Read Pinyin Hibrù 7 Bible Online

Hibrù 7 - Pinyin bible

Hibrù 7

¹Mèlchizedèkə̀ wə̀ à lə̀ pə ɨ̀fò Salèmə̀ nkɨ mbə ngàŋə̀ màʼà Nẅùə̀koʼò ntsirə̀. Nkwùə̀ nɨ Abràhamə̀ à lə̀ mənə nkwə̂ a ntsòo gha nɨ à lə̀ zhwuutə̀nə pɨ̀fò pa nɨ̀kwàa la, Mèlchizedèkə̀ à lə̀ pwùumə̀ e nchyâ mborə̀ aŋunə ze.

²Lenəla, Abràhamə̀ à lə̀ ghàbə̀ ɨ̀pwuumə̀ pa nɨ à lə̀ kẅiirə̀nə a ntsòo la aŋunə ɨlyiʼə nɨ̀ghumə̀ ŋŋâ a taʼà alyiʼə ambo ze. Ɨ̀sùmə nɨ̀linə̀ Mèlchizedèkə̀ ɨ pyə̀ mbə la lo “Ɨ̀fò nɨ mɨ̀nwùə̀ ɨ̀me təəmə̀nə”; tsaʼnə à lə̀ pənə ɨ̀fò Salèmə̀ la, ɨ̀sùmə nɨ̀linə̀ tsə̀ ɨ̀ kɨ nchi mbə la lo “Ɨ̀fò àporə̀porə̀.”

³Ka pɨ lə̀ zhyə̀ e a tǎ ɨ̀ghobə kə̀ a mǎ e, ka kɨ zhyə̂ e pɨ̀tǎ pɨ̀tǎ ɨ̀pe. Ka pɨ lə̀ zhyə̂ e tsaʼnə pɨ lə̀ pyə̂nə e, ka kɨ zhyə̂ e tsaʼnə à lə̀ kwɨghə̀nə. À chyə̂ mbə tsaʼa Moonə̀ Nẅùə̀, mbə ngàŋə̀ màʼà Nẅùə̀ nɨ à ghoŋə̀nə nɨ nkuŋə̀.

⁴Nɨ̀ lanə ndzəənə̀ mbuurə̀ ŋònə̀ ngẅùunə nɨ Mèlchizedèkə̀ à lə̀ pənə ẅèrə. Abràhamə̀ àtwuə̀ ngẅàrə̀ ɨ̀zə̀ənə̀ à lə̀ ghàpə̀ ɨ̀pwuumə̀ pa nɨ à lə̀ zɨghə̀nə ntsòo nkwə̂ nɨ pèrə la ɨlyiʼə nɨ̀ghumə̀ ŋŋâ taʼà alyiʼə ambo ze.

⁵Mbòomə à nèrə̀ lo àtsɨ̀ŋə̀ Levì nɨ a pənə àtsɨ̀ŋə̀ ngàŋə̀ màʼà Nẅùə̀ a chyə̂ a nɨ kẅiirə̀ a taʼà alyiʼə aŋunə ɨlyiʼə nɨ̀ghumə̀ ambo pɨlyimə ɨ̀pobə mbaa pə tsaʼnə pobə pɨ̀tsùmə̀ pənə àtsɨ̀ŋə̀ Abràhamə̀ la.

⁶La Mèlchizedèkə̀ wə̀ ka à lə̀ pə e ŋwùə̀ àtsɨ̀ŋə̀ Levì, la nkẅiirə̀ a taʼà alyiʼə aŋunə ɨlyiʼə nɨ̀ghumə̀ ambo Abràhamə̀ nchyâ mborə̀ aŋunə ze wa nɨ à lə̀ pənə nɨ mɨ̀nkàʼnə mɨ Nẅùə̀ la.

⁷Ka ànǎ àtse a pə e ghu lo mborə̀ la à wa nchyâ ŋònə̀ ngẅùunə aŋunə ghu nkɨ̂.

⁸Ngə̀ aŋunə ànwùə̀ ngàŋə màʼà Nẅùə̀, pə̀ənə̀ zəənə̀ lo taʼà alyiʼə aŋunə ɨlyiʼə nɨ̀ghumə̀ a kẅiirə̀ pànə̀ nɨ pɨ pa nkwɨghə̀. La ngə̀ aŋunə Mèlchizedèkə̀ ngàŋə̀ màʼà Nẅùə̀, a pə ze wa nɨ à ghoŋə̀nə nɨ nkuŋə̀ tsaʼnə àŋwàʼnə̀ Nẅùə̀ a shwəŋə̀nə.

⁹Mbə̀ʼə ŋwùə̀ a chyə̂ shwəŋə̀ lo Levì ghobə pɨ ngẅàrə̀ e nɨ pobə kẅiirə̀nə a taʼà alyiʼə amwuə ɨlyiʼə nɨ̀ghumə̀ lə̀ kɨ twuə̀ a taʼà alyiʼə aŋunə ɨlyiʼə nɨ̀ghumə̀ ambo Abràhamə̀.

