Read Pinyin Hibrù 9 Bible Online

Hibrù 9 - Pinyin bible

Hibrù 9

¹Ɨ̀kàanə̀ ghù lwùnə̀ lə̀ pə nɨ ɨ̀pe pɨ̀mbòomə a nɨ nèrə̀ tsaʼnə mbə̀ʼə pɨ səəkə̀ a Nẅùə̀. Ɨ wa nkɨ nnèrə̀ farə alyiʼə a nɨ səəkə̀ a Nẅùə̀ a àtwuə̀ ɨ̀shyə̂.

²Pɨ lə̀ korə̀ àzuŋə̀ Nẅùə̀ ngàbə̀ nɨ atsəʼə aŋunə ɨlyiʼə ɨpaa, nfuŋə̀ ndzùmə̀ àpyìinə nɨ alyiʼə yè laanə̀nə. Amwuə alyiʼə yè laanə̀nə zə̀ à lə̀ pə aləŋə làamə̀ nɨ tepèrə̀ pobə àpaanə̀ nɨ pɨ ŋânə ambo Nẅùə̀.

³Pɨ lə̀ fuŋə̀ ndzùmə̀ ɨmwuə nɨ alyiʼə nɨ a laanə̀nə mmyàanə̀.

⁴Alyiʼə mɨ̀shwàʼà a lə̀ pə amwuə alyiʼə zèrə zə̀ nɨ pɨ tsùŋə̀nə nɨ goldə̀ a nɨ tòonə̀ alyiinə aŋunə, nɨ nkwùumə̀ ɨ̀kàanə̀ nɨ pɨ lə̀ tsùŋə̀nə ndzùmə̀ àpyìinə nɨ goldə̀. Amwuə nkwùumə̀ ẅèrə wə̀, manna à lə̀ pə amwuə àmbaŋə nɨ pɨ tsùŋə̀nə nɨ goldə̀. Mbàŋə̀ Erònə̀ nɨ mɨfuə lə̀ pirə̀nə mmə mmwutə̀ aŋunə ghobə ɨ̀pàpə̀ mɨ̀ghòorə pa ɨpaa nɨ pɨ lə̀ ŋwàʼnə̀nə mɨ̀ntə̌ mɨ Nẅùə̀ aŋunə la lə̀ kɨ mbə amwuə.

⁵A àtwuə̀ nkwùumə̀ ghu, pɨ̀tɨtoo pɨ̀cherùbimə̀ lə̀ təəmə̀ aŋunə a nɨ nèrə̀ lo Nẅùə̀ à wə̀ ghu. Mɨ̀pàrə̀ mɨ pɨ̀cherùbimə̀ pə̀ lə̀ kẅupə̀ alyiʼə nɨ Nẅùə̀ à wa ndə̀ənə̀ a tɨ̀pòŋə̀ pə̀ənə̀ ghu. La ka lə pə e nkwùə̀ nɨ mbə̀ʼə pə̀ənə̀ shwəŋə̀ mɨ̀nwùə̀ mèrə mə mɨ̀tsùmə̀ a nɨ̀yèrə nɨ̀yèrə.

⁶Nkwùə̀ nɨ pɨ tsùnkə̀nə ɨlyiʼə pə a lenə la, ngàŋə̀ màʼà Nẅùə̀ à lə̀ tyiʼə̀ mmə nkwuunə̀ amwuə ntaŋə ghu àpyìinə wa njyə̂ ɨ̀tsùmə̀ nfàʼà àfàʼà àzobə.

⁷La ngə̀ aŋunə ntaŋə wa amwuə ɨmwuə, à lə̀ mə nkwuunə̀ e pə ndàʼà àtwuə̀ pɨ̀fò màʼà Nẅùə̀ a taʼà nkwùə̀ aŋunə nguʼu. Ka à lə̀ mə nkwuunə̀ e tɨghu à lòo àləəmə̀ a nɨ màʼà Nẅùə̀ ghu ntii tɨ̀pòŋə̀ e pobə tɨ̀pòŋə̀ pɨ̀tse pə̀ənə̀ nɨ pobə lə̀ mənə nfàntə̀ nɨ ɨ̀pùʼu.

