Read Pinyin Rèvə̀leshònə̀ 13 Bible Online

Rèvə̀leshònə̀ 13 - Pinyin bible

Rèvə̀leshònə̀ 13

¹Lenəla ǹdzəənə̀ mbuurə̀ nyàamə̀ ghù ntsə̂nə ɨ̀tse ɨ̀ mə nfurə̀ amwuə nchyə ghu nɨŋnə̀nə mbə nɨ mɨ̀ndoŋə̀ nɨ̀ghumə̀ nɨ ɨ̀twuə̀ sàmbaa. Pɨ̀tɨ̀làarə̀ pɨ nɨ̀fò lə̀ kɨ mbə aŋunə mɨ̀ndoŋə̀ mə mɨ̀tsùmə̀. Ɨ̀twuə̀ pə̀ sàmbaa lə̀ kɨ mbə nɨ mɨ̀linə̀ nɨ mɨ lə̀ mənə ndzòomə̀ a Nẅùə̀.

²Mbuurə̀ nyàamə̀ ghù ntsə̂nə zə nɨ ndə̀ zəənə̀nə lə ɨ̀ lə̀ pə tsaʼa afuunə, mɨ̀kwùə̀ ɨ̀me pə tsaʼa mɨ saambàŋə̀. Ntswùə̀ e ɨ pə tsaʼa ghù puʼmbyìinə̀. Drǎgònə̀ wa a ŋâ mɨ̀tɨ̀ŋnə̀ ɨ̀me nɨ aləŋə nɨ̀fò e pobə ɨ̀tɨ̀ŋnə̀ e ambo nyàamə̀ ghù ntsə̂nə wa.

³Taʼà àtwuə̀ nyàamə̀ wa a lə̀ pə nɨ àlǎ tɨmyə̀, la nɨ pɨ parə̀ mə a zèrə. Ànwùə̀ ghu a lə̀ kə̀ʼnə̀ pànə̀ pɨ àtwuə̀ ɨ̀shyə̂ pɨ̀tsùmə̀, pobə tyiʼə̀ mbìʼnə̀ a nɨ zùŋə̀ mbuurə̀ nyàamə̀ zə̀.

⁴Pànə̀ pɨ̀tsùmə̀ lə̀ ghuʼtə̀ a drǎgònə̀ wa ntiinə à lə̀ ŋânə ɨ̀tɨ̀ŋnə̀ e ambo nyàamə̀ ghù ntsə̂nə wa. Pànə̀ lə̀ kɨ nguʼtə̀ a nyàamə̀ ghù ntsə̂nə wa ntyiʼə̀ mbyiitə̀ lo, “A ɨ̀wə̌ nɨ à pənə tsaʼa mbuurə̀ nyàamə̀ ghù ntsə̂nə wə̀? A ɨ̀wə̌ nɨ mbə̀ʼə a zòŋnə̀ a ẅèrə?”

⁵Pɨ ŋâ e nɨ ɨ̀sàanə̀ lo â tə nshwəŋnə̀ ɨ̀shwəŋnə̀ ntsaa mɨsoŋə nɨ pənə a nɨ zòomə̀ a Nẅùə̀. Pɨ lə̀ ŋâ e nɨ ɨ̀tɨ̀ŋnə̀ a nɨ nèrə̀ ɨ̀tɨ̀ŋnə̀ e aŋunə ŋwɨgrə̀ mɨ̀ghumə̀ nɨ̀kwàa ntsòbə̀ ɨpaa.

⁶À lə̀ nyaʼkə̀ ntswùə̀ e mbìʼnə̀ a nɨ zòomə̀ a Nẅùə̀ nkɨ ndzòomə̀ nɨ̀linə̀ ɨ̀tse farə alyiʼə nɨ à pənə ghu pobə pànə̀ pɨ̀tsùmə̀ nɨ pɨ pənə a nɨ̀pwuurə̀.

⁷Nẅùə̀ à lə̀ ŋâ nyàamə̀ wa nɨ mɨ̀tɨ̀ŋnə̀ lo â zòŋnə̀ pànə̀ pɨ Nẅùə̀ ntsàarə̀ a ghobə, nkɨ ŋŋâ e nɨ ɨ̀tɨ̀ŋnə̀ lo â puʼtə̀ ɨ̀tsɨ̀ŋə̀ ɨ̀tsùmə̀ pobə ɨ̀laʼà ɨ̀tsùmə̀ nɨ ɨ̀shwəŋnə̀ ɨ̀tsùmə̀ pobə mbuurə̀ pànə̀ pɨ̀tsùmə̀.

⁸Pànə̀ pɨ̀tsùmə̀ nɨ pobə pa nchyə̂ a àtwuə̀ ɨ̀shyə̂ ghǎ ghuʼtə̀ a nyàamə̀ ẅèrə wə̀. Pànə̀ pə̀ pə pànə̀ nɨ ka pɨ lə̀ ŋwàʼnə̀ e mɨ̀linə̀ ɨ̀mobə amwuə àŋwàʼnə̀ nɨ̀chyə̂mbyə̂ mômbyə̂ ndzìrə̀ wa nɨ pɨ lə̀ zhwuutə̀nə zaʼà pɨ̀ pòŋə̀ tsùŋə̀ a àtwuə̀ ɨ̀shyə̂ zə.

⁹Ŋònə̀ nɨ à pənə nɨ mɨtugrə â zuʼù.

