Read Pinyin Rèvə̀leshònə̀ 2 Bible Online

Rèvə̀leshònə̀ 2 - Pinyin bible

Rèvə̀leshònə̀ 2

¹Ẅùə̀ wa nɨ à shwuə̀nə a ŋwùə̀ mɨsoŋə la a shwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù a Efesòsə̀ lo, ntwuumə̀ wə̀ ɨ furə̀ ambo ze wa nɨ à twuʼtə̀nə pɨsaŋə pa sàmbaa amwuə àpô e yè zɨghə̀nə mmə ngyìinə̀ a tɨ̀tɨ̀rə̀ ɨləŋə làamə̀ pa sàmbaa nɨ pɨ tsùŋə̀nə nɨ goldə̀.

²Ǹzhyə̂ mɨ̀nwùə̀ nɨ nɨ̀ wə̀ fàʼnə, nzhyə̂ tsaʼnə nɨ̀ fàʼnə ka mɨ̀zùŋə farə tsaʼnə nɨ̀ ẅìimə̀nə ntɨŋmə̀ mbyiimə̀ ngəʼə̀ ɨzɨghə, nkɨ nzhyə̂ lo ka nɨ̀ kòŋə̀ a wɨghə a nɨ zəənə̀ pànə̀ pa nɨ pobə pa ngɨ̀rə̀ a tɨ̀pòŋə̀ la. Ǹzhyə̂ lo nɨ̀ zhwiʼì mə pànə̀ pa nɨ pobə pa nfuŋə̀ mbɨ̀ŋmə̀ ɨ̀zobə nɨ ngàŋə ntwuumə̀ Kristù la ka pə ghobə pèrə, ndzəənə̀ lo a ngàŋə pɨ̀chwìrə̀.

³Nɨ̀ ẅìimə̀ mə ntɨŋmə̀ ndzəənə̀ ngəʼə̀ ntii nɨ̀linə̀ ɨ̀tsâ la ka kaanə̀ a wɨghə a nɨ zùŋə̀ mə̀.

⁴La ànwùə̀ nɨ ǹfèrə̀nə a wɨghə aŋunə a pə lo ka nɨ̀ pirə̀ nkòŋə̀ a wɨghə a gha tɨ̀tsòŋə̀ tsaʼnə nɨ̀ lə̀ pyə̀nə nkòŋə̀ la.

⁵Nɨ̀ kwàŋə̀ ndzəənə̀ tsaʼnə nɨ̀ kunə̀nə tyìʼə̀ ɨ̀shìʼnə̀. Nɨ̀ pə̀ŋə̀ mɨ̀ntɨŋmə̀ ɨ̀mɨghə ngɨ̀rə̀ mɨ̀nwùə̀ nɨ nɨ̀ lə̀ mənə ngɨ̀rə̀ nkwùə̀ nɨ nɨ̀ lə̀ pìʼnə̀nə a nɨ zùŋə̀ a Kristù. Nɨ̀ tə mbəla ngoŋə̀ a wɨghə tə pə̀ŋə̀ mɨ̀ntɨŋmə̀ ɨ̀mɨghə, yi mbɨ tô pìʼì aləŋə làamə̀ àzɨghə a alyiʼə nɨ a pənə ghu.

⁶Ànwùə̀ nɨ nɨ̀ wa ngɨ̀rə̀ a pòŋə̀ a chyə̂ lo nɨ̀ wa mbàanə̀ mɨ̀nwùə̀ nɨ pànə̀ nɨ pobə pənə amwuə àshwatə̀ Nikolòsə̀ pa ngɨ̀rə̀ tsaʼnə ǹkɨnə mmə mbàanə̀ àzâ.

⁷“Ŋònə̀ wa nɨ à pənə nɨ mɨtugrə â zuʼù ànwùə̀ nɨ Àzhwùə̀ a za nshwəŋə̀ ambo ɨ̀shwatə̀ ɨ̀poonə̀ pɨ Kristù! “Ambo ŋònə̀ wa nɨ à zòŋnə̀nə ntsàarə̀ a tɨ̀pòŋə̀, mbɨ ŋâ e nɨ ɨ̀sàanə̀ â zɨghə̀ nɨ̀ntàamə nɨ àtɨ̀ghə aŋunə àtɨ̀ghə za nɨ a za ngɨ̀rə̀ pànə̀ chyə̂ nɨ nkuŋə̀ mmə nkoʼò amwuə Paradise Nẅùə̀ la.”

