Read Pinyin 2 Timotì 4 Bible Online

2 Timotì 4 - Pinyin bible

2 Timotì 4

¹Ngwə̀ ntəəmə̀ a mbyə̀ Nẅùə̀ pobə Kristù Yěsû, ẅùə̀ wa nɨ à ghǎ tô saʼà mɨ̀sàʼa mɨ pànə̀ pa nɨ pobə pə̀ nchyə̂ farə pyə̀ nɨ pobə kwɨghə̀ mə. Ngwə̀ ntəəmə̀ a nɨ shwəŋə̀ ambo ghò ntiinə Kristù à wə̀ ntô a nɨ puʼtə̀ tsaʼa ɨ̀fò. Àshwəŋnə̀ mə̀ a chyə̂ la lo:

²Chwìitə̀ ntwuumə̀ Nẅùə̀ nkwùə̀ ɨ̀tsùmə̀ amwuə nkwùə̀ nɨ pànə̀ kòŋə̀nə kə̀ ka kòŋə̀ a ghobə, ngɨ̀rə̀ lo pobə pyiimə̀ a ẅèrə, nsaʼà a ghobə nkɨ ntəətə̀ a ghobə nɨ ẅèrə. Kò wə̀ kaanə̀ o a nɨ ẅìimə̀ ntɨŋmə̀ tsaʼnə wə̀ mənə nnèrə̀ mɨ̀nwùə̀ mə̀.

³Nkwùə̀ ɨ zə̀ ntô nɨ ka pànə̀ pə ghǎ kòŋə̀ a ghobə a nɨ zuʼù nkǔŋə nkuŋə nɨ pɨ pə nnèrə̀. Pobə ghǎ kòŋə̀ a ghobə pə a nɨ zuʼù a zhyə̀ nɨ a pòŋə̀nə a ghobə. Pobə ghǎ tyiʼə̀ nfuŋə̀ mbuurə̀ ɨ̀nèrə̀ mɨ̀nwùə̀ ntsùmə̀ lo pobə tô nnèrə̀ a ghobə nɨ mɨ̀nwùə̀ nɨ mɨtugrə ɨ̀mobə mə nkòŋə̀ a nɨ zuʼù.

⁴Ka pobə pə ghǎ kòŋə̀ a ghobə a nɨ zuʼù nkǔŋə nkuŋə, la mbə lèrə̀ a ghobə nɨ mbyə̀ pə a nɨ zhwiʼtə̀ mɨkerə mɨ àfǐfǐ.

⁵La ngə̀ aŋunə ghò, chwuʼtə̀ mbɨ̀ŋmə̀ o nkwùə̀ ɨ̀tsùmə̀, ngẅìimə̀ ntɨŋmə̀ o aŋunə ngəʼə̀ ntsùmə̀, nkɨ ndèrə̀ nɨ mbyə̀ a nɨ chwìitə̀ ntwuumə̀ ghù ɨ̀shìʼnə̀ wa. Tsùŋə̀ nfàʼà àfàʼà o tsaʼa ngàŋə̀ àfàʼà Nẅùə̀.

⁶Ngə̀ aŋunə mɨ̀ŋə̀, nkwùə̀ ɨ̀ kùʼnə̀ lo pɨ ŋâ mə̀ tsaʼa àzwuumə̀ nɨ̀shwàʼà ambo Nẅùə̀. Nkwùə̀ ɨ̀ kùʼnə̀ ambo mɨ̀ŋə̀ a nɨ myàʼtə̀ àtwuə̀ ɨ̀shyə̂ zə̀.

⁷Ǹdzòŋnə̀ mɨ̀làʼà ma tyìʼə̀ ɨ̀shìʼnə̀, nkɨ̀ɨrə̀ mɨ̀ndəənə̀ ma tə mmyàanə̀, nkɨ mbirə̀ nɨ àpyiimə̀ ntɨŋmə̀ aŋunə Kristù tə ndẅùutə̀.

⁸Tɨ̀tsòŋə̀, Nẅùə̀ à nùŋə̀ ngùʼu mə̀ ntiinə mɨ̀nwùə̀ ɨ̀mâ təəmə̀nə. La ngùʼu nɨ Ndòʼnə̀mbyə̂ wa nɨ à wa nsaʼà mɨ̀sàʼa mɨ pə̀ənə̀ amwuə àlàŋə yè təəmə̀nə à ghǎ tuŋə̀ a àtwuə̀ mɨ̀ŋə̀ aŋunə njyə̂ za nɨ à ghǎ saʼà mɨ̀sàʼa mɨ pə̀ənə̀ la. Ka à pə ghǎ tuŋə̀ e pə a àtwuə̀ mɨ̀ŋə̀ nɨ mɨ̀ŋə̀. À ghǎ kɨ tuŋə̀ farə a àtwuə̀ ŋònə̀ wa ntsùmə̀ nɨ à ghǎ nùŋə̀ ntɨŋmə̀ e a nɨ pyabə̀ aŋunə njyə̂ za nɨ à ghǎ kẅirə̀ tô la.

