Read Pinyin Rèvə̀leshònə̀ 17 Bible Online

Rèvə̀leshònə̀ 17 - Pinyin bible

Rèvə̀leshònə̀ 17

¹Taʼà angèrə̀ wa ghùtse amwuə pəngèrə̀ pa sàmbaa nɨ pobə lə̀ twuʼtə̀nə ɨ̀kaŋə̀ pa la, a tyiʼə̀ ntô ambo mɨ̀ŋə̀ nshwəŋə̀ lo, “Tô, mbɨ nèrə̀ o nɨ ngəʼə̀ nɨ ɨ̌ tô aŋunə ntɨ̀ŋnə̀ àkwàrə̀ wə̀. Ntɨ̀ŋnə̀ àkwàrə̀ wə̀ à wa nchyə̂ la amwuə mbòmpə àlaʼà ngẅùunə za nɨ ɨ̀ paatə̀nə mɨ̀ndòorə̀ mɨ nchyə mɨ̀noʼnə la.

²Pɨ̀fò pɨ àtwuə̀ ɨ̀shyə̂ pə̀ pɨ̀tsùmə̀ ghɨ̀rə̀ mə àfànə̀ pobə pɨ pobə. Pànə̀ pɨ àtwuə̀ ɨ̀shyə̂ lə̀ mə nnô mɨ̀lùʼù ɨ̀me mbaarə̀, tə ntyiʼə̀ ngɨ̀rə̀ àfànə̀ pobə pɨ pobə.”

³Àzhwùə̀ Nẅùə̀ a lə̀ shwuʼə̀ ntô aŋunə mɨ̀ŋə̀, angèrə̀ a lòo mə̀ pəə ze lèrə̀ alyiʼə waakə. Ǹdzəənə̀ mə̀ngyə̌ ɨ̀tse a nwuunə̀ aŋunə nyàamə̀ ghù ntsə̂nə ghu mbàŋə̀nə. Nyàamə̀ ghu tsə̂nə wa à lə̀ pə nɨ mɨ̀linə̀ nɨ mèrə lə̀ mənə ndzòomə̀ a Nẅùə̀ aŋunə ze. Nyàamə̀ ghu à lə̀ pə nɨ ɨ̀twuə̀ sàmbaa pobə mɨ̀ndoŋə̀ nɨ̀ghumə̀ aŋunə.

⁴Mə̀ngyə̌ wa à lə̀ ẅî atsəʼə yè pàŋə̀nə nɨ zhyə̀ nɨ a pàŋə̀nə nɨ bumə̀. Nkẅìi mbɨ̀ŋmə̀ e nɨ ɨ̀pwuumə̀ nɨ pɨ tsùŋə̀nə nɨ goldə̀ ghobə kɨyii mɨ̀ghòorə mɨ tsə̂nə nɨ lə̀ mənə ntsìinə̀ pobə mɨ̀tuʼù. À lə̀ twuʼtə̀ ndoŋə̀ nɨ pɨ tsùŋə̀nə nɨ goldə̀ àpô ze ɨ̀ lẅenə̀ nɨ mɨ̀nwùə̀ mɨ pɨ̂nə pobə ɨ̀kɨ̀fî mɨ̀nwùə̀ mɨ àkwàrə̀ ɨ̀me.

⁵Pɨ lə̀ ŋwàʼnə̀ nɨ̀linə̀ nɨ ka pɨ zhyə̂ e ɨ̀sùmə a nɨ̀zènə ze lo, “Maa maa Babilònə̀, mǎ pɨ ɨ̀kwàrə̀ ɨ̀tsùmə̀ pobə ɨ̀kɨ̀fî mɨ̀nwùə̀ ɨ̀tsùmə̀ a àtwuə̀ ɨ̀shyə̂.”

