Read Pinyin 2 Pità 1 Bible Online

2 Pità 1 - Pinyin bible

2 Pità 1

¹Àŋwàʼnə̀ zə̀ àŋwàʼnə̀ mɨ̀ŋə̀ Shimùnə̀ Pità nɨ m̀bənə ngàŋə̀ àfàʼà nkɨ mbə ngàŋə ntwuumə̀ Yěsû Kristù. A zə ndèrə̀ ambo pànə̀ nɨ Nẅùə̀ ɨ̀wə̀ənə̀ pobə ngàŋə̀ nchwarə̀ ɨ̀wəənə̀ Yěsû Kristù pobə ghɨ̀rə̀ mə mɨ̀nwùə̀ ɨ̀mobə təəmə̀ pobə pə nɨ àpyiimə̀ ntɨŋmə̀ yè ɨ̀shìʼnə̀ aŋunə tsaʼa pə̀ənə̀.

²Nẅùə̀ à nèrə̀ àpòŋə̀ ntɨŋmə̀ e aŋunə pɨghə ngɨ̀rə̀ nɨ̀ chyə̂ nɨ àporə̀porə̀ yè noʼnə, ntiinə nɨ̀ zhyə̂nə a Nẅùə̀ pobə Yěsû Ndòʼnə̀mbyə̂ ɨ̀wə̀ənə̀.

³Nẅùə̀ à ŋâ a wə̀ənə̀ nɨ àzwuumə̀ àtsùmə̀ nɨ pə̀ənə̀ tàʼnə ndàŋə̀ a ndzùmə̀ mɨ̀tɨ̀ŋnə̀ ɨ̀me lo pə̀ənə̀ chyə̂ tsaʼnə ɨ̀poonə̀ pɨ Kristù chyə̂nə a nɨ chyə̂. Mbə̀ʼə pə̀ənə̀ ghɨ̀rə̀ a lenə ntiinə pə̀ənə̀ zhyə̂nə a Nẅùə̀ nɨ à fuŋə̀nə a wə̀ənə̀ nɨ mɨ̀tɨ̀ŋnə̀ ɨ̀me lo pə̀ənə̀ tô ndzuʼù ɨ̀shìʼnə̀ e.

⁴Nɨ ndwuumə̀ wə̀ à kɨ ŋŋâ a wə̀ənə̀ nɨ mɨ̀nkàʼnə mɨ̀ẅùunə nɨ ndwùnə̀ e ɨ tsə̂nə lo pə̀ənə̀ làŋə̀ aŋunə mèrə nkɨ̀ɨrə̀ ɨ̀pwuumə̀ mbyə̂ pə̀ nɨ pànə̀ pa nnùŋə̀ ntoŋə ɨzobə aŋunə mbə̀ʼə pə nɨ àpòomə Nẅùə̀.

⁵Tsaʼnə Nẅùə̀ à ghɨ̀rə̀ mə mɨ̀nwùə̀ mɨ̀tsùmə̀ ambo pə̀ənə̀ la, pə̀ənə̀ taŋnə̀ amwuə ɨ̀làŋə ɨ̀tsùmə̀ a nɨ zəənə̀ lo nɨ̀ kẅìʼnə̀ ngɨ̀rə̀ mɨ̀nwùə̀ mɨ̀shìʼnə̀ aŋunə àpyiimə̀ ntɨŋmə̀ àzɨghə, aŋunə ngɨ̀rə̀ mɨ̀nwùə̀ ɨ̀zɨghə yɨ̀ ɨ̀shìʼnə̀, nɨ̀ kẅìʼnə̀ àzhyə̂ ànwùə̀,

⁶nkẅìʼnə̀ nɨ̀ẅìimə̀ mbɨ̀ŋmə̀ aŋunə àzhyə̂ ànwùə̀, nkẅìʼnə̀ àẅìimə̀ ntɨŋmə̀ aŋunə nɨ̀ẅìimə̀ mbɨ̀ŋmə̀, nkẅìʼnə̀ nɨ̀pô Nẅùə̀,

⁷nɨ̀ kẅìʼnə̀ ɨ̀kòŋnə̀ pɨlyimə aŋunə nɨ̀pô Nẅùə̀, nkẅìʼnə̀ ɨ̀kòŋnə̀ aŋunə ɨ̀kòŋnə̀ pɨlyimə.

