Read Pinyin 2 Pità 2 Bible Online

2 Pità 2 - Pinyin bible

2 Pità 2

¹Tsaʼnə ngàŋə ntwuumə̀ pɨ̀chwìrə̀ lə̀ pənə amwuə pə̀ənə̀ la, a kɨ mbə tyìʼə̀ ndəŋə ndəŋə lo pɨ̀nèrə̀ ɨ̀nwùə̀ pɨ pɨ̀chwìrə̀ kɨ mbə amwuə pɨghə. Pobə̌ nyaʼtə̀ kwuunə̀ amwuə pɨghə nɨ mɨ̀nwùə̀ nɨ mɨ̌ tsə̀ŋə̀ a wɨghə kɨ twuunə̀ a Nẅùə̀ nɨ à lə̀ zwuunə̀nə a ghobə la. Lenəla ghɨ̀rə̀ pɨ̀ faʼa ntsə̀ŋə̀ a ghobə.

²Pànə̀ pɨ̀noʼnə̌ zùŋə̀ ɨ̀làŋə ɨ̀sɨŋnə̀ ɨ̀pobə tyiʼə̀ zòomə̀ a nkǔŋə nkuŋə.

³Pɨ̀nèrə̀ pɨ pɨ̀chwìrə̌ lòo ntoŋə nɨ pobə pənə nɨ zèrə tsùnkə̀ mɨkerə mɨ pɨ̀chwìrə̀ lòo fɨ̀kə̀ a wɨghə nɨ mèrə. La pɨ chwuʼtə̀ mə a nɨ̀tsə̀ŋə̀ ɨghobə nnùŋə̀. Ka ŋònə̀ nɨ ǎ tsə̀ŋə̀ a ghobə à kɨ mə ndyə̂ e.

⁴Ka Nẅùə̀ à lə̀ yìʼtə̀ e pəngèrə̀ nɨ pɨ lə̀ ghɨ̀rə̀nə ànwùə̀ tɨ̀pòŋə̀. À lə̀ màʼà a ghobə amwuə àkɨɨnə̀ ɨ̀mǔ, nkorə̀ a ghobə nɨ mɨ̀tsaŋə̀ amwuə ndzùmə pobə̂ tyiʼə̀ mmə mbyabə̀ njyə̂ ntsoʼtə̀ mɨ̀sàʼa za.

⁵Ka Nẅùə̀ à lə̀ yìʼtə̀ e àtwuə̀ ɨ̀shyə̂ yè ntsàambyə̀. À lə̀ ghɨ̀rə̀ nchyə ɨ zhaʼà nzhwuutə̀ pànə̀ pɨ̀tsùmə̀ nɨ ka pobə lə̀ mə mbô a ghobə Nẅùə̀ la nchwarə̀ a Noà nɨ à lə̀ mənə nchwìitə̀ ntwuumə̀ mbə̀ʼə mɨ̀nwùə̀ mɨ təəmə̀nə pobə pɨ̀tse pànə̀ sàmbaa.

⁶Nẅùə̀ à lə̀ kɨ ntòonə̀ mɨ̀mbòmpə mɨ ɨ̀laʼà mɨ Sodòmə̀ pobə Gomorrah nɨ ɨ̀mǔ tsaʼa àlènə̀ ànwùə̀ ambo pànə̀ pa nɨ ka pobə mə mbô a ghobə a Nẅùə̀ la.

⁷À lə̀ chwarə̀ a Lot nɨ mɨ̀nwùə̀ ɨ̀me lə̀ təəmə̀nə a kɨ mbə ŋònə̀ nɨ ka à lə̀ kòŋə̀ e a mbòomə ànyòrə̀kə̀ nɨ pànə̀ nɨ ka pobə pô a ghobə mbòomə lə̀ mənə nchyə̂.

⁸Ŋònə̀ wə̀ nɨ mɨ̀nwùə̀ ɨ̀me lə̀ təəmə̀nə la à lə̀ mə nchyə̂ a tɨ̀tɨ̀rə̀ pobə njyə̂ ɨ̀tsùmə̀, ndzəənə̀ nkɨ ndzuʼù mɨ̀nwùə̀ mɨ tɨ̀pòŋə̀ nɨ pànə̀ pə lə̀ mənə ngɨ̀rə̀ mɨ tòmnə̀ ntɨŋmə̀ e.

