Read Pinyin Hibrù 13 Bible Online

Hibrù 13 - Pinyin bible

Hibrù 13

¹Nɨ̀ làŋə̀ nɨ mbyə̀ ntə nkòŋə̀ a ŋwùə̀ moʼo moʼo tsaʼa pɨlyimə a ndzùmə̀ Kristù.

²Nɨ̀ tə nkẅempə̀ a nɨ kẅiirə̀ ngàŋə nɨ̀ghaanə̀ amwuə mɨ̀ndâ ɨ̀mɨghə, ntiinə pànə̀ pɨ̀tse lə̀ ghɨ̀rə̀ a lenə nkẅiirə̀ pəngèrə̀ amwuə mɨ̀ndâ ɨ̀mobə tɨ zhyə̂.

³Nɨ̀ tə nkẅempə̀ pànə̀ pa nɨ pɨ pənə a ndâ ɨ̀tsaŋə̀ tsaʼa nɨ̀ wə̀ pɨghə pɨ pobə alyiʼə ghu, nkɨ mmə nkẅempə̀ pyə̀ nɨ pobə pə ndzəənə̀ ngəʼə̀ la tsaʼa nɨ̀ wə̀ ndzəənə̀ ngəʼə̀ ghu pɨghə pɨ pobə.

⁴Pànə̀ pɨ̀tsùmə̀ ẅìimə̀ ànwùə̀ nɨ̀zoʼò nɨ àghuʼtə̀, kò nɨ̀ lòo a wɨghə ntsɨ̀ŋnə ntô amwuə nɨ̀zoʼò ntiinə Nẅùə̀ à ghǎ chyâ ɨ̀sàʼa aŋunə ngàŋə àfànə̀ pobə ngàŋə ànyòrə̀kə̀ àtsùmə̀.

⁵Kò nɨ̀ pə a wɨghə nɨ ntoŋə aŋunə nkabə̀, nɨ̀ pə nɨ nɨ̀ghaʼà aŋunə àzwuumə̀ nɨ nɨ̀ pənə nɨ zèrə ntiinə Nẅùə̀ à shwəŋə̀nə lo, “Mbə̀ʼə ǹdaʼa mmyàʼtə̀ mə̀ a wɨghə kə̀ nkɨ ngwaʼà mə̀ a wɨghə apə̀.”

⁶A tə mbəla mbə lə pə̀ənə̀ shwəŋə̀ tɨ àkẅàrə̀ lo, “Ndòʼnə̀mbyə̂ la ngàŋə̀ àyèmpə̀ mə̀ Ka mbə pô mə̀ àzwuumə̀ àtse, Mbə̀ʼə ŋwùə̀ mɨsoŋə a ghɨ̀rə̀ lə àkə ambo mɨ̀ŋə̀?”

⁷Nɨ̀ kẅempə̀ ɨ̀twuə̀ pɨ ntsàambyə̀ nɨ pɨ lə̀ mənə nshwəŋə̀ àshwəŋnə̀ Nẅùə̀ ambo pɨghə. Nɨ̀ kẅempə̀ tsaʼnə nɨ̀chyə̂mbyə̂ ɨghobə a lə̀ pənə pobə pòŋə̀ kwɨghə̀, nkɨ mmə mmɨ̀ŋnə̀ tsaʼnə pobə lə̀ nùŋə̀nə ntɨŋmə̀ ɨ̀ghobə aŋunə Kristù.

⁸Ka Yěsû Kristù a kẅebə̀ e. A tyìʼə̀ ze ɨ̀zòonə, mbə ze mbə sìnə̀, mbə ghǎ ghoŋə̀ nɨ nkuŋə̀.

⁹Kò nɨ̀ pyiimə̀ lo mbuurə̀ mɨ̀nwùə̀ mɨ shwuə̀ mɨ̀tse nɨ pànə̀ pa nnèrə̀ a wɨghə fuukə̀ a wɨghə amwuə àlàŋə yè ɨ̀shìʼnə̀. A pòŋə̀ pə lo àpòŋə̀ ntɨŋmə̀ Nẅùə̀ â ghɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀. Ka pə e pə̀ a nɨ nùŋə̀ pɨ̀mbòomə mbə̀ʼə mɨ̀zɨghə̀ nɨ ka mèrə pə e nɨ àyèmpə̀ àtse ambo pànə̀ nɨ pɨ pə nnùŋə̀ pɨ̀mbòomə pɨ̀ghu.