⁸Mbə̀ʼnə mɨ̀nwùə̀ mə tə mbəla mbə amwuə pɨghə mmə nkẅuə̀ ndèrə̀ nɨ mbyə̀, yi mèrə̌ ghɨ̀rə̀ nɨ̀ fàʼà ɨ̀shìʼnə̀ nkɨ ngɨ̀rə̀ mɨ̀nwùə̀ mɨ̀shìʼnə̀ mɨ̀noʼnə tsaʼnə nɨ̀ zhyə̂nə a Ndòʼnə̀mbyə̂ ɨ̀wə̀ənə̀ Yěsû Kristù ɨ̀shìʼnə̀.

⁹Ŋònə̀ ɨ̀tse à tə mbəla mbə ghu nɨ ka à pə e nɨ mɨ̀nwùə̀ mə amwuə ze, yi à chyə̂ mbə la tsaʼa ŋònə̀ nɨ ka à mə ndzəənə̀ e a ndyə̌ sàa kə̀ ɨ̀fə̀, nkɨ ndə̀ənə̀ e lo Nẅùə̀ à waʼà mə ɨ̀nwùə̀ tɨ̀pòŋə̀ ɨ̀pe pɨ lwùnə̀.

¹⁰Tsaʼnə a pənə lə la nɨ pɨlyimə ɨ̀pâ, nɨ̀ kyiitə̀ nɨ ɨ̀tɨ̀ŋnə̀ ɨ̀wɨghə a nɨ zəənə̀ lo nɨ̀ fàʼà ntsàarə̀ tsaʼnə nɨ̀ pyə̀nə mmə fàʼà a nɨ nèrə̀ ambo àtwuə̀ mbɨ̀ŋmə̀ àzɨghə pobə pɨ̀tse pə̀ənə̀ lo Nẅùə̀ à lə̀ fuŋə̀ a wɨghə lo nɨ̀ zùŋə̀ e nkɨ tsoʼò a wɨghə lo nɨ̀ pə pə̀ənə̀ ɨ̀pe. Nɨ̀ tə mbəla mmə ngɨ̀rə̀ a lenə nɨ̀ laʼa ngwaʼà a wɨghə àpyiimə̀ ntɨŋmə̀ àzɨghə aŋunə Nẅùə̀ apə̀.

¹¹Nɨ ndwuumə̀ wə̀ Nẅùə̀ a pɨ ŋâ a wɨghə nɨ ɨ̀sàanə̀ ntsùmə̀ a nɨ nkwuunə̀ amwuə ànwùə̀ nɨ̀fò Ndòʼnə̀mbyə̂ ngàŋə̀ nchwarə̀ ɨ̀wə̀ənə̀ Yěsû Kristù nɨ à ghoŋə̀nə nɨ nkuŋə̀.

¹²Tsaʼnə a pənə lə la, mbɨ mə kẅempə̀ a wɨghə nɨ mɨ̀nwùə̀ mə nkwùə̀ ɨ̀tsùmə̀, mbaa pə tsaʼnə nɨ̀ pyə̀ mə nzhyə̂ a mèrə ɨ̀shìʼnə̀ nkɨ ntəəmə̀ ntɨ̀ŋnə̀ amwuə nkǔŋə nkuŋə nɨ nɨ̀ zhyə̂nə la.

¹³Nkwàŋə̀ lo, a pòŋə̀ lo n̂tsùŋə̀ nchi nkẅempə̀ a wɨghə nɨ mɨ̀nwùə̀ mèrə mə tsaʼnə ngwə̀ mbirə̀ nchyə̂ amwuə àtwuə̀ ɨ̀shyə̂ zə̀.

