Read Pinyin Jemə̀ 4 Bible Online

Jemə̀ 4 - Pinyin bible

Jemə̀ 4

¹Àzwuumə̀ nɨ a lòonə mɨ̀ntsòo ghobə mɨ̀làʼà ntô a tɨ̀tɨ̀rə̀ pɨghə la àkə? Ka a pə e la ɨ̀kwàŋə̀ ɨ̀pwuumə̀ pànə̀ pɨ mɨsoŋə nɨ nɨ̀ wa nchyâ amwuə mɨ̀ntɨŋmə̀ ɨ̀mɨghə pèrə tyiʼə̀ mmə ndzòŋnə̀ amwuə pɨghə ka mə tàʼà e lo nɨ̀ potə̀ nnwuunə̀ la?

²Nɨ̀ tàʼà ɨ̀pwuumə̀ la ka pə zəənə̀ a wɨghə. Nchwuʼtə̀ mbɨ̀ŋmə̀ a nɨ zhwuutə̀, mɨ̀ntɨŋmə̀ ɨ̀mɨghə mə ngyìi ɨ̀pwuumə̀; la tsaʼnə ka nɨ̀ pə wɨghə nɨ pèrə la, nɨ̀ tyiʼə̀ nsaʼnə̀, ndzòŋnə̀ pɨghə nɨ pɨghə. Mbə̀ʼə nɨ̀ pə a wɨghə nɨ ɨ̀pwuumə̀ pɨ̀ghu apə̀, ntiinə ka nɨ̀ pə mbyiitə̀ a wɨghə a pèrə ambo Nẅùə̀.

³Nɨ̀ pa mbyiitə̀, la ka pə wɨghə nɨ pèrə ntiinə nɨ̀ pa mbyiitə̀ amwuə àlàŋə tɨ̀pòŋə̀ nkɨ mmə mbyiitə̀ ɨ̀pwuumə̀ nɨ pànə̀ pɨ mɨsoŋə pa ntàʼà la.

⁴Pɨghə ngàŋə àfànə̀! Ka nɨ̀ zhyə̂ a wɨghə lo nɨ̀chyâ ɨ̀swùunə pɨghə pɨ mɨ̀nwùə̀ mɨ àtwuə̀ ɨ̀shyə̂ la nɨ̀chyâ a kɨpaanə a tɨ̀tɨ̀rə̀ pɨghə pɨ Nẅùə̀. Lenəla ŋwùə̀ wa ntsùmə̀ nɨ à pənə ɨ̀swùə ɨ̀pwuumə̀ àtwuə̀ ɨ̀shyə̂ la ngàŋə kɨpaanə Nẅùə̀.

⁵Kò nɨ̀ kwàŋə̀ lo alyiʼə àŋwàʼnə̀ Nẅùə̀ zə̀ a nyìi la chwìrə̀ nshwəŋə̀ lo, “Àzhwùə̀ za nɨ Nẅùə̀ à lə̀ ŋânə ambo pə̀ənə̀ a zə̀ ntsaʼà aŋunə ɨ̀pwuumə̀ ka mɨ̀zùŋə.”[1]

⁶La mborə̀ nɨ Nẅùə̀ à wa ŋŋâ ambo pə̀ənə̀ ɨ̀ ghɨ̀rə̀ pə̀ənə̀ tɨ̀ŋnə̀ ntsàarə̀ àzhwùə̀ nɨ a za ngɨ̀rə̀ pə̀ənə̀ tsaʼà aŋunə ɨ̀pwuumə̀ pèrə pə. Amwuə ndwuumə̀ nɨ àŋwàʼnə̀ Nẅùə̀ a za nshwəŋə̀ lo, “Nẅùə̀koʼò à twuunə̀ e àkoʼò mbɨ̀ŋmə̀ la nchyâ mborə̀ aŋunə pyə̀ pa nɨ pobə shwuʼkə̀nə mbɨ̀ŋmə̀ ɨ̀zobə a ɨ̀shyə̂ la.”

⁷Lenəla, nɨ̀ mə nshwuʼkə̀ mbɨ̀ŋmə̀ ɨ̀zɨghə ŋŋâ ambo Nẅùə̀. Mmə ntwuunə̀ a wɨghə ɨ̀nwùə̀ Satàanə̀, à pɨ kɨ̀ɨrə̀ a wɨghə.

