Read Pinyin 1 Pità 2 Bible Online

1 Pità 2 - Pinyin bible

1 Pità 2

¹Tsaʼnə a pənə lə la, nɨ̀ waʼà a tɨ̀pòŋə̀ ntsùmə̀ tsaʼa pɨ̀chwìrə̀ pobə àpə̀grə̀ nɨ àghə̀ʼnə̀ farə àshwəŋnə̀ tɨ̀pòŋə̀.

²Nɨ̀ pə tsaʼa ɨ̀poonə̀ pɨ porə̀ nɨ njyə̀ nɨ̀pɨŋnə̀ ɨ̀ za ndzaŋə̀ a ghobə nkwùə̀ ntsùmə̀, pobə tàʼà a nɨ nyoŋə̀ nɨ̀pɨŋnə̀ nɨ àzhwùə̀ nɨ ka pɨ ẅìrə̀kə̀ e. Njiilo nɨ̀ mə nnyoŋə̀ a tsèrə mbə̀ʼə kẅuə̀ pə nɨ nɨ̀chwarə̀.

³Mbə̀ʼnə àŋwàʼnə̀ Nẅùə̀ a shwəŋə̀nə lo, “Nɨ̀ zhwiʼì mə nkɨ nzhyə̂ mbòŋə̀nə Ndòʼnə̀mbyə̂.”

⁴Nɨ̀ tô ambo ze, ze wa nɨ à pənə nɨ̀ghòorə nɨ nɨ pənə nɨ nɨ̀chyə̂mbyə̂ nɨ pànə̀ pɨ mɨsoŋə lə̀ twuumə̀nə ndòo tsaʼa àzwuumə̀ àfǐfǐ, la Nẅùə̀ a tsoʼò a tsèrə tsaʼa àzwuumə̀ nɨ ndùnə̀ e tsə̂nə.

⁵Nɨ̀ tô ambo Ndòʼnə̀mbyə̂ nkɨ mbə tsaʼa mɨ̀ghòorə nɨ mɨ pənə nɨ nɨ̀chyə̂mbyə̂ ngɨ̀rə̀ Nẅùə̀ â lòo a wɨghə mboomə̀ ndâ mɨ̀shwàʼà ghu, nɨ̀ tyiʼə̀ fàʼà amwuə tsaʼa ngàŋə màʼà Nẅùə̀ yɨ̀ laanə̀nə, mbə̀ʼə shwàʼà mɨ̀shwàʼà nɨ Nẅùə̀ ǎ kẅiirə̀ làŋə̀ a ndzùmə̀ Yěsû Kristù.

⁶Mbə̀ʼnə a pənə amwuə àŋwàʼnə̀ Nẅùə̀ lo, “Nɨ̀ naŋə̀; ngwə̀ nùŋə̀ nɨ̀ghòorə nɨ ndâ a Zayònə̀, nɨ̀ghòorə nɨ nɨ̀lẅuə̀ nɨ ndâ nɨ ndwùnə̀ e ɨ tsə̂nə; ŋwùə̀ ntsùmə̀ nɨ à nùŋə̀nə ntɨŋmə̀ e aŋunə ze ka à pə ghǎ pə e nɨ ɨ̀sɨŋnə̀.”

⁷Ngə̀ aŋunə pɨghə pa nɨ nɨ̀ nùŋə̀nə ntɨŋmə̀ ɨ̀wɨghə aŋunə ze, a nɨ̀ghòorə nɨ ndwùnə̀ e tsə̂nə. La ngə̀ aŋunə pànə̀ pa nɨ ka pobə nùŋə̀ a ghobə ntɨŋmə̀ ɨ̀ghobə aŋunə ze, “Nɨ̀ghòorə tsa nɨ pɨ̀mboomə̀ mɨ̀ndâ lə̀ twuunə̀nə la, nɨ pə̀ŋə̀ ntyiʼə̀ ntɨ̀ŋnə̀ nɨ̀ghòorə aŋunə nɨ̀lẅuə̀ nɨ ndâ.”

⁸Yètse alyiʼə amwuə àŋwàʼnə̀ Nẅùə̀ a shwəŋə̀ lo, “A nɨ̀ghòorə tsa nɨ nɨ ghǎ ghɨ̀rə̀ pànə̀ kòntə̀ aŋunə, mbə àlàrə̀kə̀ nɨ̀ghòorə nɨ a ghǎ ghɨ̀rə̀ pànə̀ kunə̀.” Pobə ghǎ kòntə̀ aŋunə ntiinə ka pobə zuʼnə̀ a ghobə àshwəŋnə̀ Nẅùə̀. A kɨ mbə la tsaʼnə Nẅùə̀ à lə̀ nùŋə̀nə.

