Read Pinyin Hibrù 1 Bible Online

Hibrù 1 - Pinyin bible

Hibrù 1

¹A lə̀ pə nkwùə̀ ntsàambyə̀, Nẅùə̀ à lə̀ làŋə̀ a ndzùmə̀ ngàŋə ntwuumə̀ ɨ̀ze nshwəŋə̀ ambo pɨ̀tǎ pɨ̀tǎ ɨ̀pə̀ənə̀ nkwùə̀ noʼnə amwuə ɨ̀làŋə pɨ̀noʼnə.

²La tɨ̀tsòŋə̀ amwuə mɨ̀njyə̂ mɨ ndẅùutə mə, Nẅùə̀ à shwəŋə̀nə mə ambo pə̀ənə̀ ndàŋə̀ a ndzùmə̀ Moonə̀ e. Moonə̀ e wa nɨ à lə̀ làŋə̀nə a ndzùmə̀ ze ntsùŋə̀ àzwuumə̀ àtsùmə̀ nɨ a pənə amwuə àtwuə̀ ɨ̀shyə̂ àtsùmə̀. À lə̀ kɨ nnùŋə̀ e lo a gha mbə tsaʼa ɨ̀ndzɨ̀ghə̀ ndâ àtwuə̀ àzwuumə̀ àtsùmə̀.

³Moonə̀ wə̀ à nèrə̀ tsaʼnə Nẅùə̀ a kə̀ʼnə̀nə mbə, nkɨ mbə tsaʼnə Nẅùə̀ àtwuə̀ mbɨ̀ŋmə̀ e à pənə. À twuʼtə̀ àtwuə̀ ɨ̀shyə̂ zə̀ àtsùmə̀ nɨ àshwəŋnə̀ e za nɨ a pənə nɨ mɨ̀tɨ̀ŋnə̀ la. Nkwùə̀ nɨ à lə̀ ghɨ̀rə̀nə lo Nẅùə̀ lə̀ənə̀ a tɨ̀pòŋə̀ pànə̀ pɨ mɨsoŋə la, à lə̀ nwuunə̀ a nɨ̀pwuurə̀ a pàa àpô Nẅùə̀ yè zɨghə̀nə nɨ a pənə nɨ mɨ̀tɨ̀ŋnə̀ àtwuə̀ àzwuumə̀ àtsùmə̀ la.

⁴Nẅùə̀ à lə̀ ghɨ̀rə̀ lo nɨ̀faŋə̀ Moonə̀ e â tsàarə̀ yɨ̀ pəngèrə̀, tyìʼə̀ tsaʼnə nɨ̀linə̀ nɨ à lə̀ ŋânə ambo ze lə̀ kɨnə ntsàarə̀ ɨ̀mobə.

⁵Lə̌ ɨ̀sùmə nɨ Nẅùə̀ a laʼa mə shwəŋə̀ e ambo taʼà angèrə̀ e ghùtse apə̀ lo, “Ghǒ Moonə̀ mə̀ Ǹtyiʼə̀ la tǎ ɨwɨghə sìnə̀ wə̀”. Ka a kɨ nchi nshwəŋə̀ ambo ghùtse angèrə̀ lo, “Ngǎ pə tǎ ɨ̀ghobə, à kɨ mbə moonə̀ mə̀.”

⁶La nkwùə̀ nɨ Nẅùə̀ à lə̀ mənə ntsàa a moonə̀ nɨ̀twuə̀ e yɨ̀ mbyàŋnə̀ a àtwuə̀ ɨ̀shyə̂, à lə̀ shwəŋə̀ lo, “Pəngèrə̀ pɨ Nẅùə̀ pɨ̀tsùmə̀ chyə̂ a nɨ ghuʼtə̀ e,”

⁷Ngə̀ aŋunə pəngèrə̀, Nẅùə̀ a shwəŋə̀ mbə̀ʼə pobə lo, “Nẅùə̀ a ghɨ̀rə̀ pəngèrə̀ ɨ̀pe tsaʼa pɨ̀fèrə̀, Nkɨ ngɨ̀rə̀ ngàŋə àfàʼà ɨ̀ze pə tsaʼa ɨ̀ləəmə̀ ɨ̀mǔ.”

⁸Ndèrə̀ nɨ mbyə̀, Nẅùə̀ à lə̀ shwəŋə̀ mbə̀ʼə moonə̀ e lo, “Ànwùə̀ nɨ̀fò o Nẅùə̀ a ghǎ ghoŋə̀ nɨ nkuŋə̀ nɨ nkuŋə̀! Wə̀ wə̀ mbuʼtə̀ pə̀ənə̀ ɨ̀pô amwuə àlàŋə nɨ a təəmə̀nə.

⁹Wə̀ kòŋə̀ ànwùə̀ nɨ a təəmə̀nə, mbàanə̀ a zhyə̂ nɨ ka a təəmə̀ e Lenəla Nẅùə̀ nɨ à pənə Nẅùə̀ o à zoʼnə o nɨ mɨ̀ghurə̀ wə̀ pə nɨ nɨ̀ghaʼà à ghɨ̀rə̀ wə̀ pə nɨ àghuʼtə̀ ntsàarə̀ ngàŋə àkwùə̀ nɨ̀yìinə̀ ɨ̀zô.”

¹⁰À lə̀ kɨ nshwəŋə̀ lo, “Ghò Ndòʼnə̀mbyə̂, a nɨ̀pìʼnə̀, wə̀ lə̀ tsùŋə̀ àtwuə̀ ɨ̀shyə̂, ndòo mbô ɨ̀mô ntsùŋə̀ nɨ̀pwuurə̀ ghu.

¹¹Nɨ̀pwuurə̀ pobə àtwuə̀ ɨ̀shyə̂ ghǎ myə̀ la wə̀ kɨ ngoŋə̀ ghoŋə̀nə; pèrə ghǎ pɨ̂ sìitə̀ tsaʼa ɨtsəʼə.

¹²Wə̀ ghǎ pyiʼtə̀ a pèrə tsaʼa pɨ pa mbyiʼtə̀ ɨtsəʼə, pɨ kẅebə̀ a pèrə tsaʼnə pànə̀ pa nkyopə̀ ɨtsəʼə, La wə̀ kẅebə̀ o apə̀, nɨ̀chyə̂mbyə̂ o â kɨ ndẅùutə̀ e apə̀.”

¹³Nẅùə̀ à laʼa mə nshwəŋə̀ e ambo ghùtse angèrə̀ lo, “Nwuunə̀ aŋunə pàa àpô mə̀ yè zɨghə̀nə ghə̀ tə mbyàa nkwùə̀ nɨ ngǎ nùŋə̀ ngàŋə̀ kɨpaanə ɨ̀zô a ɨ̀shyə̂ wə̀ təətə̀ mɨ̀kwùə̀ ɨ̀mô aŋunə pobə apə̀.”

¹⁴Ka pəngèrə̀ pə e la ɨ̀zhwùə̀ nɨ Nẅùə̀ à tsàanə lo pobə̂ tô ngyèmpə̀ pànə̀ nɨ Nẅùə̀ à ghǎ chwarə̀ a ghobə?