Read Pinyin 1 Pità 3 Bible Online

1 Pità 3 - Pinyin bible

1 Pità 3

¹Tyìʼə̀ tsaʼnə ngàŋə̀ àfàʼà zuʼnə̀nə pɨ̀masàa ɨ̀pobə la, pə̀ngyə̌, nɨ̀ kɨ ndzuʼnə pɨ̀lwuumə̀ ɨ̀pɨghə njiilo pɨ̀tse tə mbə ghu nɨ ka pobə nùŋə̀ a ghobə ntɨŋmə̀ ɨ̀ghobə aŋunə àshwəŋnə̀ Nẅùə̀, mbòomə ɨwɨghə à ghɨ̀rə̀ pobə tô ambo Kristù tɨghu nɨ̀ shwəŋə̀ àshwəŋnə̀,

²ntiinə pobə zəənə̀nə àkẅàrə̀ a Nẅùə̀ amwuə pɨghə pobə mbòomə ɨwɨghə yɨ̀ ɨ̀shìʼnə̀.

³Kò nɨ̀pòŋə̀ ɨwɨghə a pə e pə ẅùə̀ nɨ nɨ̌ lòo pə ɨ̀pwuumə̀ kẅìʼnə̀ a ẅèrə ghu a ndzùmə̀ ɨsɨghə; tsaʼnə ndwuumə̀ nɨ nɨ̀ wa tsùŋə̀ ɨ̀twuə̀ ɨ̀pɨghə, ngẅî mɨsoŋə mɨ tsə̂nə ghobə ɨtsəʼə pɨ tsə̂nə.

⁴Nɨ̀ ghɨ̀rə̀ nɨ̀pòŋə̀ ɨwɨghə â pə ẅùə̀ nɨ à lə̀əmə̀nə amwuə mɨ̀ntɨŋmə̀ ɨ̀mɨghə, mbə ẅùə̀ nɨ à wa ka kẅebə̀ e, mbə ntɨŋmə̀ wa nɨ ɨ wa ngɨ̀rə̀ mɨ̀nwùə̀ ndaa ndaa nɨ àporə̀porə̀ nɨ a pənə ànwùə̀ nɨ a pòŋə̀nə a Nẅùə̀ ntsàarə̀ àzwuumə̀ àtsùmə̀.

⁵Lə̌ tsaʼnə pə̀ngyə̌ pɨ ntsàambyə̀ nɨ pɨ lə̀ laanə̀nə nkɨ nnùŋə̀ àkwàŋə̀ àzobə àtsùmə̀ aŋunə Nẅùə̀ lə̀ mənə nnèrə̀ a nɨ̀pòŋə̀ ɨghobə, nshwuʼkə̀ mbɨ̀ŋmə̀ ɨ̀zobə a mbyə̀ pɨ̀lwuumə̀ ɨ̀pobə.

⁶Tyìʼə̀ tsaʼnə Sarah à lə̀ zuʼnə̀nə a ndwuumə̀ e Abràhamə̀ tə nfuŋə̀ farə nɨ “Masàa mə̀.” Nɨ̀ zhyə̂ lo nɨ̀ tyiʼə̀ mbə la ɨ̀poonə̀ ɨ̀pəə pɨ pə̀ngyə̌ tɨ̀tsòŋə̀ mbə̀ʼə nɨ̀ mə ngɨ̀rə̀ mɨ̀nwùə̀ mɨ təəmə̀nə ka ŋâ wɨghə ɨ̀sàanə̀ ambo àkẅàrə̀.

⁷Nɨ ndwuumə̀ wə̀ nɨ pɨ̀lwuumə̀, nɨ̀ chyə̂ pɨghə pə̀ngyə̌ ɨ̀pɨghə amwuə àlàŋə yè ɨ̀shìʼnə̀, ntwuʼtə̀ a ghobə nɨ àghuʼtə̀ njiilo pobə chyə̂ la mborə̀ ntsàarə̀ a wɨghə. Pɨghə pɨ pobə pə ghǎ pwuutə̀ kẅiirə̀ a nɨ̀chyə̂mbyə̂ wa nɨ Nẅùə̀ à wa ŋŋâ la. Nɨ̀ ghɨ̀rə̀ a lenə njiilo kò àzwuumə̀ àtse a nàanə̀ e àchàʼtə̀ Nẅùə̀ àzɨghə.

