Read Pinyin 1 Timotì 5 Bible Online

1 Timotì 5 - Pinyin bible

1 Timotì 5

¹Kò wə̀ tə nsaʼà o a ndɨ̀ŋmə̂, təətə̀ e pə tsaʼa ghò wə̀ nshwəŋə̀ ambo tǎ ɨwɨghə. Lòo ɨ̀pôngwàswùumə̀ pə tsaʼa pɨlyimə ɨ̀pô

²Nkɨ ndòo pɨ̀lɨ̀ŋmə̂ pɨ pə̀ngyə̌ tsaʼa pɨ̀mǎ ɨ̀pô, nɨ ngwàngòonə̀ tsaʼa pɨlyimə ɨ̀pô tɨ àkwàŋə̀ tɨ̀pòŋə̀ àtse a ntɨŋmə̀ ghò

³Mə nnaŋə̀ pɨ̀kwùə pə̀ngyə̌, ntsùŋə̀ nnaŋə̀ a pyə̀ nɨ ka pobə pə ghobə nɨ pànə̀ nɨ pɨ pa ngyèmpə̀ a ghobə.

⁴La nkwùə mə̀ngyə̌ à tə mbə nɨ ɨ̀poonə̀ kə̀ nɨ ɨ̀poonə̀ pɨ ɨ̀poonə̀ ɨ̀pe, yi ntsàambyə̀ ànwùə̀ nɨ mbə̀ʼə pobə ghɨ̀rə̀ tsaʼa ɨ̀poonə̀ pɨ Kristù ɨ̀ chyə̂ a nɨ ŋâ àyèmpə̀ ambo pɨ̀tǎ pobə pɨ̀mǎ ɨ̀pobə nɨ pɨ̀tǎ pɨ̀tǎ pobə pɨ̀mǎ pɨ̀mǎ ɨ̀pobə ntiinə la ànwùə̀ nɨ Nẅùə̀ à tàʼnə lo pànə̀ tə ngɨ̀rə̀.

⁵Ngotə nkwùə mə̀ngyə̌ nɨ mbə̀ʼə pɨ yèmpə̀ e a chyə̂ mbə ẅùə̀ nɨ pɨ myàʼtə̀nə e ze nɨ ze, a tyiʼə̀ mmə nchàʼtə̀ a Nẅùə̀ nɨ ɨ̀twuʼə̀ pobə njyə̂ mbyabə̀ a Nẅùə̀ lo a yèmpə̀ e

⁶La ngə̀ aŋunə nkwùə mə̀ngyə̌ nɨ a wa ŋâ mbɨ̀ŋmə̀ e a nɨ zɨghə̀ mbyə̂, a kwɨghə̀ mə mbaa pə tsaʼnə a wə̀ mbirə̀ nchyə̂ la.

⁷Ŋâ ntə̌ wə̀ ambo pobə, mbə̀ʼə pobə kaŋə pə nɨ ànwùə̀ nɨ mbə̀ʼə pɨ fèrə̀ a ghobə aŋunə.

⁸Ŋònə̀ ɨ̀tse à tɨ ka mə naŋə̀ e ngẅàrə̀ ɨzobə, nkɨ tô ngotə ngẅàrə̀ e, yi à waʼà mə a Kristù ntyiʼə̀ mbɨ̂ ntsàarə̀ a ŋònə̀ nɨ ka a pyə̀ mbyiimə̀ e a Nẅùə̀.

⁹Kò pɨ ŋwàʼnə̀ e nɨ̀linə̀ nɨ nkwùə mə̀ngyə̌ ɨ̀tse amwuə àŋwàʼnə̀ pɨ̀kwùə nɨ à pirə̀ mə tɨ pyàa nguʼu mɨ̀ghumə̀ ntuurə̀ kə̀ ndàŋə̀, a kɨ mbə mə̀ngyə̌ nɨ a lə̀ zoʼnə pə taʼà ŋònə̀ mbyàŋnə̀

