Read Pinyin Jemə̀ 2 Bible Online

Jemə̀ 2 - Pinyin bible

Jemə̀ 2

¹Pɨlyimə ɨ̀pâ, tsaʼa pànə̀ nɨ pɨ nùŋə̀nə ntɨŋmə̀ ɨ̀ghobə aŋunə Ndòʼnə̀mbyə̂ Yěsû Kristù, ẅùə̀ wa nɨ à pənə Ndòʼnə̀mbyə̂ àghuʼtə̀, kò nɨ̀ ghuʼtə̀ a wɨghə pə̀ənə̀ nɨ tə̀chwìi a nɨ zùŋə̀ tsaʼnə nɨ̀ zəənə̀nə a ghobə.

²Tyiʼə̀ pə̀ənə̀ lòo lo ngàŋə̀ nkabə̀ nɨ à ẅînə àkɨ̂ nɨ pɨ tsùŋə̀nə nɨ àtɨ̀ŋnə goldə̀ pobə ɨtsəʼə pɨ tsə̂nə à tô amwuə ndâ àshwatə̀ ɨzɨghə, ngàŋə̀ àfumə̀ nɨ à ẅînə ɨ̀sìitə̀ ɨtsəʼə a kɨ ntô nkwuunə̀ àze.

³Nɨ̀ tə mbəla ntə̂ àtwuə̀ nnèrə̀ àghuʼtə̀ ambo ŋònə̀ wa nɨ à korə̀nə mbɨ̀ŋmə̀ e ɨ̀shìʼnə̀ nshwəŋə̀ ambo ze lo, “Tô nnwuunə̀ a nɨ̀ghə̂ aŋunə aləŋə ɨ̀shìʼnə̀ zə̀,” la nshwəŋə̀ ambo ngàŋə̀ àfumə̀ wa lo, “Təəmə̀ a nɨ̀yî” kə̀ “Tô ngẅìitə̀ a ɨ̀shyə̂ nɨ̀ghə̂ a nɨ̀pwùnə mɨ̀kwùə̀ ɨ̀mâ,”

⁴ka nɨ̀ zəənə̀ a wɨghə lo nɨ̀ nèrə̀ mə a tə̀chwìi amwuə pɨghə, nkɨ mmə ntsoʼtə̀ pə̀ənə̀ ndzùŋə̀ àkwàŋə̀ tɨ̀pòŋə̀ àzɨghə?

⁵Nɨ̀ zhwiʼtə̀ mbǎ pɨlyimə ɨ̀pâ, Nẅùə̀ à tsoʼò mə ngàŋə àfumə̀ amwuə àtwuə̀ ɨ̀shyə̂ ghə ngɨ̀rə̀ lo pobə̂ pyiimə̀ a Yěsû Kristù, mbə nɨ àfùʼù nkǔŋə nkuŋə ngǎ ndzɨghə̀ ànwùə̀ nɨ̀fò zhyə̀ nɨ à lə̀ kàʼà mə ambo pànə̀ pa nɨ pobə kòŋə̀nə e.

⁶La nɨ̀ pə nnaŋə̀ ngàŋə àfumə̀ ka mə fuŋə̀ a wɨghə nɨ àzwuumə̀ àtse. Pànə̀ nɨ pɨ zhyiʼnə a wɨghə nsùŋə̀ a wɨghə nchyâ amwuə mɨ̀ndâ mɨ̀sàʼa la pɨ̀wə̌? Ka à pə e la pɨ̀ghàŋə pɨ nkabə̀?

⁷A tyìʼə̀ pobə nɨ pɨ pa nshwəŋə̀ ɨ̀nwùə̀ tɨ̀pòŋə̀ mbə̀ʼə nɨ̀linə̀ tsɨ̀ ɨ̀shìʼnə̀ tsa nɨ pɨ ŋânə ambo pɨghə la.

⁸La nɨ̀ tə lanə nnùŋə̀ a tənkoŋə ntə̌ Nẅùə̀ wa nɨ à pənə amwuə àŋwàʼnə̀ lo, “Mə nkòŋə̀ a ndyimə o tyìʼə̀ tsaʼnə wə̀ kòŋə̀nə mbɨ̀ŋmə̀ o,” yi wə̌ ghɨ̀rə̀ ɨ̀shìʼnə̀.