⁸Ntàʼà lẅùutə̀ ànwùə̀ nɨ ɨ mənə nshwəŋə̀ la lo, nɨ̀ ghɨ̀rə̀ mɨ̀nwùə̀ tsaʼa pànə̀ nɨ pɨ pənə nɨ taʼà àkwàŋə̀, ɨ kòŋə̀ mbɨ̀ŋmə̀ ɨ̀zɨghə tsaʼa pɨlyimə, mmə ngɨ̀rə̀ ɨ̀shìʼnə̀ a tɨ̀tɨ̀rə̀ pɨghə, mmə koorə̀ mɨ̀lɨŋə̀ ŋwùə̀ moʼo moʼo nkɨ mmə nshwuʼkə̀ mbɨ̀ŋmə̀ ɨ̀zɨghə ambo ŋwùə̀ moʼo moʼo.

⁹Kò nɨ̀ kẅuə̀ a wɨghə a tɨ̀pòŋə̀ nɨ tɨ̀pòŋə̀, kò wə̀ kɨ nchyâ o ndòonə̀ aŋunə ŋònə̀ nɨ a chyânə ndòonə̀ aŋunə ghò. Nɨ̀ ŋâ a ghobə pə nɨ mborə̀ ntiinə Nẅùə̀ à lə̀ fuŋə̀ a wɨghə la lo nɨ̀ tə ngɨ̀rə̀ a lenə mbə̀ʼə a kɨ ŋâ a wɨghə nɨ mborə̀.

¹⁰Ntiinə àŋwàʼnə̀ Nẅùə̀ a shwəŋə̀ lo: “Ŋwùə̀ wa ntsùmə̀ nɨ à kòŋə̀nə lo pə nɨ nɨ̀chyə̂mbyə̂ kɨ zəənə̀ mɨ̀njyə̂ mɨ̀shìʼnə̀, â ŋoʼò àləəmə̀ e aŋunə àshwəŋnə̀ tɨ̀pòŋə̀ nkɨ ngẅìimə̀ àkòbə̀ ntswùə̀ e aŋunə àshwəŋnə̀ àfɨ̀ghə̀.

¹¹Â kɨ ngwaʼà a tɨ̀pòŋə̀ ntə ngɨ̀rə̀ ɨ̀shìʼnə̀; ntaŋnə̀ a nɨ tàʼà àporə̀porə̀ nkɨ ndzùŋə̀ a zèrə nɨ ntɨŋmə̀ e ɨ̀tsùmə̀.

¹²Mbə̀ʼnə Ndòʼnə̀mbyə̂ à wa ntə̂ ɨ̀myə̂ ɨ̀me aŋunə pànə̀ nɨ pɨ ghɨ̀rə̀ mɨ̀nwùə̀ mɨ təəmə̀nə, mɨtugrə ɨ̀me kɨ mə ndzuʼù àchàʼtə̀ Nẅùə̀ àzobə; la mbə̀ŋə̀ ɨ̀sɨghə̀ e aŋunə pànə̀ nɨ pɨ ghɨ̀rə̀nə a tɨ̀pòŋə̀.”

¹³A ɨ̀wə̌ nɨ mbə̀ʼə a ghɨ̀rə̀ ànwùə̀ a tɨ̀pòŋə̀ aŋunə pɨghə mbə̀ʼə nɨ̀ mə tàʼà a nɨ ghɨ̀rə̀ ɨ̀shìʼnə̀?

¹⁴Nɨ̀ tə pəla mmə ndzəənə̀ ngəʼə̀ pə ntii ànwùə̀ nɨ nɨ̀ ghɨ̀rə̀nə a təəmə̀, nɨ̀ghaʼà ɨwɨghə a pə pə ghu? Kò nɨ̀ tə mbô a wɨghə a ŋònə̀ ɨ̀tse, kò mɨ̀ntɨŋmə̀ ɨ̀mɨghə tə nə̀ʼnə̀.

