Read Pinyin 1 Pità 5 Bible Online

1 Pità 5 - Pinyin bible

1 Pità 5

¹Mɨ̀ŋə̀, tsaʼa eldà, ngwə̀ mbuʼù mbô ambo peldà nɨ pɨ pənə a tɨ̀tɨ̀rə̀ pɨghə; mbuʼù mbô la tsaʼa ndzəənə̀ zəənə̀nə Kristù nkwùə̀ nɨ à lə̀ mənə ndzəənə̀ ngəʼə̀, nkɨ mbə ghǎ pə nɨ ɨ̀sàanə̀ amwuə àghuʼtə̀ e nkwùə̀ nɨ à ghǎ tô.

²Ngwə̀ shwəŋə̀ la lo, nɨ̀ mə mbyabə̀ mbyə̂ Nẅùə̀ za nɨ à ŋânə ambo pɨghə lo nɨ̀ tə nnaŋə̀ la nɨ ntɨŋmə̀ ghù ɨ̀shìʼnə̀; kò a pə e pə tsaʼa pɨ pə̀ ntinə̀ a wɨghə. Nɨ̀ fàʼà àfàʼà àzɨghə nɨ nɨ̀ghaʼà, kò nɨ̀ fàʼà a wɨghə pə ntii nkabə̀ nɨ pɨ twuə̀nə a wɨghə ghu. Nɨ̀ fàʼà pə lo nɨ̀ wə̀ ngyèmpə̀ a ghobə.

³Kò nɨ̀ tə nzhiʼə̀ pànə̀ nɨ pɨ ŋânə lo nɨ̀ tə nnaŋə̀, la nɨ̀ pə tsaʼa pànə̀ pa nɨ mbə̀ʼə pobə mɨ̀ŋnə̀ a mbòomə ɨwɨghə.

⁴Njiilo, àtwuə̀ pɨ̀mbyabə̀ mɨ̀mbyə̂ à ghǎ tô tuŋə̀ ngùʼu ɨzɨghə nɨ pənə àghuʼtə̀ tə myə̀

⁵A kɨ mbə tyìʼə̀ ndəŋə ndəŋə ambo pɨghə mbǎ nkàŋə̀ mɨŋwùə̀, nɨ̀ zuʼnə̀ pɨ̀lɨ̀ŋmə̂, ndòo ànwùə̀ nɨ̀shwuʼkə̀ mbɨ̀ŋmə̀ ngẅî aŋunə pɨghə pɨ̀tsùmə̀ tsaʼa atsəʼə ntiinə, “Ka Nẅùə̀ a kòŋə̀ a ŋwùə̀ nɨ a nèrə̀nə mbɨ̀ŋmə̀ la nnèrə̀ àpòŋə̀ ntɨŋmə̀ e ambo ŋònə̀ wa nɨ à shwuʼkə̀nə mbɨ̀ŋmə̀ e a ɨ̀shyə̂.”

⁶Ŋâ mbɨ̀ŋmə̀ o ambo Nẅùə̀, a tyiʼə̀ ŋŋaŋə̀ o a àtɨ̀ghə amwuə nkwùə̀ nɨ ɨ kùʼnə̀nə, ambo ze.

⁷Nkɨ ŋâ mɨ̀nwùə̀ mɨ̀tsùmə̀ nɨ mɨ tsàarə̀nə o ambo ze, ntiinə a ze wa nɨ à wa nnaŋə̀ mɨ̀nwùə̀ ɨ̀mô

⁸Nɨ̀ zhìʼtə̀ a wɨghə, nnwuunə̀ a nɨ̀lyìinə̀, ntiinə ngàŋə̀ kɨpaanə nɨ à pənə devə̀lə̀ à wə̀ ngyìinə̀ nnyaʼà a wɨghə a nɨ kô nkwurə̀ e tsaʼa afuunə nɨ njyə̀ mənə ndzaŋə̀ e.

⁹Nɨ̀ təəmə̀ ntɨ̀ŋnə̀ aŋunə àpyiimə̀ ntɨŋmə̀ àzɨghə, ntwuunə̀ a wɨghə ànwùə̀ nɨ à tàʼnə lo nɨ̀ ghɨ̀rə̀, nkɨ nzhyə̂ lo ngəʼə̀ nɨ nɨ̀ zəənə̀nə la, la kɨ mbə ngəʼə̀ nɨ pɨlyimə ɨ̀pɨghə nɨ pɨ nùŋə̀nə ntɨŋmə̀ aŋunə Nẅùə̀ amwuə àtwuə̀ ɨ̀shyə̂ ze àtsùmə̀ pə nkɨ mmə ndzəənə̀.

¹⁰Nkwùə̀ nɨ nɨ̀ zəənə̀ ngəʼə̀ aŋunə mətùmə nkwùə̀, Nẅùə̀ wa nɨ à wa nkòŋə̀ a wɨghə tɨsɨŋnə mbə ze wa nɨ à lə̀ fuŋə̀nə a wɨghə lo nɨ̀ pwuutə̀ pɨghə pɨ Kristù mbə nɨ ɨ̀sàanə̀ amwuə àghuʼtə̀ e yè tɨmyə̀ za, ze àtwuə̀ mbɨ̀ŋmə̀ e a pə ghɨ̀rə̀ nɨ̀ laanə̀ mmyàanə̀, ntəəmə̀ ntɨ̀ŋnə̀, nkɨ mbə nɨ ntɨŋmə̀ a nɨ tẅəŋə̀ mɨŋaŋə ɨ̀mɨghə mèrə mìnə̀ a ɨ̀shyə̂.

¹¹Mɨ̀tɨ̀ŋnə̀ pə ɨ̀me, ngoŋə̀ nɨ nkuŋə̀ nɨ nkuŋə̀. Amen.

¹²A gha la à yèmpə̀ Salàsə̀ wa nɨ ǹzhyə̂nə lo a Moonə̀ Kristù nɨ à wa nfàʼà ambo ze nɨ ntɨŋmə̀ e ɨ̀tsùmə̀, lo ŋ̂ŋwàʼnə̀ a mətùmə àŋwàʼnə̀ wə̀ ambo pɨghə. Ngwə̀ mbuʼù mbô ambo pɨghə nshwəŋə̀ la lo, lə̌ nkǔŋə nkuŋə àpòŋə̀ ntɨŋmə̀ a Nẅùə̀. Nɨ̀ təəmə̀ aŋunə ntɨ̀ŋnə̀.

¹³Yètse àshwatə̀ ɨ̀poonə̀ pɨ Kristù nɨ a pənə a Babilònə̀ nɨ Nẅùə̀ à lə̀ kɨnə ntsoʼò tsaʼa pɨghə a zə nchàʼtə̀ a wɨghə. Moonə̀ mə̀ Mark à wə̀ nkɨ nchàʼtə̀ a wɨghə.

¹⁴Nɨ̀ chàʼtə̀ mbɨ̀ŋmə̀ ɨ̀zɨghə nkô a ŋwùə̀ moʼo moʼo nkampə̀ a nɨ nèrə̀ ɨ̀kòŋnə̀ ɨ̀poonə̀ pɨ Kristù. Àporə̀porə̀ â pə ambo pɨghə pa pɨ̀tsùmə̀ nɨ nɨ̀ pənə pɨghə pɨ Kristù la.