⁸Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù nɨ a pənə Sìminà lo, ‘Lə̌ ntwuumə̀ nɨ ɨ furə̀nə ambo ze wa nɨ à pənə ntsàambyə̀ ŋwùə̀ nkɨ mbə ndẅùə̀ndzùmə̀ ŋwùə̀, mbə ze wa nɨ à lə̀ kwɨghə̀nə nchi nkẅirə̀ nchyə̂ la.

⁹Ǹzhyə̂ ngəʼə̀ ɨzɨghə, nkɨ nzhyə̂ lo pɨghə̌ pɨ̀ghàŋə pɨ àfumə̀, la nɨ̀ pə pɨ̀ghàŋə pɨ nkabə̀. Ǹzhyə̂ tsaʼnə pànə̀ pa nɨ pobə pa nfuŋə̀ mbɨ̀ŋmə̀ ɨ̀zobə nɨ pɨ̀Jew la ka pə a ghobə pèrə la pa nshwəŋə̀ mɨ̀nwùə̀ mɨ tɨ̀pòŋə̀ mbə̀ʼə wɨghə. Pobə la ndâ àshwatə̀ Satàanə̀.

¹⁰Kò nɨ̀ pô a wɨghə ngəʼə̀ nɨ nɨ̌ zəənə̀. Ngwə̀ nshwəŋə̀ a wɨghə lo Satàanə̀ ǎ ghɨ̀rə̀ pɨ chyâ a wɨghə pɨ̀tse a ndâ ɨ̀tsaŋə̀, nɨ̀ tsùŋə̀ ndzəənə̀ ngəʼə̀ aŋunə njyə̂ nɨ̀ghumə̀. Nɨ̀ lèrə̀ nɨ mbyə̀ tyìʼə̀ nɨ àpyiimə̀ ntɨŋmə̀ àzɨghə za aŋunə mɨ̀ŋə̀; a pə pə lo nɨ̀ kwɨghə̀, nɨ̀ kwɨghə̀. Nɨ̀ tə pəla ngɨ̀rə̀ a lenə yi mbɨ ŋâ a wɨghə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ tsaʼa àtsoʼò àfàʼà ŋònə̀ nɨ à tsàarə̀nə.

¹¹Ŋònə̀ wa nɨ à pənə nɨ mɨtugrə â zuʼù ànwùə̀ nɨ Àzhwùə̀ a zə nshwəŋə̀ ambo ɨ̀shwatə̀ ɨ̀poonə̀ pɨ Kristù pə̀. Ka ŋònə̀ wa nɨ à tsàarə̀nə a tɨ̀pòŋə̀ la â pə ghǎ kwɨghə̀ e a nɨ̀wɨghə̀ nɨ à paatə̀nə a ẅùə̀.’”

¹²Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù a Pegamùmə̀ lo, lə̌ ntwuumə̀ wa nɨ ɨ furə̀nə ambo ze wa nɨ à twuʼtə̀nə ɨ̀nẅùə ntsòo yɨ̀ ntsə̂nə ndzùmə̀ ntsùmə̀ la.

¹³Ǹzhyə̂ alyiʼə nɨ nɨ̀ wa nchyə̂ ghu la, alyiʼə gha nɨ ntoʼò Satàanə̀ ɨ̀ pənə ghu. La nɨ̀ lə̀ kɨ mbirə̀ nnùŋə̀ a wɨghə ntɨŋmə̀ nùŋə̀nə aŋunə mɨ̀ŋə̀. Ka nɨ̀ lə̀ waʼà a wɨghə a àpyiimə̀ ntɨŋmə̀ àzɨghə aŋunə mɨ̀ŋə̀ amwuə nkwùə̀ Antipàsə̀. Antipàsə̀ à lə̀ mə nshwəŋə̀ a nkǔŋə nkuŋə mbə̀ʼə mə̀, pɨ zhwuutə̀ e a tɨ̀tɨ̀rə̀ pɨghə a alyiʼə nɨ Satàanə̀ à pənə ghu.

