Read Pinyin Hibrù 11 Bible Online

Hibrù 11 - Pinyin bible

Hibrù 11

¹Nɨ̀nùŋə̀ ntɨŋmə̀ aŋunə Nẅùə̀ a chyə̂ mbə a nɨ pyiimə̀ nkǔŋə nkuŋə lo wə̌ pə nɨ àzwuumə̀ nɨ wə̀ nùŋə̀nə ntɨŋmə̀ o aŋunə mmə mbyabə̀; â nɨ pyiimə̀ nkǔŋə nkuŋə lo ghò wə̀ nɨ ɨ̀pwuumə̀ nɨ wə̀ lə̀ pirə̀ mə o a pèrə tɨ zəənə̀.

²Lə̌ tsaʼnə pànə̀ pɨ nkwùə̀ ntsàambyə̀ lə̀ nùŋə̀nə ntɨŋmə̀ aŋunə Nẅùə̀, lenəla Nẅùə̀ a tyiʼə̀ mbə nɨ nɨ̀ghaʼà pobə pɨ pobə.

³Pə̀ənə̀ làŋə̀ la a ndzùmə̀ nɨ̀nùŋə̀ ntɨŋmə̀ aŋunə Nẅùə̀ nzhyə̂ lo pɨ lə̀ tsùŋə̀ àtwuə̀ ɨ̀shyə̂ pobə nɨ̀pwuurə̀ la nɨ àshwəŋnə̀ Nẅùə̀. A chyə̂ mbə la lo Nẅùə̀ à lə̀ lòo ɨ̀pwuumə̀ nɨ ka pə̀ənə̀ mə ndzəənə̀ a wəənə̀ a nɨ tsùŋə̀ a pyə̀ nɨ pə̀ənə̀ pə ndzəənə̀.

⁴Abèlə̀ à lə̀ nùŋə̀ la ntɨŋmə̀ aŋunə Nẅùə̀ nɨ à lə̀ ŋânə nchàʼtə Nẅùə̀ nɨ ɨ̀ lə̀ pòŋə̀nə ntsàarə̀ yɨ̀ Cain. Tsaʼnə à lə̀ nùŋə̀nə ntɨŋmə̀ e aŋunə Nẅùə̀, Nẅùə̀ à lə̀ zəənə̀ lo à chyə̂ mbə ŋònə̀ nɨ mɨ̀nwùə̀ ɨ̀me təəmə̀nə, ntiinə Nẅùə̀ àtwuə̀ ɨ̀pɨ̀ŋmə̀ e à lə̀ shwəŋnə̀ ɨ̀shìʼnə̀ mbə̀ʼə nchàʼtə Nẅùə̀ e. A nɨ pə tsaʼnə Abèlə̀ à lə̀ nùŋə̀nə ntɨŋmə̀ aŋunə Nẅùə̀, ànwùə̀ nɨ à lə̀ ghɨ̀rə̀nə a zə̀ mbirə̀ nshwəŋnə̀ ambo pə̀ənə̀ mbaa pə tsaʼnə à kwɨghə̀ mə e la.

⁵Enòkə̀ à lə̀ nùŋə̀ la ntɨŋmə̀ aŋunə Nẅùə̀ nɨ ka à lə̀ kwɨghə̀ e, la Nẅùə̀ a lòo e nkoʼò a nɨ̀pwuurə̀. Ka ŋònə̀ ɨ̀tse à lə̀ zhyə̂ e alyiʼə nɨ Enòkə̀ à lə̀ pənə ghu, ntiinə Nẅùə̀ à lə̀ lòo mə e. Àŋwàʼnə̀ Nẅùə̀ a shwəŋə̀ lo, Nẅùə̀ à lə̀ kɨ lòo a Enòkə̀ koʼò a nɨ̀pwuurə̀ la nɨ Enòkə̀ à lə̀ ghɨ̀rə̀ mə ànwùə̀ nɨ a pòŋə̀nə Nẅùə̀.