¹⁰Mbə̀ʼnə pɨ chi shwəŋə̀ lo a lə̀ pirə̀ a mbɨ̀ŋmə̀ tǎ pɨ tǎ ɨ̀ghobə Abràhamə̀ nkwùə̀ nɨ Mèlchizedèkə̀ à lə̀ tsirə̀nə e.

¹¹Nẅùə̀ à lə̀ ŋâ a mbòomə ambo pànə̀ pɨ Israel ndzùŋə̀ la tsaʼnə ngàŋə màʼà Nẅùə̀ amwuə àtsɨ̀ŋə̀ Levì à lə̀ ghɨ̀rə̀nə. Àfàʼà ngàŋə màʼà Nẅùə̀ amwuə àtsɨ̀ŋə̀ Levì a lə̀ pəla mbwùumə̀, yi ka ɨ̀sùmə ɨ̀tse ɨ lə̀ chi mbə ghu lo yètse ngàŋə̀ màʼà Nẅùə̀ a tô nɨ a pənə tsaʼa Mèlchizedèkə̀, ka pə e tsaʼnə Erònə̀ à lə̀ pənə.

¹²Mbə̀ʼnə Nẅùə̀ à lə̀ pəla nkẅebə̀ ngẅàrə̀ ngàŋə màʼà Nẅùə̀, yi ǎ kɨ kẅebə̀ a mbòomə

¹³Ntiinə ze wa nɨ pɨ shwəŋə̀nə mɨ̀nwùə̀ mə mbə̀ʼə e la à furə̀ la amwuə ngẅàrə̀ nyàanə. Ŋònə̀ ɨ̀tse à laʼa mə mbirə̀ e tə furə̀ amwuə ngẅàrə̀ e nfàʼà tsaʼa ngàŋə̀ màʼà Nẅùə̀ amwuə alyiʼə mɨ̀shwàʼà.

¹⁴Pə̀ənə̀ zhyə̂ tyìʼə̀ ɨ̀shìʼnə̀ lo Ndòʼnə̀mbyə̂ ɨ̀wə̀ənə̀ à lə̀ furə̀ la amwuə àtsɨ̀ŋə̀ Judà, la ka Mǔsî a lə̀ shwəŋə̀ e ànwùə̀ àtse mbə̀ʼə ngẅàrə̀ zèrə zə̀ nkwùə̀ nɨ à lə̀ mənə nshwəŋə̀ mɨ̀nwùə̀ mbə̀ʼə ngàŋə màʼà Nẅùə̀ la.

¹⁵Ànwùə̀ zèrə zə̀ ǎ tsùŋə̀ chi furə̀ laanə̀ mbə̀ʼə ngàŋə̀ màʼà Nẅùə̀ ghùtse a wùutə̀ ntô mbə tsaʼa Mèlchizedèkə̀,

¹⁶Ẅùə̀ wa nɨ à pənə ngàŋə̀ màʼà Nẅùə̀ ka zùŋə̀ e pə a mbòomə nɨ ŋwùə̀ mɨsoŋə à nùŋə̀nə nzhyə̂ ngẅàrə̀ nɨ ngàŋə màʼà Nẅùə̀ à wa nfurə̀ amwuə. Pɨ lə̀ zùŋə̀ pə ɨ̀tɨ̀ŋnə̀ wa nɨ ɨ pənə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀.

¹⁷Àŋwàʼnə̀ Nẅùə̀ a shwəŋə̀ mbə̀ʼə e lo, “Ghǒ ngàŋə̀ màʼà Nẅùə̀ nɨ à ghoŋə̀nə nɨ nkuŋə̀ amwuə ngẅàrə̀ ngàŋə màʼà Nẅùə̀ Mèlchizedèkə̀.”

¹⁸Pɨ lə̀ waʼà a mbòomə ghu ndwùnə̀ wa ntiinə ka a lə̀ chi mbə e nɨ ɨ̀tɨ̀ŋnə̀ ɨ̀tse, ka kɨ chi pə e nɨ àfàʼà àtse.

¹⁹Ka mbòomə wa nɨ Nẅùə̀ à lə̀ ŋânə ndàŋə̀ a ndzùmə̀ Mǔsî la à lə̀ ghɨ̀rə̀ e ànwùə̀ àtse â təəmə̀; la tɨ̀tsòŋə̀, Nẅùə̀ a ŋâ mə a wəənə̀ nɨ àzwuumə̀ nɨ a pòŋə̀nə ntsàarə̀ lo pə̀ənə̀ tyiʼə̀ mbyabə̀: a pə àzwuumə̀ nɨ a pɨ lòo a wəənə̀ paatə̀ a Nẅùə̀.

