Read Pinyin Rèvə̀leshònə̀ 16 Bible Online

Rèvə̀leshònə̀ 16 - Pinyin bible

Rèvə̀leshònə̀ 16

¹Ǹtyiʼə̀ ndzuʼù ngyə̀ ntɨ̀ŋnə̀ ɨ̀ furə̀ amwuə ndâ mɨ̀shwàʼà za mmə nshwəŋə̀ ambo pəngèrə̀ pa sàmbaa lo, “Nɨ̀ lèrə̀ ngə̀ nkẅìrə̀ àtse ntɨŋmə̀ Nẅùə̀ yè ẅùunə za nɨ a pənə amwuə ɨ̀kaŋə̀ ɨ̀pɨghə pa sàmbaa a àtwuə̀ ɨ̀shyə̂”

²Ntsàambyə̀ angèrə̀ à lə̀ lèrə̀ ngə̀ nkẅìrə̀ àze àkaŋə̀ àtsə̂ ntɨŋmə̀ a àtwuə̀ ɨ̀shyə̂. Ɨ̀lǎ tɨ̀pòŋə̀ nɨ lə̀ mənə ndzaŋə̀ lə̀ furə̀ aŋunə pànə̀ pa nɨ pobə lə̀ pənə nɨ ɨ̀lènə̀ nyàamə̀ yɨ̀ ntsə̂nə wa pobə pànə̀ pa nɨ pobə lə̀ səəkə̀nə a tɨtoo e wa.

³Àpaatə̀ angèrə̀ a lə̀ kẅìrə̀ àze àkaŋə̀ àtsə̂ ntɨŋmə̀ amwuə nchyə ghu nɨŋnə̀nə. Nchyə ɨ pə̀ŋə̀ ntyiʼə̀ tsaʼa àləəmə̀ àkwuə̀ ŋwùə̀. Àzwuumə̀ àtsùmə̀ nɨ a lə̀ pənə amwuə nchyə ghu a kɨ nkwɨghə̀.

⁴Angèrə̀ nòmbàa pɨtarə a kẅìrə̀ àze àkaŋə̀ àtsə̂ ntɨŋmə̀ amwuə mɨ̀ndòorə̀ mɨ nchyə ghobə pɨ nɨ̀mwurə̀ ɨ̀shyə̂ mɨ pə̀ŋə̀ ntyiʼə̀ àləəmə̀.

⁵Ǹtyiʼə̀ ndzuʼù ngyə̀ angèrə̀ wa nɨ à wa nnaŋə̀ mɨnchyə la a shwəŋə̀ lo, “Àlàŋə nɨ wə̀ lə̂nə ɨ̀sàʼa ɨ̀ghobə wə̀ lə a kùʼnə̀. Ghò wa nɨ wə̀ pənə ghu tɨ̀tsòŋə̀, ndə̀ kɨ mbə ghu. Ghò wa nɨ wə̀ laanə̀nə mmyàanə̀ la.

⁶Àlàŋə nɨ wə̀ lə̂nə ɨ̀sàʼa ɨ̀ghobə a kùʼnə̀ ntiinə pobə lə̀ kẅìrə̀ àləəmə̀ pə̀ənə̀ ɨ̀pô pobə ngàŋə ntwuumə̀ ɨ̀zô. Wə̀ kùmə̀ nkɨ ŋŋâ àləəmə̀ lo pobə̂ nô. A àlàŋə a nɨ lə̂ ɨ̀sàʼa nɨ a kùʼnə̀nə ambo pobə.”

⁷Ǹtyiʼə̀ ndzuʼù ngyə̀ ɨ̀ furə̀ amwuə alyiʼə mɨ̀shwàʼà Nẅùə̀ nshwəŋə̀ lo, “Ee mbǎ Ndòʼnə̀mbyə̂ Nẅùə̀ Àkoʼntsirə̀ Àlàŋə nɨ wə̀ wa ndə̂ ɨ̀sàʼa o a kùʼnə̀ nkɨ mbə nkǔŋə nkuŋə.”

⁸Angèrə̀ nòmbàa nɨ̀kwàa wa a kẅìrə̀ àze àkaŋə̀ àtsə̂ ntɨŋmə̀ Nẅùə̀ aŋunə nẅùumə̀. Nẅùə̀ à lə̀ ŋâ a nẅùumə̀ nɨ mɨ̀tɨ̀ŋnə̀ lo â tòonə̀ pə̀ənə̀ tsaʼa ɨ̀mǔ.

