Read Pinyin Hibrù 2 Bible Online

Hibrù 2 - Pinyin bible

Hibrù 2

¹Pə̀ənə̀ chyə̂ a nɨ təəmə̀ ntɨ̀ŋnə̀ aŋunə nkǔŋə nkuŋə nɨ pə̀ənə̀ lə̀ zuʼnə. Mbə̀ʼnə pə̀ənə̀ lə̀ waʼnə ànwùə̀ nɨ pə̀ənə̀ lə̀ zuʼnə ntyiʼə̀ ndzùŋə̀ mɨ̀nwùə̀ mɨ̀nyaanə.

²Mbə̀ʼnə ntwuumə̀ wa nɨ pəngèrə̀ lə̀ tônə nchwìitə̀ ambo pɨ̀tǎ pɨ̀tǎ ɨ̀pə̀ənə̀ la, ɨ lə̀ pə nkǔŋə nkuŋə. Lenəla Nẅùə̀ à lə̀ chyâ ngəʼə̀ nɨ ɨ̀ kùʼnə̀nə aŋunə ŋwùə̀ wa ntsùmə̀ nɨ ka à lə̀ ghɨ̀rə̀ e ànwùə̀ nɨ ntwuumə̀ wa lə̀ shwəŋə̀nə kə̀ nkɨ ntɨ̀ŋnə̀ àtwuə̀.

³Pə̀ənə̌ kɨ̀ɨrə̀ ngəʼə̀ zə̀ lə ɨla mbə̀ʼə pə̀ənə̀ wâ àlàŋə yè ẅùunə zə̀ nɨ Nẅùə̀ à tàʼnə lo pə̀ənə̀ làŋə̀ amwuə nchwarə̀? Ndòʼnə̀mbyə̂ àtwuə̀ mbɨ̀ŋmə̀ e à lə̀ zàamə̀ nshwəŋə̀ mbə̀ʼə àlàŋə nɨ̀chwarə̀ zèrə zə̀. Pànə̀ nɨ pɨ lə̀ zuʼnə ambo ze pɨ pyiimə̀ ambo pə̀ənə̀ lo a nkǔŋə nkuŋə.

⁴Nẅùə̀ à lə̀ nèrə̀ lo ntwuumə̀ wə̀ a nkǔŋə nkuŋə tsaʼnə à lə̀ ghɨ̀rə̀nə ɨ̀lènə̀ ɨ̀nwùə̀, nɨ mɨ̀nwùə̀ mɨ̀kə̀ʼnə̀nə nɨ mɨ̀nwùə̀ mɨ yerə̀nə yerə̀nə a mbuurə̀ mbuurə̀, Nẅùə̀ a kɨ ngàpə̀ mɨntyaŋnə nɨ Àzhwùə̀ Nẅùə̀ a za ŋŋâ amwuə àlàŋə nɨ a kòŋə̀nə.

⁵Ka Nẅùə̀ a ŋâ e àtwuə̀ ɨ̀shyə̂ zə̀ nɨ pə̀ənə̀ shwəŋə̀nə lo a ghǎ tô la ambo pəngèrə̀ lo pobə puʼtə̀ a zèrə.

⁶Mbə̀ʼnə pɨ shwəŋə̀nə alyiʼə àtse amwuə àŋwàʼnə̀ Nẅùə̀ lo: “Ŋwùə̀ mɨsoŋə lə̌ ɨ̀wə̌ nɨ wə̀ wə̀ nkwàŋə̀ mbə̀ʼə ze tyìʼə̀ lə? Kə̀ moonə̀ ŋwùə̀ mɨsoŋə la ɨ̀wə̌ nɨ wə̀ pyatə̀nə e tyìʼə̀ lə?

⁷Wə̀ lə̀ shwuʼkə̀ e a ɨ̀shyə̂ aŋunə mətùmə nkwùə̀ ntsàarə̀ pəngèrə̀, ntyiʼə̀ ŋŋaŋə̀ e a àtɨ̀ghə ŋŋâ e nɨ àghuʼtə̀ ẅùunə,

⁸ngɨ̀rə̀ a àzwuumə̀ àtsùmə̀ a pə a ɨ̀sùmə ze.” Zèrə a shwəŋə̀ la lo Nẅùə̀ a lə̀ ghɨ̀rə̀ àzwuumə̀ àtsùmə̀ a pə a ɨ̀sùmə ze, ka waʼà e àtse. La tɨ̀tsòŋə̀, pə̀ənə̀ pə zəənə̀ lo ka àzwuumə̀ àtsùmə̀ a pə e a ɨ̀sùmə ze.