²⁰Yètse ànwùə̀ a chi nkẅìʼnə̀ aŋunə lo Nẅùə̀ à lə̀ kɨ nùŋə̀ a ngàŋə̀ màʼà Nẅùə̀ ẅèrə wə̀ la ntsə̀əmə̀. Ka pɨ lə̀ tsə̀əmə̀ e nkwùə̀ nɨ pɨ lə̀ mənə nnùŋə̀ a zhyə̀ ngàŋə màʼà Nẅùə̀.

²¹Yěsû à lə̀ pə ngàŋə̀ màʼà Nẅùə̀ ntiinə Nẅùə̀ à lə̀ tsə̀əmə̀nə nshwəŋə̀ ambo ze lo, “Ndòʼnə̀mbyə̂ à tsə̀əmə̀ mə mbə kẅebə̀ e ntɨŋmə̀ e apə̀: ‘ghǒ ngàŋə̀ màʼà Nẅùə̀ nɨ à ghoŋə̀nə nɨ nkuŋə̀ la.’”

²²Tə̀chwìi ẅèrə wə̀ a ghɨ̀rə̀ Yěsû a pə ŋònə̀ nɨ à ghɨ̀rə̀nə pə̀ənə̀ zhyə̂ a nkǔŋə nkuŋə lo ɨ̀kàanə̀ wə̀ a ẅùə̀ nɨ ɨ pòŋə̀nə ntsàarə̀.

²³Tə̀chwìi ɨ̀tse a chi mbə ghu lo: zhyə̀ ngàŋə màʼà Nẅùə̀ lə̀ noʼò ntiinə pobə lə̀ mənə nkwɨkə̀ ka àfàʼà àzobə a chi mmə ndèrə̀ e nɨ mbyə̀.

²⁴La Yěsû à wə̀ ghu nkwùə̀ ɨ̀tsùmə̀. Ka ŋònə̀ ɨ̀tse a pə e ghu nɨ mbə̀ʼə a lòo alyiʼə e tsaʼa ngàŋə̀ màʼà Nẅùə̀.

²⁵Lenəla, à wə̀ ghu nkwùə̀ ɨ̀tsùmə̀ a nɨ chwarə̀ a ŋwùə̀ wa ntsùmə̀ nɨ à làŋə̀nə a ndzùmə̀ ze ntô ambo Nẅùə̀ ntiinə à wə̀ nchàʼtə̀ a Nẅùə̀ nkwùə̀ ɨ̀tsùmə̀ àtwuə̀ nɨ pobə.

²⁶A kùʼnə̀ lo pə̀ənə̀ pə nɨ mbuurə̀ àtwuə̀ pɨ̀fò màʼà Nẅùə̀ zə̀ nɨ à laanə̀nə ka pə e nɨ ɨ̀fèrə ɨ̀tse, ka kɨ pə e nɨ ntsɨ̀ŋnə ɨ̀tse. Nẅùə̀ à fuukə̀ mə e ngɨ̀rə̀ a pə chwìi aŋunə ngàŋə ngɨ̀rə̀ ɨ̀nwùə̀ tɨ̀pòŋə̀, ŋŋaŋə̀ e àtɨ̀ghə ngɨ̀rə̀ a tsàarə̀ a ŋwùə̀ ntsùmə̀ a nɨ̀pwuurə̀.

²⁷Ka à lə̀ pə e la tsaʼa pyə̀ ɨ̀twuə̀ pɨ̀fò màʼà Nẅùə̀ a nɨ mə mmàʼà a Nẅùə̀ njyə̂ ɨ̀tsùmə̀ njyə̂ ɨ̀tsùmə̀ mbə̀ʼə tɨ̀pòŋə̀ e, mbòŋə̀ tyiʼə̀ mmàʼà aŋunə tɨ̀pòŋə̀ pɨ̀tse pə̀ənə̀. À lə̀ màʼà a Nẅùə̀ aŋunə tɨ̀pòŋə̀ ɨ̀ghobə a taʼà nkwùə̀ amwuə nkwùə̀ za nɨ à lə̀ ŋânə mbɨ̀ŋmə̀ e tsaʼa àzwuumə̀ nɨ̀shwàʼà.

²⁸Mbòomə Mǔsî a lə̀ tsoʼò la pànə̀ nɨ pɨ lə̀ porə̀nə tsaʼa ɨ̀twuə̀ pɨ̀fò màʼà Nẅùə̀, la ànwùə̀ za nɨ Nẅùə̀ à lə̀ kàʼnə ntsə̀əmə̀ nɨ a tyiʼnə ndzùŋə̀ a mbòomə, à lə̀ tsoʼò a Moonə̀ e aŋunə àtwuə̀ pɨ̀fò màʼà Nẅùə̀ nɨ a koʼnə nkùʼù ngoŋə̀ nɨ nkuŋə.