Read Pinyin 1 Jònə 3 Bible Online

1 Jònə 3 - Pinyin bible

1 Jònə 3

¹Ndwuumə̀ nɨ Tǎ à kòŋə̀nə a wəənə̀ a ẅùə̀ nɨ mbə̀ʼə ka ŋwùə̀ a shwəŋə̀ e tə pɨ tyiʼə̀ nfuŋə̀ a wəənə̀ nɨ ɨ̀poonə̀ pɨ Nẅùə̀. Pə̀ənə̀ kɨ mbə la pèrə nkǔŋə nkuŋə. Ɨ̀sùmə nɨ ka pànə̀ pɨ àtwuə̀ ɨ̀shyə̂ zhyə̂ a ghobə lo pə̀ənə̀ la ɨ̀poonə̀ pɨ Nẅùə̀ ɨ̀ chyə̂ la lo ka pobə lə̀ zàamə̀ nzhyə̂ a ghobə a Nẅùə̀ Tǎ ɨ̀wə̀ənə̀.

²Pɨ̀swùə ɨ̀pâ nɨ ǹkòŋə̀nə, pə̀ənə̌ ɨ̀poonə̀ pɨ Nẅùə̀ tɨ̀tsòŋə̀ la ka tsùŋə̀ zhyə̂ a wəənə̀ tsaʼa pə̀ənə̀ ghǎ pə. La pə̀ənə̀ zhyə̂ lo nkwùə̀ nɨ Kristù à ghǎ tô, pə̀ənə̀ ghǎ pə tsaʼa ze ntiinə pə̀ənə̀ ghǎ zəənə̀ e tsaʼnə à pənə.

³Lenəla, ŋwùə̀ ntsùmə̀ wa nɨ à wə̀ mbyabə̀ nnùŋə̀ ntɨŋmə̀ e aŋunə ze, â nùŋə̀ mbɨ̀ŋmə̀ e ɨ̂ laanə̀ tyìʼə̀ tsaʼnə Kristù àtwuə̀ mbɨ̀ŋmə̀ e à kɨnə ndaanə̀.

⁴Ŋwùə̀ ntsùmə̀ wa nɨ à wa ngɨ̀rə̀ a tɨ̀pòŋə̀ à wa mbəʼə̀ la mbòomə Nẅùə̀. Ntiinə nɨ̀ghɨ̀rə̀ a tɨ̀pòŋə̀ a nɨ̀pəʼə̀ a mbòomə Nẅùə̀.

⁵Nɨ̀ zhyə̂ lo Yěsû à lə̀ tô àtwuə̀ ɨ̀shyə̂ ghə la a nɨ sùu a tɨ̀pòŋə̀ ɨ̀wə̀ənə̀, ka kɨ pə e nɨ tɨ̀pòŋə̀ ɨ̀tse amwuə ze.

⁶Ka ŋònə̀ nɨ à pwuutə̀ mə pobə Kristù â chi ngɨ̀rə̀ e a tɨ̀pòŋə̀. Ŋònə̀ wa ntsùmə̀ nɨ à làŋə̀nə nɨ mbyə̀ ntə ngɨ̀rə̀ a tɨ̀pòŋə̀ la, à laʼa mə mbirə̀ e tɨ zəənə̀ e kə̀ kɨ zhyə̂ e.

⁷Ɨ̀poonə̀, kò nɨ̀ tyiʼə̀ ŋwùə̀ a fɨ̀kə̀ a wɨghə. Ŋònə̀ nɨ à wa ngɨ̀rə̀ mɨ̀nwùə̀ mɨ təəmə̀nə la ŋònə̀ nɨ à wa ngɨ̀rə̀ mɨ̀nwùə̀ mɨ təəmə̀nə a mbyə̀ Nẅùə̀, tyìʼə̀ tsaʼnə Kristù à wa ngɨ̀rə̀ mɨ̀nwùə̀ mɨ təəmə̀nə.