⁶Mbə̀ʼə ka ŋònə̀ ɨ̀tse â ghɨ̀rə̀ e lo Nẅùə̀ à pə nɨ nɨ̀ghaʼà aŋunə ze tɨghu à nùŋə̀ ntɨŋmə̀ e aŋunə Nẅùə̀, ntiinə ŋònə̀ wa ntsùmə̀ nɨ à wa ntô ambo Nẅùə̀ à chyə̂ a nɨ pyiimə̀ nɨ ntɨŋmə̀ e lo Nẅùə̀ à wa ghu nkɨ mmə ntsoʼò àfàʼà pànə̀ nɨ pobə pa ntàʼà e nɨ ntɨŋmə̀ ɨ̀ghobə ɨ̀tsùmə̀.

⁷Noà à lə̀ nùŋə̀ la ntɨŋmə̀ e aŋunə Nẅùə̀ nɨ à lə̀ zuʼnə̀nə mɨ̀nwùə̀ nɨ Nẅùə̀ à lə̀ mənə nshwəŋə̀ nɨ à lə̀ pirə̀ mə e tɨ zəənə̀ tsaʼnə mèrə lòonə alyiʼə. À lə̀ zuʼnə̀ a Nẅùə̀ nkoomə̀ àpaŋə̀ nɨ pobə pɨ ngẅàrə̀ e lə̀ kwuunə̀nə amwuə nchwarə̀. Lə̌ tsaʼnə Noà à lə̀ ghɨ̀rə̀nə Nẅùə̀ a tsə̀ŋə̀ àtwuə̀ ɨ̀shyə̂ ntyiʼə̀ ndòo e tsaʼa ŋònə̀ nɨ mɨ̀nwùə̀ ɨ̀me təəmə̀nə ntiinə à nùŋə̀nə ntɨŋmə̀ aŋunə Nẅùə̀.

⁸Abràhamə̀ à lə̀ nùŋə̀ la ntɨŋmə̀ e aŋunə Nẅùə̀ nɨ à lə̀ zuʼnə̀nə a Nẅùə̀ nkwùə̀ nɨ Nẅùə̀ à lə̀ fuŋə̀nə e lo â lèrə̀ alyiʼə nɨ a lə̀ pənə lẅùutə̀ pə àze. À lə̀ lèrə̀ lèrə̀nə la ka zhyə̂ e alyiʼə nɨ à lə̀ mənə ndèrə̀.

⁹À lə̀ nùŋə̀ la ntɨŋmə̀ aŋunə Nẅùə̀ nɨ à lə̀ chyə̂nə amwuə àlaʼà za nɨ Nẅùə̀ à lə̀ kàʼnə ambo ze tsaʼa ngàŋə̀ nɨ̀ghaanə̀. À lə̀ chyə̂ amwuə àzuŋə̀ tsaʼa Isàkə̀ pobə Yàkobə̀ lə̀ kɨnə nchyə̂ nɨ pobə lə̀ pənə pànə̀ nɨ nẅùə̀ à lə̀ kɨnə ŋŋâ nkàʼnə zə̀ ambo pobə.

¹⁰Mbə̀ʼnə Abràhamə̀ à lə̀ mənə mbyabə̀ a nɨ chyə̂ amwuə mbòmpə àlaʼà ngẅùunə za nɨ Nẅùə̀ àtwuə̀ ɨ̀pɨ̀ŋmə̀ e à lə̀ kwànkə̀nə lo poomə̀ nkɨ mboomə̀. Mbòmpə àlaʼà zə̀ ɨ̀ pə zhyə̀ nɨ ɨ̌ ghoŋə̀ nɨ nkuŋə̀.

