Read Pinyin Hibrù 4 Bible Online

Hibrù 4 - Pinyin bible

Hibrù 4

¹Tsaʼnə Nẅùə̀ à lə̀ kàʼnə a wəənə̀ lo pə̀ənə̀ ghǎ pə nɨ àzhwùutə̀ pə̀ənə̀ pɨ pobə la, pə̀ənə̀ zhìʼtə̀ a wəənə̀ mbə̀ʼə ŋwùə̀ ɨ̀wəənə̀ ɨ̀tse a ghǎ nsaamə̀ a àzhwùutə̀ zèrə zə̀.

²Mbə̀ʼnə pə̀ənə̀ lə̀ zuʼnə ntwuumə̀ ghù ɨ̀shìʼnə̀ wa tyìʼə̀ tsaʼnə pobə lə̀ zuʼnə àzobə, la ka ẅèrə lə̀ yèmpə̀ e a ghobə ntiinə ka pobə lə̀ kẅiirə̀ a ghobə a ẅèrə nɨ àpyiimə̀ ntɨŋmə̀.

³Pə̀ənə̀ pa nɨ pə̀ənə̀ nùŋə̀nə ntɨŋmə̀ ɨ̀wəənə̀ aŋunə ntwuumə̀ ghù ɨ̀shìʼnə̀ wa, pə̀ənə̀ pə̀ nzhwùutə̀ pə̀ənə̀ pɨ Nẅùə̀ ntiinə à lə̀ shwəŋə̀nə mbə̀ʼnə pànə̀ pa nɨ ka pobə nùŋə̀ a ghobə ntɨŋmə̀ ɨ̀ghobə aŋunə ntwuumə̀ ghu la lo, “Tsaʼnə ndə̀ zaŋə̀nə a loŋə ntsə̀əmə̀ la, ka pobə pə ghǎ zhwùutə̀ a ghobə pəə pɨ pobə. A lə̀ shwəŋə̀ zə̀ mbaa pə tsaʼnə a lə̀ myàanə̀ a àfàʼà e a nɨ tsùŋə̀ a àtwuə̀ ɨ̀shyə̂ la.

⁴“Mbə̀ʼnə a za amwuə àŋwàʼnə̀ Nẅùə̀ a alyiʼə àtse mbə̀ʼə njyə̂ sàmbaa lo, Nẅùə̀ à lə̀ fàʼà àfàʼà mmyàanə̀ nzhwùutə̀ aŋunə njyə̂ sàmbaa.”

⁵A kɨ nchi nshwəŋə̀ mbə̀ʼə ànwùə̀ zèrə zə̀ amwuə alyiʼə yètse lo, “Mbə̀ʼə pobə laʼa nzhwùutə̀ a ghobə pəə pɨ pobə apə̀.”

⁶Ànwùə̀ nɨ a pənə ghu a chyə̂ la lo, a ghǎ zhwùutə̀ e pànə̀ pɨ̀tse zhwùutə̀ pobə pɨ Nẅùə̀. La pànə̀ pa nɨ pobə lə̀ zàamə̀nə ndzuʼù ntwuumə̀ ghù ɨ̀shìʼnə̀ wə̀ la pobə̂ zhwùutə̀ a ghobə apə̀ ntiinə pobə lə̀ zuʼnə ka nùŋə̀ a ghobə ntɨŋmə̀ aŋunə.

⁷Lenəla, Nẅùə̀ à lə̀ chi nnùŋə̀ njyə̂ ɨ̀tse nfuŋə̀ nɨ “sìnə̀” ẅùə̀ nɨ à lə̀ pyə̀ mə nkwaa nshwəŋə̀ ndàŋə̀ a ndzùmə̀ ɨ̀fò Dàfirə̀ tsaʼnə pɨ lə̀ pyə̀nə nshwəŋə̀ lo, “Nɨ̀ zuʼù ngyə̀ Nẅùə̀ sìnə̀ wə̀ kò nɨ̀ kwùukə̀ a wɨghə ntɨŋmə̀ ɨ̀wɨghə.”

⁸Joshua à lə pə la ngɨ̀rə̀ pobə zhyə̂ ànwùə̀ mbə̀ʼə àzhwùutə̀ zə̀, yi ka Nẅùə̀ a chi nshwəŋnə̀ e mbə̀ʼə yɨ̀tse njyə̂.

