Read Pinyin 2 Pità 3 Bible Online

2 Pità 3 - Pinyin bible

2 Pità 3

¹Pɨ̀swùə ɨ̀pâ pɨ̀shìʼnə̀, lə̌ àpaatə̀ àŋwàʼnə̀ nɨ ŋ̀ŋwàʼnə̀nə ambo pɨghə. Amwuə ɨ̀ŋwàʼnə̀ pèrə pə ɨ̀tsùmə̀, ntaŋnə̀ a nɨ pə̀ʼkə̀ ɨ̀kwàŋə̀ pɨ̀shìʼnə̀ amwuə pɨghə, nkẅempə̀ a wɨghə nɨ mɨ̀nwùə̀ mə̀.

²Ǹtàʼà kẅempə̀ a wɨghə nɨ mɨ̀nwùə̀ nɨ ngàŋə ntwuumə̀ Nẅùə̀ yɨ̀ laanə̀nə lə̀ kwaa mə nshwəŋə̀ ambo pɨghə farə ntə̌ wa nɨ furə̀nə ambo Ndòʼnə̀mbyə̂ ngàŋə̀ nchwarə̀ a wə̀ənə̀ nɨ ngàŋə ntwuumə̀ Kristù lə̀ ŋânə ambo pɨghə la.

³Ntsàambyə̀ ànwùə̀ nɨ ǹtàʼnə lo nɨ̀ zhyə̂ à chyə̂ lo, à ghǎ pə amwuə mɨ̀njyə̂ mɨ ndẅùutə la, pànə̀ pɨ̀tse furə̀ mmə ngẅìi ànwùə̀ Nẅùə̀, ngɨ̀rə̀ pə mɨ̀nwùə̀ nɨ pobə pa nkòŋə̀,

⁴Mmə pyiitə̀ lo, “Yěsû à lə̀ kàʼà lo à wə̀ nkẅirə̀ ntô la à ghə? Pɨ̀tǎ pɨ̀tǎ ɨ̀pə̀ənə̀ lə̀ kwɨkə̀ mə mɨ̀nwùə̀ nkɨ mbirə̀ mbə pə a lenə a nɨ̀pìʼnə̀ tsaʼnə pɨ lə̀ tsùŋə̀nə àtwuə̀ ɨ̀shyə̂.”

⁵Pobə lə̀ twuunə̀ a ghobə a nɨ zhyə̂ lo Nẅùə̀ à lə̀ shwəŋə̀nə la ɨ̀shwəŋnə̀, nɨ̀pwuurə̀ pobə ɨ̀shyə̂ furə̀. Ɨ̀shyə̂ ɨ̀ lə̀ furə̀ la amwuə nchyə, a kɨ ndòo la nchyə ntsùŋə̀ ɨ̀shyə̂ ghu.

⁶Nẅùə̀ à lə̀ kɨ ndòo la tyìʼə̀ nchyə ghu ntsə̀ŋə̀ àtwuə̀ ɨ̀shyə̂ nkwùə̀ ghu.

⁷A kɨ mbə la tyìʼə̀ àshwəŋnə̀ zèrə zə nɨ à nùŋə̀nə nɨ̀pwuurə̀ pobə àtwuə̀ ɨ̀shyə̂ sìnə̀ wə̀, a nɨ ghǎ tsə̀ŋə̀ zèrə nɨ ɨ̀mǔ amwuə njyə̂ nɨ pɨ ghǎ tsoʼtə̀ ɨ̀sàʼa pànə̀ nɨ ka pobə pô a ghobə a Nẅùə̀, nzhwuutə̀ a ghobə.

⁸La nɨ pɨ̀swùə ɨ̀pâ pɨ̀shìʼnə̀, nɨ̀ zhyə̂ lo ambo Nẅùə̀, taʼà njyə̂ à chyə̂ tsaʼa nguʼu nkaamə̀, nguʼu nkaamə̀ nkɨ mbə tsaʼa taʼà njyə̂.

⁹Ka Ndòʼnə̀mbyə̂ â sùŋə̀ e mɨ̀kwùə̀ a nɨ ghɨ̀rə̀ ànwùə̀ nɨ à kàʼnə, tsaʼnə pànə̀ pɨ̀tse pa nkwàŋə̀. La à wa ngẅìimə̀ ntɨŋmə̀ pɨghə pɨ pobə ntiinə ka à tàʼà e lo ŋònə̀ ɨ̀tse â kwɨghə̀. À wa ntàʼà pə lo ŋwùə̀ ntsùmə̀ pə̀ŋə̀ ntɨŋmə̀ aŋunə tɨ̀pòŋə̀ e.

¹⁰La ka ŋònə̀ ɨ̀tse a pə ghǎ zhyə̂ e njyə̂ nɨ Ndòʼnə̀mbyə̂ à ghǎ tô ntiinə à ghǎ tô la tsaʼa ɨ̀ndzə̀ərə̀ à wə̀ ntô nɨ ɨ̀twuʼə̀. Nɨ̀pwuurə̀ ghǎ myə̀ tsaʼnə ngyə̀ ɨ̀tse ɨ ghǎ mə tswuə̀ nɨ ɨ̀tɨ̀ŋnə̀. Ɨ̀mǔ ɨ̂ tòonə̀ àzwuumə̀ àtsùmə̀ nɨ a pənə a nɨ̀pwuurə̀ â myə̀, lenəla àtwuə̀ ɨ̀shyə̂ â sɨghə̀ pobə pɨ àzwuumə̀ àtsùmə̀ nɨ a pənə amwuə.

