Read Pinyin 1 Timotì 3 Bible Online

1 Timotì 3 - Pinyin bible

1 Timotì 3

¹Pɨ pa nshwəŋə̀ la nkǔŋə nkuŋə lo, ŋwùə̀ à tə mbəla ntàʼà a nɨ pə àtwuə̀ amwuə àshwatə̀ ɨ̀poonə̀ pɨ Kristù, yi ze à tàʼà la ngotə àfàʼà ɨ̀shìʼnə̀.

²Àtwuə̀ àshwatə̀ ɨ̀poonə̀ pɨ Kristù à chyə̂ a nɨ pə̀ ŋònə̀ tɨ ɨ̀fèrə; ŋònə̀ nɨ à zoʼnə e pə taʼà mə̀ngyə̌; ŋònə̀ nɨ mbə̀ʼə a zhyə̂ ẅìimə̀ mbɨ̀ŋmə̀ e; ŋònə̀ nɨ à pənə nɨ àzhìʼtə̀; ŋònə̀ nɨ pɨ pa nguʼtə̀ e; ŋònə̀ nɨ à wa nkẅiirə̀ pə̀ənə̀ a ndâ ze; ŋònə̀ nɨ mbə̀ʼə a nèrə̀ pə̀ənə̀.

³Kò a pə e ŋònə̀ nɨ à wa nnô mɨ̀lùʼù mbaarə̀ kə̀ ŋònə̀ nɨ à wa nkùmə̀ ɨlyiʼə; â pə ŋònə̀ nɨ mɨ̀nwùə̀ ɨ̀me ponə̀nə, ka à kɨ mə nkùmə̀ e ɨ̀sàʼa, ka kɨ pə e nɨ ntoŋə nkabə̀.

⁴À chyə̂ a nɨ pə ŋònə̀ nɨ a twuʼtə̀ ngẅàrə̀ ɨ̀shìʼnə̀, ngɨ̀rə̀ ɨ̀poonə̀ ɨ̀pe zuʼnə̀ e ɨ̀shìʼnə̀.

⁵Ŋwùə̀ à tə pə ẅùə̀ nɨ mbə̀ʼə ka a twuʼtə̀ e ngẅàrə̀ e, a tyiʼə̀ ntwuʼtə̀ ɨ̀poonə̀ pɨ Kristù lə ɨla?

⁶Kò a pə e ŋònə̀ nɨ à pirə̀ mə e tɨ kẅuə̀ amwuə ànwùə̀ Nẅùə̀, yi ǎ tə koʼò mbɨ̀ŋmə̀. Lenəla, Nẅùə̀ a chyâ ɨ̀sàʼa aŋunə ze tyìʼə̀ tsaʼnə à lə̀ chyânə aŋunə devə̀lə̀.

⁷Â kɨ mbə ŋònə̀ nɨ pànə̀ nɨ ka pobə pə a ghobə amwuə àshwatə̀ ɨ̀poonə̀ pɨ Kristù pa nkɨ ŋŋâ àghuʼtə̀ ambo ze, njiilo kò pɨ chyâ e ɨ̀sɨŋnə̀ àtwuə̀ ze lo â kunə̀ amwuə nkɨrə devə̀lə̀.

⁸Ngàŋə àyèmpə̀ amwuə àshwatə̀ ɨ̀poonə̀ pɨ Kristù chyə̂ a nɨ pə pànə̀ nɨ mbə̀ʼə pɨ ghuʼtə̀ a ghobə; mbə pànə̀ nɨ pobə pa nshwəŋə̀ a nkǔŋə nkuŋə; ka nô a ghobə mɨ̀lùʼù tɨsɨŋnə; nkɨ ka mmə tàʼà a ghobə nkabə̀ amwuə àlàŋə tɨ̀pòŋə̀.

⁹Pobə chyə̂ a nɨ ẅìimə̀ mɨ̀nwùə̀ ma nɨ Nẅùə̀ à nèrə̀nə a wəənə̀ wa nɨ pə̀ənə̀ nùŋə̀nə ntɨŋmə̀ aŋunə ze la, nɨ ntɨŋmə̀ ghu laanə̀nə.