⁹Àzwuʼə̀ ɨ̀mǔ yè tɨ̀ŋnə̀ za a lə̀ tòonə̀ pànə̀ pa, pobə tyiʼə̀ ndzòomə̀ nɨ̀linə̀ nɨ Nẅùə̀ wa nɨ à twuʼtə̀nə ɨ̀tɨ̀ŋnə̀ àtwuə̀ mɨ̀ngəʼə̀ ma, la ntwuunə̀ a ghobə a nɨ pə̀ŋə̀ mɨ̀ntɨŋmə̀ ɨ̀mobə aŋunə tɨ̀pòŋə̀ ɨghobə mbə̀ʼə pobə kaŋə ghɨ̀rə̀ nɨ̀linə̀ nɨ Nẅùə̀ faŋə̀.

¹⁰Angèrə̀ nòmbàa pɨtaanə̀ à lə̀ tyiʼə̀ nkẅìrə̀ àze àkaŋə̀ àtsə̂ ntɨŋmə̀ Nẅùə̀ aŋunə aləŋə nɨ̀fò nyàamə̀ ghù ntsə̂nə wa nɨ à lə̀ furə̀nə amwuə nchyə la. Lenəla ndzùmə ɨ̀ nàanə̀ alyiʼə nɨ̀fò nyàamə̀ wa nɨ à mənə mbuʼtə̀ la. Pànə̀ pa nɨ pobə lə̀ mənə ndzùŋə̀ a nyàamə̀ wa lə̀ tyiʼə̀ nkwurə̀ mɨsoŋə ɨ̀mobə ntii àndzaŋə nɨ pobə lə̀ mənə ndzuʼù.

¹¹Pobə lə̀ zòomə̀ a Nẅùə̀ a nɨ̀pwuurə̀ ntii àndzaŋə ghobə ɨ̀lǎ nɨ lə̀ pənə aŋunə pobə. La ka pobə lə̀ waʼà a ghobə ɨ̀nwùə̀ tɨ̀pòŋə̀ pa nɨ pobə lə̀ mənə ngɨ̀rə̀ la nkẅirə̀ tô ambo Nẅùə̀.

¹²Angèrə̀ nòmbàa ntuurə̀ a kẅìrə̀ àze àkaŋə̀ àtsə̂ ntɨŋmə̀ Nẅùə̀ za amwuə maa ndòorə̀ nchyə Euphrates. Nchyə ghu lə̀ zwuumə̀ mbə̀ʼə ŋâ àlàŋə ambo pɨ̀fò nɨ pɨ furə̀nə a pàa saʼà nẅùumə̀ lo pobə̂ làŋə̀.

¹³Ǹdzəənə̀ ɨ̀zhwùə̀ tɨ̀pòŋə̀ ɨtarə nɨ lə̀ mənə nfurə̀ pèrə pə tsaʼa pɨ̀tɨ̀tsàamə̀. Taʼà a furə̀ a ntswùə̀ drǎgònə̀ wa; yètse a furə̀ a ntswùə̀ nyàamə̀ ghù ntsə̂nə wa nɨ à lə̀ furə̀nə amwuə nchyə ghu nɨŋnə̀nə la; zhyə̀ a kɨ nfurə̀ a ntswùə̀ ngàŋə̀ ntwuumə̀ Nẅùə̀ pɨ̀chwìrə̀.

¹⁴Ɨ̀zhwùə̀ pa la ɨ̀zhwùə̀ tɨ̀pòŋə̀ nɨ pèrə pa ngɨ̀rə̀ mɨ̀nwùə̀ mɨ yerə̀nə yerə̀nə la. Ɨ̀zhwùə̀ pèrə pə pa nfurə̀ ndèrə̀ la ambo pɨ̀fò pɨ àtwuə̀ ɨ̀shyə̂ pɨ̀tsùmə̀, mmə nshwatə̀ a ghobə mbə̀ʼə pobə chwuʼtə̀ mbɨ̀ŋmə̀ aŋunə ntsòo nɨ ɨ ghǎ pə amwuə njyə̂ nɨ Nẅùə̀ Àkoʼntsirə̀ à ghǎ tsoʼtə̀ mɨ̀sàʼa mɨ pànə̀ nɨ pobə ghɨ̀rə̀nə mɨ̀nwùə̀ mɨ tɨ̀pòŋə̀.