⁹La nɨ̀ tə mə ntwuʼtə̀ pə̀ənə̀ nɨ tə̀chwìi a nɨ zùŋə̀ tsaʼnə nɨ̀ mənə ndzəənə̀ a ghobə, yi nɨ̀ wɨ̀ghə̀ mə ànwùə̀, mbòomə a kɨ ngẅìimə̀ a wɨghə tsaʼa pànə̀ nɨ ka pɨ nùŋə̀ a ghobə a mbòomə.

¹⁰Ŋwùə̀ à tə mə nnùŋə̀ pɨ̀mbòomə pɨ̀tsùmə̀ la ngwɨ̀ghə̀ a taʼà, yi à wɨ̀ghə̀ mə la pèrə pɨ̀tsùmə̀,

¹¹ntiinə ŋònə̀ wa nɨ à lə̀ shwəŋə̀nə lo, “Kò wə̀ ghɨ̀rə̀ àfànə̀,” à lə̀ kɨ nshwəŋə̀ lo, “Kò wə̀ zhwuutə̀.” Lenəla wə̀ tə ka ghɨ̀rə̀ o àfànə̀ la nzhwuutə̀ a ŋwùə̀ yi wə̀ wɨ̀ghə̀ mə ntə̌.

¹²Nɨ̀ ghɨ̀rə̀ àshwəŋnə̀ àzɨghə pobə mɨ̀fàʼnə ɨ̀mɨghə pə mɨ pànə̀ nɨ pɨ ghǎ tsoʼtə̀ mɨ̀sàʼa ɨ̀mobə zùŋə̀ ntə̌ wa nɨ ɨ wa nkyàatə̀ mɨnkɨrə mɨ ɨ̀tsaŋə̀ aŋunə pə̀ənə̀.

¹³Mbə̀ʼnə, ka Nẅùə̀ a pə ghǎ koorə̀ e mɨ̀lɨŋə̀ mɨ ŋònə̀ nɨ à wa ka koorə̀ e mɨ̀lɨŋə̀ mɨ ŋwùə̀ amwuə nkwùə̀ ntsoʼtə̀ mɨ̀sàʼa. Àkoorə̀ mɨ̀lɨŋə̀ a ghǎ tsàarə̀ ntsoʼtə̀ ɨ̀sàʼa.

¹⁴Pɨlyimə ɨ̀pâ, ŋwùə̀ à tə nshwəŋə̀ lo à wə̀ nɨ àpyiimə̀ ntɨŋmə̀ la ka mɨ̀fàʼnə ɨ̀me mə nnèrə̀ mɨ̀nwùə̀ mɨ̀shìʼnə̀, a yèmpə̀ e lə nɨ àkə? Mbə̀ʼə mbuurə̀ àpyiimə̀ ntɨŋmə̀ zə̀ ɨ̀ chwarə̀ e a ye apə̀.

¹⁵Ndyimə ɨ̀wə̀ənə̀ ghù mə̀ngyə̌ kə̀ ghu mbyàŋnə̀ à tə ka pə e nɨ ɨtsəʼə pɨ ẅînə nkɨ ka pə e nɨ mɨ̀zɨghə̀ nɨ mɨ kùʼnə̀nə a nɨ zɨghə̀ njyə̂ ɨ̀tsùmə̀,

¹⁶taʼà ŋwùə̀ wɨghə à tə shwəŋə̀ ambo pobə lo, “Lèrə̀ nɨ àporə̀porə̀, ngẅî ɨtsəʼə nkẅupə̀ mbɨ̀ŋmə̀ o nkɨ ndzɨghə̀ ndzwurə̀,” yi a yèmpə̀ a ghobə lə nɨ àkə mbə̀ʼə nɨ̀ ka ŋâ a wɨghə ɨ̀pwuumə̀ pa nɨ pèrə pa ngyèmpə̀ a ghobə a nɨ ghɨ̀rə̀ lo pobə̂ chyə̂?

¹⁷Tsaʼnə a pənə a lenə la, àpyiimə̀ ntɨŋmə̀ zèrə nɨ zèrə nɨ a za ka ghɨ̀rə̀ e lo wə̀ ghɨ̀rə̀ mɨ̀nwùə̀ mɨ̀shìʼnə̀, a àpyiimə̀ ntɨŋmə̀ nɨ a kwɨghə̀ mə.