¹⁴La pɨ̀mɨlyiʼə pɨ̀mɨ̀nwùə̀ pɨ̀tse pə ghu nɨ ǹfèrə̀nə a wɨghə aŋunə. Pɨghə pɨ̀tse pa ndzùŋə̀ mɨ̀nwùə̀ nɨ Balàamə̀ à wa nnèrə̀. Balàamə̀ à lə̀ nèrə̀ a Balàkə̀ a ghɨ̀rə̀ pànə̀ pɨ Israel tə ngɨ̀rə̀ tɨ̀pòŋə̀ ndzɨghə̀ mɨ̀zɨghə̀ nɨ pɨ zə̂nə pɨ̀tɨtoo nɨ mèrə, nkɨ mmə ngɨ̀rə̀ ɨ̀nyòrə̀kə̀ mɨ̀nwùə̀.

¹⁵Yètse nɨ ngwa nfèrə̀ a wɨghə aŋunə a chyə̂ lo pɨghə pɨ̀tse pa nkɨ nchi mbə ghu nɨ pɨghə pa ndzùŋə̀ ànwùə̀ nɨ pànə̀ nɨ pobə pənə amwuə àshwatə̀ Nikolòsə̀ pa nnèrə̀.

¹⁶Lenəla nɨ̀ pə̀ŋə̀ mɨ̀ntɨŋmə̀ ɨ̀mɨghə aŋunə tɨ̀pòŋə̀. Nɨ̀ tə ngoŋə̀ tɨ pə̀ŋə̀ mɨ̀ntɨŋmə̀ ɨ̀mɨghə yi mbɨ zàŋə̀ tô zòŋnə̀ a ghobə nɨ ɨ̀nẅùə ntsòo za nɨ ɨ̌ furə̀ a ntswùə̀ mɨ̀ŋə̀.

¹⁷“Ŋònə̀ wa nɨ à pənə nɨ mɨtugrə â zuʼù ànwùə̀ nɨ Àzhwùə̀ a shwəŋə̀nə ambo ɨ̀shwatə̀ ɨ̀poonə̀ pɨ Kristù pə̀. “Ambo ŋònə̀ wa nɨ à tsàarə̀nə a tɨ̀pòŋə̀, mbɨ ŋâ a manna ghù ndə̀əmə̀nə wa pobə nɨ̀ghòorə tsɨ̀ fuə. Pɨ̌ ŋwàʼnə̀ nɨ̀linə̀ tsɨ̀ shwuə̀ aŋunə nɨ̀ghòorə tsə̀ nɨ ka ŋònə̀ ɨ̀tse a zhyə̂ e a tsèrə ndàŋə̀ e ze wa nɨ à kẅiirə̀nə a tsèrə.”

¹⁸Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù a Tyatirà lo, lə̌ ntwuumə̀ nɨ ɨ furə̀nə ambo Moonə̀ Nẅùə̀ wa nɨ ɨ̀myə̂ ɨ̀me mə nkɨrə̀ tsaʼa ɨ̀mǔ, mɨ̀kwùə̀ ɨ̀me mə ntsìinə̀ tsaʼa àtɨ̀ŋnə àtse nɨ pɨ pa nfuŋə̀ nɨ bronzə̀ nɨ pɨ tòonə̀nə amwuə ɨ̀mǔ.

¹⁹Ǹzhyə̂ ngɨ̀rə̀ mɨ̀nwùə̀ ɨ̀zɨghə. Ǹzhyə̂ tsaʼnə nɨ̀ kòŋə̀nə mə̀ nkɨ nzhyə̂ tsaʼnə nɨ̀ nùŋə̀nə ntɨŋmə̀ aŋunə mɨ̀ŋə̀. Ǹzhyə̂ tsaʼnə nɨ̀ wə̀ nfàʼà ambo mɨ̀ŋə̀ pobə àẅìimə̀ ntɨŋmə̀ àzɨghə. Ǹzhyə̂ lo àfàʼà nɨ nɨ̀ wə̀ nfàʼà tɨ̀tsòŋə̀ a tsàarə̀ zhyə̀ nɨ nɨ̀ lə̀ pyə̀nə mmə nfàʼà.

²⁰La ǹfèrə̀ a wɨghə aŋunə taʼà ànwùə̀ lo, nɨ̀ myàʼtə̀ a mə̀ngyə̌ nɨ pɨ pa nfuŋə̀ nɨ Jezebèlə̀. À wa nfuŋə̀ mbɨ̀ŋmə̀ e nɨ ngàŋə̀ ntwuumə̀ Nẅùə̀ nfɨ̀kə̀ ngàŋə àfàʼà ɨ̀zâ ngɨ̀rə̀ pobə nyòrə̀kə̀ nkɨ mmə ndzɨghə̀ mɨ̀zɨghə̀ nɨ pɨ pa ŋŋâ ambo pɨ̀tɨtoo aŋunə nɨ̀shwàʼà.

