Read Pinyin 1 Jònə 5 Bible Online

1 Jònə 5 - Pinyin bible

1 Jònə 5

¹Ŋònə̀ wa ntsùmə̀ nɨ à nùŋə̀nə amwuə ntɨŋmə̀ ze lo Yěsû a Ghù Ndzoʼnə wa, a moonə̀ Nẅùə̀. Lenəla, ŋwùə̀ wa ntsùmə̀ nɨ à kòŋə̀nə a tǎ à kɨ kòŋə̀ a moonə̀ e.

²Ndwuumə̀ nɨ mbə̀ʼə pə̀ənə̀ zhyə̂ lo pə̀ənə̀ pə nkòŋə̀ ɨ̀poonə̀ pɨ Nẅùə̀ ɨ chyə̂ la a nɨ kòŋə̀ a Nẅùə̀ nkɨ mmə nùŋə̀ mɨ̀ntə̌ ɨ̀me.

³Lə̌ tsaʼnə mbə̀ʼə pə̀ənə̀ kòŋə̀ a Nẅùə̀ la: pə̀ənə̀ tə nnùŋə̀ mɨ̀ntə̌ ɨ̀me ntiinə ka mɨ̀ntə̌ ɨ̀me pə e àpìʼì àtse nɨ a lìrə̀nə ntsàarə̀ a wəənə̀ a nɨ pìʼì.

⁴Mbə̀ʼnə ŋwùə̀ ntsùmə̀ nɨ à pənə moonə̀ Nẅùə̀ à tsàarə̀ mə àtwuə̀ ɨ̀shyə̂. Àzwuumə̀ nɨ pə̀ənə̀ lòonə ntsàarə̀ àtwuə̀ ɨ̀shyə̂ zə̀ ghu la àpyiimə̀ ntɨŋmə̀ àzəənə̀ aŋunə Nẅùə̀.

⁵Ŋònə̀ nɨ mbə̀ʼə a tsàarə̀ àtwuə̀ ɨ̀shyə̂ a ɨ̀wə̌? A ze wa nɨ à nùŋə̀nə ntɨŋmə̀ e aŋunə Yěsû lo a Moonə̀ Nẅùə̀.

⁶Yěsû Kristù à lə̀ tô a àtwuə̀ ɨ̀shyə̂. Pɨ lə̀ ŋâ e nɨ àkẅiirə̀ nchyə nɨ nchyə, a kwɨghə̀ aŋunə àtɨ̀ghə pànkə̀nə, àləəmə̀ e a kẅìnə̀. Ka pɨ lə̀ ŋâ e a ye pə nɨ àkẅiirə̀ nchyə nɨ nchyə ndàʼà. À lə̀ kɨ kwɨghə̀ aŋunə àtɨ̀ghə pànkə̀nə, àləəmə̀ e a kẅìnə̀. La Àzhwùə̀ Nẅùə̀ nɨ a za nnèrə̀ a wəənə̀ lo lə̌ nkǔŋə nkuŋə ntiinə ka zèrə â nyìi e a chwìrə̀.

⁷Ɨ̀làŋə chyə̂ ɨtarə nɨ mbə̀ʼə pə̀ənə̀ zhyə̂ a nkǔŋə nkuŋə mbə̀ʼə Yěsû.

⁸Pə̀ənə̀ zhyə̂ a nkǔŋə nkuŋə mbə̀ʼə Yěsû ntiinə Àzhwùə̀ a lə̀ tiitə̀ a wəənə̀, pɨ ŋâ e nɨ àkẅiirə̀ nchyə nɨ nchyə, àləəmə̀ e a kẅìnə̀ nkwùə̀ nɨ à lə̀ kwɨghə̀nə. Ɨ̀làŋə pə ɨ̀tsùmə̀ ɨtarə nèrə̀ a wəənə̀ la lo Yěsû la Moonə̀ Nẅùə̀.

⁹Tsaʼnə pə̀ənə̀ nùŋə̀nə ntɨŋmə̀ aŋunə ànwùə̀ nɨ pànə̀ pə nshwəŋə̀ la, ànwùə̀ nɨ Nẅùə̀ à wə̀ nshwəŋə̀ a wəənə̀ a tsàarə̀ a zhyə̀ nɨ pànə̀ pa nshwəŋə̀ ambo pə̀ənə̀. A chyə̂ a lenə ntiinə a Nẅùə̀ àtwuə̀ ɨ̀pɨ̀ŋmə̀ e nɨ à wa nshwəŋə̀ mbə̀ʼə Moonə̀ e.

¹⁰Ŋònə̀ wa nɨ à nùŋə̀nə ntɨŋmə̀ e aŋunə Moonə̀ Nẅùə̀ â zhyə̂ lo mɨ̀nwùə̀ mə mɨ̀tsùmə̀ la nkǔŋə nkuŋə. Ŋònə̀ nɨ ka à pyiimə̀ e ànwùə̀ nɨ Nẅùə̀ à wa shwəŋə̀ à lòo a Nẅùə̀ la tsaʼa ngàŋə̀ pɨ̀chwìrə̀ ntiinə ka à pyiimə̀ e ànwùə̀ nɨ Nẅùə̀ à shwəŋə̀nə mbə̀ʼə moonə̀ e.

¹¹Ànwùə̀ nɨ Nẅùə̀ à wa nshwəŋə̀ mbə̀ʼə moonə̀ e a chyə̂ la lo: Nẅùə̀ à ŋâ mə̀ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ la ambo pə̀ənə̀. Nɨ̀chyə̂mbyə̂ ẅèrə wə̀ a pə nɨ̀chyə̂mbyə̂ ẅùə̀ nɨ moonə̀ e à ŋânə.