⁹La ngə̀ aŋunə pɨghə, pɨghə la ngẅàrə̀ nɨ Nẅùə̀ à lə̀ tsoʼò mə, mbə ngàŋə màʼà Nẅùə̀ ɨ̀fò, mbə pànə̀ pɨ àlaʼà yè laanə̀nə, mbə pànə̀ pɨ Nẅùə̀ nɨ lə̀ tsoʼnə lo pobə tə nchwìitə̀ mɨ̀nwùə̀ mɨ yerə̀nə yerə̀nə ɨ̀me, nkɨ mbə ze wa nɨ à lə̀ fuukə̀nə a wɨghə amwuə ndzùmə ndòo ntô amwuə nkàʼà ghù tsìinə̀nə wa.

¹⁰A lə̀ pə nkwùə̀ ɨ̀tse la ka nɨ̀ pɨ a wɨghə pànə̀ pɨ Nẅùə̀, la tɨ̀tsòŋə̀ pɨghə a pə̀ənə̀ ɨ̀pe; à lə̀ pə nkwùə̀ ɨ̀tse la ka nɨ̀ zhyə̂ a wɨghə àkoorə̀ mɨ̀lɨŋə̀ Nẅùə̀ aŋunə pɨghə, la tɨ̀tsòŋə̀ à nèrə̀ mə a wɨghə nɨ zèrə.

¹¹Pɨ̀swùə ɨ̀pâ pɨ̀shìʼnə̀, tsaʼnə nɨ̀ pənə pə pɨ̀tô tônə nkɨ mbə pɨ̀ndàŋə̀ làŋə̀nə amwuə àtwuə̀ ɨ̀shyə̂ ghə la, nɨ̀ tə nkɨ̀ɨrə̀ ɨ̀pwuumə̀ pa nɨ mbòbə̀ mbɨ̀ŋmə̀ ɨ̀ za ntàʼà, mbə pyə̀ nɨ pèrə pa ndzòŋnə̀ e zòŋnə̀nə pobə pyə̀ pa nɨ mɨ̀ntɨŋmə̀ ɨ̀mɨghə ma ntàʼà la.

¹²Nɨ̀ ẅìimə̀ a nɨ̀chyə̂mbyə̂ ɨwɨghə ghù ɨ̀shìʼnə̀ a tɨ̀tɨ̀rə̀ pɨ̀tɨ̀zhyə̂ a Nẅùə̀ amwuə ndwuumə̀ nɨ pobə tə mbə la nshwəŋə̀ lo nɨ̀ wə̀ ngɨ̀rə̀ a tɨ̀pòŋə̀, pobə gha ndẅùutə̀ ndzəənə̀ mɨ̀nwùə̀ mɨ̀shìʼnə̀ ɨ̀mɨghə ntyiʼə̀ nguʼtə̀ a Nẅùə̀ amwuə njyə̂ nɨ à ghǎ tô.

¹³Ntii Ndòʼnə̀mbyə̂, nɨ̀ tə nguʼtə̀ a ŋwùə̀ ntsùmə̀ nɨ pɨ tə̂nə lo a tə mbuʼtə̀ a àlaʼà, kə̀ a pə ɨ̀fò àtwuə̀ pɨ̀fò,

¹⁴21 kə̀ pɨ̀govɨnò nɨ pɨ tsoʼnə lo pobə̂ tə nchyâ ɨ̀sàʼa aŋunə ngàŋə ngɨ̀rə̀ ɨ̀nwùə̀ tɨ̀pòŋə̀, nkɨ mmə nguʼtə̀ ngàŋə ngɨ̀rə̀ mɨ̀nwùə̀ mɨ̀shìʼnə̀.

¹⁵Mbə̀ʼnə Nẅùə̀ a wa ntàʼà lo nɨ̀ tə ngɨ̀rə̀ mɨ̀nwùə̀ mɨ̀shìʼnə̀ a nɨ lòo nnàanə̀ ɨ̀fǐfǐ ɨ̀shwəŋnə̀ pa nɨ furə̀nə a ntswùə̀ ɨ̀kɨ̀ghə̀ pə̀ənə̀ la.

¹⁶Nɨ chyə̂ tsaʼa pànə̀ nɨ ka ànwùə̀ àtse a korə̀ e a ghobə, la kò nɨ̀ tyiʼə̀ ndòo ɨ̀sàanə̀ zèrə zə̀ nkẅupə̀ mɨ̀nwùə̀ mɨ tɨ̀pòŋə̀ ɨ̀mɨghə ghu. Nɨ̀ chyə̂ tsaʼa ngàŋə àfàʼà Nẅùə̀.

