Read Pinyin Rèvə̀leshònə̀ 20 Bible Online

Rèvə̀leshònə̀ 20 - Pinyin bible

Rèvə̀leshònə̀ 20

¹Lenəla ndə̀ zəənə̀ angèrə̀ a furə̀ a nɨ̀pwuurə̀ mmə nshwuʼə̀, ntwuʼtə̀ a kyi nɨ̀ntaamə̀ tɨ ndẅùutə tsa ghobə mɨ̀tsaŋə̀ mɨ tɨ̀ŋnə̀ a àpô ze.

²À lə̀ kô a drǎgònə̀ wa nɨ à lə̀ pənə ndùnə̀ ɨ̀nyoorə̀ wa nɨ à pənə Devə̀lə̀ kə̀ Satàanə̀, nkorə̀ nnùŋə̀ aŋunə nguʼu nkaamə̀.

³Angèrə̀ wa à lə̀ màʼà e amwuə nɨ̀ntaamə̀ tɨ ndẅùutə tsa, ngwùʼnə̀ a tsèrə nkɨ nfɨ̀ŋnə̀ lo mbə̀ʼə a chi nfurə̀ nfɨ̀kə̀ pànə̀ pɨ àtwuə̀ ɨ̀shyə̂ tə mbyàa nkwùə̀ nɨ nguʼu za nkaamə̀ làŋə̀nə. Nguʼu nkaamə̀ zə̀ ghǎ làŋə̀ pɨ̂ fuukə̀ e mmyàʼtə̀ aŋunə mətùmə nkwùə̀.

⁴Ǹtyiʼə̀ ndzəənə̀ ɨləŋə nɨ̀fò, pànə̀ nɨ pɨ lə̀ nwuunə̀nə aŋunə lə̀ pə pànə̀ nɨ Nẅùə̀ à lə̀ ŋânə a ghobə nɨ mɨ̀tɨ̀ŋnə̀ a nɨ puʼtə̀. Ndə̀ kɨ nchi ndzəənə̀ ɨ̀zhwùə̀ pànə̀ nɨ pɨ lə̀ kwɨkə̀nə. Pɨ lə̀ zhwuutə̀ a ghobə ntiinə pobə lə̀ mənə nshwəŋnə̀ mbə̀ʼə Yěsû nkɨ mmə nshwəŋə̀ ànwùə̀ Nẅùə̀. Pɨ lə̀ kɨ nzhwuutə̀ a ghobə ntiinə ka pobə lə̀ səəkə̀ a ghobə a nyàamə̀ ghù ntsə̂nə wa kə̀ a tɨtoo e, ka kɨ kẅiirə̀ a ghobə àlènə̀ e aŋunə mɨ̀zènə kə̀ aŋunə mbô ɨ̀mobə. Pobə lə̀ zhwuumə̀ a nɨ̀wɨghə̀ tyiʼə̀ puʼtə̀ pobə pɨ Kristù aŋunə nguʼu nkaamə̀.

⁵Ka pɨ̀kwuə̀ pɨ̀tsùmə̀ lə̀ zhwuumə̀ a ghobə a nɨ̀wɨghə̀ tə mbyàa nkwùə̀ nɨ nguʼu za nkaamə̀ lə̀ làŋə̀nə. Lə̌ ntsàambyə̀ nkwùə̀ ambo pə̀ənə̀ a nɨ zhwuumə̀ a nɨ̀wɨghə̀.

⁶Mborə̀ ghobə nɨ̀laanə̀ chyə̂ ambo pànə̀ pa pyə̀ nɨ pobə pənə amwuə ntsàambyə̀ nɨ̀zhwuumə̀ a nɨ̀wɨghə̀. Ka nɨ̀wɨghə̀ nɨ à pənə amwuə Àzhwùə̀ a pə e nɨ ɨ̀tɨ̀ŋnə̀ ɨ̀tse àtwuə̀ pobə. Pobə ghǎ pə ngàŋə màʼà Nẅùə̀ pobə yɨ̀ Kristù kɨ puʼtə̀ àtwuə̀ ɨ̀shyə̂ pobə pɨ pobə aŋunə nguʼu nkaamə̀.

⁷Nkwùə̀ nɨ nguʼu nkaamə̀ zə̀ ghǎ myə̀, pɨ̌ pɨ fuukə̀ a Satàanə̀ a ndâ ɨ̀tsaŋə̀ ze.

⁸Nkwùə̀ nɨ à ghǎ furə̀ a ndâ ɨ̀tsaŋə̀ ghə, à ghǎ ghə̀ fɨ̀kə̀ pànə̀ pɨ ɨ̀laʼà ɨ̀tsùmə̀ nɨ pənə amwuə pɨ̀pàa pɨ mbyə̂ pə̀ nɨ̀kwàa. Pɨ̀pàa pɨ mbyə̀ pə̀ nɨ̀kwàa la Gog pobə Magog. Satàanə̀ à ghǎ shwatə̀ a ghobə lo pobə̂ chwuʼtə̀ mbɨ̀ŋmə̀ ndzòŋnə̀ ntsòo. Ndùnə̀ ghobə ghǎ pə tsaʼa waakə nɨ à pənə a mbwùnə mɨ nchyə ghu nɨŋnə̀nə.