²¹Ŋ̀ŋâ mə e nɨ ɨ̀sàanə̀ lo â pə̀ŋə̀ aŋunə tɨ̀pòŋə̀ e, la a twuunə̀ e a nɨ pə̀ŋə̀ aŋunə ɨ̀nyòrə̀kə̀ mɨ̀nwùə̀ ɨ̀me.

²²Nɨ̀ zəənə̀! À tə ka pə̀ŋə̀ e, m̀màʼà e pobə pànə̀ pa nɨ pobə pɨ pobə pa nnyòrə̀kə̀ la aŋunə ɨ̀kwùunə aghoonə alyiʼə nɨ pobə pɨ pobə̌ zəənə̀ ngəʼə̀ tɨ àndànə̀. Lə̌ ànwùə̀ nɨ mbɨ ghɨ̀rə̀ aŋunə pobə mbə̀ʼə pobə ka pə̀ŋə̀ a ghobə aŋunə tɨ̀pòŋə̀ nɨ pobə pɨ mə̀ngyə̌ wa lə̀ mənə ngɨ̀rə̀.

²³Mbɨ zhwuutə̀ pànə̀ nɨ pobə pa ndzùŋə̀ mɨ̀nwùə̀ nɨ à wa nnèrə̀, mbə̀ʼə ɨ̀shwatə̀ ɨ̀poonə̀ pɨ Kristù ɨ̀tsùmə̀ zhyə̂ lo a mɨ̀ŋə̀ wa nɨ ǹzhyə̂nə ɨ̀kwàŋə̀ ghobə mɨ̀ntɨŋmə̀ pànə̀ pɨ̀tsùmə̀ la. Mbɨ chyâ ngəʼə̀ aŋunə ŋwùə̀ ɨwɨghə moʼo moʼo a nɨ zùŋə̀ a tɨ̀pòŋə̀ nɨ à ghɨ̀rə̀nə.

²⁴“Ngwə̀ nshwəŋə̀ ambo àpwùʼə̀ àzɨghə nɨ a pənə a Tyatirà lo, pɨghə pa nɨ ka nɨ̀ ẅìimə̀ a wɨghə ànwùə̀ nɨ Jezebèlə̀ à wa nnèrə̀, ka kɨ lanə̀ a wɨghə ànwùə̀ nɨ pɨ pa nfuŋə̀ nɨ nchumə nɨ Satàanə̀ à lə̀əmə̀nə, ka mbə chyâ mə̀ ngəʼə̀ ɨ̀tse aŋunə pɨghə.

²⁵Nɨ̀ nùŋə̀ ntɨŋmə̀ ɨ̀wɨghə aŋunə mɨ̀ŋə̀ tə mbyàa nkwùə̀ nɨ ǹgǎ tô.

²⁶Ze wa nɨ à tsàarə̀nə a tɨ̀pòŋə̀ nkɨ ndèrə̀ nɨ mbyə̀ a nɨ fàʼà àfàʼà mə̀ tə ngə̀ ndẅùutə̀ la, mbɨ ŋâ e nɨ ɨ̀tɨ̀ŋnə̀ a nɨ puʼtə̀ ɨ̀laʼà ɨ̀tsùmə̀,

²⁷kɨ ghɨ̀rə̀ â twuʼtə̀ a ghobə nɨ mbô mɨ tɨ̀ŋnə̀, shàʼtə̀ a ghobə tyìʼə̀ tsaʼnə ŋwùə̀ à wa nshàʼtə̀ nɨkɨŋə nɨ àpòomə la. Lə kɨ mbə mbuurə̀ ɨ̀tɨ̀ŋnə̀ nɨ Tǎ ɨwəə à lə̀ ŋânə ambo mɨ̀ŋə̀.

²⁸Mbɨ kɨ ŋâ a ghobə nɨ saŋə nkòʼò njyə̂ a nɨ nèrə̀ lo pobə tsàarə̀ a tɨ̀pòŋə̀.

²⁹Ŋònə̀ nɨ à pənə nɨ mɨtugrə â zuʼù ànwùə̀ nɨ Àzhwùə̀ a zə nshwəŋə̀ ambo ɨ̀shwatə̀ pə̀.”