¹⁰Ka ngàŋə màʼà Nẅùə̀ za nɨ lə̀ mənə nfàʼà amwuə àzuŋə̀ Nẅùə̀ lə̀ pə a ghobə nɨ ɨ̀tɨ̀ŋnə̀ a nɨ zɨghə̀ mɨ̀zɨghə̀ mɨ nɨ̀shwàʼà amwuə alyiʼə nɨ̀shwàʼà ghu.

¹¹Àtwuə̀ pɨ̀fò màʼà Nẅùə̀ pɨ pɨ̀Jew a lə̀ mə ndòo àləəmə̀ mɨ̀nyàamə̀ nkwuunə̀ nshwàʼà nɨ̀shwàʼà amwuə alyiʼə yè laanə̀nə mmyàanə̀ a nɨ sùu tɨ̀pòŋə̀ pə̀ənə̀. Lenəla pɨ tyiʼə̀ ndòo mbòbə̀ ɨ̀zobə nfurə̀ ngə̀ ntòonə̀ a àpyìinə alyiʼə nɨ pànə̀ pɨ̀ghu lə̀ mənə nchyə̂.

¹²Ntii ànwùə̀ zanə, Yěsû à lə̀ kɨ ndzəənə̀ ngəʼə̀ nkwɨghə̀ a àpyìinə mbòmpə àlaʼà gha mbə̀ʼə àləəmə̀ e â sùu pànə̀ pobə laanə̀ aŋunə tɨ̀pòŋə̀ ɨ̀ghobə.

¹³Nɨ ndwuumə̀ wə̀, a kùʼnə̀ lo pə̀ənə̀ furə̀ a àpyìinə ngə̀ ntsirə̀ e nkɨ mbìʼì ɨ̀sɨŋnə̀ wa nɨ à lə̀ pìʼnə la.

¹⁴Mbə̀ʼnə ka pə̀ənə̀ pə wəənə̀ nɨ mbòmpə àlaʼà yɨ̀tse nɨ ɨ ghoŋə̀nə nɨ nkuŋə̀ àtwuə̀ ɨ̀shyə̂ ghə, pə̀ənə̀ pə nnaŋə̀ pə zhyə̀ za nɨ ɨ̀ ghǎ tô la.

¹⁵Tsaʼnə a pənə a lenə la, pə̀ənə̀ tə ndàŋə̀ a ndzùmə̀ Yěsû ŋŋâ ɨ̀pwuumə̀ nɨ̀shwàʼà nkwùə̀ ɨ̀tsùmə̀ ambo Nẅùə̀ a nɨ ghuʼtə̀ e. Lə̌ nchàʼtə Nẅùə̀ nɨ ɨ̀ furə̀nə ambo pəə nɨ pəə pa nshwəŋə̀ nɨ mɨ̀ntswùə̀ ɨ̀məə lo Yěsû la Ndòʼnə̀mbyə̂.

¹⁶Kò nɨ̀ lə̀ənə̀ a nɨ ghɨ̀rə̀ ɨ̀pòŋə̀ kə̀ a nɨ yèmpə̀ pə̀ənə̀ nɨ ɨ̀pwuumə̀ nɨ nɨ̀ pənə nɨ pèrə, ntiinə lə̌ mbuurə̀ mɨ̀shwàʼà nɨ Nẅùə̀ à kòŋə̀nə.

¹⁷Nɨ̀ zuʼnə̀ ɨ̀twuə̀ ɨ̀pɨghə ndzùŋə̀ ànwùə̀ nɨ pobə pə nshwəŋə̀ ambo pɨghə ntiinə pobə pa nnaŋə̀ a wɨghə nkwùə̀ ɨ̀tsùmə̀, nkɨ mbə ghǎ kɨ shwəŋə̀ ambo Nẅùə̀ tsaʼnə pobə pə nfàʼà. Nɨ̀ tə mbəla ndzuʼnə̀ a ghobə, pobə fàʼà àfàʼà àzobə nɨ nɨ̀ghaʼà ntiinə pobə tə mə fàʼà nɨ àsòmnə̀ zèrə za a yèmpə̀ e a wɨghə nɨ àzwuumə̀ àtse apə̀.