¹⁰Â kɨ mbə ŋònə̀ nɨ pànə̀ zhyə̂nə e ntii mɨ̀nwùə̀ mɨ̀shìʼnə̀ nɨ à wa ngɨ̀rə̀. Mɨ̀nwùə̀ mɨ̀shìʼnə̀ tsaʼa nɨ̀ghɨ̀rə̀ ɨ̀poonə̀ kẅuə̀ amwuə mbòomə ɨ̀shìʼnə̀, nɨ̀kẅiirə̀ ngàŋə nɨ̀ghaanə̀, nɨ̀sùu mɨ̀kwùə̀ mɨ pànə̀ pɨ Nẅùə̀, nɨ̀yèmpə̀ pànə̀ nɨ pɨ pənə amwuə ngəʼə̀ farə a nɨ ŋâ mbɨ̀ŋmə̀ e a nɨ ghɨ̀rə̀ mɨ̀nwùə̀ mɨ̀shìʼnə̀ amwuə ɨ̀làŋə ɨ̀tsùmə̀.

¹¹Kò wə̀ ŋwàʼnə̀ o nɨ̀linə̀ nɨ nkwùə nɨ à pirə̀nə môngwàngòonə̀ amwuə àŋwàʼnə̀ pɨ̀kwùə ntiinə nkwùə̀ nɨ mbɨ̀ŋmə̀ e ɨ̀ pɨ nyə̀grə̀ e, ɨ̀ pɨ ghɨ̀rə̀ lo â tàʼà lo zoʼò, myàʼtə̀ a nɨ fàʼà ambo Kristù.

¹²Lenəla pobə pìʼì la ndòonə̀ ɨ̀ghobə ambo Kristù ntiinə pobə pəʼə̀ mə a ntsàambyə̀ ɨ̀kàanə̀ nɨ pobə lə̀ wàrə̀nə pobə pɨ pobə.

¹³Ka a pə e ndàʼà zèrə za, pobə kɨ mmə ndanə̀ a nɨ nwuunə̀ tɨ mə nfàʼà àzwuumə̀ àtse, mmə nkwuunə̀ amwuə mɨ̀ndâ nfurə̀ nkwuunə̀ a myə̀, ndanə̀ farə a nɨ nyìi a chwìrə̀, mmə nkwuunə̀ amwuə mɨ̀nwùə̀ mɨ pə̀ənə̀ nkɨ mmə shwəŋə̀ mɨ̀nwùə̀ nɨ ka pobə tə mbə nshwəŋə̀ a ghobə.

¹⁴Tsaʼnə a pənə lə la, ngwə̀ nshwəŋə̀ ambo pɨ̀kwùə nɨ pɨ pirə̀nə ngwàngòonə̀ la lo pobə̂ zoʼò mbyə̀ ɨ̀poonə̀, nkɨ mmə ntwuʼtə̀ mɨ̀ndâ ɨ̀mobə ɨ̀shìʼnə̀ mbə̀ʼə pobə kaŋə ŋâ ɨ̀sàanə̀ ambo ngàŋə kɨpaanə ɨ̀wəənə̀ a tə ndzòomə̀ a wəənə̀.

¹⁵Mbə̀ʼnə pɨ̀tse pɨ̀kwùə pə̀ŋə̀ mə ndzùŋə̀ a Satàanə̀.

¹⁶Tɨ̀tsòŋə̀ wə̀, mə̀ngyə̌ à tə mbə ghu nɨ à pyiimə̀nə a Kristù, mbə nɨ pɨ̀kwùə amwuə ngẅàrə̀ e, a pòŋə̀ lo a mə ngyèmpə̀ a ghobə mbə̀ʼə a ŋâ àpìʼì yè noʼnə ambo àshwatə̀ ɨ̀poonə̀ pɨ Kristù. Â myàʼtə̀ àshwatə̀ ɨ̀poonə̀ pɨ Kristù â yèmpə̀ pɨ̀kwùə pa nɨ pobə pənə ngotə pɨ̀kwùə la.

¹⁷A pòŋə̀ lo pɨ tɨ nguʼtə̀ pɨ̀lɨ̀ŋmə̂ nɨ pobə pənə amwuə àshwatə̀ ɨ̀poonə̀ pɨ Kristù nfàʼà ɨ̀shìʼnə̀, nkɨ mmə ntsoʼò àfàʼà àzobə ɨ̀shìʼnə̀, nkɨ tô pyə̀ pa nɨ pɨ pa nfàʼà nɨ ntɨŋmə̀ ɨ̀ghobə ɨ̀tsùmə̀ a nɨ chwìitə̀ ntwuumə̀ Nẅùə̀ nkɨ mə nèrə̀ a àshwəŋnə̀ Nẅùə̀.