⁸Ŋwùə̀ ntsùmə̀ nɨ à wa ndàŋə̀ nɨ mbyə̀ a nɨ ghɨ̀rə̀ a tɨ̀pòŋə̀ a moonə̀ devə̀lə̀ ntiinə devə̀lə̀ à lə̀ ghɨ̀rə̀ mə a tɨ̀pòŋə̀ a nɨ furə̀ a nɨ̀pìʼnə̀ àtwuə̀ ɨ̀shyə̂. Ɨ̀sùmə nɨ Moonə̀ Nẅùə̀ a lə̀ tônə àtwuə̀ ɨ̀shyə̂ ɨ̀ lə̀ pə la a nɨ tô ntsə̀ŋə̀ a àfàʼà devə̀lə̀.

⁹Ŋònə̀ nɨ à pənə moonə̀ Nẅùə̀ mbə̀ʼə ka a làŋə̀ e nɨ mbyə̀ a nɨ tɨ ngɨ̀rə̀ a tɨ̀pòŋə̀ ntiinə mbòomə Nẅùə̀ à wə̀ amwuə ze, Nẅùə̀ a kɨ mbə Tǎ ɨghobə, a pə kɨ làŋə̀ nɨ mbyə̀ tɨ ghɨ̀rə̀ e a tɨ̀pòŋə̀ apə̀.

¹⁰Lə̌ tsaʼnə mbə̀ʼə pə̀ənə̀ zhyə̂ lo lə̌ moonə̀ Nẅùə̀ kə̀ moonə̀ devə̀lə̀. Ŋònə̀ wa nɨ à wa ka ghɨ̀rə̀ e ànwùə̀ yè təəmə̀nə, ka kɨ mə kòŋə̀ e a ndyimə e la, ka à pə e moonə̀ Nẅùə̀.

¹¹Ntwuumə̀ ghù ɨ̀shìʼnə̀ nɨ nɨ̀ lə̀ zàamə̀nə ndzuʼù ɨ lə̀ pə la lo nɨ̀ tɨ nkòŋə̀ mbɨ̀ŋmə̀ ɨ̀zɨghə.

¹²Kò nɨ̀ pə wɨghə tsaʼa Cain. Cain à lə̀ pə ŋwùə̀ devə̀lə̀ nzhwuutə̀ a momaa e. Cain à lə̀ zhwuutə̀ e ntii àkə? À lə̀ zhwuutə̀ e ntiinə mɨ̀nwùə̀ nɨ à lə̀ mənə ngɨ̀rə̀ lə̀ pə mɨ̀nwùə̀ mɨ tɨ̀pòŋə̀, la mɨ momaa e təəmə̀.

¹³Kò a kə̀ʼnə̀ a wɨghə mbǎ pɨlyimə ɨ̀pâ, tsaʼnə pànə̀ pɨ àtwuə̀ ɨ̀shyə̂ pa mbàanə̀ a wɨghə.

¹⁴Pə̀ənə̀ zhyə̂ lo pə̀ənə̀ furə̀ mə amwuə nɨ̀wɨghə̀ nkẅiirə̀ a nɨ̀chyə̂mbyə̂ nɨ à ghoŋə̀nə nɨ nkuŋə̀, ntiinə pə̀ənə̀ kòŋə̀nə pɨlyimə ɨ̀pə̀ənə̀. Ŋònə̀ wa ntsùmə̀ nɨ ka à kòŋə̀ e a ndyimə e à chyə̂ mbə la tsaʼa àkwuə̀ ŋwùə̀.

¹⁵Ŋònə̀ nɨ à pàanə̀nə a ndyimə e a ŋònə̀ nɨ à wa nzhwuutə̀. Nɨ̀ kɨ nzhyə̂ lo ŋònə̀ nɨ à wa nzhwuutə̀ ka à pə e nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ amwuə ze.

¹⁶Yěsû Kristù à lə̀ kwɨghə̀ àtwuə̀ nɨ pə̀ənə̀, lenəla lə tyiʼə̀ mbə tsaʼnə pə̀ənə̀ zhyə̂nə àzwuumə̀ nɨ ɨ̀kòŋnə̀ ɨ pənə ẅèrə. A kɨ mbə alyiʼə ànwùə̀ àzəənə̀ a nɨ kwɨghə̀ àtwuə̀ nɨ pɨlyimə ɨ̀pə̀ənə̀.