¹¹Abràhamə̀ à lə̀ nùŋə̀ la ntɨŋmə̀ aŋunə Nẅùə̀ mbaa pə tsaʼnə à lə̀ lwùnə̀nə ka pə e nɨ ɨ̀tɨ̀ŋnə̀ a nɨ pyə̂ a moonə̀. À lə̀ nùŋə̀ ntɨŋmə̀ aŋunə Nẅùə̀ lo Nẅùə̀ â ghɨ̀rə̀ ànwùə̀ nɨ à lə̀ kàʼnə mbaa pə tsaʼnə ngẅùə e Sarah à lə̀ lwùnə̀nə nkɨ nchi mbə nkǐ mə̀ngyə̌ la.

¹²Lenəla àtsɨ̀ŋə̀ Abràhamə̀ a lə̀ noʼò tsaʼa pɨsaŋə a nɨ̀pwuurə̀, nkɨ mbə tsaʼa waakə nɨ à pənə a mbwùnə mɨ nchyə ghu nɨŋnə̀nə nɨ mbə̀ʼə ka pɨ shaŋə̀ e, mbaa pə tsaʼnə à lə̀ tyiʼnə mbə e tsaʼa àkwuə̀ ŋwùə̀ la.

¹³Pànə̀ pə̀ pɨ̀tsùmə̀ lə̀ kɨ kwɨghə̀ mbirə̀ nnùŋə̀ ntɨŋmə̀ aŋunə Nẅùə̀. Ka pobə lə̀ kẅiirə̀ a ghobə ɨ̀pwuumə̀ nɨ Nẅùə̀ à lə̀ kàʼnə ambo pobə, la ntəəmə̀ ndzəənə̀ a pèrə a ndyə̌ sàa, mbə nɨ nɨ̀ghaʼà. Pobə lə̀ tyiʼə̀ nshwəŋə̀ lo pobə chyə̂ mbə la ngàŋə nɨ̀ghaanə̀ nɨ pobə pə̀ ndàŋə̀ a ghobə la làŋə̀nə a àtwuə̀ ɨ̀shyə̂ ghə̀.

¹⁴Pànə̀ nɨ pɨ pa nshwəŋə̀ mbuurə̀ mɨ̀nwùə̀ zə̀ nèrə̀ a laanə̀ lo pobə pə ntàʼà àzobə àlaʼà.

¹⁵Pobə lə̀ pəla mmə nkẅempə̀ àlaʼà nɨ pobə lə̀ furə̀nə amwuə yi pobə lə̀ pə nɨ ɨ̀sàanə̀ a nɨ kẅirə̀ nkwə̂.

¹⁶Pobə lə̀ mə ntàʼà pə àlaʼà nɨ a pòŋə̀nə ntsàarə̀, mbə àlaʼà nɨ a pənə a nɨ̀pwuurə̀. Lenəla, ka Nẅùə̀ à pə e nɨ ɨ̀sɨŋnə̀ a nɨ ghɨ̀rə̀ pɨ fuŋə̀ e nɨ Nẅùə̀ ɨghobə, ntiinə à tsùŋə̀ mə mbòmpə àlaʼà ngẅùunə nnùŋə̀ ambo pobə.

¹⁷Abràhamə̀ à lə̀ nùŋə̀ la ntɨŋmə̀ e aŋunə Nẅùə̀ nɨ à lə̀ ŋânə a moonə̀ e tsaʼa àzwuumə̀ nɨ̀shwàʼà nkwùə̀ nɨ Nẅùə̀ à lə̀ zhwiʼnə e. Abràhamə̀ à lə̀ pə ŋònə̀ nɨ Nẅùə̀ à lə̀ nùŋə̀nə nkàʼnə zə̀ pobə ze la a kɨ nchwuʼtə̀ mbɨ̀ŋmə̀ e a nɨ ŋâ ndàʼà moonə̀ e ambo Nẅùə̀ tsaʼa àzwuumə̀ nɨ̀shwàʼà,

¹⁸mbaa pə tsaʼnə Nẅùə̀ à lə̀ shwəŋə̀ mə ambo ze lo, “Ngǎ làŋə̀ la a ndzùmə̀ Isàkə̀ ŋŋâ ɨ̀poonə̀ pə̀ nɨ ndə̀ kàʼnə ambo ghò.”

