Read Pinyin Rèvə̀leshònə̀ 10 Bible Online

Rèvə̀leshònə̀ 10 - Pinyin bible

Rèvə̀leshònə̀ 10

¹Ndə̀ chi ndzəənə̀ a ghùtse angèrə̀ nɨ à lə̀ pənə nɨ mɨ̀tɨ̀ŋnə̀ a furə̀ a nɨ̀pwuurə̀ mmə nshwuʼə̀ a ɨ̀shyə̂. Mbàʼà ɨ̀ lə̀ nàanə̀ e, nkoŋə àlùmə̀ ɨ pə a àtwuə̀ ze, ɨ̀sɨghə̀ e ɨ mə ntsìinə̀ tsaʼa nẅùumə̀, mɨ̀kwùə̀ ɨ̀me pə tsaʼa mɨ̀ntoomə̀ mɨ ɨ̀mǔ.

²À lə̀ twuʼtə̀ a mɨlyiʼə nɨ̀pùʼu nɨ àŋwàʼnə̀ ghu nyaʼkə̀nə a àpô ze, ntə̂ àkwùə̀ e yè zɨghə̀nə àtwuə̀ nchyə ghu nɨŋnə̀nə nkɨ ntə̂ yè kẅàbə̀ a nɨ̀pwùnə nɨ nchyə,

³nkyiinə̀ tsaʼa puʼmbyìinə̀ à wə̀ ndẅùmpə̀. Nkwùə̀ nɨ à lə̀ kyiinə̀nə, mɨ̀fàŋə̀ sàmbaa lə̀ pitə̀.

⁴Tsaʼnə mɨ̀fàŋə̀ ma sàmbaa lə̀ pitə̀nə la, m̀mə ntàʼà ŋwàʼnə̀ ànwùə̀ nɨ mèrə lə̀ mənə nshwəŋnə̀, ntyiʼə̀ ndzuʼù ngyə̀ ɨ̀ furə̀ a nɨ̀pwuurə̀ nshwəŋə̀ lo, “Lə̀əmə̀ ànwùə̀ nɨ mɨ̀fàŋə̀ ma pitə̀nə la nshwəŋə̀, kò wə̀ ŋwàʼnə̀ a zèrə a ɨ̀shyə̂.”

⁵Angèrə̀ wa nɨ ndə̀ zəənə̀nə a tə̂ a taʼà àkwùə̀ àtwuə̀ nchyə nkɨ ntə̂ a taʼà a nɨ̀pwùnə nɨ nchyə la, à lə̀ ŋaŋə̀ àpô e yè zɨghə̀nə a àtɨ̀ghə,

⁶ntsə̀əmə̀ aŋunə nɨ̀linə̀ nɨ Nẅùə̀ wa nɨ à ghoŋə̀nə nɨ nkuŋə̀ nɨ nkuŋə̀, ntsùŋə̀ nɨ̀pwuurə̀ ghobə àtwuə̀ ɨ̀shyə̂, nkɨ ntsùŋə̀ nchyə ghu nɨŋnə̀nə ghobə àzwuumə̀ àtsùmə̀ nɨ a lə̀ pənə amwuə pèrə. Angèrə̀ wa à lə̀ shwəŋə̀ lo, “Ka pɨ̀ pə chi lyàrə̀ e!

⁷La nkwùə̀ nɨ angèrə̀ nòmbàa sàmbaa à ghǎ toŋə̀ ntàŋnə̀ e, Nẅùə̀ à ghǎ myàanə̀ ghɨ̀rə̀ mɨ̀nwùə̀ mɨ lə̀əmə̀nə ma nɨ à lə̀ kàʼnə. À ghǎ ghɨ̀rə̀ a lenə tsaʼnə à lə̀ shwəŋə̀nə ambo ngàŋə àfàʼà ɨ̀ze nɨ pənə ngàŋə ntwuumə̀ ɨ̀ze.”

⁸Ngyə̀ za nɨ ndə̀ zuʼnə ɨ̀ furə̀ a nɨ̀pwuurə̀ la ɨ̀ chi nshwəŋə̀ ambo mɨ̀ŋə̀ lo, “Lèrə̀ ngə̀ nkẅiirə̀ nɨ̀pùʼu nɨ àŋwàʼnə̀ tsɨ̀ nyaʼkə̀nə tsa ambo angèrə̀ wa nɨ à tə̂nə a taʼà àkwùə̀ e àtwuə̀ nchyə nkɨ ntə̂ a taʼà a nɨ̀pwùnə nɨ nchyə la.”

⁹Ndə̀ lèrə̀ ngə̀ nshwəŋə̀ ambo angèrə̀ wa lo â ŋâ a mɨlyiʼə nɨ̀pùʼu nɨ àŋwàʼnə̀ wa ambo mɨ̀ŋə̀. A shwəŋə̀ ambo mɨ̀ŋə̀ lo, “Kò tsèrə nkwurə̀, tsèrə pɨ ghɨ̀rə̀ nɨ̀pùmə̀ ɨ̀tsô lẅùə̀, la lɨ̀ŋmə̀ a ntswùə̀ ghò tsaʼa ɨ̀nyuurə̀.”

¹⁰Ǹkẅiirə̀ a mɨlyiʼə nɨ̀pùʼu nɨ àŋwàʼnə̀ tsa ambo angèrə̀ wa nkwurə̀, tsèrə lɨ̀ŋmə̀ a ntswùə̀ mɨ̀ŋə̀ tsaʼa ɨ̀nyuurə̀. La nkwùə̀ nɨ ndə̀ myə̀nə, tsèrə lə̀ ghɨ̀rə̀ nɨ̀pùmə̀ ɨ̀tsâ lẅùə̀.

¹¹Pɨ tyiʼə̀ nshwəŋə̀ ambo mɨ̀ŋə̀ lo, “Wə̀ chyə̂ a nɨ gha nshwəŋə̀ mɨ̀nwùə̀ nɨ mɨ ghǎ ghɨ̀rə̀ ambo pànə̀ pɨ àtwuə̀ ɨ̀shyə̂ pɨ̀noʼnə nɨ ɨ̀laʼà pɨ̀noʼnə nɨ mbuurə̀ ɨ̀shwəŋnə̀ ɨ̀tsùmə̀ farə ambo pɨ̀fò pɨ̀noʼnə.”