Read Pinyin 3 Jònə 1 Bible Online

3 Jònə 1 - Pinyin bible

3 Jònə 1

¹Àŋwàʼnə̀ zə̀ a furə̀ ambo mɨ̀ŋə̀ àtwuə̀ àshwatə̀ ɨ̀poonə̀ pɨ Kristù, mmə ndèrə̀ ambo ɨ̀swùə mə Gayòsə̀ nɨ ǹkòŋə̀nə e tyìʼə̀ ɨ̀shìʼnə̀ la.

²Ɨ̀swùə mə̀ ghù ɨ̀shìʼnə̀, ngwə̀ nchàʼtə̀ a Nẅùə̀ lo mɨ̀nwùə̀ mɨ̀tsùmə̀ nɨ ghò wə̀ ngɨ̀rə̀ yìinə̀ ɨ̀shìʼnə̀, wə̀ chyə̂ ɨ̀shìʼnə̀ tyìʼə̀ tsaʼnə àzhwùə̀ o a kɨnə nchyə̂ ɨ̀shìʼnə̀.

³Ndə̀ pə nɨ nɨ̀ghaʼà tyìʼə̀ tɨsɨŋnə a nɨ zuʼù ambo pɨlyimə ɨ̀pə̀ənə̀ pɨ̀tse nɨ pobə lə̀ tônə a nɨ̀ghə̂ nshwəŋə̀ tsaʼnə ghò wə̀ ngɨ̀rə̀ mɨ̀nwùə̀ nɨ Nẅùə̀ à lə̀ shwəŋə̀nə lo wə̀ ghɨ̀rə̀, farə lo ghò wə̀ mbirə̀ ngɨ̀rə̀ a mèrə.

⁴Ka mbə mə̀ nɨ àzwuumə̀ àtse nɨ a ghɨ̀rə̀nə mbə nɨ nɨ̀ghaʼà ntsàarə̀ a nɨ zuʼù lo pànə̀ nɨ pənə tsaʼa ɨ̀poonə̀ ɨ̀pâ pə ngɨ̀rə̀ mɨ̀nwùə̀ nɨ Nẅùə̀ à tàʼnə lo pobə̂ ghɨ̀rə̀.

⁵Ɨ̀swùə mə̀ ghù ɨ̀shìʼnə̀, wə̀ lanə nfàʼà nɨ ntɨŋmə̀ o ɨ̀tsùmə̀ a nɨ yèmpə̀ pɨlyimə ɨ̀pə̀ənə̀, mbaa pə tsaʼnə ka wə̀ lə̀ zhyə̂ o a ghobə pɨ̀tse la.

⁶Pobə shwəŋə̀ amwuə àshwatə̀ ɨ̀poonə̀ pɨ Kristù nɨ a pənə a nɨ̀ghə̂ mbə̀ʼə ɨ̀kòŋnə̀ wa nɨ wə̀ lə̀ nèrə̀nə ambo pobə. M̀buʼù mbô ambo ghò lo wə̀ kyiitə̀ amwuə àlàŋə àtsùmə̀ ngyèmpə̀ a ghobə aŋunə àkwùə̀ nɨ̀yìinə̀ àzobə amwuə ndwuumə̀ nɨ ɨ̌ pòŋə̀ ambo Nẅùə̀.

⁷Mbə̀ʼnə pobə lə̀ mənə nkarə̀ a ɨlyiʼə ɨlyiʼə a nɨ fàʼà ambo Kristù tɨghu pobə kẅiirə̀ àyèmpə̀ àtse ambo pɨ̀tɨ̀nùŋə̀ ntɨŋmə̀ aŋunə Nẅùə̀.

⁸Lenəla, a pòŋə̀ lo pə̀ənə̀ nɨ pə̀ənə̀ pənə ɨ̀poonə̀ pɨ Kristù tə ngyèmpə̀ mbuurə̀ pànə̀ zèrə zə̀ mbə̀ʼə pə̀ənə̀ pwuutə̀ pə̀ənə̀ pɨ pobə a nɨ tiitə̀ pànə̀ nɨ nkǔŋə nkuŋə.

