Read Pinyin Jemə̀ 5 Bible Online

Jemə̀ 5 - Pinyin bible

Jemə̀ 5

¹Ngàŋə nkabə̀, nɨ̀ zhwiʼtə̀ ànwùə̀ nɨ mbɨ shwəŋə̀ ambo pɨghə! Nɨ̀ pə mbû nkɨ mmə ngyìi nɨ ɨ̀tɨ̀ŋnə̀ ntii ngəʼə̀ nɨ ɨ̀ pɨ tô aŋunə pɨghə!

²Nkabə̀ ɨzɨghə ɨ̀ lə̂ mə, ɨ̀sə̀ʼə kɨ ndzɨghə̀ ɨtsəʼə ɨ̀pɨghə.

³Àwùrə̀kaamə a ẅìimə̀ mə ɨ̀tɨ̀ŋnə goldə̀ pobə ɨ̀tɨ̀ŋnə silbà ɨ̀pɨghə. Àwùrə̀kaamə zèrə zə̀ a ghǎ pə la àlènə̀ a nɨ nèrə̀ mɨ̀nwùə̀ ma myə̀ nɨ nɨ̀ ghɨ̀rə̀nə la; kɨ zɨghə̀ mbòbə̀ mbɨ̀ŋmə̀ ɨzɨghə tsaʼa ɨ̀mǔ. Nɨ̀ shwatə̀ mə mɨ̀nkabə̀ ɨ̀mɨghə amwuə mɨ̀njyə̂ mə nɨ mɨ pənə mɨ̀njyə̂ mɨ ndẅùutə.

⁴Nɨ̀ pirə̀ a wɨghə mɨ̀nkabə̀ mɨ pə̀ənə̀ nɨ pobə pa nfàʼà amwuə mɨ̀swùumə ɨ̀mɨghə tɨ twuə̀. Nɨ̀ zhwiʼtə̀ a nɨ̀yìi ɨghobə! Nɨ̀yìi pànə̀ pa nɨ pobə pa nfàʼà amwuə mɨ̀swùumə ɨ̀mɨghə à pyàa mə ambo Nẅùə̀, Ndòʼnə̀mbyə̂ Nẅùə̀koʼò.

⁵Nɨ̀chyə̂mbyə̂ ɨwɨghə amwuə àtwuə̀ ɨ̀shyə̂ ghə à lẅenə̀ nɨ ɨ̀pwuumə̀ pɨ̀shìʼnə̀ pa nɨ mbòbə̀ mbɨ̀ŋmə̀ ɨ̀ za nkòŋə̀ la. Nɨ̀ zɨghə̀ mə ndzwurə̀ tə ndẅentə̀ ntyiʼə̀ tsaʼa mɨ̀nyàamə̀ mə mbyabə̀ njyə̂ nɨ pɨ ghǎ wàrə̀ a mèrə.

⁶Nɨ̀ saʼà mə mɨ̀sàʼa mɨ pànə̀ nɨ mɨ̀nwùə̀ ɨ̀mobə təəmə̀nə, nchyâ ngəʼə̀ aŋunə pobə, nzhwuutə̀ pànə̀ tɨ ɨ̀sùmə ànwùə̀; la ka pobə pə kẅâ a ghobə.

⁷Pɨlyimə ɨ̀pâ, nɨ̀ pə ngẅìimə̀ mɨ̀ntɨŋmə̀ ɨ̀mɨghə mbyabə̀ tə mbyàa njyə̂ nɨ Ndòʼnə̀mbyə̂ à ghǎ chi tô. Nɨ̀ zəənə̀ ndwuumə̀ nɨ ɨ̀ndyiʼə̀ mɨ̀swùumə à wa ngẅìimə̀ ntɨŋmə̀ e mbyabə̀ lo mɨ̀zɨghə̀ ɨ̀me koʼò a nɨ furə̀ a nkwə̂ mbə̀ŋə̀ ngə̀ mbyàa nkwùə̀ nɨ̀fùʼù.

⁸A kùʼnə̀ lo nɨ̀ kɨ mmə ngẅìimə̀ mɨ̀ntɨŋmə̀ ɨ̀mɨghə, ngẅìimə̀ àpyiimə̀ ntɨŋmə̀ àzɨghə â tɨ̀ŋnə̀ ntiinə nkwùə̀ nɨ̀tô Ndòʼnə̀mbyə̂ ɨ̀ zə̀ mbaatə̀.

⁹Kò nɨ̀ tə ndẅùmpə̀ pɨ̀tse pə̀ənə̀ mbǎ pɨlyimə ɨ̀pâ, mbə̀ʼə Nẅùə̀koʼò a kaŋə chyâ ɨ̀sàʼa aŋunə pɨghə. Ngàŋə̀ saʼà mɨ̀sàʼa à paatə̀ mə, à wə̀ təəmə̀ a ntswùə̀ ndâ.

¹⁰Pɨlyimə ɨ̀pâ, nɨ̀ kẅempə̀ ngàŋə ntwuumə̀ Nẅùə̀ za nɨ lə̀ pə nshwəŋnə̀ aŋunə nɨ̀linə̀ nɨ Ndòʼnə̀mbyə̂ la. Nɨ̀ lòo a ghobə tsaʼa àlènə̀ pànə̀ pa pyə̀ nɨ pobə lə̀ ẅìimə̀nə ntɨŋmə̀ amwuə nkwùə̀ ngəʼə̀.

