Read Pinyin 2 Timotì 1 Bible Online

2 Timotì 1 - Pinyin bible

2 Timotì 1

¹A mɨ̀ŋə̀ Pàolò, nɨ Nẅùə̀ à lə̀ ghɨ̀rə̀nə lo m̂bə ngàŋə̀ ntwuumə̀ Kristù Yěsû amwuə ndwuumə̀ nɨ à lə̀ kòŋə̀nə. À lə̀ tsàa mə̀ lo ntiitə̀ pə̀ənə̀ mbə̀ʼə nkàʼnə nɨ̀chyə̂mbyə̂ ambo pànə̀ nɨ pobə pwuutə̀nə mbə taʼà ŋwùə̀ pobə pɨ Kristù.

²Ŋ̀ŋwàʼnə̀ àŋwàʼnə̀ zə̀ lə ambo Timotì nɨ à pənə moonə̀ mə̀ nɨ ǹkòŋə̀nə a ẅèrə. Tǎ ɨ̀wə̀ənə̀ Nẅùə̀ pobə Ndòʼnə̀mbyə̂ ɨ̀wə̀ənə̀ Kristù nèrə̀ o nɨ àpòŋə̀ ntɨŋmə̀ pobə àkoorə̀ mɨ̀lɨŋə̀ nɨ àporə̀porə̀ àzobə.

³Ngwə̀ ŋŋâ a mɨyàa ambo Nẅùə̀ nɨ ntɨŋmə̀ ghu laanə̀nə tsaʼnə pɨ̀tǎ pɨ̀tǎ ɨ̀pâ lə̀ fàʼnə. Ngwa nkẅempə̀ o amwuə àchàʼtə̀ Nẅùə̀ nkwùə̀ ɨ̀tsùmə̀ nɨ ɨ̀twuʼə̀ pobə njyə̂, ŋŋâ a mɨyàa ambo Nẅùə̀.

⁴Nkwùə̀ nɨ ǹkẅempə̀nə nchyə ɨ̀myə̂ o, ntyiʼə̀ ntàʼà amwuə ɨ̀twuʼə̀ pobə njyə̂ a nɨ zəənə̀ o njiilo ntɨŋmə̀ mə̀ lẅenə̀ nɨ nɨ̀ghaʼà.

⁵Nkẅempə̀ tsaʼnə wə̀ nùŋə̀nə ntɨŋmə̀ o ɨ̀tsùmə̀ aŋunə Kristù, nɨ à pənə mbuurə̀ ntɨŋmə̀ za nɨ mǎ o ghu ndɨ̀ŋmə̂ Lois pobə mǎ o Eunice lə̀ nùŋə̀nə ntɨŋmə̀ aŋunə Kristù. Ǹzhyə̂ lo wə̀ kɨ nnùŋə̀ ntɨŋmə̀ tyìʼə̀ tsaʼa pobə.

⁶Lenəla, ǹtàʼà kẅempə̀ o lo wə̀ lèrə̀ nɨ mbyə̀ nɨ àfàʼà nɨ Nẅùə̀ à lə̀ ŋânə ambo ghò nkwùə̀ nɨ ndə̀ nùŋə̀nə mbô ɨ̀mâ àtwuə̀ ghò nchàʼtə̀ a Nẅùə̀.

⁷Mbə̀ʼnə ka Àzhwùə̀ nɨ Nẅùə̀ a ŋânə ambo pə̀ənə̀ a pə e la a nɨ ghɨ̀rə̀ lo pə̀ənə̀ tɨ mbô àkẅàrə̀; a chyə̂ pə a nɨ ŋâ a wəənə̀ nɨ mɨ̀tɨ̀ŋnə̀ lo pə̀ənə̀ kòŋə̀ pə̀ənə̀ nkɨ nzhyə̂ a nɨ ẅìimə̀ mbɨ̀ŋmə̀ ɨ̀zəənə̀.

⁸Lenəla, kò wə̀ pə o nɨ àkẅàrə̀ a nɨ shwəŋə̀ mbə̀ʼə Ndòʼnə̀mbyə̂ ɨ̀wə̀ənə̀, kə̀ mbə̀ʼə mə̀ nɨ ngwə̀ amwuə ɨ̀tsaŋə̀ ntii Kristù. La wə̀ kɨ ntaŋnə̀ àzô a nɨ zəənə̀ ngəʼə̀ mbə̀ʼə ntwuumə̀ ghù ɨ̀shìʼnə̀, tsaʼnə ǎ mə ŋâ o nɨ mɨ̀tɨ̀ŋnə̀ a nɨ zəənə̀ ngəʼə̀ ghu.