¹⁸La mbə̀ʼə ŋònə̀ ɨ̀tse a shwəŋə̀ lo, “Wə̀ wə̀ nɨ àpyiimə̀ ntɨŋmə̀; m̀mə nfàʼà mɨ̀nwùə̀ mɨ̀shìʼnə̀.” À tə shwəŋə̀ a lenə àpə̀ŋə̀ àshwəŋnə̀ mə̀ a pə lo, “Nèrə̀ mə̀ nɨ àpyiimə̀ ntɨŋmə̀ o za nɨ ka wə̀ pə ngɨ̀rə̀ o mɨ̀nwùə̀ mɨ̀shìʼnə̀ la, n̂nèrə̀ o nɨ àpyiimə̀ ntɨŋmə̀ mə̀ nɨ mɨ̀nwùə̀ mɨ̀shìʼnə̀ myə̀ nɨ ngwə̀ ngɨ̀rə̀.”

¹⁹Nɨ̀ pyiimə̀ lo a ye taʼà Nẅùə̀koʼò ze nɨ ze? A pòŋə̀! Mbaa pə ɨ̀zhyə̂ pyiimə̀, nkɨ mmə mbô tə ngwùrə̀ a mbyə̀ ze.

²⁰Àpuukə̀ ŋònə̀! Wə̀ tàʼà a nɨ zhyə̂ àlènə̀ lo àpyiimə̀ ntɨŋmə̀ za nɨ zèrə za ka ghɨ̀rə̀ e mɨ̀nwùə̀ mɨ̀shìʼnə̀ la àfǐfǐ?

²¹Ngə̀ aŋunə tǎ pɨ tǎ ɨ̀wə̀ənə̀, Abràhamə̀, Nẅùə̀ à lə̀ lòo e tsaʼa ŋònə̀ nɨ mɨ̀nwùə̀ ɨ̀me təəmə̀nə la ndàŋə̀ la a ndzùmə̀ àpyiimə̀ ntɨŋmə̀ e ghobə àfàʼà e nkwùə̀ nɨ à lə̀ lòonə a moonə̀ e Isàkə̀ a nɨ ghə̀ ngɨ̀rə̀ nɨ̀shwàʼà ghu ambo Nẅùə̀.

²²Nɨ̀ zəənə̀ lo àpyiimə̀ ntɨŋmə̀ Abràhamə̀ a lə̀ yìinə̀ ndəŋə ndəŋə pobə àfàʼà e. Àfàʼà e a tyiʼə̀ ngɨ̀rə̀ lo àpyiimə̀ ntɨŋmə̀ e â koʼò nkùʼù.

²³Lenəla, a lə̀ koʼò mbwùumə̀ tsaʼnə àŋwàʼnə̀ Nẅùə̀ a shwəŋə̀nə lo, “Abràhamə̀ à lə̀ pyiimə̀ a Nẅùə̀, Nẅùə̀ a lòo e tsaʼa ŋònə̀ nɨ mɨ̀nwùə̀ ɨ̀me təəmə̀nə,” lenəla pɨ tyiʼə̀ nfuŋə̀ a Abràhamə̀ nɨ ɨ̀swùə Nẅùə̀.

²⁴Nɨ̀ zəənə̀ lo, Nẅùə̀ à wa ndòo e a ŋwùə̀ tsaʼa ŋònə̀ nɨ mɨ̀nwùə̀ ɨ̀me təəmə̀nə ndàŋə̀ e la a ndzùmə̀ ngɨ̀rə̀ mɨ̀nwùə̀ ɨ̀shìʼnə̀ ɨ̀ze ka pə e pə a ndzùmə̀ àpyiimə̀ ntɨŋmə̀ e ndàʼà.

²⁵A lə̀ kɨ mbə la ndəŋə ndəŋə ambo Rahàbə̀ àkwàrə̀ mə̀ngyə̌ za. Nẅùə̀ à lə̀ lòo e tsaʼa ŋònə̀ nɨ mɨ̀nwùə̀ ɨ̀me təəmə̀nə nkwùə̀ nɨ à lə̀ kẅiirə̀nə pànə̀ pɨ Israel pa nɨ pɨ lə̀ tônə lo nyoorə̀ ɨlyiʼə a ndâ ze ntyiʼə̀ ngɨ̀rə̀ pobə làŋə̀ amwuə àlàŋə yè nyaanə ndèrə̀ a ghobə.

²⁶Tsaʼnə mbɨ̀ŋmə̀ tə mbə tɨ Àzhwùə̀ ɨ̀ pə àkwuə̀, a kɨ mbə tsaʼnə àpyiimə̀ ntɨŋmə̀ a tə mbə tɨ ɨ̀fàʼà, àpyiimə̀ ntɨŋmə̀ ghu a kɨ mbə àkwuə̀.