Read Pinyin 1 Timotì 6 Bible Online

1 Timotì 6 - Pinyin bible

1 Timotì 6

¹A pòŋə̀ lo ɨ̀pùʼù ɨ̀tsùmə̀ zhyə̂ lo a kùʼnə̀ ambo pobə a nɨ ghuʼtə̀ pɨ̀masàa ɨ̀pobə aŋunə ànwùə̀ àtsùmə̀ mbə̀ʼə ŋònə̀ ɨ̀tse a kaŋə tsə̀ŋə̀ nɨ̀linə̀ nɨ Nẅùə̀ kə̀ ànwùə̀ za nɨ pə̀ənə̀ nèrə̀nə la.

²Kò ɨ̀pùʼù tɨ ngwaʼà a ghobə pɨ̀masàa ɨ̀pobə pa nɨ pɨ nùŋə̀nə ntɨŋmə̀ ɨ̀ghobə aŋunə Kristù ntiinə pobə pɨ pobə tyiʼnə pɨlyimə. Pobə fàʼà àfàʼà àzobə pə amwuə àlàŋə̀ nɨ ǎ chi pòŋə̀ ntsàarə̀ ntiinə pobə fàʼà la ambo pànə̀ nɨ pɨ nùŋə̀nə ntɨŋmə̀ aŋunə Nẅùə̀ nkɨ mbə pànə̀ nɨ pobə kòŋə̀nə. Lə̌ mɨ̀nwùə̀ nɨ wə̀ chyə̂nə a nɨ chwìitə̀ nkɨ nèrə̀ a ghobə.

³Ŋònə̀ ɨ̀tse a tɨ mə nèrə̀ mɨ̀nwùə̀ nɨ ka mɨ pə e tsaʼa àshwəŋnə̀ nkǔŋə nkuŋə za nɨ a pənə yi Ndòʼnə̀mbyə̂ Yěsû Kristù, kə̀ mɨ̀nwùə̀ nɨ ka mɨ pwùumə̀ e aŋunə àtəətə̀ mbə̀ʼə a nɨ pô a Nẅùə̀ la,

⁴Ŋònə̀ ẅèrə wə̀ à lẅenə̀ nɨ àkoʼò mbɨ̀ŋmə̀, ka kɨ zhyə̂ e ànwùə̀ àtse. Àkoʼò mbɨ̀ŋmə̀ zə̀ a zə̀ aŋunə ze la tsaʼa nɨ̀ghòonə̀, a kòŋə̀ a nɨ tànkə̀ nkɨ nsaʼnə̀ pobə pə̀ənə̀ aŋunə ɨ̀shwəŋnə̀. Zèrə zə̀ a tyiʼə̀ ntô nɨ àghə̀ʼnə̀ pobə nɨ̀ghàbə̀ ngɨ̀rə̀ pànə̀ zòomə̀ pànə̀ pɨ Nẅùə̀ nkɨ mbə nɨ ɨ̀kwàŋə̀ tɨ̀pòŋə̀ aŋunə pə̀ənə̀,

⁵nkɨ mbə tyìʼə̀ a nɨ tànkə̀ nkɨ nsaʼnə̀ pobə pɨ pànə̀ nɨ pɨ pə̀ŋə̀nə mɨ̀nwùə̀, ka nkǔŋə nkuŋə a pə e amwuə pobə. Pobə kɨ mmə kwàŋə̀ lo ànwùə̀ Nẅùə̀ a àlàŋə a nɨ fùʼù nkabə̀.

⁶La ànwùə̀ Nẅùə̀ a za ntô nɨ àpìi yè noʼnə mbə̀ʼə pə̀ənə̀ zwurə̀ àzwuumə̀ nɨ pə̀ənə̀ pənə nɨ zèrə.

⁷Mbə̀ʼnə ka pə̀ənə̀ lə̀ tô a wəənə̀ nɨ àzwuumə̀ àtse àtwuə̀ ɨ̀shyə̂ ghə̀, mbə ghǎ kɨ lòo a wəənə̀ a yètse lèrə̀ nɨ zèrə apə̀.

⁸Njiilo pə̀ənə̀ tə mbə nɨ mɨ̀zɨghə̀ ghobə ɨtsəʼə pɨ ẅînə, pə̀ənə̀ zwurə̀ a pèrə.

⁹Pànə̀ pa nɨ pobə pa ntàʼà lo pə nɨ nkabə̀ yɨ̀noʼnə la pa nkunə̀ amwuə ɨ̀kwàʼnə̀ ghobə ɨ̀zə̀ʼə̀ nɨ pa ndòo ɨ̀kɨ̀ghə̀ ɨ̀kwàŋə̀ ntô nɨ pèrə nɨ̌ chyâ a ghobə amwuə ngəʼə̀ tsə̀ŋə̀ a ghobə, lòo a nɨ̀wɨghə̀ tô.

¹⁰Ntoŋə nkabə̀ a àlàŋə nɨ tɨ̀pòŋə̀ ntsùmə̀ à wa nfurə̀ aŋunə. Ntoŋə nkabə̀ zèrə zə̀ ɨ̀ ghɨ̀rə̀ mə pànə̀ pɨ̀tse waʼà a Yěsû, nchyâ ɨ̀lǎ amwuə mɨ̀ntɨŋmə̀ ɨ̀mobə.

¹¹La ngə̀ aŋunə ghò ngàŋə̀ àfàʼà Nẅùə̀, mə nkɨ̀ɨrə̀ mɨ̀nwùə̀ mə mɨ̀tsùmə̀ ntə̂ àtwuə̀ o aŋunə mɨ̀nwùə̀ mɨ təəmə̀nə nɨ nɨ̀pô Nẅùə̀ nɨ àpyiimə̀ ntɨŋmə̀ ghobə ɨ̀kòŋnə̀, nɨ̀ẅìimə̀ ntɨŋmə̀ ghobə nɨ̀potə̀ mbɨ̀ŋmə̀.

