Read Pinyin 1 Timotì 2 Bible Online

1 Timotì 2 - Pinyin bible

1 Timotì 2

¹Ntsàambyə̀ ànwùə̀ nɨ ǹtàʼnə lo wə̀ zhyə̂ a chyə̂ lo nɨ̀ chyə̂ a nɨ mə nchàʼtə̀ a Nẅùə̀, mbuʼù mbô nkɨ mmə ŋŋâ a mɨyàa ambo ze àtwuə̀ nɨ ŋwùə̀ ntsùmə̀.

²Pə̀ənə̀ tə ngɨ̀rə̀ a lenə ambo pɨ̀fò, farə ambo pànə̀ pɨ̀ẅùunə, njiilo mbə̀ʼə pə̀ənə̀ tə nnwuunə̀ ɨ̀shìʼnə̀ nɨ àporə̀porə̀, mmə ngɨ̀rə̀ mɨ̀nwùə̀ nɨ Nẅùə̀ à tàʼnə, nkɨ mmə ngɨ̀rə̀ mɨ̀nwùə̀ nɨ mɨ pənə nɨ àghuʼtə̀.

³Lə̌ ànwùə̀ ɨ̀shìʼnə̀ nɨ mbə̀ʼə pə̀ənə̀ tə ngɨ̀rə̀ nɨ a pòŋə̀nə a Nẅùə̀ ngàŋə̀ nchwarə̀ ɨ̀wəənə̀,

⁴Nẅùə̀ wa nɨ à wa ntàʼà lo ŋwùə̀ ntsùmə̀ â furə̀ amwuə ngəʼə̀ nzhyə̂ nkǔŋə nkuŋə.

⁵La à chyə̂ mbə taʼà Nẅùə̀, la kɨ nchi mbə taʼà ŋwùə̀ nɨ à wa ndòo pànə̀ pɨ àtwuə̀ ɨ̀shyə̂ ntô mbwuutə̀ pobə pɨ Nẅùə̀ lo pobə pɨ pobə pə taʼà ŋwùə̀. Ŋònə̀ ghu a pə Kristù Yěsû,

⁶ẅùə̀ wa nɨ à lə̀ ŋânə mbɨ̀ŋmə̀ e pɨ zhwuutə̀ tsaʼa mômbyə̂ nɨ̀shwàʼà àtwuə̀ nɨ ŋwùə̀ ntsùmə̀. À lə̀ ghɨ̀rə̀ a lenə la amwuə ngotə nkwùə̀ mbə̀ʼə a pə tsaʼa àlènə̀ nɨ Nẅùə̀ à lə̀ tàʼnə lo fuukə̀ a ŋwùə̀ ntsùmə̀ amwuə ngəʼə̀.

⁷Lə̌ ɨ̀sùmə nɨ Kristù à lə̀ tsoʼnə mə̀ ntsàa lo n̂gə̀ mbə tsaʼa ngàŋə̀ ntwuumə̀ e, nkɨ mbə ɨ̀nèrə̀ ambo pànə̀ nɨ ka pobə pə ghobə pɨ̀Jew, lo n̂shwəŋə̀ ntwuumə̀ e wa nɨ ɨ pənə nɨ nkǔŋə nkuŋə lo pobə̂ nùŋə̀ ntɨŋmə̀ ɨ̀ghobə aŋunə ze. Ka mmə nyìi mə̀ lə chwìrə̀, nshwəŋə̀ la nkǔŋə nkuŋə.

⁸Lenəla, ǹtàʼà lo a alyiʼə àtsùmə̀ nɨ ɨ̀poonə̀ pɨ Kristù pòmpə̀nə ghu, mbyàŋnə̀ mə nchàʼtə̀ a Nẅùə̀ ŋŋaŋə̀ mbô ɨ̀mobə ma nɨ mɨ laanə̀nə a mbyə̀ Nẅùə̀ la àtɨ̀ghə. Kò pobə tə ndzaŋə̀ a loŋə kə̀ nsaʼnə̀.

⁹Nkɨ ntàʼà lo pə̀ngyə̌ ẅî ɨtsəʼə nɨ kùʼnə̀nə amwuə àlàŋə yè ɨ̀shìʼnə̀. Kò pobə tə ntsùŋə̀ a ghobə ɨ̀twuə̀ ɨ̀pobə nkànə̀ àndànə̀; kò pobə tə ngẅî a ghobə a chenə̀ nɨ pɨ tsùŋə̀nə nɨ goldə̀ kə̀ ngẅî mɨsoŋə mɨ tsə̂nə. Kò pobə tə ngẅî ɨtsəʼə pɨ̀tsə̂nə a nɨ nèrə̀ nɨ̀pòŋə̀ ɨ̀ghobə.

¹⁰La pobə mə ngɨ̀rə̀ pə mɨ̀nwùə̀ mɨ ɨ̀shìʼnə̀ nɨ mɨ kùʼnə̀nə ambo pə̀ngyə̌ nɨ pobə pa mbô a Nẅùə̀.

¹¹A kùʼnə̀ lo mə̀ngyə̌ a lanə̀ àchyə̌chyə̂ nkɨ mmə ndzuʼnə̀ amwuə ɨ̀làŋə ɨ̀tsùmə̀.

¹²Ka ŋ̀ŋâ mə̀ ɨ̀sàanə̀ ambo pə̀ngyə̌ a nɨ nèrə̀ mbyàŋnə̀ kə̀ a nɨ pə nɨ ɨ̀tɨ̀ŋnə̀ àtwuə̀ mbyàŋnə̀. Pobə nwuunə̀ tyìʼə̀ àchyə̌chyə̂.

¹³A chyə̂ lə la ntiinə Nẅùə̀ à lə̀ zàamə̀nə ntsùŋə̀ la Adàmə̀ zaʼà mbòŋə̀ ntsùŋə̀ Ifə̀.

¹⁴Ɨ̀nyoorə̀ ɨ̀ lə̀ fɨ̀kə̀ la Ifə̀, ka ɨ̀ lə̀ fɨ̀kə̀ e Adàmə̀. Ɨ̀ lə̀ fɨ̀kə̀ la Ifə̀ a wɨ̀ghə̀ ntə̌ Nẅùə̀.

¹⁵La mə̀ngyə̌ à ghǎ chwarə̀ amwuə nkwùə̀ nɨ a mənə mbyə̂ mbə̀ʼə a làŋə̀ nɨ mbyə̀ nnùŋə̀ ntɨŋmə̀ e aŋunə Nẅùə̀, mmə nkòŋə̀ pɨ̀tse pə̀ənə̀, mbə ghù ndaanə̀nə a mbyə̀ Nẅùə̀, nkɨ mmə ngɨ̀rə̀ mɨ̀nwùə̀ amwuə àlàŋə nɨ a kùʼnə̀nə.