¹⁹Abràhamə̀ a lə̀ zhyə̂ lo mbə̀ʼə Nẅùə̀ a pə̀ʼkə̀ a ŋwùə̀ aŋunə nɨ̀wɨghə̀; tsaʼnə a pənə lə la, lə̌ ndwuumə̀ nɨ mbə̀ʼə pɨ shwəŋə̀ lo Nẅùə̀ à lə̀ pə̀ʼkə̀ a Isàkə̀ aŋunə nɨ̀wɨghə̀.

²⁰Isàkə̀ à lə̀ nùŋə̀ la ntɨŋmə̀ aŋunə Nẅùə̀ nchyâ mborə̀ aŋunə Yàkobə̀ pobə Esau nkàʼà a ghobə nɨ mɨ̀nwùə̀ nɨ mɨ ghǎ tô amwuə nɨ̀chyə̂mbyə̂ ɨghobə.

²¹Yàkobə̀ à lə̀ nùŋə̀ la ntɨŋmə̀ e aŋunə Nẅùə̀ nchyâ mborə̀ aŋunə ɨ̀poonə̀ pɨ Jòsebə̀ moʼo moʼo mbòŋə̀ kwɨghə̀ e. À lə̀ zəʼnə̀ aŋunə mbàŋə̀ e nsəəkə̀ a Nẅùə̀.

²²Jòsebə̀ à lə̀ nùŋə̀ la ntɨŋmə̀ e aŋunə Nẅùə̀. Nkwùə̀ nɨ à lə̀ mənə ntàʼà kwɨghə̀ e à lə̀ shwəŋə̀ tsaʼnə pànə̀ pɨ Israel ghǎ furə̀ àlaʼà Egypt, nkɨ ŋŋâ ntə̌ tsaʼnə pɨ ghǎ ghɨ̀rə̀ nɨ àkwuə̀ e.

²³Tǎ pɨ Mǔsî pobə mǎ e lə̀ nùŋə̀ la ntɨŋmə̀ aŋunə Nẅùə̀ ndə̀əmə̀ e aŋunə ŋwɨgrə̀ ɨtarə nkwùə̀ nɨ pɨ lə̀ pyə̂nə e. Pobə lə̀ zəənə̀ lo à lə̀ pə moonə̀ mbòŋə̀ ka mɨ̀zùŋə, ka chi pô a ghobə a mbòomə nɨ ɨ̀fò àlaʼà Egypt à lə̀ nùŋə̀nə.

²⁴Mǔsî à lə̀ nùŋə̀ la ntɨŋmə̀ e aŋunə Nẅùə̀, ntwuunə̀ e lo kò pɨ fuŋə̀ e a ye nɨ moonə̀ moonə̀ ɨ̀fò Ferò ghù mə̀ngyə̌ nkwùə̀ nɨ à lə̀ kẅuə̀nə.

²⁵À lə̀ kòŋə̀ pə lo zəənə̀ ngəʼə̀ pobə pɨ pànə̀ pɨ Nẅùə̀ ntsàarə̀ a nɨ zuʼù ɨ̀shìʼnə̀ amwuə tɨ̀pòŋə̀ aŋunə mətùmə nkwùə̀.

²⁶À lə̀ zəənə̀ lo nɨ̀pə nɨ ɨ̀sɨŋnə̀ ntii Ghù Ndzoʼnə wa à pòŋə̀ ntsàarə̀ a nɨ̀pə nɨ ɨ̀pwuumə̀ pɨ ɨ̀shìʼnə̀ nɨ pənə àlaʼà Egypt, ntiinə à lə̀ mənə ndzəənə̀ mɨntyaŋnə nɨ Nẅùə̀ à ghǎ ŋâ ambo ze.