⁸Nɨ̀ mə ntô mbaatə̀ a Nẅùə̀ mbə̀ʼə Nẅùə̀ â kɨ ntô mbaatə̀ a wɨghə. Ngàŋə ngɨ̀rə̀ ɨ̀nwùə̀ tɨ̀pòŋə̀, nɨ̀ sùu mbô ɨ̀mɨghə mbǎ! Pɨghə pa nɨ nɨ̀ pənə ngàŋə àpə̀grə̀, nɨ̀ ghɨ̀rə̀ mèrə laanə̀.

⁹Nɨ̀ pə nsòmnə̀, ntyiʼə̀ mmə mbonə̀ ngyìi; ngɨ̀rə̀ nɨ̀ẅìi ɨwɨghə â pə̀ŋə̀ ntyiʼə̀ nɨ̀yìi; nɨ̀ghaʼà ɨwɨghə â pə̀ŋə̀ ntyiʼə̀ àsòmnə̀.

¹⁰Nɨ̀ shwuʼkə̀ mbɨ̀ŋmə̀ ɨ̀zɨghə a ɨ̀shyə̂ a mbyə̀ Ndòʼnə̀mbyə̂; à pɨ ŋankə̀ a wɨghə àtɨ̀ghə.

¹¹Kò nɨ̀ kɨ nshwəŋə̀ ɨ̀nwùə̀ tɨ̀pòŋə̀ aŋunə pɨ̀tse pə̀ənə̀ mbǎ pɨlyimə ɨ̀pâ. Ŋònə̀ wa nɨ à shwəŋə̀nə a tɨ̀pòŋə̀ aŋunə moonə̀ Kristù nkɨ ntsoʼtə̀ e la, à twuunə̀ la ntə̌ nkɨ mmə ntsoʼtə̀ a ẅèrə. Wə̀ tə mmə ntsoʼtə̀ ntə̌ yi ka wə̀ pə o ŋònə̀ nɨ à wa ndzuʼnə̀ ntə̌, ghò la ngàŋə̀ ntsoʼtə̀ mɨ̀sàʼa.

¹²Nẅùə̀koʼò la ndàʼà ŋònə̀ nɨ à wa ŋŋâ ntə̌, nkɨ mmə ntsoʼtə̀. A ye ndàʼà ze nɨ ze nɨ mbə̀ʼə a chwarə̀ a ŋwùə̀ nkɨ ntsə̀ŋə̀ e. Wə̀ lòo mbɨ̀ŋmə̀ o lə tsaʼa ɨ̀wə̌ a nɨ tə ntsoʼtə̀ a ndyimə o?

¹³Nɨ̀ tsùŋə̀ zhwiʼtə̀ mbǎ pɨghə pa nɨ nɨ̀ wa nshwəŋə̀ lo, “Ǎ pə sìnə̀ kə̀ a ghǎ pə a ngẅùʼə pəə lèrə̀ amwuə yɨ̀tse mbòmpə àlaʼà ngə̀ nchyə̂ ghu aŋunə taʼà nguʼu ntaŋə̀ a mɨ̀tàanə ntsùŋə̀ ndzɨghə̀ àpìi.”

¹⁴La ka zhyə̂ a wɨghə tsaʼnə nɨ̀chyə̂mbyə̂ ɨwɨghə à ghǎ pə a ngẅùʼə. Nɨ̀ wə̀ mbə lə tsaʼa mbàʼà ngẅùʼə nɨ ɨ̀ nàanə̀nə ɨlyiʼə nkɨ wùutə̀ sìimə̀ e.

¹⁵Nɨ̀ chyə̂ a nɨ shwəŋə̀ pə lo, “Ndòʼnə̀mbyə̂ à tə kòŋə̀, pəə chyə̂ pɨ̀tɨ̀ŋnə̀ ngɨ̀rə̀ a zə pobə zhyə̀.”

¹⁶La tɨ̀tsòŋə̀, nɨ̀ wə̀ nkoʼò mbɨ̀ŋmə̀ nkɨ mmə ntsòo pɨ̀ghàŋə̀ ɨ̀pɨghə; ka à kùʼnə̀ e a lenə.

¹⁷Njiilo, ŋònə̀ nɨ à zhyə̂nə ànwùə̀ ɨ̀shìʼnə̀ nɨ a kùʼnə̀nə a nɨ ghɨ̀rə̀, ka ghɨ̀rə̀ e a zèrə̀, à ghɨ̀rə̀ la tɨ̀pòŋə̀.