Read Pinyin Hibrù 3 Bible Online

Hibrù 3 - Pinyin bible

Hibrù 3

¹Lenəla nɨ pɨlyimə ɨ̀pâ ɨ̀poonə̀ pɨ Kristù nɨ Nẅùə̀ à fuŋə̀nə, nɨ̀ nùŋə̀ àkwàŋə̀ àzɨghə aŋunə Yěsû nɨ à pənə ngàŋə̀ ntwuumə̀ Nẅùə̀ àtwuə̀ ɨ̀pɨ̀ŋmə̀ e, nkɨ mbə àtwuə̀ pɨ̀fò màʼà Nẅùə̀ aŋunə ànwùə̀ za nɨ pə̀ənə̀ nùŋə̀nə ntɨŋmə̀ aŋunə la.

²À lə̀ fàʼà àfàʼà za nɨ Nẅùə̀ à lə̀ tsoʼnə e lo â fàʼà la nɨ ntɨŋmə̀ e ɨ̀tsùmə̀ tyìʼə̀ tsaʼnə Mǔsî à lə̀ kɨnə nfàʼà amwuə ndâ Nẅùə̀ nɨ ntɨŋmə̀ e ɨ̀tsùmə̀.

³Yěsû à chyə̂ nɨ àghuʼtə̀ ntsàarə̀ Mǔsî tyìʼə̀ tsaʼnə pɨ pa nguʼtə̀ a ŋònə̀ nɨ à wa mboomə̀ ndâ ntsàarə̀ ndâ.

⁴Ndâ ntsùmə̀ la à wa mbòomə ŋwùə̀, la Nẅùə̀ a mə mboomə̀ àzwuumə̀ àtsùmə̀.

⁵Mǔsî à lə̀ fàʼà nɨ ntɨŋmə̀ e ɨ̀tsùmə̀ a ndâ Nẅùə̀ tsaʼa ngàŋə̀ àfàʼà, mmə nshwəŋə̀ mɨ̀nwùə̀ nɨ Nẅùə̀ à ghǎ shwəŋə̀.

⁶La Kristù à lə̀ pə àtwuə̀ ndâ Nẅùə̀ nfàʼà nɨ ntɨŋmə̀ e ɨ̀tsùmə̀ tsaʼa moonə̀ e, ndâ ghu ɨ̀ pə la pə̀ənə̀ mbə̀ʼə pə̀ənə̀ ẅìimə̀ ntɨŋmə̀ ntəəmə̀ ntɨ̀ŋnə̀ nkɨ mmə ntèrə̀ aŋunə ànwùə̀ nɨ pə̀ənə̀ pə mbyabə̀ la.

⁷Lenəla, tsaʼnə Àzhwùə̀ Nẅùə̀ a za nshwəŋə̀ lo, “Nɨ̀ zuʼù ngyə̀ Nẅùə̀ sìnə̀ wə̀,

⁸kò nɨ̀ kwùukə̀ a wɨghə mɨ̀ntɨŋmə̀ ɨ̀mɨghə tsaʼnə pɨ̀tǎ ɨ̀pɨghə lə̀ ghɨ̀rə̀nə nkwùə̀ za nɨ pobə lə̀ tɨ̀ŋnə̀nə àtwuə̀ ambo Nẅùə̀, nzhwiʼì e amwuə alyiʼə waakə la.

⁹A nɨyerə ghə, pobə lə̀ zhwiʼì mə̀ nkɨ ndzəənə̀ àfàʼà zhyə̂ nɨ ndə̀ fàʼnə aŋunə nguʼu mɨ̀ghumə̀ nɨ̀kwàa.

¹⁰Nɨ ndwuumə̀ wə̀, ndə̀ pə nɨ àzaŋə̀ loŋə pəə pɨ ɨ̀waanə̀ pànə̀ pèrə pə, ntyiʼə̀ nshwəŋə̀ lo pobə pa nfànə̀ àlàŋə mə̀ nkwùə̀ ɨ̀tsùmə̀ ka chi zhyə̂ zùŋə̀ a ghobə a zèrə.