⁶Ǹdzəənə̀ lo mə̀ngyə̌ wa à paarə̀ tyìʼə̀ tsaʼa ŋònə̀ nɨ à nônə mɨ̀lùʼù ntii àləəmə̀ pànə̀ pɨ Nẅùə̀ pobə yè pànə̀ nɨ pobə pa ngɨ̀rə̀ mɨ̀nwùə̀ nɨ Yěsû à tàʼnə lo pobə̂ ghɨ̀rə̀. Nkwùə̀ nɨ ǹdzəənə̀ e, ànwùə̀ ghu a lanə nkə̀ʼnə̀ mə̀ ka mɨ̀zùŋə.

⁷Angèrə̀ wa a pyiitə̀ ambo mɨ̀ŋə̀ lo, “A ghò lə à lanə nkə̀ʼnə̀ àkə? Mbɨ tiitə̀ o nɨ ànwùə̀ nɨ ka wə̀ zhyə̂ o mbə̀ʼə mə̀ngyə̌ wə̀ ghobə nyàamə̀ ghù ntsə̂nə wə̀ nɨ à pìʼnə e mbə nɨ ɨ̀twuə̀ sàmbaa nɨ mɨ̀ndoŋə̀ nɨ̀ghumə̀ aŋunə.

⁸Nyàamə̀ wa nɨ wə̀ lə̀ zəənə̀nə la à lə̀ pə mə ghù ntɨ̀ŋnə̀, la tɨ̀tsòŋə̀ ka à pirə̀ e ghù ntɨ̀ŋnə̀. À lə̀ furə̀ amwuə nɨ̀ntaamə̀ tɨ ndẅùutə ndèrə̀ a alyiʼə nɨ pɨ̌ zhwuutə̀ e. Nkwùə̀ nɨ pànə̀ pɨ àtwuə̀ ɨ̀shyə̂ nɨ ka pɨ lə̀ ŋwàʼnə̀ e mɨ̀linə̀ ɨ̀mobə amwuə àŋwàʼnə̀ nɨ̀chyə̂mbyə̂ a nɨ furə̀ nkwùə̀ nɨ pɨ lə̀ tsùŋə̀nə àtwuə̀ ɨ̀shyə̂ ghǎ zəənə̀ a nyàamə̀ ghù ntsə̂nə wa, a ghǎ kə̀ʼnə̀ a ghobə. A ghǎ kə̀ʼnə̀ a ghobə a nɨ zəənə̀ a nyàamə̀ nɨ à lə̀ pənə ghù ntɨ̀ŋnə̀, ka ghǎ pə e ghù ntɨ̀ŋnə̀, la à kùmə̀ nchi mbə ghù ntɨ̀ŋnə̀.

⁹“Zèrə zə a tàʼà la àzhìʼtə̀ pobə àzhyə̂ ànwùə̀. Ɨ̀twuə̀ pa sàmbaa la pɨ̀kòŋə̀ sàmbaa nɨ mə̀ngyə̌ wə̀ à wa nnwuunə̀ aŋunə.

¹⁰Nkɨ mbə la pɨ̀fò sàmbaa nɨ pɨ̀pɨtaanə̀ kwɨghə̀ mə, taʼà a pirə̀ mmə mbuʼtə̀, taʼà a pə pòŋə̀ tô puʼtə̀; la nkwùə̀ nɨ à ghǎ tô, ǎ puʼtə̀ tyìʼə̀ aŋunə mətùmə nkwùə̀.

¹¹Ngə̀ aŋunə nyàamə̀ wa nɨ à lə̀ pənə ghù ntɨ̀ŋnə̀, à kùmə̀ ka chi pə e ghù ntɨ̀ŋnə̀ tɨ̀tsòŋə̀, a ɨ̀fò nòmbàa nɨ̀fàamə̂. Ɨ̀fò nòmbàa nɨ̀fàamə̂ ghu à chyə̂ mbə la ambo pɨ̀fò pə̀ sàmbaa mmə ndèrə̀ alyiʼə nɨ pɨ̌ zhwuutə̀ e.

