Read Pinyin 1 Jònə 4 Bible Online

1 Jònə 4 - Pinyin bible

1 Jònə 4

¹Pɨ̀swùə ɨ̀pâ pɨ̀shìʼnə̀, kò nɨ̀ pyiimə̀ a wɨghə a ŋònə̀ wa ntsùmə̀ nɨ à wa nshwəŋə̀ lo à wə̀ nɨ Àzhwùə̀ Nẅùə̀. Nɨ̀ zhwiʼì a ghobə pɨ̀tsùmə̀ a nɨ zəənə̀ lo Àzhwùə̀ ghu a furə̀ ambo Nẅùə̀ lo. Nɨ̀zhwiʼì a ghobə ntiinə ngàŋə ntwuumə̀ Nẅùə̀ pɨ pɨ̀chwìrə̀ pɨ̀noʼnə tyiʼə̀ mə a alyiʼə àtsùmə̀ amwuə àtwuə̀ ɨ̀shyə̂.

²Lə̌ ndwuumə̀ nɨ mbə̀ʼə nɨ̀ zhyə̂ lo ŋwùə̀ à wə̀ nɨ Àzhwùə̀ Nẅùə̀: Ŋwùə̀ wa ntsùmə̀ nɨ à wa nshwəŋə̀ lo Yěsû Kristù à lə̀ tô àtwuə̀ ɨ̀shyə̂ ghə tsaʼa ŋwùə̀ mɨsoŋə la ŋwùə̀ nɨ à pənə nɨ Àzhwùə̀ Nẅùə̀.

³La ŋwùə̀ wa ntsùmə̀ nɨ à wa nshwəŋə̀ lo ka Yěsû à lə̀ tô e a àtwuə̀ ɨ̀shyə̂ tsaʼa ŋwùə̀ mɨsoŋə la ka à pə e nɨ Àzhwùə̀ Nẅùə̀ amwuə ze. Àzhwùə̀ nɨ à pənə nɨ zèrə a àzhwùə̀ ngàŋə̀ kɨpaanə Kristù. Nɨ̀ lə̀ zuʼù mə lo àzhwùə̀ ghu a ghǎ tô, mbaa pə tɨ̀tsòŋə̀ à tô mə ntyiʼə̀ e a àtwuə̀ ɨ̀shyə̂.

⁴La ngə̀ aŋunə pɨghə, ɨ̀poonə̀, pɨghə̌ pànə̀ pɨ Nẅùə̀, nkɨ ntsàarə̀ ngàŋə ntwuumə̀ Nẅùə̀ pɨ pɨ̀chwìrə̀ za ntiinə Àzhwùə̀ za nɨ a pənə amwuə pɨghə a chyə̂ nɨ mɨ̀tɨ̀ŋnə̀ ntsàarə̀ a devə̀lə̀ nɨ à wa mbuʼtə̀ pànə̀ pɨ àtwuə̀ ɨ̀shyə̂ la.

⁵Ngàŋə ntwuumə̀ Nẅùə̀ pɨ pɨ̀chwìrə̀ za la pànə̀ pɨ àtwuə̀ ɨ̀shyə̂, lenəla mɨ̀nwùə̀ nɨ pobə pa nshwəŋə̀ a mɨ̀nwùə̀ mɨ àtwuə̀ ɨ̀shyə̂. Pànə̀ pɨ àtwuə̀ ɨ̀shyə̂ kɨ mmə ndzuʼù ànwùə̀ nɨ pobə pa nshwəŋə̀.

⁶La pə̀ənə̌ pànə̀ pɨ Nẅùə̀. Ŋwùə̀ ntsùmə̀ nɨ à zhyə̂nə a Nẅùə̀ à wa ndzuʼù ànwùə̀ nɨ pə̀ənə̀ pa nshwəŋə̀. La ŋwùə̀ wa nɨ ka à pə e ŋwùə̀ Nẅùə̀ ka à zuʼù e ànwùə̀ nɨ pə̀ənə̀ pa nshwəŋə̀. Lə̌ àlàŋə nɨ mbə̀ʼə pə̀ənə̀ zhyə̂ Àzhwùə̀ nkǔŋə nkuŋə nɨ àzhwùə̀ pɨ̀chwìrə̀.

⁷Pɨ̀swùə ɨ̀pâ, pə̀ənə̀ tə nkòŋə̀ pɨlyimə ɨ̀pə̀ənə̀ ntiinə ɨ̀kòŋnə̀ ɨ furə̀ la ambo Nẅùə̀. Ŋwùə̀ wa ntsùmə̀ nɨ à wa nkòŋə̀ a ndyimə e la moonə̀ Nẅùə̀, a kɨ nzhyə̂ a Nẅùə̀.

⁸Ŋwùə̀ wa ntsùmə̀ nɨ à wa ka kòŋə̀ e ndyimə e ka à zhyə̂ e a Nẅùə̀ ntiinə Nẅùə̀ àtwuə̀ mbɨ̀ŋmə̀ e à wa nkòŋə̀ pə̀ənə̀.

⁹Lə̌ tsaʼnə Nẅùə̀ à lə̀ làŋə̀nə nnèrə̀ ɨ̀kòŋnə̀ e ambo pə̀ənə̀: À lə̀ tsàa ndàʼà Moonə̀ e a àtwuə̀ ɨ̀shyə̂ ghə lo mbə̀ʼə pə̀ənə̀ làŋə̀ a ndzùmə̀ ze mbə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀.