¹⁷Nɨ̀ tə nguʼtə̀ a ŋwùə̀ ntsùmə̀, nkòŋə̀ pɨlyimə ɨ̀pɨghə nɨ pɨghə pɨ pobə nùŋə̀nə ntɨŋmə̀ aŋunə Nẅùə̀, mbô a Nẅùə̀ nkɨ nguʼtə̀ a ɨ̀fò.

¹⁸Pɨghə ngàŋə àfàʼà, nɨ tsùŋə̀ ndzuʼnə̀ pɨ̀masàa ɨ̀pɨghə, ŋŋâ a ghobə nɨ àghuʼtə̀; ka pə e pə ambo ndàʼà pyə̀ pa nɨ pɨ pa ngɨ̀rə̀ ɨ̀shìʼnə̀ aŋunə pɨghə, nkɨ mbonə̀ la. Nɨ zuʼnə̀ farə pyə̀ pa nɨ pɨ tsə̂nə.

¹⁹Nẅùə̀ à pɨ pyiimə̀ o mbə̀ʼə wə̀ zəənə̀ ngəʼə̀ nɨ ka ɨ̀ pə e ɨ̀zò ntiinə wə̀ zhyə̂nə ànwùə̀ nɨ à wa ntàʼà a zèrə.

²⁰Mbə̀ʼə ka wə̀ zɨghə̀ o àpìi àtse nkwùə̀ nɨ pɨ mənə nkəʼə̀ o wə̀ ẅìimə̀ ntɨŋmə̀ ndzəənə̀ ngəʼə̀ ntii ànwùə̀ tɨ̀pòŋə̀ nɨ wə̀ ghɨ̀rə̀nə. La wə̀ tə ngẅìimə̀ ntɨŋmə̀ mə ndzəənə̀ ngəʼə̀ nkwùə̀ nɨ wə̀ ghɨ̀rə̀nə ànwùə̀ ɨ̀shìʼnə̀ zèrə zə̀ a pə ànwùə̀ ɨ̀shìʼnə̀ ambo ghò a mbyə̀ Nẅùə̀.

²¹Mbə̀ʼnə Nẅùə̀ à lə̀ fuŋə̀nə a wɨghə la lo nɨ̀ tə ngɨ̀rə̀ a lenə ntiinə Kristù à lə̀ zəənə̀ ngəʼə̀ àtwuə̀ nɨ pɨghə, nnùŋə̀ la àlènə̀ ambo pɨghə lo nɨ̀ tə ndzùŋə̀ mbòbə̀ mɨ̀kwùə̀ ɨ̀zəə.

²²Ka à lə̀ ghɨ̀rə̀ e ànwùə̀ tɨ̀pòŋə̀ àtse. Ka ŋwùə̀ a kɨ mbə e ghu nɨ à laʼa mə ndzuʼù a chwìrə̀ a furə̀ a ntswùə̀ ze.

²³Nkwùə̀ nɨ pɨ lə̀ mənə ndzòomə̀ e, ka à lə̀ kẅâ e; nkwùə̀ nɨ à lə̀ mənə ndzəənə̀ ngəʼə̀, ka à lə̀ shwàŋə̀ e a ŋwùə̀. À lə̀ ŋâ pə mbɨ̀ŋmə̀ e ambo Nẅùə̀ wa nɨ à kùʼnə̀nə a nɨ tsoʼtə̀ mɨ̀sàʼa mɨ pə̀ənə̀.

²⁴Kristù àtwuə̀ mbɨ̀ŋmə̀ e à lə̀ pìʼì a tɨ̀pòŋə̀ ɨ̀wəənə̀ aŋunə mbɨ̀ŋmə̀ e ndèrə̀ aŋunə àtɨ̀ghə pànkə̀nə, mbə̀ʼə pə̀ənə̀ kwɨghə̀ aŋunə tɨ̀pòŋə̀ ɨ̀wəənə̀ la ntyiʼə̀ mmə ngɨ̀rə̀ mɨ̀nwùə̀ mɨ təəmə̀nə. Pɨ lə̀ chyâ ɨ̀lǎ aŋunə ze la mbarə̀ a wɨghə la parə̀nə,

²⁵ntiinə nɨ̀ lə̀ pənə la tsaʼa mɨ̀mbyə̂ mɨ̀ndzìrə̀ nɨ mɨ fàntə̀nə a àlàŋə àzobə, la tɨ̀tsòŋə̀, nɨ kẅirə̀ nkwə̂ ambo ɨ̀mbyabə̀ mɨ̀mbyə̂ wa, à kɨ mbə ze wa nɨ a twuʼtə̀nə mɨ̀ntɨŋmə̀ ɨ̀mɨghə.