Read Pinyin Hibrù 8 Bible Online

Hibrù 8 - Pinyin bible

Hibrù 8

¹Ànwùə̀ nɨ pə̀ənə̀ tàʼnə a nɨ shwəŋə̀ a chyə̂ la lo pə̀ənə̀ chyə̂ nɨ àtwuə̀ pɨ̀fò màʼà Nẅùə̀ nɨ a nwuunə̀nə a pàa àpô Nẅùə̀ Àkoʼntsirə̀ yè zɨghə̀nə aŋunə aləŋə nɨ̀fò e a nɨ̀pwuurə̀.

²À wa nfàʼà àfàʼà e tsaʼa àtwuə̀ pɨ̀fò màʼà Nẅùə̀ amwuə alyiʼə yè laanə̀nə, nɨ a pənə ngotə àzuŋə̀ za nɨ à korə̀nə Ndòʼnə̀mbyə̂ ka korə̀ e ŋwùə̀ mɨsoŋə la.

³Nẅùə̀ à wa ntsoʼò àtwuə̀ pɨ̀fò màʼà Nẅùə̀ àtsùmə̀ la lo â ŋâ ɨ̀pwuumə̀ nchàʼtə Nẅùə̀ pobə ɨ̀pwuumə̀ nɨ̀shwàʼà nɨ pànə̀ pa ndòo ntô. Lenəla, a kɨ nkùʼnə̀ lo wə̀ pə nɨ àzwuumə̀ àtse a nɨ ŋâ.

⁴Yěsû à lə̀ pəla mbə àtwuə̀ ɨ̀shyə̂ ghə, yi mbə̀ʼə ka à pə e ngàŋə̀ màʼà Nẅùə̀, ntiinə ngàŋə màʼà Nẅùə̀ lə̀ mə ŋŋâ ɨ̀pwuumə̀ nɨ̀shwàʼà pobə ɨ̀pwuumə̀ nchàʼtə Nẅùə̀ ndzùŋə̀ la mbòomə.

⁵Pobə lə̀ mə nfàʼà amwuə alyiʼə yè laanə̀nə za nɨ a shwuə̀nə nkɨ mbə tsaʼa ləgrə àzwuumə̀ zhyə̀ nɨ a pənə a nɨ̀pwuurə̀. Ntiinə nkwùə̀ nɨ Mǔsî à lə̀ pənə korə̀ àzuŋə̀ Nẅùə̀, Nẅùə̀ à lə̀ kwàtə̀ nshwəŋə̀ lo, “Zəənə̀ lo wə̀ korə̀ àzuŋə̀ zə̀ ndzùŋə̀ tyìʼə̀ tsaʼnə ndə̀ nèrə̀nə o a àtwuə̀ mbarə̀ la.”

⁶La àfàʼà ngàŋə̀ màʼà Nẅùə̀ nɨ Yěsû à pənə nɨ zèrə a tsàarə̀ àzobə, tyìʼə̀ tsaʼnə ɨ̀kàanə̀ wa nɨ à lə̀ tsùnkə̀nə a tɨ̀tɨ̀rə̀ Nẅùə̀ pobə pə̀ənə̀ ɨ lə̀ pòŋə̀ ntsàarə̀ a ghu lwùnə̀, ntiinə nkàʼnə za nɨ à lə̀ ghɨ̀rə̀nə amwuə ɨ̀kàanə̀ ghu ɨ̀ lə̀ pòŋə̀ ntsàarə̀.

⁷Mbə̀ʼnə ɨ̀kàanə̀ ghù lwùnə̀ wa ɨ lə̀ pə la ka pə e nɨ ànwùə̀ tɨ̀pòŋə̀ àtse, yi ka ɨ̀sùmə ɨ̀tse ɨ lə̀ chi mbə e ghu a nɨ lòo ghu nyaanə ɨ̀kàanə̀ ntô nɨ ẅèrə.

⁸La Nẅùə̀ à lə̀ zəənə̀ àwɨ̀ghə̀ ànwùə̀ amwuə pə̀ənə̀ ɨ̀pe ntyiʼə̀ nshwəŋə̀ lo, “À shwəŋə̀ mɨ̀ŋə̀ Ndòʼnə̀mbyə̂ lo nkwùə̀ ɨ̀ zə̀ ntô nɨ mbɨ wàrə̀ ɨ̀kàanə̀ ghù shwuə̀ pəə pɨ pànə̀ pɨ Israel, nɨ pəə pɨ pànə̀ pɨ Judà.

⁹Ka ɨ̀kàanə̀ wə̀ ɨ pə ghǎ pə e la tsaʼa ẅùə̀ nɨ ndə̀ wàrə̀nə pəə pɨ̀tǎ pɨ tǎ ɨ̀pobə njyə̂ nɨ ndə̀ ẅìimə̀nə àpô àzobə nfurə̀ a àlaʼà Egypt, ntiinə ka pobə lə̀ nùŋə̀ a ghobə ntɨŋmə̀ ɨ̀ghobə aŋunə ɨ̀kàanə̀ nɨ ndə̀ wàrə̀nə pəə pɨ pobə. Lenəla, ǹtumə̀ ndzùmə̀ mə̀ ŋŋâ nɨ pobə. À shwəŋə̀ mɨ̀ŋə̀ Ndòʼnə̀mbyə̂.

¹⁰Lə̌ ɨ̀kàanə̀ nɨ mbɨ ghǎ wàrə̀ pəə pɨ pànə̀ pɨ Israel amwuə mɨ̀njyə̂ nɨ mɨ ghǎ tô, la a shwəŋə̀ mɨ̀ŋə̀ Ndòʼnə̀mbyə̂: Mbɨ ghǎ chyâ pɨ̀mbòomə ɨ̀pâ amwuə ɨ̀twuə̀ ɨ̀pobə kɨ ŋwàʼnə̀ a pèrə amwuə mɨ̀ntɨŋmə̀ ɨ̀mobə. Mbɨ ghǎ pə Nẅùə̀ ɨ̀ghobə, pobə kɨ mbə pə̀ənə̀ ɨ̀pâ.

¹¹Ka ŋwùə̀ a pə ghǎ chi nèrə̀ a ŋwùə̀ ɨ̀ghobə ɨ̀tse kə̀ a ndyimə e nɨ ŋònə̀ nɨ m̀bənə ẅèrə, nshwəŋə̀ lo, ‘Zhyə̂ a Ndòʼnə̀mbyə̂,’ ntiinə pobə pɨ̀tsùmə̀ ghǎ zhyə̂ mə̀, a nɨ pìʼnə̀ aŋunə mɨlyiʼə mɨnkɨ̂ tə ghə̀ pyàa aŋunə ndɨ̀ŋmə̂.

¹²Ntiinə ngǎ lə̀ənə̀ a tɨ̀pòŋə̀, chi kẅempə̀ mə̀ ɨ̀fàntə̀ ɨ̀nwùə̀ ɨ̀pobə apə̀.”

¹³Tsaʼnə Nẅùə̀ à fuŋə̀nə ɨ̀kàanə̀ wə̀ nɨ ghù shwuə̀ la, a ghɨ̀rə̀ ka ghu lwùnə̀ chi mbə e nɨ ɨ̀tɨ̀ŋnə̀; lenəla, àzwuumə̀ nɨ ka à chi mbə e nɨ ɨ̀tɨ̀ŋnə̀ a tyiʼə̀ mbɨ̂ la pɨ̂nə ndẅùutə̀ mmyə̀.