⁹Tsaʼnə a pənə lə la, njyə̂ àzhwùutə̀ ɨ za ghu ambo pànə̀ pɨ Nẅùə̀ tyìʼə̀ tsaʼnə à lə̀ zhwùutə̀nə aŋunə njyə̂ sàmbaa,

¹⁰ntiinə ŋònə̀ wa ntsùmə̀ nɨ a zhwùutə̀nə pobə Nẅùə̀ a kɨ nzhwùutə̀ aŋunə ɨ̀pe ɨ̀fàʼà tyìʼə̀ tsaʼnə Nẅùə̀ à lə̀ kɨnə nzhwùutə̀ aŋunə ɨ̀pe.

¹¹A kùʼnə̀ lo pə̀ənə̀ kyiitə̀ mɨ̀tɨ̀ŋnə̀ ɨ̀məənə̀ mɨ̀tsùmə̀ a nɨ zhwùutə̀ pə̀ənə̀ pɨ Nẅùə̀, nzhìʼtə̀ lo kò ŋwùə̀ ɨ̀wəənə̀ ɨ̀tse a kunə̀ e ndzùŋə̀ àtɨ̀ŋnə̀ àtwuə̀ pànə̀ pɨ ntsàambyə̀.

¹²Mbə̀ʼnə àshwəŋnə̀ Nẅùə̀ a za nchyə̂ amwuə pə̀ənə̀ nkɨ mmə nfàʼà, ntsə̂ ntsàarə̀ ɨ̀nẅùə ntsòo ndzùmə̀ ntsùmə̀ zhyə̂ nɨ ɨ̀ sòbə̀nə ntomnə̀ mbyàa alyiʼə nɨ ntɨŋmə̀ pobə àzhwùə̀ pənə, nkɨ mbyàa alyiʼə nɨ mɨ̀zùnkə pobə ɨ̀kẅìinə nɨ mɨ̀foomə̀ pənə amwuə pa mbwuutə̀. A za nshàrə̀ nzhyə̂ ɨ̀kwàŋə̀ pobə mɨ̀nwùə̀ nɨ mɨ̀ntɨŋmə̀ mɨ pə̀ənə̀ tàʼnə.

¹³Ka àzwuumə̀ àtse a pə ghu nɨ a lə̀əmə̀nə a ɨ̀myə̂ Nẅùə̀; àzwuumə̀ àtsùmə̀ a za sàŋə̀ a mbyə̀ ze wa nɨ ŋwùə̀ ntsùmə̀ à ghǎ təəmə̀ shwəŋə̀ ànwùə̀ e nɨ ntswùə̀ e.

¹⁴Tsaʼnə pə̀ənə̀ pənə nɨ àtwuə̀ pɨ̀fò màʼà Nẅùə̀ yɨ̀ ngẅùunə nɨ à pənə Yěsû Moonə̀ Nẅùə̀ wa nɨ à pə mə a nɨ̀pwuurə̀ la, a pòŋə̀ lo pə̀ənə̀ təəmə̀ ntɨ̀ŋnə̀ aŋunə ànwùə̀ za nɨ pə̀ənə̀ nùŋə̀nə ntɨŋmə̀ aŋunə la.

¹⁵Mbə̀ʼnə ka pə̀ənə̀ pə wəənə̀ la nɨ àtwuə̀ pɨ̀fò màʼà Nẅùə̀ za nɨ à wa ka koorə̀ e mɨ̀lɨŋə̀ ɨ̀məənə̀ aŋunə alyiʼə nɨ pə̀ənə̀ porə̀nə. Pə̀ənə̀ chyə̂ pə nɨ ẅùə̀ wa nɨ Satàanə̀ à lə̀ kwàʼnə̀nə e amwuə ɨ̀làŋə ɨ̀tsùmə̀ tsaʼnə à kɨnə mmə nkwàʼnə̀ a wəənə̀; la ka à lə̀ wɨ̀ghə̀ e.

¹⁶Njiilo nɨ̀ ghɨ̀rə̀ pə̀ənə̀ paatə̀ a Nẅùə̀ nɨ à pənə nɨ àpòŋə̀ ntɨŋmə̀ tɨ àkẅàrə̀ mbə̀ʼə kẅiirə̀ a àkoorə̀ mɨ̀lɨŋə̀ pobə àpòŋə̀ ntɨŋmə̀ za nɨ ǎ yèmpə̀ a wəənə̀ nkwùə̀ za ntsùmə̀ nɨ pə̀ənə̀ tàʼnə.