Read Pinyin Rèvə̀leshònə̀ 19 Bible Online

Rèvə̀leshònə̀ 19 - Pinyin bible

Rèvə̀leshònə̀ 19

¹Zə̀ ànwùə̀ a lə̀ làŋə̀, ǹdzuʼù ngyə̀ ntɨ̀ŋnə̀ ɨ̀ furə̀ a nɨ̀pwuurə̀ mmə ndzòrə̀ tsaʼa àpùŋə̀ pə̀ənə̀ mmə nkyiinə̀ lo, “Pə̀ənə̀ pə̀ ngyetə̀ a Nẅùə̀. Nɨ̀chwarə̀, nɨ nɨ̀faŋə̀, ghobə mɨ̀tɨ̀ŋnə̀ chyə̂ ambo Nẅùə̀.

²Mbə̀ʼnə ntsòʼtə ɨ̀sàʼa e ɨ̀ pənə nkǔŋə nkuŋə nkɨ kùʼnə̀! Ntiinə à lə̂nə ɨ̀sàʼa ntɨ̀ŋnə̀ àkwàrə̀ wa nɨ à wa nfɨ̀kə̀ pànə̀ pɨ àtwuə̀ ɨ̀shyə̂ lo pobə̂ ghɨ̀rə̀ a tɨ̀pòŋə̀ nɨ mɨ̀nwùə̀ mɨ àfànə̀ ɨ̀me la. À kẅuə̀ àsoo nɨ à lə̀ kẅìrə̀nə àləəmə̀ ngàŋə àfàʼà ɨ̀ze.”

³Pobə kɨ nchi nkyiinə̀ lo, “Pə̀ənə̀ pə ngyetə̀ a Nẅùə̀. Ndyə̂ nɨ ɨ furə̀nə tsaʼnə mbòmpə àlaʼà ngẅùunə za ɨ̀ mənə nsɨghə̀ la ɨ wə̀ nkoʼò ndèrə̀ àtɨ̀ghə nɨ nkuŋə̀ nɨ nkuŋə̀.”

⁴Pɨ̀lɨ̀ŋmə̂ pa mɨ̀ghumə̀ mbaa ntsòbə̀ nɨ̀kwàa ghobə mbuurə̀ mɨ̀nyàamə̀ za nɨ̀kwàa lə̀ kunə̀ a ɨ̀shyə̂ àkùbəkubə̀ a mbyə̀ Nẅùə̀ nsəəkə̀ e ze wa nɨ à ŋaanə̀nə aŋunə aləŋə nɨ̀fò e nshwəŋə̀ lo, “Amen, pə̀ənə̀ pə ngyetə̀ a Nẅùə̀.”

⁵Lenəla ǹtyiʼə̀ ndzuʼù ngyə̀ ɨ̀ furə̀ aŋunə aləŋə nɨ̀fò nshwəŋə̀ lo, “Nɨ̀ yetə̀ a Nẅùə̀ ɨ̀wə̀ənə̀, pɨghə pa pɨ̀tsùmə̀ nɨ nɨ̀ pənə ngàŋə àfàʼà ɨ̀ze; pɨghə pa nɨ nɨ̀ wa nguʼtə̀ e, kə̀ wə̀ faŋə̀ kə̀ nkɨ̂.”

⁶Ǹkɨ ndzuʼù ngyə̀ ɨ̀tse ɨ̀ mə ndzòrə̀ tsaʼa àpùŋə̀ pə̀ənə̀, mmə ndzòrə̀ tsaʼa nɨ̀fuurə̀, mmə nkwùrə̀ tsaʼa mbə̀ŋə̀. Ngyə̀ ghu ɨ̀ lə̀ mə nshwəŋə̀ lo, “Pə̀ənə̀ yetə̀ a Nẅùə̀. Mbə̀ʼnə Ndòʼnə̀mbyə̂ Nẅùə̀ Àkoʼntsirə̀ ɨ̀wə̀ənə̀ à wa mbuʼtə̀ a ŋwùə̀ ntsùmə̀.

⁷Nɨ̀ ghɨ̀rə̀ pə̀ənə̀ pə nɨ nɨ̀ghaʼà, pə̀ənə̀ shwəŋə̀ lo pə̀ənə̀ pə ngaʼà mmə nsəəkə̀ e! Mbə̀ʼnə nkwùə̀ ɨ̀ kùʼù ambo mômbyə̂ ndzìrə̀ a nɨ zoʼò, ngɨ̀ɨnə̀ a kɨ nchwuʼtə̀ mbɨ̀ŋmə̀ mmə mbyabə̀.