¹²Zòŋnə̀ ngotə mɨ̀làʼà ndzɨghə̀ tsaʼa ŋònə̀ nɨ a nùŋə̀nə ntɨŋmə̀ e aŋunə Nẅùə̀, mbə̀ʼə pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. Nẅùə̀ à lə̀ fuŋə̀ o mbə̀ʼə nɨ̀chyə̂mbyə̂ ẅèrə wə̀ nkwùə̀ wa nɨ wə̀ lə̀ shwəŋə̀nə lo, wə̀ nùŋə̀ ntɨŋmə̀ o aŋunə Kristù a mbyə̀ pɨ̀ndzəənə̀ zəənə̀nə pɨ̀noʼnə.

¹³A mbyə̀ Nẅùə̀ nɨ à wa ŋŋâ a nɨ̀chyə̂mbyə̂ ambo àzwuumə̀ àtsùmə̀, nɨ Kristù Yěsû nɨ à lə̀ shwəŋə̀nə a nkǔŋə nkuŋə nɨ à pənə a ntɨŋmə̀ ze a mbyə̀ Pontyòsə̀ Palètə̀.

¹⁴Nshwəŋə̀ ambo ghò lo wə̀ nùŋə̀ mɨ̀ntə̌ mɨ Nẅùə̀ mə tyìʼə̀ tɨ wɨ̀ghə̀ a ghùtse amwuə ndwuumə̀ nɨ mbə̀ʼə ŋwùə̀ a fèrə̀ e a ghò apə̀ tə mbyàa nkwùə̀ nɨ Ndòʼnə̀mbyə̂ ɨ̀wə̀ənə̀ Yěsû Kristù à ghǎ tô.

¹⁵Nɨ̀tô e a ghǎ pə la tsaʼnə Nẅùə̀ à lə̀ nùŋə̀nə, Nẅùə̀ wa nɨ pə̀ənə̀ pa nguʼtə̀ la, mbə ndàʼà Mbuʼtə̀ mbyə̂, mbə Ɨ̀fò àtwuə̀ pɨ̀fò pɨ̀tsùmə̀ nkɨ mbə Ndòʼnə̀mbyə̂ àtwuə̀ pɨ̀ndòʼnə̀mbyə̂ pɨ̀tsùmə̀.

¹⁶A ze wa à wa ka kwɨghə̀ e, mmə nchyə̂ amwuə nkàʼà nɨ mbə̀ʼə ka ŋwùə̀ a paatə̀ e, mbə ze wa nɨ ŋwùə̀ à lə̀ zəənə̀ mə e apə̀ mbə ghǎ kɨ zəənə̀ e apə̀. Àghuʼtə̀ ghobə ɨ̀tɨ̀ŋnə̀ pə ambo ze.

¹⁷Shwəŋə̀ ambo ngàŋə nkabə̀ nɨ pənə àtwuə̀ ɨ̀shyə̂ ghə̀ lo kò pobə tɨ nèrə̀ mbɨ̀ŋmə̀, kò pobə tɨ nùŋə̀ ntɨŋmə̀ aŋunə nkabə̀ nɨ làŋə̀nə e làŋə̀nə. Pobə nùŋə̀ ntɨŋmə̀ ghobə pə aŋunə Nẅùə̀ nɨ à wa ŋŋâ a wəənə̀ nɨ àzwuumə̀ àtsùmə̀ tə yìʼtə̀ a yètse lo pə̀ənə̀ tɨ ndzɨghə̀ ntèrə̀.

¹⁸Shwəŋə̀ ambo pobə lo pobə tɨ ngɨ̀rə̀ mɨ̀nwùə̀ mɨ̀shìʼnə̀, mbə nɨ ntɨŋmə̀ a nɨ ŋâ ambo pɨ̀tse pə̀ənə̀, kò pobə tɨ ngẅìimə̀ a ghobə àpô.

¹⁹Nɨ̀ ndwuumə̀ wə̀, pobə pə nnùŋə̀ àzwuumə̀ yè tsə̂nə nɨ a pənə àtsirə̀ ndâ àzobə yɨ̀ ɨ̀shìʼnə̀ nɨ pobə poomə̀nə amwuə nkwùə̀ za nɨ ɨ ghǎ tô, lenəla, nzhyə̂ ẅìimə̀ a nɨ̀chyə̂mbyə̂ wa nɨ à pənə nɨ̀chyə̂mbyə̂ nkǔŋə nkuŋə la.

²⁰Timotì, tsùŋə̀ nùŋə̀ ànwùə̀ za nɨ pɨ lə̀ ŋânə ambo ghò la. Kɨ̀ɨrə̀ ɨ̀shwəŋnə̀ pa nɨ pànə̀ nɨ pobə pa ka pô a ghobə a Nẅùə̀ pa nshwəŋnə̀ ntwuunə̀ a ghobə a Nẅùə̀, nfɨ̀kə̀ nshwəŋə̀ lo a àshwəŋnə̀ àzhìʼtə̀.

²¹Ntiinə pànə̀ pɨ̀tse lòo mə lo pobə pə nɨ àzhìʼtə̀ ghu, lenəla pobə fàntə̀ mə àlàŋə̀ àpyiimə̀ ntɨŋmə̀ àzobə. Àpòŋə̀ ntɨŋmə̀ Nẅùə̀ â pə aŋunə pɨghə.