Read Pinyin Titus 2 Bible Online

Titus 2 - Pinyin bible

Titus 2

¹La ngə̀ aŋunə ghò Titus, nèrə̀ pə̀ənə̀ pə lo pobə chyə̂ tsaʼnə mbòomə ghù ɨ̀shìʼnə̀ a nèrə̀nə.

²Nèrə̀ pɨ̀lɨ̀ŋmə̂ pɨ mbyàŋnə̀ a nɨ zhyə̂ ẅìimə̀ mbɨ̀ŋmə̀ ɨ̀zobə, ngɨ̀rə̀ mɨ̀nwùə̀ tsaʼa pɨ̀lɨ̀ŋmə̂ nɨ pobə pənə nɨ àzhìʼtə̀; Àpyiimə̀ ntɨŋmə̀ àzobə a tɨ̀ŋnə̀, ɨ pobə mmə nkòŋə̀ pə̀ənə̀ ɨ̀shìʼnə̀ nkɨ mmə nzhyə̂ korə̀ ntɨŋmə̀ nkwùə̀ ngəʼə̀.

³Tyìʼə̀ tsaʼnə wə̀ təətə̀nə mbyàŋnə̀ la, kɨ ntəətə̀ pə̀ngyə̌ pɨ̀lɨ̀ŋmə̂ a nɨ pə pə̀ngyə̌ nɨ mbòomə ghù ɨ̀shìʼnə̀. Kò pobə tə ntsə̀ŋə̀ mɨ̀linə̀ mɨ pə̀ənə̀ kə̀ nkòŋə̀ mɨ̀lùʼù tɨsɨŋnə. La pobə̂ tyiʼə̀ nnèrə̀ mɨ̀nwùə̀ nɨ mɨ kùʼnə̀nə,

⁴njiilo pobə lòo pə̀ngyə̌ pɨ̀kɨ̂ nkoʼò amwuə ndwuumə̀ nɨ pobə kòŋə̀ pɨ̀lwuumə̀ ɨ̀pobə Pobə ɨ̀poonə̀ ɨ̀pobə.

⁵Pə̀ngyə̌ pɨ̀lɨ̀ŋmə̂ kɨ ngerə̀ a nɨ nèrə̀ pə̀ngyə̌ pɨ̀kɨ̂ a nɨ pə nɨ àzhìʼtə̀, kɨ zhyə̂ e pə ndàʼà pɨ̀lwuumə̀ ɨ̀pobə. Pobə gerə̀ a nɨ zhyə̂ twuʼtə̀ mɨ̀ndâ ɨ̀mobə, kɨ pə nɨ mbòomə ghù ɨ̀shìʼnə̀, mə zuʼnə̀ pɨ̀lwuumə̀ ɨ̀pobə, njiilo kò ŋònə̀ ɨ̀tse a shwəŋə̀ e àshwəŋnə̀ tɨ̀pòŋə̀ mbə̀ʼə àshwəŋnə̀ Nẅùə̀.

⁶Wə̀ ghə̀ ambo mbyàŋnə̀ yɨ̀kɨ̂, wə̀ tiitə̀ a ghobə lo pobə kɨ mbə nɨ àzhìʼtə̀.

⁷Nèrə̀ mbɨ̀ŋmə̀ o amwuə àlàŋə àtsùmə̀ tsaʼa àlènə̀ ambo pə̀ənə̀ a nɨ zùŋə̀ ngɨ̀rə̀ mɨ̀nwùə̀ mɨ ɨ̀shìʼnə̀. Wə̀ ghə̀ a nɨ nèrə̀ mɨ̀nwùə̀, wə̀ tə̂ àtwuə̀ nèrə̀ nɨ ntɨŋmə̀ o ɨ̀tsùmə̀.

⁸Ghɨ̀rə̀ àshwəŋnə̀ nɨ a furə̀nə a ntswùə̀ ghò a pə yè ɨ̀shìʼnə̀ nɨ mbə̀ʼə ka ŋwùə̀ a twuunə̀ e, mbə̀ʼə ɨ̀sɨŋnə̀ ɨ̂ koorə̀ ngàŋə kɨpaanə ɨ̀zô amwuə ndwuumə̀ nɨ ka pobə pə pə a ghobə nɨ ànwùə̀ àtse nɨ mbə̀ʼə pobə shwəŋə̀ mbə̀ʼə pə̀ənə̀.