⁸Nẅùə̀ à lə̀ ŋâ e nɨ ɨ̀sàanə̀ lo â màʼà atsəʼə yè ɨ̀shìʼnə̀ àtse nɨ pɨ tsùŋə̀nə nɨ atsəʼə àtse nɨ pɨ pa nfuŋə̀ nɨ linènə̀.” (Atsəʼə yè ɨ̀shìʼnə̀ zə̀ a nèrə̀ la mɨ̀nwùə̀ mɨ pànə̀ pɨ Nẅùə̀ mɨ təəmə̀nə.)

⁹Angèrə̀ wa a tyiʼə̀ nshwəŋə̀ ambo mɨ̀ŋə̀ lo, “Ŋwàʼnə̀ ànwùə̀ zə̀ lo, ‘Mborə̀ ɨ̀ chyə̂ aŋunə pànə̀ pa nɨ pɨ wuunə̀nə a ghobə aŋunə ndzòʼo Mômbyə̂ Ndzìrə̀ wa.’” A chi nkẅìʼnə̀ nshwəŋə̀ ambo mɨ̀ŋə̀ lo. “Lə̌ àshwəŋnə̀ nkǔŋə nkuŋə nɨ a furə̀nə ambo Nẅùə̀.”

¹⁰Ǹtyiʼə̀ nkunə̀ a mɨ̀kwùə̀ ze àkùbəkubə̀ lo səəkə̀ e, a shwəŋə̀ ambo mɨ̀ŋə̀ lo, “Kò wə̀ ghɨ̀rə̀ a lenə! Ǹkɨ mbə tyìʼə̀ ngàŋə̀ àfàʼà tsaʼa ghò, nkɨ mbə taʼà ŋònə̀ nɨ à nùŋə̀nə ntɨŋmə̀ e aŋunə Yěsû nkɨ ntəəmə̀ a aŋunə nkǔŋə nkuŋə wa nɨ Yěsû à wa nnèrə̀ la. Səəkə̀ pə a Nẅùə̀ ntiinə àshwəŋnə̀ nkǔŋə nkuŋə za nɨ Yěsû à wa nshwəŋə̀ la a za ŋŋâ mɨ̀tɨ̀ŋnə̀ ambo pə̀ənə̀ a nɨ chwìitə̀ ntwuumə̀ Nẅùə̀.”

¹¹Lenəla ǹtyiʼə̀ ndzəənə̀ ntswùə̀ nɨ̀pwuurə̀ ɨ təəmə̀ ghù ghɨɨrə̀, ǹnaŋə̀ ndzəənə̀ a ləəmə yɨ̀ fuə pɨ mə nfuŋə̀ a ŋònə̀ nɨ à pənə àtwuə̀ nɨ Ŋònə̀ Nɨ À Pənə Nkǔŋə Nkuŋə nkɨ mmə ngɨ̀rə̀ pànə̀ zhyə̂ a nkǔŋə nkuŋə mbə̀ʼə Nẅùə̀. À wa nsaʼà mɨ̀sàʼa ɨ̀me la nɨ nkǔŋə nkuŋə nkɨ ndzòŋnə̀ ngàŋə kɨpaanə ɨ̀ze.

¹²Ɨ̀myə̂ ɨ̀me pə tsaʼa àləəmə̀ ɨ̀mǔ, pɨ̀tɨ̀làarə̀ pɨ nɨ̀fò pɨ̀noʼnə pə àtwuə̀ ze, a pə nɨ nɨ̀linə̀ tsɨ̀tse aŋunə ze nɨ à kɨnə nzhyə̂ e pə ze nzhyə̂ ɨ̀sùmə nɨ̀linə̀ ghu.

¹³À lə̀ ẅî atsəʼə yè sàa nɨ pɨ tsùbə̀nə amwuə àləəmə̀. Nɨ̀linə̀ ɨ̀tse kɨ mbə “Àshwəŋnə̀ Nẅùə̀.”

¹⁴Pɨ̀soyì pɨ nɨ̀pwuurə̀ lə̀ ẅî ɨtsəʼə pɨ̀fuə pɨ laanə̀nə pɨ̀shìʼnə̀ nɨ pɨ tsùŋə̀nə nɨ atsəʼə àtse nɨ pɨ pa nfuŋə̀ nɨ linènə̀, nkoʼò àtwuə̀ pɨləəmə mmə ndzùŋə̀ e.

