Read Pinyin Hibrù 5 Bible Online

Hibrù 5 - Pinyin bible

Hibrù 5

¹Pɨ pa ntsoʼò àtwuə̀ pɨ̀fò màʼà Nẅùə̀ àtsùmə̀ amwuə pə̀ənə̀ ɨ̀pe lo â tə ndòo mɨ̀nwùə̀ mɨ pànə̀ pɨ̀ghu ndèrə̀ ambo Nẅùə̀, mmə ŋŋâ ɨ̀pwuumə̀ nchàʼtə Nẅùə̀ nkɨ mmə nshwàʼà mɨ̀shwàʼà ntii tɨ̀pòŋə̀ ɨghobə.

²Tsaʼnə ze àtwuə̀ ɨ̀pɨ̀ŋmə̀ e à porə̀nə amwuə ɨ̀làŋə pɨ̀noʼnə la, à zhyə̂ potə̀ mbɨ̀ŋmə̀ ambo pànə̀ pa nɨ ka pobə zhyə̂ a ghobə ànwùə̀ nkɨ mmə nfàntə̀ mɨ̀nwùə̀.

³Lə̌ ɨ̀sùmə nɨ à chyə̂ a nɨ shwàʼà mɨ̀shwàʼà aŋunə ɨye tɨ̀pòŋə̀ ghobə tɨ̀pòŋə̀ pɨ̀tse pə̀ənə̀.

⁴Ka ŋònə̀ ɨ̀tse a tsoʼò e ɨ̀pɨ̀ŋmə̀ e aŋunə àtwuə̀ pɨ̀fò màʼà Nẅùə̀. À fuŋə̀ Nẅùə̀ nfuŋə̀ tyìʼə̀ tsaʼnə à lə̀ fuŋə̀nə a Erònə̀ la.

⁵A tyìʼə̀ ndəŋə ndəŋə tsaʼnə ka Kristù a lə̀ tsoʼò e mbɨ̀ŋmə̀ e aŋunə àtwuə̀ pɨ̀fò màʼà Nẅùə̀. À lə̀ shwəŋə̀ Nẅùə̀ ambo ze lo, “Ghò la moonə̀ mə̀; ǹtyiʼə̀ mbə tǎ ɨwɨghə sìnə̀.”

⁶Nẅùə̀ a kɨ nchi nshwəŋə̀ alyiʼə àtse lo, “Ghò la ngàŋə̀ màʼà Nẅùə̀ nɨ nkuŋə̀ amwuə aghaŋə ngàŋə̀ màʼà Nẅùə̀ Mèlchizedèkə̀.”

⁷Aŋunə nɨ̀chyə̂mbyə̂ Yěsû amwuə àtwuə̀ ɨ̀shyə̂, à lə̀ mmə nchàʼtə̀ a Nẅùə̀, mbyiitə̀ e nɨ mɨ̀nwùə̀ nɨ nchyə ɨ̀myə̂ àtwuə̀ ze, a Nẅùə̀ wa nɨ à pənə nɨ mɨ̀tɨ̀ŋnə̀ a nɨ chwarə̀ e aŋunə nɨ̀wɨghə̀ la. Nẅùə̀ à lə̀ zuʼù a nɨ̀yìi e ntiinə à lə̀ shwuʼkə̀nə mbɨ̀ŋmə̀ e mmə ndzuʼnə̀ e.

⁸Mbaa pə tsaʼnə à lə̀ pənə Moonə̀ Nẅùə̀, à lə̀ lanə̀ a nɨ zuʼnə̀ ndàŋə̀ a ndzùmə̀ ngəʼə̀ nɨ à lə̀ zəənə̀nə.

⁹Nkwùə̀ nɨ pɨ lə̀ ghɨ̀rə̀nə e a laanə̀ mmyàanə̀, à lə̀ pə̀ŋə̀ ntyiʼə̀ àlàŋə nɨ̀chwarə̀ nɨ a ghoŋə̀nə nɨ nkuŋə̀ ambo pànə̀ pa nɨ pɨ lə̀ mənə ndzuʼnə̀ e.

¹⁰Lenəla, Nẅùə̀ à lə̀ tsoʼò e aŋunə àtwuə̀ pɨ̀fò màʼà Nẅùə̀ yè ẅùunə amwuə aghaŋə ngàŋə̀ màʼà Nẅùə̀ Mèlchizedèkə̀.

¹¹Mɨ̀nwùə̀ mɨ̀noʼnə mə ghu a nɨ shwəŋə̀ mbə̀ʼə ànwùə̀ zə̀ ambo pɨghə, la a tɨ̀ŋnə̀ ambo pəə a nɨ shankə̀ ntiinə nɨ wa nẅàmnə̀ a nɨ lanə̀ ànwùə̀.

¹²Mbaa pə tsaʼnə nɨ̀ pɨ nɨ kɨ pə tɨ̀tsòŋə̀ ɨ pə pɨ̀nèrə̀, nɨ̀ wə̀ mbirə̀ tàʼà a ŋwùə̀ lo a nèrə̀ a wɨghə nɨ ntsàambyə̀ ànwùə̀ amwuə àshwəŋnə̀ Nẅùə̀. Nɨ̀ pə kɨ pə tɨ̀tsòŋə̀ ntyiʼə̀ mmə zɨghə̀ mɨ̀zɨghə̀ mɨ kwurə̀nə la nɨ̀ wə̀ mbirə̀ nnyoŋə̀ nɨ̀pɨŋnə̀.

¹³Ŋwùə̀ wa ntsùmə̀ nɨ a pirə̀nə mmə nnyoŋə̀ nɨ̀pɨŋnə̀ la moonə̀, ka zhyə̂ e ànwùə̀ nɨ a təəmə̀nə pobə zhyə̀ nɨ ka təəmə̀ amwuə àshwəŋnə̀ Nẅùə̀.

¹⁴La mɨ̀zɨghə̀ mɨ kwurə̀nə mɨ chyə̂ ambo pɨlyimə nɨ pobə mèrə̀kə̀ mə nkɨ nzhyə̂ a tə̀chwìi a tɨ̀tɨ̀rə̀ ànwùə̀ yè ɨ̀shìʼnə̀ pobə yè tɨ̀pòŋə̀.