¹¹Tsaʼnə Nẅùə̀ à ghǎ tsə̀ŋə̀ àzwuumə̀ àtsùmə̀ nɨ ndwuumə̀ wə̀ la, nɨ̀ ghǎ tyiʼə̀ pə zèrə mbuurə̀ pə̀ənə̀? Nɨ̀ chyə̂ a nɨ̀chyə̂mbyə̂ ghù ndaanə̀nə nkɨ ŋŋâ a ẅèrə ambo Nẅùə̀,

¹²tsaʼnə nɨ̌ mə pyabə̀ njyə̂ nɨ Nẅùə̀ à ghǎ tô kɨ kyiitə̀ amwuə àlàŋə àtsùmə̀ a nɨ zəənə̀ lo zèrə faʼa ntô. À ghǎ pə njyə̂ ghu ɨ̀mǔ tòonə̀ nɨ̀pwuurə̀ ntsə̀ŋə̀. Àzwuʼə̀ ɨ̀mǔ zə̀ a ghɨ̀rə̀ àzwuumə̀ àtsùmə̀ nɨ a pənə a nɨ̀pwuurə̀ a myìirə̀.

¹³La a nɨ zùŋə̀ nkàʼnə e pə̀ənə̀ pə mbyabə̀ nɨ̀pwuurə̀ tsɨ̀ shwuə̀ pobə àtwuə̀ ɨ̀shyə̂ yè shwuə̀, nɨ a pənə alyiʼə nɨ mɨ̀nwùə̀ mɨ təəmə̀nə pənə ghu.

¹⁴Lenəla, nɨ pɨ̀swùə ɨ̀pâ, tsaʼnə nɨ̀ wə̀ mbyabə̀ njyə̂ ghu la, nɨ̀ kyiitə̀ amwuə ɨ̀làŋə ɨ̀tsùmə̀ a nɨ zəənə̀ lo kò àpàbə àtse pobə ɨ̀fèrə ɨ̀tse pə e aŋunə pɨghə. Nɨ̀ kɨ mbə nɨ àporə̀porə̀ pɨghə pɨ pobə.

¹⁵Nɨ̀ lòo àwìimə̀ ntɨŋmə̀ Ndòʼnə̀mbyə̂ tsaʼa ɨ̀sàanə̀ nɨ Nẅùə̀ à wə̀ ŋŋâ ambo pɨghə lo nɨ̀ chwarə̀, tyìʼə̀ tsaʼnə ndyimə ɨ̀wə̀ənə̀ ghù ɨ̀shìʼnə̀ Pàolò à lə̀ ŋwàʼnə̀nə ambo pɨghə nɨ àzhìʼtə̀ nɨ Nẅùə̀ à lə̀ ŋânə ambo ze.

¹⁶La ànwùə̀ nɨ à wa nshwəŋə̀ amwuə ɨ̀ŋwàʼnə̀ ɨ̀tsùmə̀ nɨ à wa ŋŋwàʼnə̀. Mɨ̀nwùə̀ mɨ̀tɨ̀ŋnə̀ mɨ̀tse chyə̂ ghu amwuə ɨ̀ŋwàʼnə̀ pə̀ nɨ à wa ŋŋwàʼnə̀ la nɨ mèrə tɨ̀ŋnə̀nə ambo pə̀ənə̀ a nɨ zhyə̂, nɨ pànə̀ nɨ ka pobə zhyə̂ a ghobə ànwùə̀ àtse pobə pànə̀ nɨ pobə pa ka shwəŋə̀ a ghobə ànwùə̀ moʼo pa nshwəŋə̀ mɨ̀nwùə̀ mɨ̀tɨ̀ŋnə̀ mə amwuə àlàŋə tɨ̀pòŋə̀. Lə̌ tsaʼnə pobə pa ngɨ̀rə̀ aŋunə ɨlyiʼə pɨ̀nyaanə amwuə àŋwàʼnə̀ Nẅùə̀. Lenəla, ntyiʼə̀ ndòo a nɨ̀wɨghə̀ ntô aŋunə pobə.

¹⁷La nɨ̀ pɨ̀swùə ɨ̀pâ, tsaʼnə nɨ̀ pyə̀ mə nzhyə̂ ànwùə̀ zə̀ la, nɨ̀ zhìʼtə̀ a wɨghə mbə̀ʼə ɨ̀fàntə̀ ɨ̀nwùə̀ pànə̀ nɨ pobə pa ka zùŋə̀ a ghobə a mbòomə kaŋə ghɨ̀rə̀ nɨ furə̀ aŋunə alyiʼə ɨ̀shìʼnə̀ nɨ nɨ̀ pənə ghu nkunə̀

¹⁸Nɨ̀ làŋə̀ nɨ mbyə̀ ntə nkẅuə̀ amwuə àpòŋə̀ ntɨŋmə̀ nɨ Ndòʼnə̀mbyə̂ ngàŋə̀ chwarə̀ ɨ̀wə̀ənə̀ Yěsû Kristù a wa nnèrə̀ ambo pə̀ənə̀, nkɨ mmə nzhyə̂ e ɨ̀shìʼnə̀. Àghuʼtə̀ â pə ambo ze a nɨ pìʼnə̀ tɨ̀tsòŋə̀ ngoŋə̀ nɨ nkuŋə̀. Amen!