¹⁵Ɨ̀nẅùə ntsòo yɨ̀ ntsə̂nə ɨ̀ lə̀ furə̀ a ntswùə̀ ze mbə zhyə̀ nɨ ǎ lòo chyâ ngəʼə̀ àtwuə̀ pànə̀ pɨ ɨ̀laʼà ɨ̀tsùmə̀ ghu. Ze àtwuə̀ mbɨ̀ŋmə̀ e à ghǎ puʼtə̀ a ghobə nɨ mbô mɨ tɨ̀ŋnə̀, kɨ kyiimə̀ mɨ̀lùʼù ma nɨ mɨ pənə amwuə alyiʼə nɨ pɨ pa ntswuʼə̀ mɨ̀ntàamə mɨ mɨ̀lùʼù ghu la a nɨ nèrə̀ àtsə̂ ntɨŋmə̀ Nẅùə̀ Àkoʼntsirə̀.

¹⁶Pɨ lə̀ ŋwàʼnə̀ nɨ̀linə̀ ɨ̀tse aŋunə atsəʼə yè sàa e pobə ntaamə̀ e lo, “Ɨ̀fò àtwuə̀ pɨ̀fò pɨ̀tsùmə̀ nkɨ mbə Ndòʼnə̀mbyə̂ àtwuə̀ pɨ̀ndòʼnə̀mbyə̂ pɨ̀tsùmə̀.”

¹⁷Ǹchi ndzəənə̀ a ghùtse angèrə̀ a təəmə̀ amwuə nẅùumə̀ mmə nkyiinə̀ nɨ ngyə̀ ntɨ̀ŋnə̀ ambo pɨ̀sɨ̀ŋə pɨ̀tsùmə̀ nɨ pèrə pa ntàarə̀ àtɨ̀ghə lo, “Nɨ̀ tô nshwatə̀ a taʼà alyiʼə aŋunə nɨ̀ghaʼà Nẅùə̀ ghu ngẅùunə!

¹⁸Nɨ̀ tô nkwurə̀ mbòbə̀ mbɨ̀ŋmə̀ pɨ̀fò, nɨ yɨ̀ ɨ̀twuə̀ pɨ̀soyì, nɨ yɨ̀ pànə̀ pɨ̀ẅùunə, nɨ yɨ̀ pɨləəmə pobə yɨ̀ pə̀ənə̀ nɨ pobə pa nkoʼò aŋunə, nɨ yɨ̀ pànə̀ pɨ̀tsùmə̀, nɨ yɨ̀ ɨ̀pùʼù pobə pànə̀ nɨ ka pobə pə ghobə ɨ̀pùʼù, nɨ pànə̀ pɨ̀ẅùunə farə pɨ̀kɨ̂.”

¹⁹Ǹtyiʼə̀ ndzəənə̀ a nyàamə̀ ghù ntsə̂nə wa pobə pɨ̀fò pɨ àtwuə̀ ɨ̀shyə̂ nɨ pɨ̀soyì ɨ̀pobə pobə shwatə̀ a taʼà alyiʼə lo zòŋnə̀ a ŋònə̀ nɨ à koʼnə a ləəmə yɨ̀ fuə wa pobə ɨ̀pe pɨ̀soyì.

²⁰Pɨ lə̀ kô a nyàamə̀ ghù ntsə̂nə wa pobə ngàŋə̀ ntwuumə̀ Nẅùə̀ yɨ̀ pɨ̀chwìrə̀ wa nɨ à lə̀ ghɨ̀rə̀nə ɨ̀lènə̀ ɨ̀nwùə̀ pɨ̀yerə̀nə yerə̀nə ndòo nfɨ̀kə̀ pànə̀ pa nɨ pobə lə̀ kẅiirə̀nə a àlènə̀ nyàamə̀ ghù ntsə̂nə wa, nkɨ mmə nsəəkə̀ a tɨtoo e wa. Pɨ lə̀ màʼà a ghobə wə̀ pɨpaa a pɨ̀tɨ̀ŋnə̀ amwuə àkɨɨnə̀ ɨ̀mǔ nɨ a za nkɨrə̀ nɨ ɨ̀mǔ nɨ ɨ wa ntòonə̀ ka mɨ̀zùŋə.

²¹Ŋònə̀ wa nɨ à lə̀ koʼnə a ləəmə yɨ̀ fuə wa la à lə̀ lòo ɨ̀nẅùə ntsòo za nɨ ɨ̀ lə̀ furə̀nə a ntswùə̀ ze la nzhwuutə̀ pɨ̀fò pa pobə pɨ̀soyì ɨ̀pobə pɨ̀tsùmə̀. Pɨ̀sɨ̀ŋə tyiʼə̀ nkwurə̀ mbòbə̀ mbɨ̀ŋmə̀ ɨzobə tsaʼnə pobə kòŋə̀nə.