Read Pinyin Rèvə̀leshònə̀ 14 Bible Online

Rèvə̀leshònə̀ 14 - Pinyin bible

Rèvə̀leshònə̀ 14

¹Ndə̀ tyiʼə̀ nnaŋə̀ ndzəənə̀ Mômbyə̂ Ndzìrə̀ Nẅùə̀ wa a təəmə̀ àtwuə̀ mbarə̀ ɨ̀tse nɨ pɨ pa nfuŋə̀ nɨ Zayònə̀. Pànə̀ nkaamə̀ nkɨrə nɨ mɨ̀ghumə̀ nɨ̀kwàa ntsòbə̀ nɨ̀kwàa pə pobə pɨ pobə, pɨ ŋwàʼnə̀ nɨ̀linə̀ ɨ̀tse pobə tsɨ̀ Tǎ ɨghobə aŋunə mɨ̀zènə ɨ̀mobə.

²Ǹchi ndzuʼù ngyə̀ ɨ̀ furə̀ a nɨ̀pwuurə̀ mmə ndzòrə̀ tsaʼa nɨ̀fuurə̀ kə̀ tsaʼa mbə̀ŋə̀ ɨ̀ zə̀ nkwùrə̀. Ɨ̀ lə̀ kɨ mmə ntswuə̀ tsaʼa ngyə̀ mɨ̀lùŋə mɨ ngyə̂ mɨ̀noʼnə nɨ pɨ̀mbuʼù mənə mbuʼù.

³Pobə lə̀ mə ndzòbə̀ nchyə yɨ̀ shwuə̀ a mbyə̀ aləŋə nɨ̀fò za ghobə mɨ̀nyàamə̀ ma nɨ̀kwàa nɨ mèrə laʼa mbirə̀ mmə nchyə̂ la, nɨ pɨ̀lɨ̀ŋmə̂ pa. Ka ŋònə̀ ɨ̀tse a lə̀ pə e ghu nɨ mbə̀ʼə a lanə̀ nchyə ẅèrə wə̀ ndàŋə̀ pànə̀ pa nkaamə̀ nkɨrə nɨ mɨ̀ghumə̀ nɨ̀kwàa ntsòbə̀ nɨ̀kwàa nɨ pobə lə̀ pənə ghobə ndàʼà pànə̀ nɨ Nẅùə̀ à lə̀ tsuʼnə ɨ̀twuə̀ ɨ̀pobə.

⁴Pànə̀ pèrə pə̀ la pànə̀ nɨ pobə pirə̀ mə a ghobə tɨ tsə̀ŋə̀ mbɨ̀ŋmə̀ ɨ̀zobə nɨ pə̀ngyə̌, ntiinə pobə nùŋə̀nə mbɨ̀ŋmə̀ ɨ̀zobə zèrə laanə̀. Pobə pa ndzùŋə̀ a Mômbyə̂ Ndzìrə̀ wa a alyiʼə àtsùmə̀ nɨ à wa ndèrə̀. Pobə kɨ mbə pànə̀ pa nɨ pɨ tsuʼnə ɨ̀twuə̀ ɨ̀pobə amwuə pànə̀ pɨ àtwuə̀ ɨ̀shyə̂. Pobə chyə̂ mbə tsaʼa ntsàambyə̀ ɨ̀pwuumə̀ nɨ pɨ fùʼnə nɨ pɨ ŋânə ambo Nẅùə̀ pobə Mômbyə̂ Ndzìrə̀ wa tsaʼa nchàʼtə Nẅùə̀.

⁵Ka pobə̂ nyìi a ghobə a chwìrə̀, ka kɨ pə a ghobə nɨ ɨ̀fèrə ɨ̀tse.

⁶Lenəla ndə̀ chi zəənə̀ a angèrə̀ ghùtse a mə ntàarə̀ a àtɨ̀ghə àtɨ̀ghə. Angèrə̀ wa a twuʼtə̀ ntwuumə̀ ghù ɨ̀shìʼnə̀ wa nɨ ɨ ghoŋə̀nə nɨ nkuŋə̀ la. À lə mə nchwìitə̀ ntwuumə̀ ghù ɨ̀shìʼnə̀ wa ambo pànə̀ pɨ àtwuə̀ ɨ̀shyə̂, nɨ pànə̀ pɨ̀tsùmə̀, nɨ àtsɨ̀ŋə̀ àtsùmə̀, nɨ ɨ̀shwəŋnə̀ ɨ̀tsùmə̀ pobə ɨ̀laʼà ɨ̀tsùmə̀.