⁹Tsaʼnə a pənə lə la, Nẅùə̀ à zhyə̂ tsaʼnə mbə̀ʼə a chwarə̀ pànə̀ nɨ mɨ̀nwùə̀ ɨ̀mobə təəmə̀nə aŋunə àkwàʼnə̀ àtsùmə̀ nkɨ nzhyə̂ tsaʼnə mbə̀ʼə a kɨ nnùŋə̀ ngàŋə ngɨ̀rə̀ ɨ̀nwùə̀ tɨ̀pòŋə̀ amwuə ngəʼə̀ tə mbyàa njyə̂ ntsoʼtə̀ ɨ̀sàʼa,

¹⁰nkɨ tô ambo pànə̀ pyə̀ nɨ pobə pa ndzùŋə̀ pə mɨ̀nwùə̀ mɨ ntsɨ̀ŋnə nɨ mbɨ̀ŋmə̀ ɨ̀zobə za ntàʼà. Pɨ̀nèrə̀ pɨ pɨ̀chwìrə̀ pèrə pə pa ntsòo a ghàŋə̀, nnèrə̀ mbɨ̀ŋmə̀, ka kɨ mə pô a ghobə a nɨ zòomə̀ ɨ̀zhwùə̀ pɨ̀laanə̀nə pa nɨ pənə a nɨ̀pwuurə̀ la.

¹¹Mbaa pə pəngèrə̀ nɨ pɨ tɨ̀ŋnə̀nə nkɨ nchi mbə nɨ ɨ̀tɨ̀ŋnə̀ nɨ ɨ tsàarə̀nə yè pɨ̀nèrə̀ mɨ̀nwùə̀ pɨ pɨ̀chwìrə̀ pə, ka pobə lə̀ mə ndzòomə̀ a ghobə ɨ̀zhwùə̀ pɨ̀laanə̀nə pə a mbyə̀ Ndòʼnə̀mbyə̂.

¹²La pànə̀ pèrə pə pa ngɨ̀rə̀ mɨ̀nwùə̀ tɨ kwàŋə̀ tsaʼa mɨ̀nyàamə̀ mɨ mɨpaʼa mɨ tsə̂nə myə̀ nɨ pɨ lə̀ pyə̂nə lo pànə̀ tə nkô nzhwuutə̀. Pobə pa ndzòomə̀ mɨ̀nwùə̀ nɨ ka pobə zhyə̂ a ghobə. Pɨ ghǎ tsə̀ŋə̀ a ghobə tyìʼə̀ tsaʼnə pànə̀ pa nkô mɨ̀nyàamə̀ mɨ tsə̂nə a mɨpaʼa nzhwuutə̀.

¹³Nẅùə̀ à ghǎ ŋâ a ghobə nɨ ngəʼə̀ tyìʼə̀ tsaʼnə pobə kɨnə mmə ŋŋâ ambo pɨ̀tse pə̀ənə̀. Pobə pa ndzɨghə̀ mbyə̂ ɨzobə tyìʼə̀ nɨ njyə̂, ngɨ̀rə̀ pə mɨ̀nwùə̀ nɨ mɨ pòŋə̀nə a ghobə, pobə tə mbwuutə̀ pɨghə pɨ pobə ndzɨghə̀, pobə chyâ ɨ̀sɨŋnə̀ àtwuə̀ pɨghə ntiinə pobə la ɨ̀pwuumə̀ tɨ̀pòŋə̀.

¹⁴Ɨ̀myə̂ ɨ̀mobə kɨ mmə ndzəənə̀ e pə pə̀ngyə̌ nɨ pobə pa nfànə̀, ka laʼa kaanə̀ a ghobə a nɨ ghɨ̀rə̀ a tɨ̀pòŋə̀. Pobə pa mbə̀ŋə̀ ɨ̀twuə̀ pànə̀ nɨ pobə porə̀nə ngɨ̀rə̀ lo pobə̂ kwɨghə̀ nkɨrə, pobə mèrə̀kə̀ mə amwuə àghə̀ʼə̀ ntyiʼə̀ mbə ngẅàrə̀ ndòonə̀.