¹⁰Lə̌ tsaʼnə ɨ̀kòŋnə̀ ghu ɨ pənə: ka a pə e la lo pə̀ənə̀ lə̀ pyə̀ mmə nkòŋə̀ a Nẅùə̀, a chyə̂ pə lo à lə̀ kòŋə̀ a wəənə̀ ntsàa a Moonə̀ e lo a pə tsaʼa àzwuumə̀ nɨ̀shwàʼà nsùu a tɨ̀pòŋə̀ ɨ̀wə̀ənə̀.

¹¹Pɨ̀swùə ɨ̀pâ, tsaʼnə Nẅùə̀ à kòŋə̀nə a wəənə̀ nɨ ndwuumə̀ wə̀, pə̀ənə̀ chyə̂ a nɨ tə nkòŋə̀ mbɨ̀ŋmə̀ ɨ̀zəənə̀.

¹²Ŋònə̀ ɨ̀tse à laʼa mə mbirə̀ e tɨ zəənə̀ a Nẅùə̀. La pə̀ənə̀ tə mmə nkòŋə̀ mbɨ̀ŋmə̀ ɨ̀zəənə̀, yi Nẅùə̀ ǎ pə pə̀ənə̀ pɨ pobə, ɨ̀kòŋnə̀ e nɨ à pənə nɨ ẅèrə aŋunə pə̀ənə̀ ɨ̂ kɨ nkoʼò mbwùumə̀.

¹³Pə̀ənə̀ zhyə̂ lo pə̀ənə̀ pwuutə̀ mə mbə taʼà ŋwùə̀ pə̀ənə̀ pɨ Nẅùə̀, a kɨ mbwuutə̀ mbə taʼà ŋwùə̀ pə̀ənə̀ pɨ pobə, ntiinə à ŋâ mə a wəənə̀ nɨ Àzhwùə̀ e.

¹⁴Pə̀ənə̀ zəənə̀ mə nkɨ mmə nshwəŋə̀ ambo pɨ̀tse pə̀ənə̀ lo Tǎ à lə̀ tsàa a Moonə̀ e lo â tô mbə Ngàŋə̀ Nchwarə̀ pə̀ənə̀ a àtwuə̀ ɨ̀shyə̂ ghə̀.

¹⁵Ŋwùə̀ ntsùmə̀ nɨ à tsoʼnə ntswùə̀ e nshwəŋə̀ lo Yěsû la Moonə̀ Nẅùə̀, Nẅùə̀ à wa pobə ze a kɨ mbə pobə Nẅùə̀.

¹⁶Pə̀ənə̀ zhyə̂ nkɨ nnùŋə̀ ntɨŋmə̀ aŋunə ɨ̀kòŋnə̀ nɨ Nẅùə̀ à pənə nɨ ẅèrə aŋunə pə̀ənə̀. Nẅùə̀ à wa nkòŋə̀ pə̀ənə̀. Ŋwùə̀ wa ntsùmə̀ nɨ à wa nkòŋə̀ pə̀ənə̀ à wa pobə Nẅùə̀, Nẅùə̀ a kɨ mbə pobə ze.

¹⁷Ɨ̀kòŋnə̀ nɨ ɨ pənə amwuə pə̀ənə̀ ɨ koʼò mbwùumə̀. Lenəla mɨ̀ntɨŋmə̀ ɨ̀məənə̀ ghǎ tɨ̀ŋnə̀ aŋunə njyə̂ ntsoʼtə̀ ɨ̀sàʼa, ntiinə pə̀ənə̀ pɨ Nẅùə̀ chyə̂ mbə la taʼà ŋwùə̀ a àtwuə̀ ɨ̀shyə̂ ghə tyìʼə̀ tsaʼnə Kristù à lə̀ pənə pobə ze.

¹⁸Ka ŋònə̀ nɨ Nẅùə̀ à kòŋə̀nə â pə e nɨ àkẅàrə̀. Ɨ̀kòŋnə̀ nɨ koʼnə mbwùumə̀ ɨ wa nkantə̀ àkẅàrə̀ àtsùmə̀. Àzwuumə̀ nɨ a za ndòo àkẅàrə̀ ntô la ngəʼə̀ nɨ pɨ ghǎ chyâ aŋunə njyə̂ ntsòʼtə mɨ̀sàʼa. Ŋònə̀ nɨ à pənə nɨ àkẅàrə̀ la ŋònə̀ nɨ ka ɨ̀kòŋnə̀ e ɨ koʼò mbwùumə̀ e.

¹⁹Pə̀ənə̀ pa nnèrə̀ ɨ̀kòŋnə̀ la ntiinə Nẅùə̀ à lə̀ pyə̀nə nkòŋə̀ a wəənə̀.

²⁰Ŋònə̀ ɨ̀tse à tə mbəla nshwəŋə̀ lo, “Ǹkòŋə̀ a Nẅùə̀” la mbàanə̀ a ndyimə e yi la ngàŋə̀ pɨ̀chwìrə̀ ntiinə ŋònə̀ wa nɨ ka à kòŋə̀ e a ndyimə wa nɨ à mənə ndzəənə̀, mbə̀ʼə ka à kɨ nkòŋə̀ e a Nẅùə̀ nɨ ka à mə ndzəənə̀ e.

²¹Nẅùə̀ à ŋâ mə a wəənə̀ nɨ ntə̌ wə̀ lo, “Ŋònə̀ nɨ à wa nkòŋə̀ a Nẅùə̀ à chyə̂ a nɨ kɨ nkòŋə̀ a ndyimə e.”