⁸Aŋunə ɨ̀nwùə̀ pèrə pə ɨ̀tsùmə̀, Àzhwùə̀ Nẅùə̀ a lə̀ mə nnèrə̀ lo ka àlàŋə a nɨ kwuunə̀ amwuə alyiʼə yè laanə̀nə mmyàanə̀ za a lə̀ nyaʼkə̀ e mbə̀ʼə ntaŋə yè àpyìinə wa pirə̀ ntəəmə̀ alyiʼə ghu.

⁹Lə lə̀ pə la àlènə̀ a nɨ nèrə̀ ànwùə̀ nɨ a pənə ghu tɨ̀tsòŋə̀. Zèrə zə̀ a nèrə̀ la lo ka ɨ̀pwuumə̀ nchàʼtə Nẅùə̀ pobə ɨ̀pwuumə̀ nɨ̀shwàʼà nɨ pɨ lə̀ mənə ŋŋâ ambo Nẅùə̀ lə̀ kùʼnə̀ e a nɨ sùu mɨ̀ntɨŋmə̀ mɨ pə̀ənə̀ nɨ pobə lə̀ mənə nguʼtə̀ a Nẅùə̀ lo mèrə laanə̀.

¹⁰Tsaʼnə mɨ̀nwùə̀ mèrə mə lə̀ pənə e pə ndàʼà mɨ̀nwùə̀ nchyâ mɨ̀zɨghə̀ nɨ mɨ̀lùʼù farə ɨ̀làŋə ɨ̀tsùmə̀ a nɨ sùu pə̀ənə̀ pɨ laanə̀ a ndzùmə̀ àpyìinə la, pɨ lə̀ mə ngɨ̀rə̀ mɨ̀nwùə̀ mèrə mə la a nɨ pyabə̀ nkwùə̀ nɨ Nẅùə̀ ǎ tô kẅepə̀ mɨ̀nwùə̀ mèrə̂ tyiʼə̀ mɨ̀shwuə̀.

¹¹Nkwùə̀ nɨ Kristù à lə̀ tônə tsaʼa àtwuə̀ pɨ̀fò màʼà Nẅùə̀ ntii mɨ̀nwùə̀ mɨ ɨ̀shìʼnə̀ ma nɨ mɨ tyiʼə̀ mə e a nɨ̀ghə̂ la, à lə̀ làŋə̀ amwuə àzuŋə̀ Nẅùə̀ nɨ a laanə̀nə ntsàarə̀ nɨ ka à korə̀ e ŋwùə̀ mɨsoŋə, ka kɨ pə e àzwuumə̀ nɨ pɨ tsùŋə̀nə a àtwuə̀ ɨ̀shyə̂ ghə̀.

¹²Nkwùə̀ nɨ Kristù à lə̀ kwuunə̀nə nɨ nkuŋə̀ amwuə alyiʼə nɨ a laanə̀nə mmyàanə̀ amwuə àzuŋə̀ za, ka à lə lòo e pə àləəmə̀ mbyə̂ kə̀ àləəmə̀ moonə̀ nyàamə̀ tsaʼa àzwuumə̀ nɨ̀shwàʼà. À lə̀ lòo pə àze àləəmə̀ a nɨ lòo nchwarə̀ a wəənə̀ ghu nɨ nkuŋə̀.

¹³Tsaʼnə pɨ pa ndòo àləəmə̀ mɨ̀mbyə̂ pobə àləəmə̀ pɨ̀lwuumə̀ pɨ nyàamə̀ farə àpwuə̀ ɨ̀poonə̀ pɨ nyàamə̀ nkẅìrə̀ aŋunə pànə̀ nɨ ka pobə laanə̀ a ghobə a nɨ zùŋə̀ a mbòomə nɨ pɨ pa nguʼtə̀ a Nẅùə̀ ngɨ̀rə̀ pobə laanə̀ a ndzùmə̀ ɨsɨghə la,