²⁷Mǔsî à lə̀ nùŋə̀ la ntɨŋmə̀ e aŋunə Nẅùə̀ nfurə̀ a àlaʼà Egypt ka mə pô e lo ɨ̀fò ǎ zaŋə̀ a loŋə. À lə̀ lèrə̀ nɨ mbyə̀ pə ntiinə à lə̀ zəənə̀ Nẅùə̀ nɨ ka pɨ mə ndzəənə̀ e.

²⁸Mǔsî à lə̀ nùŋə̀ la ntɨŋmə̀ e aŋunə Nẅùə̀ mbìʼnə̀ ànwùə̀ mbə̀ʼə Nɨ̀ghaʼà Àlàŋə̀ Mmyàʼtə̀, nshwəŋə̀ lo pànə̀ pɨ Israel lòo àləəmə̀ ndzoʼò aŋunə mɨ̀ntswùə̀ mɨ̀ndâ ɨ̀mobə, njiilo angèrə̀ nɨ à wa nzhwuutə̀ pə̀ənə̀ à làŋə̀ mmyàʼtə̀ pɨ̀tsàa pɨ̀mbyə̀ pɨ ɨ̀poonə̀ ɨ̀pobə pɨ̀mbyàŋnə̀ tɨghu à zhwuutə̀.

²⁹Pànə̀ pɨ Israel lə̀ nùŋə̀ la ntɨŋmə̀ ɨ̀ghobə aŋunə Nẅùə̀ ntwuumə̀ nchyə ghu nɨŋnə̀nə ghu pàŋə̀nə wa tsaʼa pobə pə ngyìinə̀ aŋunə ɨ̀shyə̂ ndzopə̀. La nkwùə̀ nɨ pànə̀ pɨ Egypt lə̀ lopə̀nə a nɨ twuumə̀ àzobə, nchyə ghu lə̀ sùŋə̀ a ghobə.

³⁰Pànə̀ pɨ Israel lə̀ nùŋə̀ la ntɨŋmə̀ ɨ̀ghobə aŋunə Nẅùə̀ ngyìinə̀ nkamnə̀ nkaʼà Jèrikò aŋunə njyə̂ sàmbaa ẅèrə kẅìnə̀ a ɨ̀shyə̂.

³¹Rahàbə̀ nɨ à lə̀ pənə àkwàrə̀ mə̀ngyə̌ à lə̀ nùŋə̀ la ntɨŋmə̀ e aŋunə Nẅùə̀, pɨ ka zhwuutə̀ e a ye pobə pɨ pànə̀ pa nɨ pɨ lə̀ tɨ̀ŋnə̀nə àtwuə̀ ambo Nẅùə̀ ntiinə à lə̀ kẅiirə̀nə pànə̀ pɨ Israel nɨ pɨ lə̀ tônə a nɨ nyoorə̀ ɨlyiʼə ɨ̀shìʼnə̀ a ndzùmə̀ ndzùmə̀.

³²Mbə̀ʼə ǹshankə̀ ngə̀ mbyàa lə ɨghə? Ka nkwùə̀ ɨ̀ pə e ghu ambo mɨ̀ŋə̀ a nɨ shwəŋə̀ mbə̀ʼə Gideon, nɨ Barak, nɨ Somsə̀nə̀, nɨ Jeftà, nɨ Dàfirə̀, nɨ Samuel pobə pɨ ngàŋə ntwuumə̀ Nẅùə̀.

³³Pobə lə̀ làŋə̀ a ndzùmə̀ àpyiimə̀ ntɨŋmə̀ àzobə ndzòŋnə̀ ntsòo pobə ɨ̀laʼà pɨ̀noʼnə ntsàarə̀. Pobə lə̀ ghɨ̀rə̀ mɨ̀nwùə̀ mɨ təəmə̀nə nkɨ nkẅiirə̀ àzwuumə̀ nɨ Nẅùə̀ à lə̀ kàʼnə la. Pobə lə̀ kẅupə̀ mɨ̀ntswùə̀ mɨ pɨ̀puʼmbyìinə̀,

