Read Pinyin 1 Pità 4 Bible Online

1 Pità 4 - Pinyin bible

1 Pità 4

¹Tsaʼnə Kristù à lə̀ zəənə̀nə ngəʼə̀ la, nɨ̀ kɨ chwuʼtə̀ mbɨ̀ŋmə̀ a nɨ zəənə̀ ngəʼə̀ tsaʼa ze ntiinə ŋònə̀ wa ntsùmə̀ nɨ à zəənə̀nə ngəʼə̀ à furə̀ amwuə tɨ̀pòŋə̀.

²Lenəla, ka a lə̀ chi chyə̂ e àpwùʼə̀ nɨ̀chyə̂mbyə̂ e amwuə àtwuə̀ ɨ̀shyə̂ ghə̀ amwuə ɨ̀làŋə tɨ̀pòŋə̀ pa nɨ ŋwùə̀ mɨsoŋə a tàʼnə la. A lə̀ chyə̂ pə amwuə ndwuumə̀ nɨ Nẅùə̀ a kòŋə̀nə.

³Nɨ̀ pyə̀ mmə ntsə̀ŋə̀ nkwùə̀ ɨ̀zɨghə yɨ̀noʼnə amwuə mɨ̀njyə̂ nɨ mɨ lə̀ làŋə̀nə a nɨ ghɨ̀rə̀ mɨ̀nwùə̀ nɨ pɨ̀tɨ̀zhyə̂ a Nẅùə̀ lə̀ mənə ngɨ̀rə̀. Mmə nchyə̂ a nɨ̀chyə̂mbyə̂ ànyòrə̀kə̀ nkɨ mbə nɨ kòonə̀, mmə nnô mbaarə̀, nshwatə̀ ngɨ̀rə̀ ɨ̀kɨ̀fî mɨ̀nwùə̀.

⁴A kə̀ʼnə̀ pɨ̀tɨ̀zhyə̂ a Nẅùə̀ pə̀ tɨ̀tsòŋə̀ amwuə ndwuumə̀ nɨ ka nɨ̀ pwuutə̀ a wɨghə ghobə amwuə nɨ̀chyə̂mbyə̂ mɨ̀nyàamə̀ pobə nɨ tsə̀ŋə̀ ɨ̀pwuumə̀ àfǐfǐ. Lenəla pobə tyiʼə̀ mmə ndzòomə̀ a wɨghə.

⁵La, pobə ghǎ tiitə̀ tsaʼnə pobə lə̀ fàʼnə ambo Nẅùə̀ nɨ à chwuʼtə̀ mə mbɨ̀ŋmə̀ e a nɨ tsoʼtə̀ ɨ̀sàʼa pànə̀ pɨ̀tɨ̀ŋnə̀ pobə pɨ̀kwuə̀.

⁶Lə̌ ɨ̀sùmə nɨ Kristù à lə̀ chwìitə̀nə ntwuumə̀ ghù ɨ̀shìʼnə̀ wa farə ambo pɨ̀kwuə̀ pyə̀ nɨ Nẅùə̀ a lə̀ tsoʼtə̀ mə ɨ̀sàʼa ɨ̀ghobə, ngɨ̀rə̀ pobə kwɨkə̀ tyìʼə̀ tsaʼnə ǎ ghɨ̀rə̀ ambo ŋwùə̀ mɨsoŋə ntsùmə̀. À lə̀ chwìitə̀ ambo pobə la mbə̀ʼə ɨ̀zhwùə̀ ɨ̀pobə chyə̂ tsaʼnə Nẅùə̀ à wə̀ nchyə̂.

⁷Ndẅùutə ànwùə̀ àtsùmə̀ ɨ̀ paatə̀, njiilo nɨ̀ ẅìimə̀ mbɨ̀ŋmə̀ ɨ̀zɨghə, mbə nɨ mɨ̀ntɨŋmə̀ mɨ laanə̀nə mbə̀ʼə chàʼtə̀ a Nẅùə̀ ɨ̀shìʼnə̀.

⁸Maa ànwùə̀ nɨ à pənə ghu à chyə̂ lo, nɨ̀ kòŋə̀ mbɨ̀ŋmə̀ ɨ̀zɨghə ɨ̀shìʼnə̀, ntiinə ɨ̀kòŋnə̀ ɨ kẅupə̀nə a tɨ̀pòŋə̀ yi noʼnə.

⁹Nɨ̀ kẅiirə̀ pɨ̀ghɨ̀ɨnə̀ amwuə mɨ̀ndâ ɨ̀mɨghə tɨghu nɨ̀ lẅùmpə̀.

¹⁰Nɨ̀ lòo ɨ̀zhìʼtə̀ pa nɨ Nẅùə̀ à ŋânə ambo pɨghə àtwuə̀ àtwuə̀ la ngyèmpə̀ a pɨ̀tse pànə̀ ghu tsaʼa pànə̀ nɨ pɨ zhyə̂nə a nɨ fàʼà nɨ àzwuumə̀ nɨ Nẅùə̀ à ŋânə ambo pobə.