⁹Taŋnə̀ a nɨ fàʼà ntô ndzəənə̀ mə̀,

¹⁰ntiinə Demàsə̀ à pìʼnə̀ àze pə a nɨ tyiʼə̀ nkòŋə̀ e pə ɨ̀pwuumə̀ àtwuə̀ ɨ̀shyə̂, lenəla, mmyàʼtə̀ mə̀ nkɨ̀ɨrə̀ ndèrə̀ e a Tèsàlonikà. Kresènsə̀ a lèrə̀ a Galatia, Titus a kɨ ndèrə̀ a Dalmatia.

¹¹A tyìʼə̀ ndàʼà Lukə̀ a nɨ̀ghə̂ pəə ze. Lòo a Mark pɨghə ze tô, ntiinə mbə̀ʼə a yèmpə̀ mə̀ aŋunə àfàʼà.

¹²Ngwə̀ ntwuumə̀ a Takikùsə̀ a Efesòsə̀.

¹³Wə̀ mə ntô, wə̀ lòo a kutə̀ mə̀ nɨ ndə̀ waʼnə ambo Kapùsə̀ a àlaʼà Troas; nkɨ ntô nɨ ɨ̀ŋwàʼnə̀ ɨ̀pâ pa, nkɨtô pyə̀ nɨ pənə nɨ mɨ̀ngòbə̀ la.

¹⁴Àlèzandà, ɨ̀ntẅuə̀ àlàamə̀ wa à lə̀ chyâ àlǎ a ntɨŋmə̀ mɨ̀ŋə̀. A ndàʼà Ndòʼnə̀mbyə̂ nɨ à ghǎ tsoʼò àfàʼà e aŋunə ànwùə̀ nɨ à ghɨ̀rə̀nə.

¹⁵Kɨ mmə nzhìʼtə̀ o nɨ ze, ntiinə à lanə ntwuunə̀ e ntwuumə̀ ghù ɨ̀shìʼnə̀ wa nɨ pə̀ənə̀ pa nchwìitə̀ la nɨ ntɨŋmə̀ e ɨ̀tsùmə̀.

¹⁶Aŋunə ntsàambyə̀ nkwùə̀ nɨ ndə̀ nwuunə̀nə aŋunə nɨ̀ghòorə nɨ korə̀, ka ŋònə̀ ɨ̀tse â lə̀ tô e a nɨ tompə̀ mə̀. Ŋwùə̀ ntsùmə̀ a lə̀ myàʼtə̀ mə̀ nkɨ̀ɨrə̀ e. Kò Nẅùə̀ a chyâ e ɨ̀sàʼa aŋunə pobə ntii ànwùə̀ nɨ pobə ghɨ̀rə̀nə aŋunə mɨ̀ŋə̀.

¹⁷La Ndòʼnə̀mbyə̂ à lə̀ pə pəə ze, ŋŋâ mə̀ nɨ ɨ̀tɨ̀ŋnə̀ lo ntsùŋə̀ nchwìitə̀ ntwuumə̀ ghù ɨ̀shìʼnə̀ wa, lo mbə̀ʼə pànə̀ pa pɨ̀tsùmə̀ nɨ ka pobə pə ghobə pɨ̀Jew la pɨ tsùŋə̀ ndzuʼù. Lenəla, Nẅùə̀ a fuukə̀ mə̀ a ntswùə̀ puʼmbyìinə̀ wa.

¹⁸Ndòʼnə̀mbyə̂ ǎ fuukə̀ mə̀ amwuə ànwùə̀ tɨ̀pòŋə̀ àtsùmə̀ nɨ pɨ ghɨ̀rə̀nə aŋunə mɨ̀ŋə̀, lòo mə̀ ɨ̀shìʼnə̀ ghə̀ kwuunə̀ amwuə ànwùə̀ nɨ̀fò e a nɨ̀pwuurə̀. Pə̀ənə̀ ghuʼtə̀ a Ndòʼnə̀mbyə̂ nɨ nkuŋə̀ nɨ nkuŋə̀.

¹⁹Chàʼtə̀ a Prìsilà pobə Aquila farə ngẅàrə̀ Ònesiforùsə̀ ambo mɨ̀ŋə̀.

²⁰Erastus à ghoŋə̀ e a Korìntə̀, ǹkɨ mmyàʼtə̀ a Trofimùsə̀ a Mìletùsə̀ nɨ nɨ̀ghòonə̀.

²¹Taŋnə̀ ntô nkwùə̀ ghɨɨmə ɨ̂ pòŋə̀ tô. Eubulus, nɨ Pudènsə̀, nɨ Linus, nɨ Klodyà, farə pɨlyimə pɨ̀tsùmə̀ pə nchàʼtə̀ o.

²²Ndòʼnə̀mbyə̂ â pə pɨghə ze. Àpòŋə̀ ntɨŋmə̀ Nẅùə̀ a pə aŋunə pɨghə.