¹²“Mɨ̀ndoŋə̀ mɨ nyàamə̀ ma nɨ̀ghumə̀ la pɨ̀fò nɨ̀ghumə̀ nɨ pɨ pirə̀nə e mɨ̀tɨ̀ŋnə̀ ambo pobə tɨ ŋâ. Pɨ ghǎ ŋâ a ghobə nɨ ɨ̀tɨ̀ŋnə̀ a nɨ puʼtə̀ tsaʼa pɨ̀fò pobə pɨ nyàamə̀ wa aŋunə ndàʼà taʼà nẅùumə̀.

¹³Àkwàŋə̀ nɨ pɨ̀fò pə nɨ̀ghumə̀ pɨ̀tsùmə̀ lə̀ pənə nɨ zèrə a lə̀ pə a nɨ ŋâ mɨ̀tɨ̀ŋnə̀ ɨ̀mobə ghobə ɨ̀tɨ̀ŋnə̀ ɨ̀ghobə ambo nyàamə̀ ghù ntsə̂nə wa.

¹⁴Pobə ghǎ zòŋnə̀ ntsòo pobə pɨ Mômbyə̂ Ndzìrə̀ Nẅùə̀. La Mômbyə̂ Ndzìrə̀ Nẅùə̀ â tsàarə̀ a ghobə ntiinə à pənə Ndòʼnə̀mbyə̂ àtwuə̀ pɨ̀ndòʼnə̀mbyə̂ pɨ̀tsùmə̀ nkɨ mbə Ɨ̀fò àtwuə̀ pɨ̀fò pɨ̀tsùmə̀. À chyə̂ mbə la pobə pɨ pànə̀ nɨ Nẅùə̀ à fuŋə̀nə nkɨ ntsoʼò a ghobə, pobə kɨ mmə nfàʼà ambo ze nɨ ntɨŋmə̀ ɨ̀ghobə ɨ̀tsùmə̀.”

¹⁵Angèrə̀ wa a shwəŋə̀ ambo mɨ̀ŋə̀ lo, “Mɨ̀ndòorə̀ mɨ nchyə ma nɨ wə̀ tənə ndzəənə̀ àkwàrə̀ za a nwuunə̀ àtwuə̀ la pə̀ənə̀, nɨ àpùŋə̀ pə̀ənə̀, nɨ ɨ̀laʼà pobə mbuurə̀ àshwəŋnə̀ ɨ̀laʼà ɨ̀tsùmə̀.

¹⁶Nyàamə̀ ghù ntsə̂nə wa pobə mɨ̀ndoŋə̀ ma nɨ wə̀ zəənə̀nə la à ghǎ pàanə̀ àkwàrə̀ za kẅiirə̀ àzwuumə̀ àtsùmə̀ nɨ à pənə nɨ zèrə mmyàʼtə̀ e ntǔmnə̀. Pɨ ghǎ kwurə̀ mbòbə̀ mbɨ̀ŋmə̀ e tòonə̀ e amwuə ɨ̀mǔ.

¹⁷Mbə̀ʼnə Nẅùə̀ à lə̀ ghɨ̀rə̀ mɨ̀ntɨŋmə̀ ɨ̀mobə pə amwuə ndwuumə̀ nɨ pobə̌ ghɨ̀rə̀ ànwùə̀ nɨ à kwàŋə̀nə nɨ àpô moʼo. À lə̀ ŋâ ɨ̀tɨ̀ŋnə̀ ambo nyàamə̀ ghù ntsə̂nə wa lo â puʼtə̀ àtwuə̀ ɨ̀shyə̂ tə mbyàa nkwùə̀ nɨ ànwùə̀ nɨ à lə̀ shwəŋə̀nə a koʼò mbwùumə̀.

¹⁸Mə̀ngyə̌ wa nɨ wə̀ lə̀ zəənə̀nə la, a mbòmpə àlaʼà ngẅùunə za nɨ ɨ̀ za mbuʼtə̀ pɨ̀fò pɨ àtwuə̀ ɨ̀shyə̂ la.”