⁹La pə̀ənə̀ zəənə̀ a Yěsû wa nɨ Nẅùə̀ à lə̀ shwuʼkə̀nə e a ɨ̀shyə̂ ntsàarə̀ pəngèrə̀, ndàŋə̀ a ndzùmə̀ àpòŋə̀ ntɨŋmə̀ Nẅùə̀ nkwɨghə̀ àtwuə̀ ŋwùə̀ ntsùmə̀ la Nẅùə̀ a tuŋə̀ ngùʼu e, ŋŋâ e nɨ àghuʼtə̀ ntii nɨ̀wɨghə̀ nɨ à lə̀ kwɨghə̀nə.

¹⁰A kùʼnə̀ lo Nẅùə̀ wa nɨ à wa ntsùŋə̀ àzwuumə̀ àtsùmə̀, a kɨ mbə ambo ze la, â ghɨ̀rə̀ Kristù wa nɨ pànə̀ pa ndàŋə̀ a ndzùmə̀ ze mbòŋə̀ nchwarə̀ la, â pòŋə̀ mmyàanə̀ ndàŋə̀ a ndzùmə̀ ngəʼə̀ za nɨ à lə̀ zəənə̀nə ngɨ̀rə̀ lo ɨ̀poonə̀ pɨ̀noʼnə pə nɨ àghuʼtə̀ e.

¹¹Yěsû ẅèrə wə̀ à wa nsùu pànə̀ pɨ laanə̀ aŋunə tɨ̀pòŋə̀ ɨghobə. Ze ghobə pànə̀ pa nɨ a ghɨ̀rə̀nə pɨ laanə̀ la pɨ furə̀ la amwuə tàʼà ngẅàrə̀. La ɨ̀sùmə nɨ ka a pə e nɨ ɨ̀sɨŋnə̀ a nɨ fuŋə̀ a ghobə nɨ pɨlyimə ɨ̀pe.

¹²Ntyiʼə̀ nshwəŋə̀ ambo Nẅùə̀ lo, “Ngǎ shwəŋə̀ mbə̀ʼə o ambo pɨlyimə ɨ̀pâ, ngǎ nkɨ zòbə̀ nchyə àghuʼtə̀ amwuə àshwatə̀ pə̀ənə̀ ɨ̀pô”

¹³A lə̀ kɨ nshwəŋə̀ lo, “Ngǎ nùŋə̀ ntɨŋmə̀ mə̀ aŋunə ze” nkɨ chi shwəŋə̀ alyiʼə àtse lo, “Ngwə̀ a nɨ̀ghə̂ pəə pɨ ɨ̀poonə̀ nɨ Nẅùə̀ a lə̀ ŋânə wə̀.”

¹⁴Tsaʼnə ɨ̀poonə̀ pèrə pə lə̀ pənə nɨ mbòbə̀ mbɨ̀ŋmə̀ pobə àləəmə̀ la, Yěsû à lə̀ kɨ mbə tsaʼa pobə mbə̀ʼə kwɨghə̀ tsə̀ŋə̀ ɨ̀tɨ̀ŋnə̀ ze wa nɨ à lə pənə nɨ ɨ̀tɨ̀ŋnə̀ àtwuə̀ nɨ̀wɨghə̀ la, lə a pə devə̀lə̀.

¹⁵A lə̀ fuukə̀ pànə̀ pa nɨ àkẅàrə̀ nɨ̀wɨghə̀ a lə̀ chyânə a ghobə a ndâ ɨ̀tsaŋə̀ nkwùə̀ nɨ pobə lə̀ pirə̀nə pɨ tɨ̀ŋnə̀.

¹⁶Mbə̀ʼnə a laanə̀ lo ka à lə̀ mə ngyèmpə̀ e la pəngèrə̀, à lə̀ mə ngyèmpə̀ pə ngẅàrə̀ Abràhamə̀ tsaʼnə àŋwàʼnə̀ Nẅùə̀ a shwəŋə̀nə.

¹⁷Nɨ ndwuumə̀ wə̀, à lə̀ chyə̂ a nɨ pə tsaʼa pɨlyimə ɨ̀pe amwuə ɨ̀làŋə ɨ̀tsùmə̀ mbə̀ʼə tyiʼə̀ pə àtwuə̀ pɨ̀fò màʼà Nẅùə̀ àzobə nɨ à wa nkoorə̀ mɨ̀lɨŋə̀ mɨ pə̀ənə̀ nkɨ mmə nfàʼà nɨ ntɨŋmə̀ e ɨ̀tsùmə̀ ngɨ̀rə̀ Nẅùə̀ a sùu a tɨ̀pòŋə̀ pə̀ənə̀.

¹⁸Tsaʼnə à lə̀ zəənə̀nə ngəʼə̀ Satàanə̀ a kwàʼnə̀ e la, mbə̀ʼə a kɨ ngyèmpə̀ pànə̀ nɨ pɨ pənə amwuə àkwàʼnə̀.