Read Pinyin Rèvə̀leshònə̀ 15 Bible Online

Rèvə̀leshònə̀ 15 - Pinyin bible

Rèvə̀leshònə̀ 15

¹Ndə̀ chi ndzəənə̀ àlènə̀ yè ẅùunə nɨ a kə̀ʼnə̀nə a nɨ̀pwuurə̀. Ndə̀ zəənə̀ pəngèrə̀ sàmbaa nɨ pobə pìʼnə mɨ̀ngəʼə̀ mɨ̀tɨ̀ŋnə̀ sàmbaa. Mɨ̀ngəʼə̀ mɨ̀ẅùunə ma la mɨ̀ngəʼə̀ mɨ ndẅùutə ntiinə Nẅùə̀ à lòonə a mèrə a nɨ nèrə̀ àtsə̂ ntɨŋmə̀ e.

²Ndə̀ zəənə̀ àzwuumə̀ àtse tsaʼa nchyə ghu nɨŋnə̀nə nɨ ɨ pənə tsaʼa glasə̀, nnyàamə̀ pobə ɨ̀mǔ. Nkɨ nchi ndzəənə̀ pànə̀ nɨ pobə lə̀ təəmə̀nə a nɨ̀pwùnə àzwuumə̀ àtse nɨ a pənə tsaʼa nchyə ghu nɨŋnə̀nə. Pànə̀ pɨ̀ghu la pànə̀ nɨ pobə lə̀ zòŋnə̀nə ntsàarə̀ a nyàamə̀ ghù tsə̂nə wa ghobə tɨtoo e farə nòmbàa nɨ̀linə̀ ɨ̀tse la. Pobə lə̀ twuʼtə̀ mɨ̀lùŋə mɨ ngyə̂ nɨ Nẅùə̀ à ŋânə ambo pobə.

³Pobə lə̀ mə ndzòbə̀ mɨnchyə mɨ ngàŋə̀ àfàʼà Nẅùə̀ Mǔsî pobə mɨnchyə mɨ Mômbyə̂ Ndzìrə̀ wa nshwəŋə̀ lo, “Ndòʼnə̀mbyə̂ Nẅùə̀ Àkoʼntsirə̀, mɨ̀nwùə̀ nɨ wə̀ wa ngɨ̀rə̀ a mɨ̀nwùə̀ mɨ̀ẅùunə pobə mɨ kə̀ʼnə̀nə! Ghò la ɨ̀fò àtwuə̀ ɨ̀shyə̂ àtsùmə̀. Wə̀ wa ngɨ̀rə̀ mɨ̀nwùə̀ ɨ̀mô pə amwuə àlàŋə nɨ a təəmə̀nə nkɨ mbə nɨ nkǔŋə nkuŋə.

⁴A ɨ̀wə̌ Ndòʼnə̀mbyə̂, nɨ mbə̀ʼə ka a pô e a ghò ŋŋaŋə̀ nɨ̀linə̀ ɨ̀tsô àtɨ̀ghə? Mbə̀ʼnə à pənə e ndàʼà o nɨ wə̀ laanə̀nə mmyàanə̀. Pànə̀ pɨ̀tsùmə̀ amwuə ɨ̀laʼà ɨ̀tsùmə̀ ghǎ tô a mbyə̀ ghò səəkə̀ o, ntiinə mɨ̀nwùə̀ ɨ̀mô mɨ təəmə̀nə mɨ̀tsùmə̀ furə̀ a sàŋə̀.”

⁵Zə̀ ànwùə̀ a lə̀ kɨ làŋə̀ ǹdzəənə̀ Ndâ Mɨ̀shwàʼà Nẅùə̀ a nɨ̀pwuurə̀ ɨ̀ təəmə̀ a yɨ̀ ngɨɨrə̀, nɨ àzuŋə̀ Nẅùə̀ ntəəmə̀ amwuə.

⁶Pəngèrə̀ pa sàmbaa nɨ pɨ lə̀ pìʼnə mɨ̀ngəʼə̀ mɨ̀tɨ̀ŋnə̀ ma sàmbaa lə̀ furə̀ amwuə Ndâ Mɨ̀shwàʼà za. Pobə lə̀ ẅî ɨtsəʼə nɨ fuə̀nə tə ntsìinə̀, nkorə̀ mɨ̀kòbə̀ nɨ pɨ tsùŋə̀nə nɨ goldə̀ a ghàŋə̀ pobə.

⁷Taʼà nyàamə̀ amwuə mbuurə̀ mɨ̀nyàamə̀ za nɨ̀kwàa a ŋâ ɨ̀kaŋə̀ sàmbaa nɨ pɨ tsùŋə̀nə nɨ goldə̀ ambo pəngèrə̀ pa. Ɨ̀kaŋə̀ pa lə̀ lẅenə̀ nɨ àtsə̂ ntɨŋmə̀ Nẅùə̀; Nẅùə̀ wa nɨ à ghoŋə̀nə nɨ nkuŋə̀ nɨ nkuŋə̀ la.

⁸Ndâ mɨ̀shwàʼà za ɨ̀ lə̀ lẅenə̀ nɨ ndyə̂ nɨ ɨ furə̀nə aŋunə nɨ̀faŋə̀ Nẅùə̀ pobə mɨ̀tɨ̀ŋnə̀ ɨ̀me, ka ŋònə̀ ɨ̀tse a lə̀ pə e ghu nɨ mbə̀ʼə a lə̀ kwuunə̀ amwuə tə mbyàa nkwùə̀ nɨ mɨ̀ngəʼə̀ ma sàmbaa nɨ pɨ lə̀ ŋânə ambo pəngèrə̀ pa sàmbaa la mɨ lẅùutə̀ mə.