¹²Ŋònə̀ wa nɨ à pwuutə̀nə mbə taʼà ŋwùə̀ pobə Moonə̀ Nẅùə̀ à wa nɨ nɨ̀chyə̂mbyə̂. Ŋònə̀ nɨ ka à pwuutə̀ mbə taʼà ŋwùə̀ pobə Moonə̀ Nẅùə̀ ka à pə e nɨ nɨ̀chyə̂mbyə̂.

¹³Ŋ̀ŋwàʼnə̀ mɨ̀nwùə̀ mə ambo pɨghə pa nɨ nɨ̀ nùŋə̀nə ntɨŋmə̀ ɨ̀wɨghə aŋunə nɨ̀linə̀ nɨ Moonə̀ Nẅùə̀, mbə̀ʼə nɨ̀ zhyə̂ lo nɨ̀ wa nɨ nɨ̀chyə̂mbyə̂ nɨ à ghoŋə̀nə nɨ nkuŋə̀.

¹⁴Àzwuumə̀ nɨ a za ngɨ̀rə̀ pə̀ənə̀ pə nɨ ntɨŋmə̀ a nɨ tô a mbyə̀ Nẅùə̀ a chyə̂ lo pə̀ənə̀ tə pyiitə̀ e nɨ àzwuumə̀ àtse amwuə ndwuumə̀ nɨ à tàʼnə, yi ǎ zuʼù àchàʼtə̀ àzəənə̀.

¹⁵Tsaʼnə pə̀ənə̀ zhyə̂nə lo à wa ndzuʼù a wəənə̀ aŋunə àzwuumə̀ àtsùmə̀ nɨ pə̀ənə̀ pyiitə̀nə e nɨ zèrə la, pə̀ənə̀ kɨ nzhyə̂ lo ǎ ŋâ a wəənə̀ nɨ àzwuumə̀ àtsùmə̀ nɨ pə̀ənə̀ pyiitə̀nə e nɨ zèrə.

¹⁶Ŋwùə̀ à tə ndzəənə̀ a ndyimə e a mə ngɨ̀rə̀ a tɨ̀pòŋə̀ nɨ mbə̀ʼə ka à lòo e a nɨ̀wɨghə̀ ntô, yi ǎ chàʼtə̀ a Nẅùə̀ aŋunə ze lo Nẅùə̀ â ŋâ e nɨ nɨ̀chyə̂mbyə̂. Pànə̀ nɨ ngwə̀ nshwəŋə̀ lo nɨ̀ chàʼtə̀ a Nẅùə̀ aŋunə pobə a pànə̀ nɨ ka tɨ̀pòŋə̀ ɨghobə a pə ghɨ̀rə̀ e lo pobə̂ kwɨghə̀. La tɨ̀pòŋə̀ ɨ̀tse à wa ngɨ̀rə̀ lo pànə̀ kwɨghə̀. Ŋwùə̀ à tə pəla ngɨ̀rə̀ mbuurə̀ tɨ̀pòŋə̀ zə̀, yi ka m̀mə nshwəŋə̀ mə̀ la lo nɨ̀ chàʼtə̀ a Nẅùə̀ aŋunə ŋònə̀ ghu.

¹⁷Ɨ̀fàntə̀ ɨ̀nwùə̀ ɨ̀tsùmə̀ la tɨ̀pòŋə̀, la tɨ̀pòŋə̀ ɨ̀tse à wa ghu nɨ à wa ka lòo e a nɨ̀wɨghə̀ tô.

¹⁸Pə̀ənə̀ zhyə̂ lo ŋwùə̀ ntsùmə̀ nɨ à pənə moonə̀ Nẅùə̀ ka à làŋə̀ e nɨ mbyə̀ ngɨ̀rə̀ a tɨ̀pòŋə̀ ntiinə Moonə̀ Nẅùə̀ à wa mbyabə̀ e, lenəla, ŋònə̀ tɨ̀pòŋə̀ wa a kɨ ngɨ̀rə̀ e ànwùə̀ tɨ̀pòŋə̀ àtse aŋunə ze apə̀.

¹⁹Pə̀ənə̀ zhyə̂ lo pə̀ənə̀ pɨ̀tsùmə̀ la ɨ̀poonə̀ pɨ Nẅùə̀, nkɨ nzhyə̂ lo ŋònə̀ tɨ̀pòŋə̀ wa a pə nɨ mɨ̀tɨ̀ŋnə̀ àtwuə̀ pànə̀ pɨ̀tsùmə̀ nɨ ka pobə zhyə̂ a ghobə a Nẅùə̀.

²⁰Pə̀ənə̀ zhyə̂ lo Moonə̀ Nẅùə̀ à tô mə a àtwuə̀ ɨ̀shyə̂ ngɨ̀rə̀ ɨ̀twuə̀ ɨ̀pə̀ənə̀ laanə̀ mbə̀ʼə pə̀ənə̀ zhyə̀ a Nẅùə̀ nɨ à pənə nkǔŋə nkuŋə, pə̀ənə̀ kɨ mbə taʼà ŋwùə̀ pə̀ənə̀ pɨ pobə wa nɨ à pənə nkǔŋə nkuŋə, nkɨ mbə taʼà ŋwùə̀ pə̀ənə̀ pɨ Moonə̀ e Yěsû Kristù. A ze mbə Nẅùə̀ nkǔŋə nkuŋə nkɨ mbə ze wa nɨ à wa ŋŋâ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ la.

²¹Ɨ̀poonə̀, kò nɨ̀ pə a wɨghə nɨ ànwùə̀ àtse a nɨ ghɨ̀rə̀ pɨghə pɨ pɨ̀titoo.