¹⁸Mbə̀ʼnə àŋwàʼnə̀ Nẅùə̀ a shwəŋə̀nə lo, “Kò wə̀ korə̀ o ntswùə̀ ɨ̀fòŋə̀ nkwùə̀ nɨ ɨ̀ mənə nnẅùʼə̀ nkẅùə̀” nkɨ nchi nshwəŋə̀ lo, “Ngàŋə̀ àfàʼà a chyə̂ a nɨ kẅiirə̀ nkabə̀ àfàʼà e.”

¹⁹Kò wə̀ pyiimə̀ o ànwùə̀ nɨ pɨ shwəŋə̀nə aŋunə ndɨ̀ŋmə̂ amwuə àshwatə̀ ɨ̀poonə̀ pɨ Kristù tɨghu pɨ̀ndzəənə̀ zəənə̀nə pɨpaa kə̀ pɨtarə pyiimə̀ ànwùə̀ ghu.

²⁰Ngə̀ aŋunə pànə̀ pa nɨ pobə pa ngɨ̀rə̀ a tɨ̀pòŋə̀ la, saʼà a ghobə a mbyə̀ pə̀ənə̀ mbə̀ʼə àpwùʼə̀ pə̀ənə̀ a zəənə̀ mbə nɨ àkẅàrə̀.

²¹A mbyə̀ Nẅùə̀ pobə Kristù Yěsû nɨ pəngèrə̀ nɨ pɨ tsoʼnə, ngwə̀ shwəŋə̀ ambo ghò nkwàtə̀ lo wə̀ nùŋə̀ mɨ̀ntə̌ mə, mmə nnaŋə̀ mɨ̀nwùə̀ amwuə àlàŋə nɨ a təəmə̀nə. Kò wə̀ ghɨ̀rə̀ o ànwùə̀ mbô ɨ̀myə̂ mɨ ŋwùə̀.

²²Kò wə̀ fàʼà ntsaʼnə a nɨ nùŋə̀ mbô nchàʼtə̀ a Nẅùə̀ àtwuə̀ ŋònə̀ nɨ à pirə̀nə mmə nkwuunə̀ amwuə àfàʼà Ndòʼnə̀mbyə̂. Tsoʼò àpô o amwuə tɨ̀pòŋə̀ pànə̀ pɨ̀nyaanə nnùŋə̀ mbɨ̀ŋmə̀ o ɨ̂ laanə̀.

²³Kò wə̀ kɨ nnô o pə ndàʼà nchyə, nyaʼa nnô a mɨlyiʼə mɨ̀lùʼù mbə̀ʼə nɨ̀pùmə̀ ɨ̀tsô tsa nɨ tsèrə tsa nnoʼò ŋŋâ o nɨ ngəʼə̀, wə̀ kɨ mmə ngòntə̀ nkwùə̀ ɨ̀tsùmə̀ la.

²⁴Tɨ̀pòŋə̀ pànə̀ pɨ̀tse à wa nfaʼa nfurə̀ a sàŋə̀ pɨ zəənə̀, ntyiʼə̀ mbə pə tsaʼa Nẅùə̀ à chyâ mə ɨ̀sàʼa aŋunə pobə. La pɨ ghǎ tyiʼə̀ zəənə̀ a tɨ̀pòŋə̀ pànə̀ pɨ̀tse amwuə mɨ̀nkwùə̀ mɨ̀tse.

²⁵A kɨ mbə tyìʼə̀ ndəŋə ndəŋə lo mɨ̀nwùə̀ mɨ̀shìʼnə̀ ma fàʼà furə̀ a sàŋə̀ pɨ zəənə̀. Mɨ tɨ ka furə̀ e pə a sàŋə̀, àlàŋə a pə e ghu nɨ mbə̀ʼə pɨ lə̀əmə̀ a mèrə mɨ̀tsùmə̀ apə̀.