⁹Pobə lə̀ sìimə̀ amwuə àtwuə̀ ɨ̀shyə̂, nkamnə̀ alyiʼə nɨ pànə̀ pɨ Nẅùə̀ pa nchyə̂, mbə mbòmpə àlaʼà e nɨ à kòŋə̀nə. La ɨ̀mǔ ɨ lə̀ furə̀ a nɨ̀pwuurə̀ nshwuʼə̀ ntòonə̀ a ghobə nɨ nkuŋə̀.

¹⁰Pɨ lə̀ màʼà a devə̀lə̀ nɨ à lə̀ mənə nfɨ̀kə̀ a ghobə amwuə àkɨɨnə̀ ɨ̀mǔ nɨ a lə̀ mənə ntòonə̀ ka mɨ̀zùŋə, a alyiʼə nɨ pɨ lə̀ màʼnə a nyàamə̀ ghù ntsə̂nə wa ghobə ngàŋə̀ ntwuumə̀ Nẅùə̀ pɨ̀chwìrə̀ wa; À ghǎ pə alyiʼə nɨ pobə ghǎ pə alyiʼə nɨ pobə ghǎ tyiʼə̀ zəənə̀ ngəʼə̀ nɨ ɨ̀twuʼə̀ ghobə njyə̂ nɨ nkuŋə̀ nɨ nkuŋə̀.

¹¹Ndə̀ chi ndzəənə̀ a ŋwùə̀ a ŋaanə̀ aŋunə maa maa aləŋə nɨ̀fò yè fuə. Àtwuə̀ ɨ̀shyə̂ ghobə nɨ̀pwuurə̀ myìirə̀ a mbyə̀ ze ka pɨ chi ndzəənə̀ e.

¹²Ndə̀ zəənə̀ pànə̀ nɨ pobə lə̀ kwɨkə̀ mə, nɨ pànə̀ pɨ̀ẅùunə pobə pɨ̀kɨ̂ pobə təəmə̀ a mbyə̀ aləŋə nɨ̀fò za. Ndə̀ zəənə̀ ɨ̀ŋwàʼnə̀ pa nɨ Nẅùə̀ à lə̀ ŋwàʼnə̀nə ngɨ̀rə̀ mɨ̀nwùə̀ ɨ̀zobə amwuə la pèrə pə pɨ̀nyaʼkə̀nə. Pɨ lə̀ kɨ nchi nyaʼkə̀ a yètse àŋwàʼnə̀ nɨ a pənə nɨ mɨ̀linə̀ mɨ pə̀ənə̀ nɨ pobə ghǎ pə pobə pɨ Nẅùə̀. Nẅùə̀ à ghǎ tsoʼtə̀ mɨ̀sàʼa mɨ pànə̀ nɨ pobə kwɨkə̀ mə zùŋə̀ pə mɨ̀nwùə̀ nɨ pobə lə̀ mənə ngɨ̀rə̀ tsaʼnə pɨ ŋwàʼnə̀nə amwuə ɨ̀ŋwàʼnə̀ pa la.

¹³Pànə̀ nɨ pobə lə̀ kwɨkə̀nə amwuə nchyə ghu nɨŋnə̀nə ghǎ lèrə̀ ambo Nẅùə̀ lo pɨ̂ saʼà mɨ̀sàʼa ɨ̀mobə. Pànə̀ nɨ pobə lə̀ kwɨkə̀nə nkɨ mbə amwuə àlaʼà pànə̀ nɨ pobə kwɨkə̀ mə ghǎ kɨ lèrə̀ ambo Nẅùə̀ lo â saʼà mɨ̀sàʼa ɨ̀mobə. Pɨ ghǎ tsoʼtə̀ mɨ̀sàʼa ɨ̀mobə zùŋə̀ mɨ̀nwùə̀ nɨ pobə lə̀ mənə ngɨ̀rə̀.

¹⁴Pɨ lə̀ màʼà a nɨ̀wɨghə̀ ghobə àlaʼà pànə̀ nɨ pobə kwɨkə̀ mə amwuə àkɨɨnə̀ ɨ̀mǔ. Àkɨɨnə̀ ɨ̀mǔ zə̀ a nɨ̀wɨghə̀ nɨ à pənə nɨ̀wɨghə̀ amwuə Àzhwùə̀.

¹⁵Ŋwùə̀ wa ntsùmə̀ nɨ ka pɨ̀ lə̀ zəənə̀ e nɨ̀linə̀ ɨ̀tse amwuə àŋwàʼnə̀ nɨ̀chyə̂mbyə̂ la, pɨ lə̀ màʼà e amwuə àkɨɨnə̀ ɨ̀mǔ.