¹⁴pobə̌ tyiʼə̀ laanə̀ pə la mbə̀ʼə pɨ sùu a ghobə nɨ àləəmə̀ Kristù! A nɨ zùŋə̀ mɨ̀tɨ̀ŋnə̀ mɨ Àzhwùə̀ ma nɨ mɨ ghoŋə̀nə nɨ nkuŋə̀ la, Kristù à lə̀ ŋâ ɨ̀pɨ̀ŋmə̀ e tsaʼa àzwuumə̀ nɨ̀shwàʼà nɨ ka a pə e nɨ àlòʼo ambo Nẅùə̀. Àləəmə̀ e a pɨ sùu mɨ̀ntɨŋmə̀ ɨ̀məənə̀ mɨ laanə̀ aŋunə mɨ̀nwùə̀ mɨ tɨ̀pòŋə̀ ma nɨ mɨ ma ndòo a nɨ̀wɨghə̀ ntô, njiilo pə̀ənə̀ fàʼà ambo Nẅùə̀ wa nɨ à wə̀ nchyə̂ la.

¹⁵Nɨ ndwuumə̀ wə̀, Kristù à chyə̂ mbə ŋònə̀ nɨ à wə̀ ntsùnkə̀ ɨ̀kàanə̀ ghù shwuə̀ a tɨ̀tɨ̀rə̀ ŋwùə̀ mɨsoŋə pobə Nẅùə̀. Ɨ̀sùmə ɨ̀ chyə̂ mbə lo à tàʼà lo pànə̀ pa nɨ Nẅùə̀ à fuŋə̀nə lo pobə̂ tô mbə pə̀ənə̀ ɨ̀pe pobə̂ kẅiirə̀ mborə̀ za nɨ ɨ̀ ghoŋə̀nə nɨ nkuŋə̀ la nɨ Nẅùə̀ à lə̀ kàʼnə. A chyə̂ lə la ntiinə à lə̀ kwɨghə̀nə tsaʼa mômbyə̂ nɨ̀shwàʼà a nɨ sùu a tɨ̀pòŋə̀ pə̀ənə̀ nkwùə̀ nɨ pobə lə̀ pirə̀nə a ɨ̀sùmə ɨ̀kàanə̀ ghù lwùnə̀.

¹⁶Mbə̀ʼə ka pɨ̀ shwəŋə̀ e ntə̌ nɨ̀wɨghə̀ ŋwùə̀ nkwùə̀ nɨ à pirə̀nə ghù ntɨ̀ŋnə̀.

¹⁷Mbə̀ʼə ka pɨ̀ ghɨ̀rə̀ e ànwùə̀ àtse amwuə ntə̌ nɨ̀wɨghə̀ nɨ ŋònə̀ nɨ à pirə̀nə e ghù ntɨ̀ŋnə̀. Pɨ pa nfàʼà nɨ ntə̌ nɨ̀wɨghə̀ pə nkwùə̀ nɨ ŋònə̀ nɨ à ŋânə a ẅèrə à kwɨghə̀nə.

¹⁸La ɨ̀sùmə nɨ ɨ̀kàanə̀ ghù ntsàambyə̀ ɨ lə̀ fàʼnə pə ntii àləəmə̀ la.

¹⁹Mǔsî à lə̀ zàamə̀ ntiitə̀ pànə̀ nɨ mɨ̀ntə̌ mɨ̀tsùmə̀ tsaʼnə mɨ pənə amwuə mbòomə. Lenəla, à lə̀ lòo àləəmə̀ ɨ̀poonə̀ pɨ nyàamə̀ nnyàamə̀ ghobə nchyə, ndòo mɨ̀nyùŋə̀ mɨ mbyə̂ mɨ ndzìrə̀ mɨ pàŋə̀nə nkorə̀ aŋunə mɨ̀fàa mɨ àtɨ̀ghə hisòpə̀, ntsùbə̀ amwuə àləəmə̀ za ndzàrə̀ aŋunə àŋwàʼnə̀ mbòomə pobə pɨ pànə̀ pɨ̀tsùmə̀.

²⁰Tsaʼnə à lə̀ ghɨ̀rə̀nə a lenə la, a shwəŋə̀ lo, “Lə̌ àləəmə̀ za nɨ a korə̀nə a wɨghə aŋunə ɨ̀kàanə̀ wa nɨ Nẅùə̀ à lə̀ shwəŋə̀nə lo nɨ̀ nùŋə̀ la.”