¹⁰Pɨ zàamə̀ nzhwiʼì ngàŋə àyèmpə̀ zə. Pobə pəla ndzəənə̀ lo pobə kùʼnə̀, pɨ myàʼtə̀ a ghobə lo pobə fàʼà tsaʼa ngàŋə àyèmpə̀.

¹¹Pə̀ngyə̌ ɨ̀pobə chyə̂ a nɨ kɨ mbə pànə̀ nɨ mbə̀ʼə pɨ ghuʼtə̀ a ghobə ntii mbòomə ɨ̀ghobə; kò pobə pə a ghobə pànə̀ nɨ pobə pa nkwə̀əmə̀ pə̀ənə̀, pobə pə pànə̀ nɨ mbə̀ʼə pobə ẅìimə̀ mbɨ̀ŋmə̀ ɨ̀zobə, mbə nɨ nkǔŋə nkuŋə aŋunə ànwùə̀ àtsùmə̀ nɨ pobə pa ngɨ̀rə̀.

¹²Ngàŋə̀ àyèmpə̀ amwuə àshwatə̀ ɨ̀poonə̀ pɨ Kristù à chyə̂ a nɨ pə ŋònə̀ nɨ à zoʼnə e pə ndàʼà taʼà mə̀ngyə̌, nkɨ mbə ŋònə̀ nɨ à zhyə̂ a nɨ twuʼtə̀ ɨ̀poonə̀ ɨ̀pe ɨ̀shìʼnə̀ pobə pɨ ngẅàrə̀ e.

¹³Ngàŋə àyèmpə̀ za amwuə àshwatə̀ ɨ̀poonə̀ pɨ Kristù nɨ pobə fàʼnə ɨ̀shìʼnə̀ zɨghə̀ àpìi ntiinə pobə zhyə̂nə tsaʼnə mbə̀ʼə pobə təəmə̀ ntɨ̀ŋnə̀, nkɨ nzhyə̂ nkǔŋə nkuŋə lo pobə nùŋə̀ ntɨŋmə̀ ɨ̀ghobə aŋunə Kristù Yěsû nɨ nkuŋə̀.

¹⁴Ngwə̀ nkwàŋə̀ lo mbɨ pòŋə̀ tô zəənə̀ o, la ngwə̀ ŋŋwàʼnə̀ a nɨ tiitə̀ o nɨ mɨ̀nwùə̀ mə njiilo,

¹⁵ànwùə̀ àtse a tə mbəla ngẅìimə̀ mə̀ lo kò ntô, yi zèrə a pɨ yèmpə̀ o a nɨ zhyə̂ tsaʼnə mbə̀ʼə pànə̀ ghɨ̀rə̀ amwuə ndâ Nẅùə̀, nɨ ɨ̀ pənə àshwatə̀ ɨ̀poonə̀ pɨ Nẅùə̀ ghù ntɨ̀ŋnə̀, mbə ntoomə̀, nkɨ mbə àtsirə̀ ndâ nɨ a ẅìimə̀nə a nkǔŋə nkuŋə ntsùmə̀.

¹⁶Ka ŋwùə̀ à pə̀ e ghu nɨ mbə̀ʼə a làʼnə̀ lo Nẅùə̀ à nèrə̀ a wəənə̀ nɨ mɨ̀nwùə̀ mɨ̀noʼnə amwuə àshwatə̀ àzəənə̀ tsaʼa pànə̀ nɨ pobə pa nchàʼtə̀ a Nẅùə̀. À lə̀ tô tsaʼa ŋwùə̀ mɨsoŋə, Àzhwùə̀ a nèrə̀ e tsaʼa ŋònə̀ nɨ mɨ̀nwùə̀ ɨ̀me təəmə̀nə, pəngèrə̀ zəənə̀ e. Pànə̀ lə̀ chwìitə̀ ntwuumə̀ mbə̀ʼə e ambo ɨ̀laʼà ɨ̀tsùmə̀, pànə̀ lə̀ nùŋə̀ ntɨŋmə̀ aŋunə ze amwuə àtwuə̀ ɨ̀shyə̂ àtsùmə̀, Nẅùə̀ a tyiʼə̀ ndòo e nkoʼò ndèrə̀ a nɨ̀pwuurə̀.