¹¹Ndə̀ zaŋə̀ loŋə ntsə̀əmə̀ lo, ‘Mbə̀ʼə pobə laʼa nkwuunə̀ a ghobə nzhwuutə̀ pəə pɨ pobə apə̀.’”

¹²Pɨlyimə ɨ̀pâ, nɨ̀ zhìʼtə̀ a wɨghə mbə̀ʼə ŋwùə̀ ɨwɨghə ɨ̀tse a pə nɨ ntɨŋmə̀ tɨ̀pòŋə̀ nɨ ɨ wa ngɨ̀rə̀ lo â myàʼtə̀ a Nẅùə̀ wa nɨ à pənə ghù ntɨ̀ŋnə̀ la.

¹³A nɨ zəənə̀ lo kò tɨ̀pòŋə̀ a fɨ̀kə̀ e ŋwùə̀ ɨwɨghə ɨ̀tse lo ghɨ̀rə̀ ntɨŋmə̀ e ɨ kwùukə̀, nɨ̀ lə̀ʼtə̀ mbɨ̀ŋmə̀ ɨ̀zɨghə nkwùə̀ ɨ̀tsùmə̀ amwuə mɨ̀njyə̂ mɨ̀tsùmə̀ tə mbyàa tsaʼnə mbə̀ʼə nɨ̀ shwəŋə̀ lo, “Sìnə̀ wə̀.”

¹⁴Mbə̀ʼnə pə̀ənə̀ pɨ Kristù fàʼà la a taʼà àfàʼà mbə̀ʼə pə̀ənə̀ ghoŋə̀ amwuə àpyiimə̀ ntɨŋmə̀ za nɨ pə̀ənə̀ lə̀ pənə nɨ zèrə a nɨ̀pìʼnə̀ tə ngǎ ngə̀ ndẅùutə̀.

¹⁵Tsaʼnə àŋwàʼnə̀ Nẅùə̀ a shwəŋə̀nə lo, “Nɨ̀ zuʼù ngyə̀ Nẅùə̀ sìnə̀ wə̀, kò nɨ̀ kwùukə̀ a wɨghə mɨ̀ntɨŋmə̀ ɨ̀mɨghə, tsaʼnə nɨ̀ lə̀ ghɨ̀rə̀nə nkwùə̀ nɨ nɨ̀ lə̀ tɨ̀ŋnə̀nə àtwuə̀ ambo Nẅùə̀.”

¹⁶A lə̀ pə pɨ̀wə̌ nɨ pɨ lə̀ zuʼnə ngyə̀ Nẅùə̀ ntɨ̀ŋnə̀ àtwuə̀ ambo ze? Ka la pə e pànə̀ pa pɨ̀tsùmə̀ nɨ Mǔsî à lə̀ lòonə a ghobə nfurə̀ àlaʼà Egypt la?

¹⁷À lə̀ zaŋə̀ a loŋə pobə pɨ̀wə̌ aŋunə nguʼu mɨ̀ghumə̀ nɨ̀kwàa? Ka a lə̀ pə e la pànə̀ pa nɨ pɨ lə̀ ghɨ̀rə̀nə a tɨ̀pòŋə̀ nkuntə̀ a ɨ̀shyə̂ amwuə alyiʼə waakə nkwɨghə̀ la?

¹⁸Nẅùə̀ à lə̀ tsə̀əmə̀ la ambo pɨ ɨ̀wə̌ lo ka pobə pə zhwùutə̀ a ghobə pobə pɨ pobə? Ka a lə̀ shwəŋə̀ e la ambo pànə̀ pa nɨ pobə lə̀ tɨ̀ŋnə̀nə àtwuə̀ la?

¹⁹Lenəla, pə̀ənə̀ zəənə̀ lo mbə̀ʼə ka pobə lə̀ zhwùutə̀ a ghobə pobə pɨ pobə ntiinə ka pobə lə̀ pə a ghobə nɨ àpyiimə̀ ntɨŋmə̀.