Read Pinyin 1 Timotì 1 Bible Online

1 Timotì 1 - Pinyin bible

1 Timotì 1

¹Àŋwàʼnə̀ zə̀ a furə̀ ambo mɨ̀ŋə̀ Pàolò nɨ m̀bənə ngàŋə̀ ntwuumə̀ Kristù Yěsû, a nɨ zùŋə̀ ntə̌ Nẅùə̀ ngàŋə̀ nchwarə̀ ɨ̀wəənə̀ nɨ yɨ̀ Kristù Yěsû nɨ pə̀ənə̀ pa mbyabə̀ la,

²mmə ndèrə̀ ambo Timotì, ngotə moonə̀ mə̀ amwuə àzhwùə̀ nɨ ndə̀ yèmpə̀nə a nùŋə̀ ntɨŋmə̀ e aŋunə Nẅùə̀. Tǎ Nẅùə̀ nɨ Kristù Yěsû Ndòʼnə̀mbyə̂ ɨ̀wə̀ənə̀ pobə̂ ŋâ o nɨ àpòŋə̀ ntɨŋmə̀ nɨ àkoorə̀ mɨ̀liŋə̀ ghobə àporə̀porə̀.

³Tsaʼnə ndə̀ mənə ndèrə̀ a Màsèdonyà, ndə̀ puʼù mbô ambo ghò lo wə̀ ghoŋə̀ a Efesòsə̀ mbə̀ʼə zòŋə̀ pànə̀ pɨ̀tse nɨ pobə lə̀ mənə nnèrə̀ ànwùə̀ Nẅùə̀ pɨ̀chwìrə̀.

⁴Shwəŋə̀ ambo pobə lo kò pobə kɨ ndòo nkwùə̀ ɨzobə ntumə̀ mɨkerə mɨ pɨ̀chwìrə̀ ghobə nɨ̀shankə̀ mɨ̀waanə̀ mɨ̀ngẅàrə̀ nɨ ka mèrə mə ndẅùutə̀ e, ntiinə mbuurə̀ mɨ̀nwùə̀ zèrə zə̀ za ndòo àtànkə̀ ntô ntsàarə̀ a nɨ ghɨ̀rə̀ pànə̀ zhyə̂ ànwùə̀ nɨ Nẅùə̀ à tàʼnə lo pə̀ənə̀ zhyə̂ mbə̀ʼə pə̀ənə̀ pəla nnùŋə̀ ntɨŋmə̀ aŋunə Kristù.

⁵Ɨ̀sùmə nɨ ǹshwəŋə̀nə ànwùə̀ zə̀ ɨ chyə̂ la lo pə̀ənə̀ tə nkòŋə̀ mbɨ̀ŋmə̀ ɨ̀zəənə̀ nɨ ɨ̀kòŋnə̀ wa nɨ ɨ furə̀nə a ɨ̀sùmə ntɨŋmə̀ wa nɨ ɨ laanə̀nə, ntɨŋmə̀ wa nɨ ɨ wa ngɨ̀rə̀ lo pə̀ənə̀ zhyə̂ ànwùə̀ tɨ̀pòŋə̀ ghobə yè ɨ̀shìʼnə̀ nɨ àpyiimə̀ ntɨŋmə̀ za nɨ a pənə àpyiimə̀ ntɨŋmə̀ nkǔŋə nkuŋə.

⁶Pànə̀ pɨ̀tse myàʼtə̀ mə a nkǔŋə nkuŋə wə̀ ntyiʼə̀ ndzɨ̀nkə̀ ntəəmə̀ ngə̀ kwuunə̀ amwuə ɨ̀shwəŋnə̀ pɨ̀tànkə̀nə nɨ ka pə e nɨ ɨ̀sùmə.

⁷Pobə tàʼà a nɨ pə pɨ̀nèrə̀ pɨ̀mbòomə pɨ Nẅùə̀ tɨghu pobə zhyə̂ ànwùə̀ nɨ pobə pə nshwəŋə̀ kə̀ nkɨ nzhyə̂ ànwùə̀ nɨ pobə pa nnèrə̀ nɨ mɨ̀tɨ̀ŋnə̀ la.