⁹Ndə̀ ŋwàʼnə̀ àŋwàʼnə̀ ambo àshwatə̀ ɨ̀poonə̀ pɨ Kristù nɨ a pənə a àlaʼà ghò, la Diotrephes wa nɨ à kòŋə̀nə pə lo pə ndùŋə̀ mbyə̀, a wâ ànwùə̀ ghu nɨ ndə̀ ŋwàʼnə̀nə la.

¹⁰Lenəla, nkwùə̀ nɨ mbɨ tô, mbɨ fuukə̀ mɨ̀nwùə̀ mɨ̀tsùmə̀ nɨ à lə̀ ghɨ̀rə̀nə mèrə furə̀ a sàŋə̀. À wa nnyìi pɨ̀chwìrə̀ nkɨ mmə nshwəŋə̀ mɨ̀nwùə̀ mɨ tɨ̀pòŋə̀ aŋunə pə̀ənə̀. Ka lə̀ a pə e ànwùə̀ àtsùmə̀ mbə̀ʼə e, à lə̀ kɨ ntwuunə̀ a nɨ kẅiirə̀ pɨlyimə ɨ̀pə̀ənə̀ nkɨ ndzòŋə̀ farə pànə̀ nɨ pobə lə̀ mənə ntàʼà lo kẅiirə̀ a ghobə, nkantə̀ a ghobə amwuə àshwatə̀ ɨ̀poonə̀ pɨ Kristù.

¹¹Ɨ̀swùə mə̀ ghù ɨ̀shìʼnə̀, kò wə̀ mɨ̀ŋnə̀ ànwùə̀ tɨ̀pòŋə̀; mɨ̀ŋnə̀ pə ànwùə̀ ɨ̀shìʼnə̀. Ŋònə̀ nɨ à wa ngɨ̀rə̀ ànwùə̀ ɨ̀shìʼnə̀ la moonə̀ Nẅùə̀, la ŋònə̀ nɨ à wa ngɨ̀rə̀ ànwùə̀ tɨ̀pòŋə̀ la ka à zhyə̂ e a Nẅùə̀.

¹²La ngə̀ aŋunə Demetrius, pànə̀ pɨ̀tsùmə̀ shwəŋə̀ ɨ̀shìʼnə̀ mbə̀ʼə e. À wa ngɨ̀rə̀ mɨ̀nwùə̀ mɨ ɨ̀shìʼnə̀ nɨ mèrə nèrə̀nə lo ze a ŋònə̀ ɨ̀shìʼnə̀, pəə àtwuə̀ ɨ̀pɨ̀ŋmə̀ àzəə kɨ mmə nshwəŋnə̀ ɨ̀shìʼnə̀ mbə̀ʼə e, ntiinə wə̀ zhyə̂nə lo ànwùə̀ nɨ pəə pa nshwəŋə̀ a nkǔŋə nkuŋə.

¹³Ngwə̀ nɨ mɨ̀nwùə̀ mɨ̀noʼnə a nɨ ŋwàʼnə̀ ambo ghò, la ka kòŋə̀ mə̀ a nɨ ŋwàʼnə̀ a mèrə.

¹⁴Ngwə̀ ntàʼà a nɨ faʼa ntô ndzəənə̀ o mbə̀ʼə pùu nwuunə̀ nshwəŋnə̀.

¹⁵Àporə̀porə̀ â pə ambo ghò. Pɨ̀swùə ɨ̀pə̀ənə̀ pɨ̀tsùmə̀ a nɨ̀ghə̂ pə nchàʼtə̀ o. Kɨ ntyiʼə̀ nchàʼtə̀ pɨ̀swùə ɨ̀pə̀ənə̀ pɨ̀tsùmə̀ a nɨ̀ghâ àtwuə̀ àtwuə̀.