¹¹Ŋònə̀ nɨ à wa nshwəŋə̀ ànwùə̀ Nẅùə̀, à wa nshwəŋə̀ tyìʼə̀ ànwùə̀ nɨ à kẅiirə̀nə ambo Nẅùə̀. Ŋònə̀ nɨ à wa nfàʼà â fàʼà tyìʼə̀ nɨ mɨ̀tɨ̀ŋnə̀ nɨ Nẅùə̀ à ŋânə ambo ze, njiilo pə̀ənə̀ ŋâ àghuʼtə̀ ambo Nẅùə̀ aŋunə ànwùə̀ àtsùmə̀ nɨ pə̀ənə̀ mənə ngɨ̀rə̀, ndàŋə̀ a ndzùmə̀ Yěsû Kristù wa nɨ àghuʼtə̀ pobə ɨ̀tɨ̀ŋnə̀ pənə ambo ze ngoŋə̀ ambo ze nɨ nkuŋə̀ nɨ nkuŋə̀. Amen.

¹²Pɨlyimə ɨ̀pâ, kò a kə̀ʼnə̀ e a wɨghə mbə̀ʼə mbuurə̀ ɨ̀kwàʼnə̀ pɨ̀tɨ̀ŋnə̀ nɨ tsirə̀nə a wɨghə pə tsaʼa ànwùə̀ shwuə̀ nɨ a tônə ambo pɨghə.

¹³Nɨ̀ pə mə ghaʼà ghaʼnə lo nɨ̀ wə̀ nɨ ɨ̀sàanə̀ a nɨ zəənə̀ ngəʼə̀ nɨ Kristù a lə̀ zəənə̀nə, mbə̀ʼə ghǎ pə nɨ nɨ̀ghaʼà yè noʼnə nkwùə̀ nɨ a ghǎ tô nɨ ntɨ̀ŋnə̀ e yi yerə̀nə yerə̀nə wa.

¹⁴Pɨ tə mə ndzòomə̀ a wɨghə ntiinə nɨ̀ wə̀ ndzùŋə̀ a Kristù, yi mborə̀ ɨ̀ za aŋunə pɨghə, a nɨ nèrə̀ lo àzhwùə̀ àghuʼtə̀ za nɨ a pənə àzhwùə̀ Nẅùə̀ la, a zə aŋunə pɨghə.

¹⁵Ŋwùə̀ wɨghə ɨ̀tse a mə ndzəənə̀ ngəʼə̀, kò zəənə̀ e pə ntiinə a pənə nzhwuutə̀ pə̀ənə̀, kə̀ ɨ̀ndzə̀ərə̀ kə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀, kə̀ ŋònə̀ nɨ a chyânə àpô amwuə mɨ̀nwùə̀ mɨ pə̀ənə̀.

¹⁶Nɨ̀ tə mbəla mə ndzəənə̀ ngəʼə̀ tsaʼa ɨ̀poonə̀ pɨ Kristù, kò nɨ̀ pə a wɨghə nɨ ɨ̀sɨŋnə̀. Nɨ̀ ŋâ pə a mɨyàa ambo Nẅùə̀ lo nɨ̀ pyiimə̀ nɨ̀linə̀ tsèrə tsa.

¹⁷Nkwùə̀ ɨ̀ kùʼù ambo Nẅùə̀ a nɨ pìʼnə̀ a nɨ tsoʼtə̀ mɨ̀sàʼa, a pə pìʼnə̀ la aŋunə pə̀ənə̀ ɨ̀pe. À tə mbəla mbìʼnə̀ aŋunə pə̀ənə̀, yi a ghǎ tyiʼə̀ pə pə ɨla ambo pànə̀ pa nɨ ka pobə zuʼnə̀ a ghobə ntwuumə̀ Nẅùə̀ ghù ɨ̀shìʼnə̀ wa?

¹⁸Tsaʼnə àŋwàʼnə̀ Nẅùə̀ a shwəŋə̀nə lo: “A tə pəla ntɨ̀ŋnə̀ ambo ŋònə̀ nɨ mɨ̀nwùə̀ ɨ̀me təəmə̀nə a nɨ chwarə̀, Yi a ghǎ tyiʼə̀ pə pə la ambo pɨ̀tɨ̀zhyə̂ a Nẅùə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀?”

¹⁹Lenəla, pànə̀ pa nɨ pobə pa ndzəənə̀ ngəʼə̀ pə amwuə àlàŋə nɨ Nẅùə̀ à kòŋə̀nə, pobə̂ ŋâ mbɨ̀ŋmə̀ ɨ̀zobə ambo Nẅùə̀ wa nɨ à lə̀ tsùŋə̀nə a ghobə, ndàŋə̀ a mbyə̀ ntə ngɨ̀rə̀ ɨ̀shìʼnə̀.