¹⁰Ŋònə̀ nɨ pɨ pənə kô e tsaʼa àpùʼù ntsòo, pɨ̌ kô. Ẅùə̀ nɨ pɨ pənə zhwuutə̀ e nɨ mɨnẅuə ntsòo, pɨ̌ kɨ zhwuutə̀ e la nɨ mɨnẅuə ntsòo ghu. Zèrə zə ànwùə̀ a tàʼà la lo ɨ̀poonə̀ pɨ Nẅùə̀ potə̀ mbɨ̀ŋmə̀ ngẅìimə̀ ntɨŋmə̀, nkɨ nnùŋə̀ ntɨŋmə̀ tyìʼə̀ aŋunə àshwəŋnə̀ Nẅùə̀.

¹¹Ndə̀ chi ndzəənə̀ mbuurə̀ nyàamə̀ yɨ̀ ntsə̂nə za yɨ̀tse ɨ̀ furə̀ amwuə ɨ̀shyə̂ mbə nɨ mɨ̀ndoŋə̀ mɨmbaa tsaʼa mɨ̀ndoŋə̀ mɨ mômbyə̂ ndzìrə̀, la mmə nshwəŋnə̀ tsaʼa drǎgònə̀.

¹²Àpaatə̀ mbuurə̀ nyàamə̀ wa a lə̀ mə nfàʼà nɨ mɨ̀tɨ̀ŋnə̀ mɨ ntsàambyə̀ nyàamə̀ wa a mbyə̂ ze, ndòo ngɨ̀rə̀ àtwuə̀ ɨ̀shyə̂ pobə pə̀ənə̀ ɨ̀pe ghuʼtə̀ a ntsàambyə̀ nyàamə̀ wa. Nyàamə̀ wa la nyàamə̀ nɨ à lə̀ pənə nɨ àlǎ za nɨ a lə̀ pənə zhwuutə̀ e la pɨ parə̀ a zèrə.

¹³Àpaatə̀ nyàamə̀ wa a lə̀ mə ngɨ̀rə̀ ɨ̀lènə̀ ɨ̀nwùə̀ pɨ̀yerə̀nə yerə̀nə pɨ̀ẅùunə. À lə̀ ghɨ̀rə̀ ɨ̀mǔ furə̀ a nɨ̀pwuurə̀ nshwuʼə̀ a ɨ̀shyə̂ a ɨ̀myə̂ pə̀ənə̀.

¹⁴À lə̀ lòo ɨ̀lènə̀ ɨ̀nwùə̀ pɨ̀yerə̀nə yerə̀nə pa nɨ pɨ lə̀ myàʼtə̀nə e a ghɨ̀rə̀ a ɨ̀myə̂ ntsàambyə̀ nyàamə̀ wa nfɨ̀kə̀ pànə̀ pɨ àtwuə̀ ɨ̀shyə̂ pɨ̀tsùmə̀ ghu. À lə̀ shwəŋə̀ ambo pobə lo pobə̂ tsùŋə̀ a tɨtoo nɨ pobə̌ mə ghuʼtə̀ nɨ à shwuə̀nə a ntsàambyə̀ nyàamə̀ wa nɨ pɨ lə̀ chyânə a àlǎ aŋunə nɨ mɨnẅuə ntsòo la a pirə̀ ghù ntɨ̀ŋnə̀.

¹⁵Pɨ lə̀ ŋâ àpaatə̀ nyàamə̀ wa nɨ ɨ̀tɨ̀ŋnə̀ lo â fə̂ àzhwùə̀ nɨ̀chyə̂mbyə̂ aŋunə tɨtoo wa ngɨ̀rə̀ â shwəŋnə̀ nkɨ nzhwuutə̀ pànə̀ pɨ̀tsùmə̀ nɨ ka pobə mə nguʼtə̀ a ghobə a ẅèrə.

¹⁶Nyàamə̀ wə̀ à lə̀ nyìimə̀ pànə̀ pɨ̀tsùmə̀; pànə̀ pɨ̀ẅùunə kə̀ pɨ̀kɨ̂, ngàŋə nkabə̀ kə̀ ngàŋə àfumə̀, ɨ̀pùʼù kə̀ pànə̀ nɨ ka pobə pə ghobə ɨ̀pùʼù lo pɨ̀ chyâ àlènə̀ aŋunə àpô àzobə yè zɨghə̀nə kə̀ a nɨ̀zènə.

¹⁷A lə̀ pə amwuə ndwuumə̀ nɨ mbə̀ʼə ka ŋwùə̀ a zwuunə̀ e àzwuumə̀ kə̀ nshwùunə̀ tɨghu a pə nɨ àlènə̀ zə. Àlènə̀ zə̀ a lə̀ pə la nɨ̀linə̀ nɨ mbuurə̀ nyàamə̀ zə kə̀ nòmbàa nɨ à pənə nòmbàa nɨ̀linə̀ tsə̀.

¹⁸Zèrə zə̀ a tàʼà la ŋònə̀ nɨ à pənə nɨ àzhìʼtə̀. Njiilo ŋònə̀ nɨ à zhyə̂nə ɨ̀nwùə̀ â tàʼà ɨ̀sùmə nòmbàa nyàamə̀ ghù ntsə̂nə wə̀. A nòmbàa ŋwùə̀ mɨsoŋə nɨ à pənə nkɨrə ntuurə̀ nɨ mɨ̀ghumə̀ ntuurə̀ ntsòbə̀ ntuurə̀.