¹⁷Ŋwùə̀ à tə mbəla mbə nɨ ɨ̀pwuumə̀, ndzəənə̀ a momaa e nɨ à pənə mbuŋə̀, ka à koorə̀ e mɨ̀liŋə̀ ɨ̀me a nɨ yèmpə̀ e, a tyiʼə̀ nnèrə̀ àkə nnèrə̀ lo à kòŋə̀ a Nẅùə̀?

¹⁸Ɨ̀poonə̀, kò pə̀ənə̀ tɨ nnèrə̀ ɨ̀kòŋnə̀ pə nɨ ɨ̀kòbə̀ ntswùə̀ kə̀ nɨ ɨ̀shwəŋnə̀ ɨ̀pə̀ənə̀, pə̀ənə̀ nèrə̀ ɨ̀kòŋnə̀ wa nɨ ɨ pənə ɨ̀kòŋnə̀ nkǔŋə nkuŋə aŋunə ngɨ̀rə̀ mɨ̀nwùə̀ ɨ̀zəənə̀.

¹⁹Pə̀ənə̀ tə pəla mbə nɨ ɨ̀kòŋnə̀ a tɨ̀tɨ̀rə̀ pə̀ənə̀, pə̀ənə̀ zhyə̂ lo pə̀ənə̌ pànə̀ pɨ nkǔŋə nkuŋə, nkɨ ntô a mbyə̀ Nẅùə̀ tɨ àkẅàrə̀ amwuə mɨ̀ntɨŋmə̀ ɨ̀məənə̀.

²⁰Nkwùə̀ za ntsùmə̀ nɨ mɨ̀ntɨŋmə̀ ɨ̀məənə̀ ma nsaʼà a wəənə̀ la, pə̀ənə̀ zhyə̂ lo Nẅùə̀ à zhyə̂ ànwùə̀ àtsùmə̀ ntsàarə̀ tsaʼnə pə̀ənə̀ zhyə̂nə.

²¹Lenəla nɨ pɨ̀swùə ɨ̀pâ pɨ ɨ̀shìʼnə̀, mɨ̀ntɨŋmə̀ ɨ̀məənə̀ tə pəla ka mə tiitə̀ e a wəənə̀ lo pə̀ənə̀ pə ngɨ̀rə̀ a tɨ̀pòŋə̀, pə̀ənə̀ chyə̂ mbə a wəənə̀ nɨ àkẅàrə̀ a mbyə̀ Nẅùə̀ apə̀.

²²Pə̀ənə̌ kɨ kẅiirə̀ àzwuumə̀ àtsùmə̀ nɨ pə̀ənə̀ pyiitə̀nə ambo ze ntiinə pə̀ənə̀ pə nnùŋə̀ mɨ̀ntə̌ ɨ̀me, nkɨ mmə ngɨ̀rə̀ mɨ̀nwùə̀ nɨ mɨ̌ ghɨ̀rə̀ a pə nɨ nɨ̀ghaʼà.

²³Ntə̌ e nɨ à wa ntàʼà lo pə̀ənə̀ nùŋə̀ ɨ chyə̂ lo pə̀ənə̀ nùŋə̀ ntɨŋmə̀ ɨ̀wəənə̀ aŋunə nɨ̀linə̀ nɨ Moonə̀ e Yěsû Kristù, nkɨ nkòŋə̀ mbɨ̀ŋmə̀ ɨ̀zə̀ənə̀. A tyiʼə̀ ntə̌ ghu nɨ Kristù à lə̀ ŋânə ambo pə̀ənə̀.

²⁴Ŋwùə̀ wa ntsùmə̀ nɨ à nùŋə̀nə ntə̌ Nẅùə̀, à pwuutə̀ mbə la taʼà ŋwùə̀ pobə Nẅùə̀, Nẅùə̀ a kɨ mbwuutə̀ mbə taʼà ŋwùə̀ pobə ze. Lə̌ tsaʼnə pə̀ənə̀ pa ngɨ̀rə̀ a nɨ zhyə̂ lo Nẅùə̀ à wə̀ pə̀ənə̀ pɨ pobə: pə̀ənə̀ zhyə̂ a lenə ntiinə à ŋânə a wəənə̀ nɨ Àzhwùə̀ e.