¹⁸Nɨ̀ làŋə̀ nɨ mbyə̀ nchàʼtə̀ a Nẅùə̀ nkẅempə̀ a wəə. Pəə zhyə̂ lo mɨ̀ntɨŋmə̀ ɨ̀məə laanə̀ aŋunə àfàʼà nɨ pəə fàʼnə, pəə kɨ ntàʼà a nɨ chyə̂ a nɨ̀chyə̂mbyə̂ nɨ ẅèrə a təəmə̀nə amwuə ɨ̀làŋə ɨ̀tsùmə̀.

¹⁹Ngwə̀ mbuʼù ambo pɨghə lo nɨ̀ tsùŋə̀ nchàʼtə̀ a Nẅùə̀ mbə̀ʼə â ghɨ̀rə̀ n̂faʼa nkẅirə̀ nkwə̂ ambo pɨghə.

²⁰Nẅùə̀ wa nɨ à wa ŋŋâ àporə̀porə̀ nɨ à lə̀ ghɨ̀rə̀nə Ndòʼnə̀mbyə̂ ɨ̀wə̀ənə̀ Yěsû a kẅirə̀ mbə̀ʼkə̀ aŋunə nɨ̀wɨghə̀, mbə ze wa nɨ à pənə ɨ̀mbyabə̀ mɨ̀mbyə̂ ghù ngẅùunə, nkɨ mbə ze nɨ à lə̀ wàrə̀nə ɨ̀kàanə̀ nɨ ɨ ghoŋə̀nə nɨ nkuŋə̀ nɨ àləəmə̀ e,

²¹â ŋâ ɨ̀pwuumə̀ pɨ̀shìʼnə̀ ɨ̀tsùmə̀ nɨ nɨ̀ tàʼnə mbə̀ʼə nɨ̀ kɨ ngɨ̀rə̀ mɨ̀nwùə̀ nɨ Nẅùə̀ à tàʼnə. Â lèrə̀ nɨ mbyə̀ ngɨ̀rə̀ mɨ̀nwùə̀ mɨ̀tsùmə̀ nɨ à wa nkòŋə̀ aŋunə pə̀ənə̀ ndàŋə̀ ndzùmə̀ Yěsû Kristù wa nɨ à pənə nɨ àghuʼtə̀ nɨ a ghoŋə̀nə nɨ nkuŋə̀ nɨ nkuŋə̀. Amen.

²²Pɨlyimə ɨ̀pâ, ngwə̀ mbuʼù mbô ambo pɨghə lo nɨ̀ tsùŋə̀ nzhwiʼtə̀ àshwəŋnə̀ zə̀ nɨ ǎ lə̀ʼtə̀ mɨ̀ntɨŋmə̀ ɨ̀mɨghə, mbaa pə tsaʼnə ka àŋwàʼnə̀ zə̀ à sàa e la.

²³Ǹtàʼà lo nɨ̀ zhyə̂ lo pɨ fuukə̀ a ndyimə ɨ̀wəənə̀ Timotì a ndâ ɨ̀tsaŋə̀. À tə mbəla ndzàŋə̀ ntô, yi pəə ze pɨ tô zəənə̀ a wɨghə.

²⁴Nɨ̀ chàʼtə̀ ɨ̀twuə̀ ɨ̀shwatə̀ ɨ̀tsùmə̀ pobə pànə̀ pɨ Nẅùə̀ pɨ̀tsùmə̀. Pɨlyimə ɨ̀pə̀ənə̀ nɨ pobə pənə a Italy pə nchàʼtə̀ a wɨghə.

²⁵Nẅùə̀ â nèrə̀ àpòŋə̀ ntɨŋmə̀ e aŋunə pɨghə pɨ̀tsùmə̀. Amen.