¹⁴Ǹzhyə̂ lo nkwùə̀ ɨ̀ paatə̀ ambo mɨ̀ŋə̀ a nɨ myàʼtə̀ àtwuə̀ ɨ̀shyə̂ zə̀ tsaʼnə Ndòʼnə̀mbyə̂ Yěsû Kristù ɨ̀wəənə̀ à ghɨ̀rə̀nə ǹzhyə̂.

¹⁵Ngwə̀ taŋnə̀ amwuə ɨ̀làŋə ɨ̀tsùmə̀ a nɨ zəənə̀ lo nkwùə̀ nɨ m̀myàʼtə̀nə àtwuə̀ ɨ̀shyə̂ zə̀, nɨ̀ pirə̀ mmə nkẅempə̀ mɨ̀nwùə̀ mèrə mə mɨ̀tsùmə̀.

¹⁶Ka pəə lə̀ zùŋə̀ a wəə pə mɨkerə nɨ pànə̀ lə̀ tumə̀nə a nɨ tiitə̀ a wɨghə nɨ mɨ̀nwùə̀ mɨ yerə̀nə yerə̀nə nɨ Ndòʼnə̀mbyə̂ ɨ̀wə̀ənə̀ Yěsû Kristù a lə̀ mənə ngɨ̀rə̀, farə tsaʼnə a ghǎ tô. Pəə àtwuə̀ mbɨ̀ŋmə̀ àzəə lə̀ zəənə̀ mɨ̀nwùə̀ mèrə mə nɨ ɨ̀myə̂ ɨ̀məə,

¹⁷ntiinə pəə lə̀ pənə ghu nkwùə̀ nɨ Nẅùə̀ Tǎ a lə̀ mənə ŋâ àghuʼtə̀ e tsaʼnə ngyə̀ za lə̀ furə̀nə amwuə alyiʼə nɨ̀fò Nẅùə̀ ntô ambo ze nshwəŋə̀ lo “Lə̌ moonə̀ ghù ɨ̀shìʼnə̀ nɨ ǹkòŋə̀nə, mbə nɨ nɨ̀ghaʼà mbə̀ʼə e.”

¹⁸Pəə àtwuə̀ ɨ̀pɨ̀ŋmə̀ àzəə lə̀ zuʼù ngyə̀ zə̀ tsaʼnə ɨ̀ lə̀ pənə àtwuə̀ mbarə̀ yɨ̀ ndaanə̀nə za.

¹⁹Lenəla, ɨ̀twuə̀ ɨ̀pəə laanə̀ aŋunə ntwuumə̀ nɨ ngàŋə ntwuumə̀ Nẅùə̀ lə̀ mənə nchwìitə̀ la. Njiilo nɨ̀ tsùŋə̀ tə̂ àtwuə̀ ntiinə ɨ chyə̂ tsaʼa làamə̀ nɨ à wə̀ nkɨrə̀ amwuə ndzùmə tə mbyàa nkwùə̀ nɨ njyə̂ ɨ̌ laanə̀, saŋə ngẅùʼə ngẅùʼə a tyiʼə̀ ntô amwuə mɨ̀ntɨŋmə̀ ɨ̀mɨghə.

²⁰Aŋunə ɨ̀nwùə̀ pə ɨ̀tsùmə̀ nɨ̀ tsùŋə̀ nzhyə̂ a laanə̀ lo ka ànwùə̀ ɨ̀tse a pə e amwuə àŋwàʼnə̀ Nẅùə̀ nɨ ngàŋə ntwuumə̀ Nẅùə̀ lòonə pə àzhìʼtə̀ àzobə nshwəŋə̀ a zèrə.

²¹Mbə̀ʼnə ka ànwùə̀ àtse nɨ ngàŋə̀ ntwuumə̀ Nẅùə̀ à shwəŋə̀nə a furə̀ e pə amwuə àkwàŋə̀ ŋwùə̀ mɨsoŋə. A furə̀ pə ambo pànə̀ pa nɨ Nẅùə̀ à ŋânə a ghobə nɨ àshwəŋnə̀ ghu lo pobə shwəŋə̀.