⁸Pə̀ənə̀ zhyə̂ lo mbòomə a pòŋə̀ mbə̀ʼə ŋwùə̀ a mə nfàʼà nɨ ẅèrə amwuə àlàŋə̀ nɨ à pyə̀nə mbə fàʼà.

⁹Mbə̀ʼnə pə̀ənə̀ zhyə̂ a laanə̀ lo ka pɨ lə̀ ghɨ̀rə̀ a mbòomə la ambo pànə̀ nɨ mɨ̀nwùə̀ ɨ̀mobə təəmə̀nə. Pɨ lə̀ ghɨ̀rə̀ la ambo pànə̀ nɨ pɨ pa mbəʼə̀ a mbòomə pobə pànə̀ nɨ pɨ pa ntɨ̀ŋnə̀ àtwuə̀, pànə̀ nɨ ka pɨ pô a ghobə a Nẅùə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀, pànə̀ nɨ ka pɨ laanə̀ a ghobə nɨ pànə̀ nɨ pɨ zòomə̀ a Nẅùə̀, pànə̀ nɨ pɨ zhwuutə̀nə pɨ̀tǎ pobə pɨ̀mǎ ɨ̀pobə nɨ pànə̀ nɨ pɨ zhwuutə̀nə pɨ̀tse pə̀ənə̀.

¹⁰Mbòomə à kɨ mbə farə ambo pànə̀ nɨ pobə pa ngɨ̀rə̀ àfànə̀, mbə ambo mbyàŋnə̀ nɨ pobə pa ndyə̂ nɨ yɨ̀tse mbyàŋnə̀ kə̀ pə̀ngyə̌ nɨ pobə pa ndyə̂ nɨ pɨ̀tse pə̀ngyə̌, mbə ambo pànə̀ nɨ pobə pa ntaŋə̀ ɨ̀pùʼù nɨ ngàŋə̀ pɨ̀chwìrə̀, mbə ambo pànə̀ nɨ pobə pa ntsə̀əmə̀ lo shwəŋə̀ a nkǔŋə nkuŋə la ka shwəŋə̀ a ghobə nkɨ mbə ambo pànə̀ pa nɨ pobə pa ngɨ̀rə̀ mɨ̀nwùə̀ ma nɨ ka mbòomə a tàʼà e la,

¹¹a nɨ zùŋə̀ ntwuumə̀ ghù ɨ̀shìʼnə̀ nɨ pənə nɨ àghuʼtə̀ mbə̀ʼə Nẅùə̀ nɨ pə̀ənə̀ pa nguʼtə̀ la; a pə ntwuumə̀ wa nɨ à lə̀ ŋânə ambo mɨ̀ŋə̀ lo n̂chwìitə̀ la.

¹²Ŋ̀ŋâ a mɨyàa ambo Kristù Yěsû Ndòʼnə̀mbyə̂ ɨ̀wə̀ənə̀ nɨ à ŋânə ɨ̀tɨ̀ŋnə̀ ambo mɨ̀ŋə̀ ntiinə à lə̀ zəənə̀nə lo ǹkùʼnə̀ a nɨ fàʼà ambo ze nɨ ntɨŋmə̀ mə̀ ɨ̀tsùmə̀, a tyiʼə̀ ntsoʼò mə̀ lo n̂fàʼà àfàʼà zə̀ ambo ze.

¹³Ndə̀ mə nshwəŋnə̀ a tɨ̀pòŋə̀ mbə̀ʼə e, mmə nnyàŋə̀ pə̀ənə̀ ɨ̀pe, nkɨ mmə ndzòomə̀ e; la ka ndə̀ mə nzhyə̂ mə ànwùə̀ nɨ ndə̀ mənə ngɨ̀rə̀, nkɨ mbirə̀ mə̀ ntɨŋmə̀ aŋunə Kristù tɨ nùŋə̀.