⁹À lə̀ chwarə̀ a wəənə̀ amwuə ngəʼə̀, nfuŋə̀ a wəənə̀ lo pə̀ənə̀ pə pànə̀ pɨ laanə̀nə. Ka à lə̀ ghɨ̀rə̀ e lə pə ntiinə pə̀ənə̀ lə̀ ghɨ̀rə̀nə ànwùə̀ ɨ̀shìʼnə̀ àtse, la à lə̀ ghɨ̀rə̀ a lenə pə ntii àkwàŋə̀ e pobə àpòŋə̀ ntɨŋmə̀ e nɨ à lə̀ nèrə̀nə a wəənə̀ ndàŋə̀ a ndzùmə̀ Kristù Yěsû zaʼà àtwuə̀ ɨ̀shyə̂ â pòŋə̀ pìʼnə̀.

¹⁰Tɨ̀tsòŋə̀, à ghɨ̀rə̀ pə̀ənə̀ zəənə̀ àpòŋə̀ ntɨŋmə̀ e tsaʼnə ngàŋə̀ nchwarə̀ ɨ̀wəənə̀ Kristù Yěsû à tônə. Kristù à tô ntsə̀ŋə̀ mɨ̀tɨ̀ŋnə̀ mɨ nɨ̀wɨghə̀, nkɨ nnèrə̀ a wəənə̀ amwuə ntwuumə̀ ghù ɨ̀shìʼnə̀ lo pə̀ənə̀ pə nɨ nɨ̀chyə̂mbyə̂ nɨ ka pə̀ənə̀ pə ghǎ chi kwɨghə̀ a wəənə̀.

¹¹Nẅùə̀ à tsoʼò mə̀ lo mbə ngàŋə̀ nchwìitə̀ ntwuumə̀ e, mbə ngàŋə̀ ntwuumə̀ Kristù, nkɨ mbə ɨ̀nèrə̀ a nɨ tɨ nchwìitə̀ ntwuumə̀ ghù ɨ̀shìʼnə̀ wə̀.

¹²La ɨ̀sùmə nɨ ngwə̀ ndzəənə̀ ngəʼə̀ zə̀ nɨ ngwə̀ ndzəənə̀ a zèrə lə, la ka mbə mə̀ nɨ ɨ̀sɨŋnə̀, ntiinə ǹzhyə̂nə a ŋònə̀ nɨ ǹnùŋə̀nə ntɨŋmə̀ aŋunə ze. Nkɨ nzhyə̂ tyìʼə̀ nkǔŋə nkuŋə lo ǎ tsùŋə̀ pyabə̀ àzwuumə̀ nɨ à ŋânə ambo mɨ̀ŋə̀ tə pyàa a ndẅùutə njyə̂.

¹³Nùŋə̀ ànwùə̀ za ɨ̀shìʼnə̀ nɨ wə̀ lə̀ zuʼnə ambo mɨ̀ŋə̀ la. Àshwəŋnə̀ ghu a chyə̂ mbə la tsaʼa àlènə̀ aŋunə nkǔŋə nkuŋə àshwəŋnə̀ nɨ wə̀ gerə̀nə a nɨ zùŋə̀ tsaʼa ŋònə̀ nɨ à nùŋə̀nə ntɨŋmə̀ e aŋunə Kristù, nkɨ mmə nkòŋə̀ pànə̀ pɨ̀nyaanə tsaʼa ŋònə̀ nɨ à chyə̂nə mbə taʼà ŋwùə̀ pobə Kristù Yěsû.

¹⁴Lòo mɨ̀tɨ̀ŋnə̀ mɨ Àzhwùə̀ Nẅùə̀ nɨ mɨ ma nchyə̂ amwuə pə̀ənə̀ ndòo mbyamnə̀ àzwuumə̀ ɨ̀shìʼnə̀ za nɨ Nẅùə̀ à ŋânə ambo ghò la.

¹⁵Wə̀ zhyə̂ lo ŋwùə̀ ntsùmə̀ amwuə Asia à kɨ̀ɨrə̀ mə̀, mbaa pə Fìjelùsə̀ pobə Hermogenes kɨ nkɨ̀ɨrə̀ mə̀.

¹⁶Ndòʼnə̀mbyə̂ â nèrə̀ àkoorə̀ mɨ̀lɨŋə̀ e ambo ngẅàrə̀ Ònesiforùsə̀ ntiinə à lə̀ yèmpə̀nə mə̀ nkwùə̀ noʼnə. Ka à lə̀ pə e nɨ ɨ̀sɨŋnə̀ lo ngwə̀ a ndâ ɨ̀tsaŋə̀,

¹⁷la nkwùə̀ nɨ à lə̀ tônə a Romə̀, à lə̀ tàʼà mə̀ tɨ ndzəənə̀.

¹⁸Ndòʼnə̀mbyə̂ â nèrə̀ àkoorə̀ mɨ̀lɨŋə̀ e ambo Ònesiforùsə̀ aŋunə njyə̂ za nɨ Ndòʼnə̀mbyə̂ ǎ ghǎ tô la. Nɨ̀ tsùŋə̀ nzhyə̂ àfàʼà za àtsùmə̀ nɨ à lə̀ fàʼnə a Efesòsə̀ la.