⁷À lə̀ mə nshwəŋə̀ amwuə ngyə̀ ntɨ̀ŋnə̀ lo, “Nɨ̀ ghuʼtə̀ a Nẅùə̀ ngyetə̀ e, ntiinə nkwùə̀ a nɨ tsoʼtə̀ mɨ̀sàʼa mɨ pànə̀ pɨ àtwuə̀ ɨ̀shyə̂ ɨ̀ kùʼù mə. Nɨ̀ səəkə̀ e, a ze wa nɨ à tsùŋə̀nə nɨ̀pwuurə̀ pobə àtwuə̀ ɨ̀shyə̂ nɨ nchyə ghu nɨŋnə̀nə pobə pɨ̀nɨ̀mwurə̀ ɨ̀shyə̂.”

⁸Àpaatə̀ angèrə̀ a zùŋə̀ ghù ntsàambyə̀ wa nkɨ mmə nshwəŋə̀ lo, “Mbòmpə àlaʼà ngẅùunə za, Babilònə̀ à kunə̀ mə; à kunə̀ mə tə mbɨgrə̀! À lə̀ ghɨ̀rə̀ pànə̀ pɨ ɨ̀laʼà ɨ̀tsùmə̀ nô mɨ̀lùʼù mɨ tɨ̀ŋnə̀ ɨ̀me. Mɨ̀lùʼù mə lə̀ pə la a nɨ ghɨ̀rə̀ pànə̀ fànə̀.”

⁹Angèrə̀ nòmbàa pɨtarə a zùŋə̀ a ghobə nshwəŋə̀ nɨ ngyə̀ ntɨ̀ŋnə̀ lo, “Ŋònə̀ ɨ̀tse à tə mbə ghu mmə nsəəkə̀ a nyàamə̀ ghù ntsə̂nə wa nɨ à furə̀nə amwuə nchyə pobə tɨtoo e wa, kə̀ kẅiirə̀ àlènə̀ e a nɨ̀zènə ze kə̀ aŋunə àpô e,

¹⁰ze àtwuə̀ mbɨ̀ŋmə̀ e à ghǎ nô mɨ̀lùʼù mɨ àtsə̂ ntɨŋmə̀ Nẅùə̀. Pɨ chyâ mə e nɨ mɨ̀tɨ̀ŋnə̀ amwuə ndoŋə̀ àtsə̂ ntɨŋmə̀ Nẅùə̀. Pɨ ghǎ tsɨ̀nkə̀ ngəʼə̀ àtwuə̀ ze nɨ ɨ̀mǔ wa nɨ ɨ wa ndwùumə̀ ka mɨ̀zùŋə a mbyə̀ pəngèrə̀ pɨ laanə̀nə pa pobə Mômbyə̂ Ndzìrə̀ wa.

¹¹Ndyə̂ ɨ̀mǔ wa ɨ̀tsùmə̀ nɨ ɨ lə̀ mənə nfurə̀ amwuə ɨ̀mǔ wa nɨ ɨ lə̀ mənə ntòonə̀ a ghobə la ɨ lə̀ mə nkoʼò ndèrə̀ a àtɨ̀ghə nɨ nkuŋə̀ nɨ nkuŋə̀. Ka àzhwùutə̀ a lə̀ pə e ghu nɨ njyə̂ kə̀ nɨ ɨ̀twuʼə̀ ambo pànə̀ pa nɨ pobə lə̀ mənə nsəəkə̀ a nyàamə̀ wa pobə tɨtoo wa. Lə̌ tsaʼnə a pənə ambo ŋwùə̀ wa ntsùmə̀ nɨ à pənə nɨ àlènə̀ nɨ̀linə̀ nɨ nyàamə̀ ghu.”

¹²Zèrə zə̀ a tàʼà la lo pànə̀ pɨ Nẅùə̀ ẅìimə̀ ntɨŋmə̀, nnùŋə̀ mɨ̀ntə̌ mɨ Nẅùə̀ nkɨ nnùŋə̀ ntɨŋmə̀ aŋunə Yěsû.

¹³Ndə̀ tyiʼə̀ ndzuʼù ngyə̀ ɨ̀ furə̀ a nɨ̀pwuurə̀ mmə nshwəŋə̀ lo, “Ŋwàʼnə̀ lo, ‘A nɨ pìʼnə̀ tɨ̀tsòŋə̀, mborə̀ ɨ̀ chyə̂ ambo pànə̀ pa nɨ pobə kwɨghə̀nə ntiinə pobə nùŋə̀nə ntɨŋmə̀ aŋunə Ndòʼnə̀mbyə̂ la.’” Àzhwùə̀ a shwəŋə̀ lo, “A tyìʼə̀ nkǔŋə nkuŋə, pobə̌ zhwùutə̀ aŋunə àtaŋnə̀ àzobə, kɨ kẅiirə̀ mɨntyaŋnə ntii mɨ̀nwùə̀ mɨ̀shìʼnə̀ nɨ pobə lə̀ mənə ngɨ̀rə̀.”