⁹Təətə̀ ɨ̀pùʼù a nɨ zuʼnə̀ pɨ̀masàa ɨ̀pobə, nkɨ ngɨ̀rə̀ lo pɨ̀masàa ɨ̀pobə pə ngaʼà nkwùə̀ ɨ̀tsùmə̀. Kò pobə tə nkẅùə̀ a ghobə ànwùə̀ a ntswùə̀ pobə.

¹⁰Kò ɨ̀pùʼù pə̀ tə ndzə̀ərə̀ pɨ̀masàa ɨ̀pobə. Pobə̂ nèrə̀ lo pobə la ɨ̀pùʼù pɨ̀shìʼnə̀ ngɨ̀rə̀ ɨ̀nwùə̀ ɨ̀tsùmə̀ nɨ ntɨŋmə̀ ɨ̀ghobə ɨ̀tsùmə̀, njiilo pobə ghɨ̀rə̀ àshwəŋnə̀ Nẅùə̀ ngàŋə̀ nchwarə̀ ɨ̀wə̀ənə̀ a nèrə̀ ɨ̀pòŋə̀ a ɨ̀myə̂ pə̀ənə̀.

¹¹Nẅùə̀ à nèrə̀ àpòŋə̀ ntɨŋmə̀ e njiilo à chwarə̀ a ŋwùə̀ mɨsoŋə

¹²Àpòŋə̀ ntɨŋmə̀ Nẅùə̀ zə̀ a zə̀ ndanə̀ a wə̀ənə̀ a nɨ twuunə̀ a mbòomə wa nɨ pànə̀ pa nchyə̂ tsaʼa ka pobə zhyə̂ a ghobə a Nẅùə̀ la. Zèrə a lanə̀ wə̀ənə̀ lo kò pə̀ənə̀ tə ngerə̀ ntoŋə aŋunə ɨ̀pwuumə̀ àtwuə̀ ɨ̀shyə̂, nzhyə̂ ẅìimə̀ mbɨ̀ŋmə̀ ghɨ̀rə̀ mɨ̀nwùə̀ nɨ mɨ təəmə̀nə, kɨ chyə̂ tsaʼa pànə̀ nɨ pɨ zhyə̂nə a Nẅùə̀ amwuə àtwuə̀ ɨ̀shyə̂ ghə,

¹³tsaʼnə pə̀ənə̀ pə nnùŋə̀ àkwàŋə̀ àzəənə̀ ntə mbyabə̀ Nẅùə̀ ɨ̀wə̀ənə̀ ngẅùunə pobə ngàŋə̀ nchwarə̀ ɨ̀wə̀ənə̀ Yěsû Kristù pobə̂ tô amwuə àghuʼtə̀.

¹⁴Yěsû a lə̀ kwɨghə̀ a nɨ tsuʼù ɨ̀twuə̀ ɨ̀pə̀ənə̀ amwuə tɨ̀pòŋə̀ ɨ̀wə̀ənə̀, nkɨ ngɨ̀rə̀ pə̀ənə̀ laanə̀, njiilo pə̀ənə̀ tyiʼə̀ mbə pə̀ənə̀ ɨ̀pe nɨ pobə pənə nɨ ntɨŋmə̀ lo ghɨ̀rə̀ mɨ̀nwùə̀ nɨ mɨ pòŋə̀nə.

¹⁵Nèrə̀ mɨ̀nwùə̀ mə nɨ ǹtiitə̀nə o lə ambo pə̀ənə̀ amwuə àshwatə̀ ɨ̀poonə̀ pɨ Kristù. Pə̀ʼkə̀ mɨ̀ntɨŋmə̀ ɨ̀mobə lo pobə̂ ghɨ̀rə̀ mɨ̀nwùə̀ mə, nkɨ nsaʼà pànə̀ nɨ pobə pa ngɨ̀rə̀ mɨ̀nwùə̀ nɨ ka mɨ kùʼnə̀ e nɨ ɨ̀tɨ̀ŋnə̀. Kò wə̀ pyiimə̀ o lo ŋònə̀ ɨ̀tse â wâ o.