¹⁵La nɨ̀ pə nɨ àkẅàrə̀ aŋunə Kristù tsaʼa Ndòʼnə̀mbyə̂ nkɨ mmə nchwuʼtə̀ mbɨ̀ŋmə̀ nkwùə̀ ɨ̀tsùmə̀ a nɨ ŋâ àpə̀ŋə̀ àshwəŋnə̀ ambo ŋwùə̀ ntsùmə̀ nɨ à pyiitə̀nə a wɨghə nɨ àpyiitə̀ mbə̀ʼə ànwùə̀ nɨ nɨ̀ mənə mbyabə̀.

¹⁶Nɨ̀ kẅuə̀ a ghobə pə nɨ àghuʼtə̀ pobə àpotə̀ àshwəŋnə̀ nɨ ntɨŋmə̀ ghu laanə̀nə mbə̀ʼə ɨ̀sɨŋnə̀ ɨ̂ koorə̀ pànə̀ pa nɨ pobə pa ndzòomə̀ a wɨghə mbə̀ʼə mɨ̀nwùə̀ mɨ̀shìʼnə̀ nɨ nɨ̀ wa ngɨ̀rə̀ ntii Kristù la

¹⁷ntiinə a pòŋə̀ ambo pɨghə a nɨ zəənə̀ ngəʼə̀, mbə pə tsaʼnə Nẅùə̀ a kòŋə̀nə ntsàarə̀ a nɨ tə ngɨ̀rə̀ a tɨ̀pòŋə̀.

¹⁸Mbə̀ʼnə Kristù a lə̀ kwɨghə̀nə ntii tɨ̀pòŋə̀ pə̀ənə̀ a taʼà nkwùə̀. Mbə ze wa nɨ mɨ̀nwùə̀ ɨ̀me təəmə̀nə, nkwɨghə̀ àtwuə̀ nɨ pànə̀ pa nɨ ka mɨ̀nwùə̀ ɨ̀mobə təəmə̀ e, ndòo a ghobə ntô ambo Nẅùə̀. Pɨ lə̀ zhwuutə̀ e la mbòbə̀ mbɨ̀ŋmə̀ e, la ngɨ̀rə̀ a pə nɨ nɨ̀chyə̂mbyə̂ amwuə Àzhwùə̀.

¹⁹À lə̀ lèrə̀ tsaʼa àzhwùə̀ ngə̀ nchwìitə̀ ntwuumə̀ Nẅùə̀ ambo ɨ̀zhwùə̀ pa nɨ lə̀ pənə a ndâ ɨ̀tsaŋə̀ la.

²⁰Lə lə̀ pə ɨ̀zhwùə̀ pànə̀ pa nɨ pɨ lə̀ twuunə̀nə a ghobə a nɨ zuʼnə̀ ntwuumə̀ Nẅùə̀ nkwùə̀ za nɨ à lə̀ ẅìimə̀nə ntɨŋmə̀ e mbyabə̀ tsaʼnə Noà à lə̀ mənə nkoomə̀ àpaŋə̀ la. À lə̀ pə ndàʼà pànə̀ nɨ̀fàamə̂ nɨ pɨ lə̀ pənə amwuə àpaŋə̀ za nɨ ka nchyə lə̀ zhwuutə̀ a ghobə.

²¹Zèrə zə̀ a lə̀ pə àlènə̀ àkẅiirə̀ nchyə sìnə̀ wə̀ nɨ a za nchwarə̀ a wəənə̀, ka pə e àzwuumə̀ nɨ a za nsùu pə ndòtə aŋunə mbɨ̀ŋmə̀. A nkàʼnə nɨ ɨ̀ furə̀nə amwuə ntɨŋmə̀ ghù laanə̀nə ndèrə̀ ambo Nẅùə̀. Nkàʼnə zə̀ ɨ̀ chwarə̀ a wɨghə tsaʼnə Yěsû Kristù à lə̀ zhwuumə̀nə a nɨ̀wɨghə̀ la.

²²Kristù wa nɨ à koʼò mə ndèrə̀ a nɨ̀pwuurə̀ ntyiʼə̀ nnwuunə̀ a pàa Nẅùə̀ yè zɨghə̀nə, ntyiʼə̀ mmə mbuʼtə̀ pəngèrə̀ pobə ngàŋə mɨ̀tɨ̀ŋnə̀ nɨ pànə̀ nɨ pobə pa mbuʼtə̀ a nɨ̀pwuurə̀.