Read Pinyin 2 Jònə 1 Bible Online

2 Jònə 1 - Pinyin bible

2 Jònə 1

¹Àŋwàʼnə̀ zə̀ a furə̀ la ambo mɨ̀ŋə̀ àtwuə̀ àshwatə̀ ɨ̀poonə̀ pɨ Kristù. Ngwə̀ ŋŋwàʼnə̀ ambo ghò mə̀ngyə̌ nɨ Nẅùə̀ à lə̀ tsoʼnə pɨghə pɨ ɨ̀poonə̀ ɨ̀pô. Ǹkòŋə̀ o tyìʼə̀ ɨ̀shìʼnə̀. Ka a wɨghə la kòŋə̀ e ndàʼà mɨ̀ŋə̀ nɨ mɨ̀ŋə̀. À kòŋə̀ pəə pɨ pànə̀ pɨ̀tsùmə̀ nɨ pɨ zhyə̂nə a nkǔŋə nkuŋə nkòŋə̀ a wɨghə.

²Ǹkòŋə̀ o ntii nkǔŋə nkuŋə wə̀ nɨ pəə zhyə̂nə, mbə kɨ zhyə̂ a ẅèrə nɨ nkuŋə̀.

³Àpòŋə̀ ntɨŋmə̀, nɨ àkoorə̀ mɨ̀lɨŋə̀, nɨ àporə̀porə̀ za nɨ a furə̀nə ambo Tǎ Nẅùə̀ pobə Yěsû Kristù Moonə̀ Tǎ, â pə ambo pə̀ənə̀. Ɨ̀pwuumə̀ pə ɨ̀tsùmə̀ pə ɨ̀pə̀ənə̀ tsaʼnə pə̀ənə̀ mənə ngɨ̀rə̀ mɨ̀nwùə̀ mɨ nkǔŋə nkuŋə nkɨ mmə nkòŋə̀ mbɨ̀ŋmə̀ ɨ̀zəənə̀.

⁴Ǹgaʼà tyìʼə̀ tɨsɨŋnə a nɨ zuʼù lo ɨ̀poonə̀ ɨ̀pô pɨ̀tse pə ndzùŋə̀ a nkǔŋə nkuŋə tyìʼə̀ tsaʼnə Tǎ à lə̀ shwəŋə̀nə lo pə̀ənə̀ zùŋə̀ a nkǔŋə nkuŋə la.

⁵Lenəla nɨ mə̀ngyə̌, ngwə̀ mbuʼù mbô ambo ghò lo pə̀ənə̀ tə nkòŋə̀ mbɨ̀ŋmə̀ ɨ̀zəənə̀. Ntə̌ wə̀ nɨ ngwə̀ ŋŋwàʼnə̀ ambo ghò lə ka à pə e ntə̌ ghù shwuə̀, a ntə̌ nɨ pə̀ənə̀ lə̀ pənə nɨ ẅèrə a nɨ̀pìʼnə̀ nkwùə̀ ntsàambyə̀.

⁶Ɨ̀kòŋnə̀ wə̀ nɨ ngwə̀ nshwəŋə̀ lə ɨ chyə̂ la lo: pə̀ənə̀ tə ndzuʼnə̀ mɨ̀ntə̌ mɨ Nẅùə̀. Ntə̌ wa nɨ pɨghə pɨ̀tsùmə̀ lə̀ pyə̀nə ndzuʼù a nɨ̀pìʼnə̀ ɨ chyə̂ la lo nɨ̀ chyə̂ a nɨ kòŋə̀ mbɨ̀ŋmə̀ ɨ̀zɨghə.

⁷Ngàŋə àfɨ̀ghə̀ yè noʼnə tô mə àtwuə̀ ɨ̀shyə̂ sìnə̀ wə̀. Lə̌ pànə̀ pa nɨ ka pobə pyiimə̀ a ghobə lo pɨ lə̀ pyə̂ a Yěsû Kristù a àtwuə̀ ɨ̀shyə̂ ghə̀ la tsaʼa ŋwùə̀ mɨsoŋə. Mbuurə̀ pànə̀ zèrə zə a ngàŋə àfɨ̀ghə̀ nkɨ mbə ngàŋə kɨpaanə Kristù.

⁸Njiilo nɨ̀ zhìʼtə̀ a wɨghə mbə̀ʼə nɨ̀ kaŋə pî àzwuumə̀ nɨ nɨ̀ fàʼnə mbə nɨ zèrə, mbə̀ʼə ghǎ kẅiirə̀ àtsoʼò àfàʼà àzɨghə nɨ a koʼnə mbwùumə̀.

⁹Nɨ̀ zhyə̂ lo ŋònə̀ wa nɨ ka à lèrə̀ e nɨ mbyə̀ a nɨ zùŋə̀ ànwùə̀ nɨ Kristù à lə̀ nèrə̀nə la, ka à pə e pobə Nẅùə̀. La ŋònə̀ wa ntsùmə̀ nɨ à lèrə̀nə nɨ mbyə̀ a nɨ zùŋə̀ mɨ̀nwùə̀ nɨ Kristù à lə̀ nèrə̀nə la, à chyə̂ pobə Tǎ nɨ Moonə̀ e.

¹⁰Lenəla, ŋònə̀ ɨ̀tse à tə tô ambo pɨghə, mmə nèrə̀ e mɨ̀nwùə̀ nɨ ka mèrə furə̀ e ambo Kristù, kò nɨ pyiimə̀ mə̀ a wɨghə a kwuunə̀ a ndâ pɨghə kə̀ kɨ chàʼtə̀ e.

¹¹Ntiinə ŋònə̀ nɨ ǎ chàʼtə̀ e, à pwuutə̀ la pobə ze a nɨ ghɨ̀rə̀ a tɨ̀pòŋə̀ wa nɨ à wa ngɨ̀rə̀ la.

¹²Ngwə̀ nɨ mɨ̀nwùə̀ mɨ̀noʼnə a nɨ shwəŋə̀ ambo pɨghə la ka pə ŋwàʼnə̀ a mèrə amwuə àpàa àŋwàʼnə̀ nɨ nɨkoŋə nɨ àŋwàʼnə̀, la ngwə̀ nkwàŋə̀ lo mbɨ tô ghaanə̀ a wɨghə pə̀ənə̀ zəənə̀ mɨ̀sɨghə̀ ɨ̀məənə̀ nshwəŋnə̀ mbə̀ʼə nɨ̀ghaʼà ɨ̀wəənə̀ â pwùumə̀.

¹³Ɨ̀poonə̀ pɨ ndyimə ɨwɨghə ghù mə̀ngyə̌ wa nɨ Nẅùə̀ à lə̀ tsoʼnə la pə nchàʼtə̀ a wɨghə.