¹⁵Yěsû à lə̀ shwəŋə̀ lo, “Nɨ̀ zəənə̀! Ngǎ tô la njyə̂ nɨ ka ŋònə̀ ɨ̀tse a pə ghǎ zhyə̂ e tyìʼə̀ tsaʼnə ɨ̀ndzə̀ərə̀ à wa ntô la! Mborə̀ ɨ̀ chyə̂ ambo ŋònə̀ wa nɨ à pənə a nɨ̀lyìinə̀ nkwâ ntsobə e ɨ̀shìʼnə̀ mbə̀ʼə a kaŋə yìinə̀ ntǔmnə̀, tyiʼə̀ pə e nɨ ɨ̀sɨŋnə̀ a mbyə̀ pə̀ənə̀ apə̀.”

¹⁶Ɨ̀zhwùə̀ tɨ̀pòŋə̀ pa tyiʼə̀ nshwatə̀ pɨ̀fò pa pɨ̀tsùmə̀ alyiʼə nɨ pɨ pa nfuŋə̀ amwuə àshwəŋnə̀ Hibrù lo Armageddon.

¹⁷Angèrə̀ nòmbàa sàmbaa a kẅìrə̀ àze àkaŋə̀ àtsə̂ ntɨŋmə̀ Nẅùə̀ amwuə ɨ̀fə̂. Ngyə̀ ntɨ̀ŋnə̀ ɨ̀ furə̀ aŋunə aləŋə nɨ̀fò amwuə Ndâ Mɨ̀shwàʼà Nẅùə̀ nshwəŋə̀ lo, “A ghɨ̀rə̀ mə.”

¹⁸Mbə̀ŋə̀ ɨ̀ lə̀ ŋwàŋə̀, nkwùrə̀; nɨ̀fàŋə̀ pitə̀. Ɨ̀shyə̂ ɨ̀ nə̀ʼnə̀ nɨ mɨ̀tɨ̀ŋnə̀ amwuə àlàŋə nɨ ɨ̀ laʼa mə nnə̀ʼnə̀ e a lenə tsaʼnə Nẅùə̀ à lə̀ tsùŋə̀nə a ŋwùə̀ mɨsoŋə apə̀. Ɨ̀shyə̂ ɨ̀ lə̀ nə̀ʼnə̀ ka mɨ̀zùŋə.

¹⁹Mbòmpə àlaʼà yɨ̀ ngẅùunə za ɨ̀ lə̀ saanə̀ ɨlyiʼə ɨtarə, mɨ̀mbòmpə mɨ ɨ̀laʼà mɨ̀ẅùunə amwuə ɨ̀laʼà ɨ̀tsùmə̀ shàʼtə̀. Nẅùə̀ a kẅempə̀ mbòmpə àlaʼà ntɨ̀ŋnə̀ Babilònə̀, nchyâ ngəʼə̀ aŋunə pànə̀ nɨ pobə pənə amwuə mbòmpə àlaʼà ghu, ngɨ̀rə̀ lo pobə̂ nô ndoŋə̀ àtsə̂ ntɨŋmə̀ e za.

²⁰Ɨ̀pàbə ɨ̀shyə̂ ɨ̀tsùmə̀ nɨ mɨnchyə kamnə̀nə lə̀ myìirə̀, ka pɨ̀ kɨ nchi mmə ndzəənə̀ e mɨ̀mbarə̀.

²¹Pɨ̀maa pɨ̀maa pɨ mɨẅuunə nɨ mbə̀ʼə taʼà a lìrə̀ tsaʼa kilù mɨ̀ghumə̀ mɨntaanə̀ lə̀ furə̀ a nɨ̀pwuurə̀ mmə nkẅìnə̀ aŋunə pə̀ənə̀. Pànə̀ pèrə pə̀ tyiʼə̀ mə ndzòomə̀ a Nẅùə̀ ntiinə mɨẅuunə mə lə̀ pɨ̂nə tɨsɨŋnə.