¹⁵Pobə waʼà mə àlàŋə yè təəmə̀nə, ntyiʼə̀ ndzùŋə̀ pə àlàŋə Balàamə̀ moonə̀ Beor. Balàamə̀ wə̀ à lə̀ kòŋə̀ nkabə̀ nɨ pɨ lə̀ tyaŋə̀nə e nɨ zèrə ntii ɨ̀nwùə̀ tɨ̀pòŋə̀ nɨ à lə̀ mənə ngɨ̀rə̀.

¹⁶Pɨ lə̀ saʼà e aŋunə ànwùə̀ tɨ̀pòŋə̀ e. Ndzàkɨshyə̀ e ɨ̀ shwəŋnə̀ ambo ze nɨ ngyə̀ ŋwùə̀ mɨsoŋə ndzòŋə̀ ànwùə̀ nɨ ngàŋə̀ ntwuumə̀ Nẅùə̀ wa à lə̀ tyiʼə̀ mmə ngɨ̀rə̀ tsaʼa àpaarə̀.

¹⁷Pànə̀ pə chyə̂ mbə tsaʼa pɨ̀nɨ̀mwurə̀ ɨ̀shyə̂ nɨ pɨ zwuumə̀nə, nkɨ chyə̂ mbə tsaʼa mbàʼà nɨ àghə̀ʼtə̀ tɨ̀ŋnə̀ a zə̀ mbìʼì. Nẅùə̀ à nùŋə̀ alyiʼə ambo pobə nɨ a pənə nɨ̀ntaamə̀ tsɨ̀ shyə.

¹⁸Pobə pa nshwəŋnə̀ ɨ̀shwəŋnə̀ àkoʼò mbɨ̀ŋmə̀ pobə ɨ̀kɨ̀ghə̀ ɨ̀shwəŋnə̀, ndòo ngɨ̀rə̀ mɨ̀nwùə̀ məghàbə̀ ɨ̀zobə za nchwùutə̀ nkô pànə̀ pa nɨ pobə pìʼnə̀ mə a nɨ kɨ̀ɨrə̀ nfurə̀ amwuə pànə̀ pa nɨ pobə pa nchyə̂ a nɨ̀chyə̂mbyə̂ àfàntə̀ la.

¹⁹Pobə pa nkaʼà a nɨ kyàatə̀ mɨnkɨrə aŋunə pə̀ənə̀, la pobə àtwuə̀ mbɨ̀ŋmə̀ àzobə pə ɨ̀pùʼù ambo pɨ̀mbòomə pa nɨ pɨ tsə̀ŋə̀nə la. Mbə̀ʼnə ŋwùə̀ la àpùʼù ambo àzwuumə̀ za àtsùmə̀ nɨ a kônə e nkorə̀

²⁰Pànə̀ tə mbəla nkɨ̀ɨrə̀ mɨ̀nwùə̀ nɨ mɨ tsə̀ŋə̀nə àtwuə̀ ɨ̀shyə̂ zə̀ ndàŋə̀ a ndzùmə̀ nɨ̀zhyə̂ a Ndòʼnə̀mbyə̂ ɨ̀wə̀ənə̀ nɨ à pənə ngàŋə̀ nchwarə̀ ɨ̀wə̀ənə̀ Yěsû Kristù, nchi nkẅirə̀ nkwuunə̀ amwuə, ndẅùutə zə̀ ɨ̀ pɨ̂ ambo pobə ntsàarə̀ mbìʼnə.

²¹A lə̀ pə pòŋə̀ ambo pobə mbə̀ʼə pobə lə̀ pəla ngoŋə̀ tɨ zhyə̂ àlàŋə yè təəmə̀nə zə̀, ntsàarə̀ a nɨ zhyə̂ ntə̌ ghu laanə̀nə wa nchi mbə̀ŋə̀ mmyàʼtə̀ a ẅèrə.

²²Ànwùə̀ zèrə zə̀ a lə̀ ghɨ̀rə̀ ɨ̀shwəŋnə̀ pɨ̀màʼtə̀nə màʼtə̀nə pə lo, “Ngwɨghə̀ ɨ̀ za nkẅirə̀ ndzɨghə̀ àzhaʼkə̀ e, àkuŋə nɨ pɨ sùunə a kẅirə̀ ngə̀ mbɨgrə̀ e pə amwuə nɨ̀lèbə.”