¹⁴La Ndòʼnə̀mbyə̂ ɨ̀wə̀ənə̀ a nèrə̀ àpòŋə̀ ntɨŋmə̀ e yè noʼnə aŋunə mɨ̀ŋə̀, ngɨ̀rə̀ lo n̂nùŋə̀ ntɨŋmə̀ mə aŋunə ze nkɨ mmə nkòŋə̀ pànə̀ pɨ̀nyaanə a nɨ zùŋə̀ tsaʼnə ŋònə̀ nɨ à pənə taʼà ŋwùə̀ pobə Kristù Yěsû à chyə̂nə a nɨ pə.

¹⁵Pɨ shwəŋə̀ la nkǔŋə nkuŋə nɨ mbə̀ʼə ŋwùə̀ a pyiimə̀ nɨ ntɨŋmə̀ e ɨ̀tsùmə̀ lo: Kristù Yěsû à lə̀ tô a àtwuə̀ ɨ̀shyə̂ la a nɨ chwarə̀ ngàŋə ngɨ̀rə̀ ɨ̀nwùə̀ tɨ̀pòŋə̀, nɨ m̀bənə ŋònə̀ nɨ tɨ̀pòŋə̀ e à noʼnə ntsàarə̀ a yè ŋònə̀ ntsùmə̀.

¹⁶La Nẅùə̀ à lə̀ koorə̀ mɨ̀lɨŋə̀ ɨ̀mâ, mɨ̀ŋə̀ wa nɨ m̀bənə ŋònə̀ nɨ tɨ̀pòŋə̀ e a tsàarə̀nə a tɨ̀pòŋə̀ ŋwùə̀ ntsùmə̀, njiilo Kristù Yěsû a lòo mə̀ tsaʼa àzwuumə̀ àfàʼà e a nɨ nèrə̀ àwìimə̀ ntɨŋmə̀ e tsaʼa àlènə̀ ambo pànə̀ pa nɨ pobə pənə ghǎ nùŋə̀ ntɨŋmə̀ aŋunə ze kɨ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ lo pobə̂ zəənə̀.

¹⁷Pə̀ənə̀ ghuʼtə̀ a ɨ̀fò wa nɨ à wa mbuʼtə̀ àtwuə̀ ɨ̀shyə̂ nkwùə̀ ɨ̀tsùmə̀, mbə ẅùə̀ wa nɨ pɨ pa ka zəənə̀ e a ye, mbə e pə ndàʼà e mbə Nẅùə̀ nɨ nɨ̀linə̀ ɨ̀tse pənə nɨ àghuʼtə̀ ngoŋə̀ nɨ nkuŋə̀ nɨ nkuŋə̀ la. Amen.

¹⁸Moonə̀ mə̀ Timotì, ngwə̀ ŋŋâ o nɨ ntə̌ wə̀, ndzùŋə̀ la ànwùə̀ nɨ ngàŋə̀ ntwuumə̀ Nẅùə̀ à lə̀ shwəŋə̀nə mbə̀ʼə o. Ntə̌ wə̀ pə tsaʼa ɨ̀pwuumə̀ ntsòo a nɨ lòo ndzòŋnə̀ ntsòo ghù ɨ̀shìʼnə̀.

¹⁹Ẅìimə̀ ntɨŋmə̀ o ngoŋə̀ pɨghə Kristù nkɨ mbə nɨ ntɨŋmə̀ ghu laanə̀nə aŋunə ze. Ka pànə̀ pɨ̀tse mə ntàʼà a ghobə a nɨ zuʼù ànwùə̀ yè ɨ̀shìʼnə̀ nɨ mɨ̀ntɨŋmə̀ ɨ̀mobə mə ntiitə̀ a ghobə, lenəla, ntsə̀ŋə̀ àpyiimə̀ ntɨŋmə̀ àzobə aŋunə Kristù

²⁰Amwuə pànə̀ pə a Hymenaeus pobə Àlèzandà nɨ ŋ̀ŋânə a ghobə ambo Satàanə̀ lo à nèrə̀ a ghobə lo ka a pòŋə̀ e a nɨ zòomə̀ Nẅùə̀.