¹¹Mbə̀ʼnə pə̀ənə̀ lə̀ zəənə̀nə lo Nẅùə̀ à lə̀ chyâ mborə̀ aŋunə pobə ntii àẅìimə̀ ntɨŋmə̀ àzobə. Nɨ̀ lə̀ zuʼù mə ànwùə̀ mbə̀ʼə àẅìimə̀ ntɨŋmə̀ Yobə̀ nkɨ nzhyə̂ mbuurə̀ àfùʼù nɨ Nẅùə̀ à lə̀ lẅùutə̀nə ŋŋâ ambo ze. A tyìʼə̀ nkǔŋə nkuŋə, Ndòʼnə̀mbyə̂ à wa nkoorə̀ mɨ̀lɨŋə̀ nkɨ mmə nzhwiʼtə̀ a nɨ̀yìi pə̀ənə̀.

¹²Pɨlyimə ɨ̀pâ, zhyə̀ nɨ a tsàarə̀nə àtsùmə̀ a pə lo kò nɨ̀ kɨ ntsə̀əmə̀. Kò nɨ̀ tsə̀əmə̀ aŋunə nɨ̀pwuurə̀ kə̀ ɨ̀shyə̂ kə̀ aŋunə àzwuumə̀ àtse. Nɨ̀ ghɨ̀rə̀ “ngaŋə” ɨwɨghə â pə “ngaŋə”, “ee” ɨwɨghə â kɨ mbə “ee” mbə̀ʼə Nẅùə̀ a kaŋə chyâ ɨ̀sàʼa aŋunə pɨghə.

¹³Ŋwùə̀ wɨghə ɨ̀tse à wə̀ amwuə ngəʼə̀? Â pə nchàʼtə̀ a Nẅùə̀. Ŋwùə̀ wɨghə ɨ̀tse à wə̀ mbə nɨ nɨ̀ghaʼà? A kùʼnə̀ lo â zòbə̀ nchyə nguʼtə̀ a Nẅùə̀ ghu.

¹⁴Ŋwùə̀ wɨghə ɨ̀tse à wə̀ ngòonə̀? Â tsàa ntwuumə̀ ambo ɨ̀twuə̀ àshwatə̀ ɨ̀poonə̀ pɨ Kristù pɨ̀ tô nchàʼtə̀ a Nẅùə̀ àtwuə̀ ze, ndzoʼò e nɨ mɨ̀ghurə̀ mɨ àporə̀porə̀ aŋunə nɨ̀linə̀ nɨ Ndòʼnə̀mbyə̂.

¹⁵Àchàʼtə̀ Nẅùə̀ zèrə zə̀ nɨ pɨ chàʼtə̀nə nɨ àpyiimə̀ ntɨŋmə̀ a pɨ parə̀ a ngoonə ẅèrə wə̀. Nẅùə̀ à pɨ kẅirə̀ ŋâ e nɨ nɨ̀chyə̂mbyə̂; A kɨ mbə lo à lə̀ fàntə̀ mə ànwùə̀ yi Nẅùə̀ à pɨ lə̀ənə̀ a tɨ̀pòŋə̀ e ghu.

¹⁶Lenəla, nɨ̂ tə mbyiimə̀ ɨ̀fàntə̀ ɨ̀nwùə̀ a tɨ̀tɨ̀rə̀ pɨghə, mmə nchàʼtə̀ a Nẅùə̀ pɨghə nɨ pɨghə, mbə̀ʼə Nẅùə̀ â parə̀ wɨghə. Àchàʼtə̀ Nẅùə̀ ŋwùə̀ nɨ mɨ̀nwùə̀ ɨ̀me təəmə̀nə a za ntwuʼtə̀ mɨ̀tɨ̀ŋnə̀ mɨ ẅùunə.

¹⁷Elijah à lə̀ kɨ mbəla ŋwùə̀ mɨsoŋə tsaʼa pə̀ənə̀. À lə̀ chàʼtə̀ a Nẅùə̀ nɨ ntɨŋmə̀ e ɨ̀tsùmə̀ lo kò mbə̀ŋə̀ ɨ̀ lô e, mbə̀ŋə̀ ɨ̀ kɨ ka lô e amwuə àlaʼà ghu aŋunə nguʼu ɨtarə nɨ àtùmə.

¹⁸Nguʼu zèrə zə lə̀ làŋə̀ a kɨ nchi nchàʼtə̀ a Nẅùə̀ lo mbə̀ŋə̀ ɨ̂ lô, ɨ̀ kɨ ndô ngɨ̀rə̀ mɨ̀zɨghə̀ koʼò.

¹⁹Pɨlyimə ɨ̀pâ, taʼà ŋwùə̀ ɨwɨghə à tə mbəla ngwaʼà nkǔŋə nkuŋə ghùtse ŋwùə̀ a lòo e nkẅirə̀ nkwə̂,

²⁰nɨ̀ kẅempə̀ lo: ŋònə̀ wa ntsùmə̀ nɨ à ghɨ̀rə̀nə ngàŋə̀ ngɨ̀rə̀ ɨ̀nwùə̀ tɨ̀pòŋə̀ a myàʼtə̀ a tɨ̀pòŋə̀ e la, à ghǎ chwarə̀ a ngàŋə̀ ngɨ̀rə̀ ɨ̀nwùə̀ tɨ̀pòŋə̀ wa a ntswùə̀ nɨ̀wɨghə̀, kɨ ghɨ̀rə̀ pɨ̀ lə̀ənə̀ ɨ̀fàntə̀ ɨ̀nwùə̀ ɨ̀pe pɨ̀noʼnə.