Read Pinyin Jemə̀ 3 Bible Online

Jemə̀ 3 - Pinyin bible

Jemə̀ 3

¹Pɨlyimə ɨ̀pâ, ka a pòŋə̀ e lo pɨghə pɨ̀noʼnə pə pɨ̀nèrə̀ ɨ̀nwùə̀, ntiinə nɨ̀ zhyə̂nə lo ɨ̀sàʼa ɨ̀wəənə̀ tsaʼa pɨ̀nèrə̀ ɨ̀nwùə̀ ghǎ tɨ̀ŋnə̀ tsàarə̀ a yɨ̀ pànə̀ pɨ̀tse.

²Pə̀ənə̀ pɨ̀tsùmə̀ pa nfàntə̀ mɨ̀nwùə̀. La ŋònə̀ ɨ̀tse à tə pə ghu nɨ ka à pə nfàntə̀ e aŋunə mɨ̀nwùə̀ nɨ à wa nshwəŋə̀ yi la ŋònə̀ nɨ mɨ̀nwùə̀ ɨ̀me pòŋə̀nə mmyàanə̀, a kɨ mbə ŋònə̀ nɨ mbə̀ʼə a ẅìimə̀ mbɨ̀ŋmə̀ e ntsùmə̀.

³Pə̀ənə̀ tə chyâ a jangàrə̀ a ntswùə̀ ləəmə a nɨ ghɨ̀rə̀ lo â zuʼnə̀ a wəənə̀ yi mbə̀ʼə pə̀ənə̌ kɨ zhyə̂ ghɨ̀rə̀ lo â lèrə̀ amwuə pàa nɨ pə̀ənə̀ kòŋə̀nə.

⁴Pə̀ənə̀ naŋə̀ ɨ̀paŋə̀ pɨ̀ẅùunə pa amwuə nchyə, pèrə patə nfaŋə̀ faŋə̀nə la, fèrə̀ ntɨ̀ŋnə̀ a kɨ mmə ntinə̀ a pèrə. Pɨ pa nnyaʼa ntinə̀ a pèrə la tyìʼə̀ pɨ̀mɨlyiʼə lə nshwùʼtə̀, a pə̀ŋə̀ ndèrə̀ amwuə pàa nɨ ɨ̀sùŋə̀ àpaŋə̀ à kòŋə̀nə lo â lèrə̀.

⁵A kɨ mbə tyìʼə̀ ndəŋə ndəŋə aŋunə àləəmə̀ za nɨ a pənə a ntswùə̀ pə̀ənə̀ la. A kɨ̂ kɨ̂nə la mbə tyìʼə̀ alaamə mbɨ̀ŋmə̀ yè tɨ̀ŋnə̀ nɨ a za nnèrə̀ mbɨ̀ŋmə̀ nɨ mbuurə̀ mɨ̀nwùə̀ mɨ̀ẅùunə nɨ mbə̀ʼə zèrə a ghɨ̀rə̀. Kwàŋə̀ amwuə mbuurə̀ nɨ mbə̀ʼə mɨlyiʼə ɨ̀mǔ a saʼà ntòonə̀ a taʼà maa kòŋə̀!

⁶Àləəmə̀ a chyə̂ tsaʼa ɨ̀mǔ. Mbə tsaʼa àtwuə̀ ɨ̀shyə̂ nɨ a lẅenə̀nə nɨ ɨ̀nwùə̀ tɨ̀pòŋə̀ mbə e amwuə pə̀ənə̀ nsìimə̀ ɨ̀nwùə̀ tɨ̀pòŋə̀ amwuə ɨlaamə mbɨ̀ŋmə̀ pə̀ənə̀ tyìʼə̀ ɨ̀tsùmə̀. A za ntòonə̀ a nɨ̀chyə̂mbyə̂ ɨ̀wə̀ənə̀ nɨ ɨ̀mǔ wa nɨ ɨ furə̀nə amwuə àkɨɨnə̀ ɨ̀mǔ.

⁷Ŋwùə̀ mɨsoŋə à zhyə̂ a nɨ ghɨ̀rə̀ mɨ̀nyàamə̀ chyə̂ pobə pɨ pə̀ənə̀. À ghɨ̀rə̀ mə mɨ̀nyàamə̀ mɨ̀tsùmə̀ nɨ mɨ pənə a ɨsɨghə kə̀ amwuə nchyə, nɨ mɨ̀nyàamə̀ mɨ tsə̂nə ghobə pɨ̀sɨ̀ŋə, nɨ mbuurə̀ mɨ̀nyàamə̀ tsaʼa mɨ̀nyoorə̀ nɨ mbuurə̀ mɨ̀nyàamə̀ mɨ nchyə tsaʼa ɨ̀swuə̀ chyə̂ pobə pɨ pə̀ənə̀.

⁸La ka ŋwùə̀ mɨsoŋə a zhyə̂ e a nɨ ẅìimə̀ àləəmə̀ e. Àləəmə̀ la àzwuumə̀ za nɨ a pɨ̂nə ka mɨ̀zùŋə ka pɨ kɨ mmə nzhyə̂ ẅìimə̀ e a zèrə, a za nnoʼò nɨ ndyiʼə̀ nɨ mbə̀ʼə zèrə zhwuutə̀ a ŋwùə̀.