³⁴mbyaatə̀ ɨ̀ləəmə̀ ɨ̀mǔ pɨ̀tɨ̀ŋnə̀, nkɨ̀ɨrə̀ lo mbə̀ʼə pɨ zhwuutə̀ a ghobə nɨ mɨnẅuə ntsòo. Pobə lə̀ patə mborə̀ porə̀nə la mbə̀ŋə̀ ntyiʼə̀ ngàŋə mɨ̀tɨ̀ŋnə̀. Pobə lə̀ pə̀ŋə̀ ntyiʼə̀ ngàŋə ntsòo yɨ̀ tɨ̀ŋnə̀ ndzòŋnə̀ ntsàarə̀ pɨ̀soyì pɨ ɨ̀laʼà pɨ̀nyaanə.

³⁵Pə̀ngyə̌ lə̀ làŋə̀ a ndzùmə̀ àpyiimə̀ ntɨŋmə̀ àzobə nkẅirə̀ nkẅiirə̀ ngàŋə ngẅàrə̀ ɨ̀zobə nɨ pobə lə̀ kwɨghə̀ mə nkẅirə̀ nzhwuumə̀. Pɨ lə̀ kəʼə̀ a pɨ̀tse a ndâ ɨ̀tsaŋə̀ mmə ntàʼà myàʼtə̀ a ghobə, pobə twuunə̀ a ghobə nkwɨghə̀ amwuə ngəʼə̀ mbə̀ʼə ghǎ zhwuumə̀ a nɨ̀wɨghə̀ pə nɨ nɨ̀chyə̂mbyə̂ nɨ à pòŋə̀nə ntsàarə̀.

³⁶Pɨ lə̀ nyèŋə̀ a pɨ̀tse nkəʼə̀ a ghobə, nkorə̀ a pɨ̀tse ntsàa a ghobə a ndâ ɨ̀tsaŋə̀.

³⁷Pɨ lə̀ tumpə̀ a pɨ̀tse nɨ mɨ̀ghòorə, ndiitə̀ a pɨ̀tse ɨ̀tùmə ɨpaa nɨ àsǒ, nzhwuutə̀ a pɨ̀tse nɨ ɨ̀nẅùə ntsòo. Pɨ̀tse lə̀ mə nkarə̀ ngẅî mɨ̀ngòbə̀ mɨ mbyə̂ ndzìrə̀ pobə mbyə̂ ndoŋə̀. Pɨ̀tse lə̀ pə ngàŋə àfumə̀, pɨ mə nnyàŋə̀ a pɨ̀tse, pɨ mə ŋŋâ a pɨ̀tse nɨ ngəʼə̀ ka mɨ̀zùŋə.

³⁸Ka àtwuə̀ ɨ̀shyə̂ zə̀ a lə̀ pirə̀ mbòŋə̀ e ambo pobə. Pobə tyiʼə̀ ndzɨ̀nkə̀ nkarə̀ amwuə ɨlyiʼə waakə pobə pɨ̀kòŋə̀. Pobə lə̀ mə nchyə̂ àtwuə̀ mɨ̀mbarə̀ pobə amwuə mɨ̀mbwùʼə̀ nɨ mɨ̀ngwɨgrə̀ a ɨ̀shyə̂.

³⁹Nẅùə̀ à lə̀ pyiimə̀ lo pànə̀ pèrə pə lə̀ lẅenə̀ nɨ àpyiimə̀ ntɨŋmə̀, la ka ŋwùə̀ ghobə ɨ̀tse a lə̀ kẅiirə̀ e àzwuumə̀ nɨ Nẅùə̀ a lə̀ kàʼnə ambo pobə,

⁴⁰ntiinə Nẅùə̀ à lə̀ nùŋə̀ mə ànwùə̀ nɨ a pòŋə̀nə ntsàarə̀ ambo pə̀ənə̀ lo pobə ghǎ pwuutə̀ la pə̀ənə̀ pɨ pobə pòŋə̀ təəmə̀ ɨ̀shìʼnə̀.