²¹À lə̀ kɨ ngɨ̀rə̀ tyìʼə̀ a lenə a nɨ zàrə̀ àləəmə̀ aŋunə àzuŋə̀ Nẅùə̀ pobə pɨ àzwuumə̀ àtsùmə̀ nɨ pɨ pa ndòo nsəəkə̀ a Nẅùə̀ ghu.

²²A tyìʼə̀ nkǔŋə nkuŋə tsaʼnə mbòomə à nèrə̀nə lo pɨ pa ndòo la àləəmə̀ ndòo ngɨ̀rə̀ ɨ̀pwuumə̀ pɨ̀noʼnə laanə̀, Nẅùə̀ a kɨ mmə ndə̀ənə̀ a tɨ̀pòŋə̀ pə̀ənə̀ pə nkwùə̀ nɨ pɨ kẅìrə̀nə a àləəmə̀.

²³Pɨ lə̀ chyə̂ a nɨ sùu ɨ̀pwuumə̀ pa nɨ shwuə̀nə a pyə̀ nɨ pənə a nɨ̀pwuurə̀ nɨ àləəmə̀ nyàamə̀. La nɨ̀shwàʼà tsɨ̀ nyaanə nɨ nɨ tsàarə̀nə a tsə̀ chyə̂ ghu nɨ mbə̀ʼə pɨ lòo nsùu ɨ̀pwuumə̀ nɨ pənə a nɨ̀pwuurə̀.

²⁴Mbə̀ʼnə ka Kristù à lə̀ kwuunə̀ e amwuə alyiʼə yè laanə̀nə za nɨ à tsùŋə̀nə pànə̀ pɨ mɨsoŋə, nɨ a lə̀ shwuə̀nə a ye nkǔŋə nkuŋə. La Kristù a kwuunə̀ pə a nɨ̀pwuurə̀ alyiʼə nɨ à tyiʼnə ntəəmə̀ ghu àtwuə̀ nɨ pə̀ənə̀ a mbyə̀ Nẅùə̀.

²⁵Àtwuə̀ pɨ̀fò màʼà Nẅùə̀ a za nkwuunə̀ amwuə alyiʼə yè laanə̀nə za a taʼà nkwùə̀ aŋunə taʼà nguʼu nɨ àləəmə̀ nyàamə̀. La ka Kristù à lə̀ kwuunə̀ e pə a nɨ tə ŋŋâ mbɨ̀ŋmə̀ e nkwùə̀ noʼnə.

²⁶A lə̀ pə la mbə a lenə yi à lə̀ pə zəənə̀ ngəʼə̀ nkwùə̀ noʼnə a nɨ furə̀ tsaʼnə Nẅùə̀ à lə̀ tsùŋə̀nə àtwuə̀ ɨ̀shyə̂. La tɨ̀tsòŋə̀, à tô mə a tàʼà nkwùə̀ nɨ nkuŋə̀ ŋŋâ mbɨ̀ŋmə̀ e tsaʼa mômbyə̂ nɨ̀shwàʼà amwuə ndẅùutə nkwùə̀ a nɨ pyaatə̀ a tɨ̀pòŋə̀ pə̀ənə̀.

²⁷Ŋwùə̀ à chyə̂ a nɨ kwɨghə̀ a taʼà nkwùə̀. Tsaʼnə à kwɨghə̀nə, Nẅùə̀ ǎ tyiʼə̀ tsoʼtə̀ e.

²⁸Lenəla Nẅùə̀ à lə̀ ŋâ a Kristù tsaʼa mômbyə̂ nɨ̀shwàʼà a taʼà nkwùə̀ a nɨ lòo mbyaatə̀ a tɨ̀pòŋə̀ pànə̀ pɨ̀noʼnə. À ghǎ kẅirə̀ tô; ka pə chi tô e pə a nɨ pyaatə̀ a tɨ̀pòŋə̀, la tyìʼə̀ tô pə a nɨ chwarə̀ pànə̀ pa nɨ pɨ pə mbyabə̀ e.