⁹Pə̀ənə̀ pa nsəəkə̀ a Nẅùə̀koʼò Tǎ ɨ̀wə̀ənə̀ nɨ zèrə nkɨ mmə ndòo tyìʼə̀ a zèrə ndzòomə̀ pə̀ənə̀ nɨ Nẅùə̀ à lə̀ tsùŋə̀nə pɨ shwuə̀ e.

¹⁰Àshwəŋnə̀ mborə̀ pobə ndzòomə̀ a za nfurə̀ tyìʼə̀ amwuə taʼà ntswùə̀; ka à kùʼnə̀ e a lenə mbǎ pɨlyimə ɨ̀pâ.

¹¹Nɨ̀mwurə̀ ɨ̀shyə̂ nɨ mbə̀ʼə nchyə yɨ̀ lɨ̀ŋmə̀nə furə̀ amwuə, mbə̀ʼə nchyə yɨ̀ lẅùə̀nə kɨ furə̀ e amwuə apə̀.

¹²Pɨlyimə ɨ̀pâ, mbə̀ʼə nkàarə ɨ̀ laʼa ndzumə̀ e ɨfaŋə mɨ̀ghurə̀ apə̀, ɨ̀ghəbə̀ kɨ ndaʼa ndzumə̀ e àkobə̀ apə̀; mbə̀ʼə ndòorə̀ nchyə ngwaŋə̀ ɨ laʼa nkɨ ŋŋâ e nchyə yɨ̀ nônə apə̀.

¹³Ŋwùə̀ ɨwɨghə ɨ̀tse à wə̀ ghu nɨ à zhìʼtə̀nə nkɨ ntsùŋə̀ nzhyə̂ ɨ̀nwùə̀? Â ghɨ̀rə̀ zèrə â furə̀ ndaanə̀ aŋunə nɨ̀chyə̂mbyə̂ e; nkɨ nshwuʼkə̀ mbɨ̀ŋmə̀ e ngɨ̀rə̀ mɨ̀nwùə̀ mɨ̀shìʼnə̀ myə̀ nɨ mèrə nèrə̀nə àzhìʼtə̀ yèghu.

¹⁴La nɨ̀ tə mbəla mbə nɨ àghə̀ʼnə̀ ghobə àngəʼə nɨ nɨ̀kòŋə̀ ɨ̀twuə̀ ɨ̀pɨghə amwuə mɨ̀ntɨŋmə̀ ɨ̀mɨghə, kò nɨ̀ tsòo wɨghə a ghàŋə̀ kə̀ ntwuunə̀ a nkǔŋə nkuŋə.

¹⁵Ka mbuurə̀ àzhìʼtə̀ za ɨ̀ furə̀ e la ambo Nẅùə̀; a àzhìʼtə̀ àtwuə̀ ɨ̀shyə̂, ka pə e nɨ àzhwùə̀ Nẅùə̀, nkɨ nfurə̀ pə ambo ɨ̀zhyə̂.

¹⁶Alyiʼə za àtsùmə̀ nɨ àghə̀ʼnə̀ a pənə ghu pànə̀ kòŋə̀ pə ɨ̀twuə̀ ɨ̀pobə, a chyə̂ la mbuurə̀ àzhwàʼnə̀ àtsùmə̀ a pə ghu nkɨ ndẅenə̀ nɨ ɨ̀nwùə̀ tɨ̀pòŋə̀ pɨ̀noʼnə.

¹⁷La àzhìʼtə̀ za nɨ a furə̀nə ambo Nẅùə̀ a chyə̂ la mbyə̀ ndaanə̀, mmə nkòŋə̀ a nɨ ghɨ̀rə̀ lo pànə̀ nwuunə̀ ɨ̀shìʼnə̀, mmə ntaŋnə̀ pə a nɨ kwàŋə̀ ɨ̀kwàŋə̀ pɨ̀shìʼnə̀, mmə ndzuʼnə̀, mbə nɨ àkoorə̀ mɨ̀lɨŋə̀, mmə ngɨ̀rə̀ mɨ̀nwùə̀ mɨ̀shìʼnə̀. Ŋònə̀ nɨ à pənə nɨ mbuurə̀ àzhìʼtə̀ zə̀ à chyə̂ la ka pə e nɨ mɨnkə, ka kɨ mə fɨ̀kə̀ e pə̀ənə̀.

¹⁸Nkwùə̀ nɨ ngàŋə àporə̀porə̀ ghɨ̀rə̀nə lo àporə̀porə̀ â pə amwuə pə̀ənə̀, pobə pyə̀ la àporə̀porə̀, a tyiʼə̀ nkẅuə̀ ngɨ̀rə̀ lo pànə̀ tyiʼə̀ ngɨ̀rə̀ mɨ̀nwùə̀ nɨ mɨ təəmə̀nə a mbyə̀ Nẅùə̀.