¹⁴Ndə̀ chi nnaŋə̀ ndzəənə̀ mbàʼà yɨ̀ fuə, ŋònə̀ nɨ à nwuunə̀nə aŋunə a pə tsaʼa “Moonə̀ ŋwùə̀” ntuŋə̀ a tɨ̀làarə̀ nɨ̀fò àtwuə̀ ze nɨ pɨ tsùŋə̀nə nɨ goldə̀, nkɨ mbə nɨ mɨnẅuə nɨ̀fùʼù ghù tsə̂nə a àpô ze.

¹⁵Ghùtse angèrə̀ a furə̀ amwuə Ndâ Mɨ̀shwàʼà Nẅùə̀, nkyiinə̀ nɨ ngyə̀ ntɨ̀ŋnə̀ nshwəŋə̀ ambo ŋònə̀ wa nɨ à nwuunə̀nə aŋunə mbàʼà za lo, “Lòo a mɨnẅuə nɨ̀fùʼù wa mbìʼnə̀ a nɨ fùʼù ntiinə nkwùə̀ nɨ̀fùʼù mɨ̀zɨghə̀ nɨ mɨ pənə mɨ àtwuə̀ ɨ̀shyə̂ ɨ̀ kùʼù mə.”

¹⁶Lenəla, ŋònə̀ wa nɨ à lə̀ nwuunə̀nə àtwuə̀ mbàʼà za a màʼà mɨnẅuə nɨ̀fùʼù wa a àtwuə̀ ɨ̀shyə̂ nfùʼù mɨ̀zɨghə̀ mɨ àtwuə̀ ɨ̀shyə̂.

¹⁷Yɨ̀tse angèrə̀ a chi nfurə̀ amwuə Ndâ Mɨ̀shwàʼà Nẅùə̀ a nɨ̀pwuurə̀ ntwuʼtə̀ a mɨnẅuə nɨ̀fùʼù ghù ntsə̂nə.

¹⁸Yɨ̀tse angèrə̀ nɨ à pənə nɨ mɨ̀tɨ̀ŋnə̀ a nɨ puʼtə̀ ɨ̀mǔ a furə̀ alyiʼə mɨ̀shwàʼà Nẅùə̀ nkyiinə̀ nɨ ngyə̀ ntɨ̀ŋnə̀ ambo ẅùə̀ nɨ à lə̀ twuʼtə̀nə a mɨnẅuə nɨ̀fùʼù ghù ntsə̂nə la lo, “Lòo a mɨnẅuə nɨ̀fùʼù o ghù ntsə̂nə wa ndòo nshwatə̀ mɨ̀kàʼa mɨ̀ntàamə mɨ mɨ̀lùʼù nɨ mɨ pənə amwuə ɨ̀swùumə amwuə àtwuə̀ ɨ̀shyə̂ la, ntiinə mɨ̀ntàamə mɨ̀ghu tɨ̀ŋnə̀.”

¹⁹Lenəla angèrə̀ wa a màʼà mɨnẅuə e wa a àtwuə̀ ɨ̀shyə̂, nshwatə̀ pànə̀ pa mmàʼà a ghobə a alyiʼə nɨ Nẅùə̀ ǎ nèrə̀ àtsə̂ ntɨŋmə̀ e yè ẅùunə ghu, tyìʼə̀ tsaʼnə pɨ pa nshwatə̀ mɨ̀ntàamə mɨ mɨ̀lùʼù nkẅìrə̀ alyiʼə nɨ pɨ pa ntswuʼə̀ nfuukə̀ mɨ̀lùʼù la.

²⁰Pɨ lə̀ tswuʼə̀ mɨ̀ntàamə mɨ̀lùʼù ma amwuə alyiʼə nɨ ka a lə̀ pə e amwuə mbòmpə àlaʼà ngẅùunə. Àləəmə̀ a tyiʼə̀ nfurə̀ nkuŋnə̀ ndèrə̀ tsaʼa pɨ̀marə̀ nkɨrə ɨpaa nkɨ ŋŋaŋnə̀ àtɨ̀ghə tsaʼa ntàamə̀ ɨpaa.