Read Pinyin Rèvə̀leshònə̀ 21 Bible Online

Rèvə̀leshònə̀ 21 - Pinyin bible

Rèvə̀leshònə̀ 21

¹Ndə̀ tyiʼə̀ ndzəənə̀ nɨ̀pwuurə̀ tsɨ̀ shwuə̀ ghobə àtwuə̀ ɨ̀shyə̂ yè shwuə̀. Nɨ̀pwuurə̀ tsɨ̀ ntsàambyə̀ ghobə àtwuə̀ ɨ̀shyə̂ yè ntsàambyə̀ lə̀ myə̀ mə, ka nchyə ghu nɨŋnə̀nə kɨ mbirə̀ e.

²Ndə̀ zəənə̀ mbòmpə àlaʼà ngẅùunə yɨ̀ ndaanə̀nə nɨ ɨ̀ pənə Yèrusalèmə̀ yɨ̀ shwuə̀ tsaʼnə à furə̀nə a nɨ̀pwuurə̀ ambo Nẅùə̀. Nẅùə̀ à lə̀ tsùnkə̀ e tyìʼə̀ tsaʼnə pə̀ngyə̌ pa ntsùnkə̀ a ngɨ̀ɨnə̀ a kùʼnə̀ a nɨ zoʼò.

³Ndə̀ zuʼù ngyə̀ ntɨ̀ŋnə̀ ɨ̀ furə̀ aŋunə aləŋə nɨ̀fò za nshwəŋə̀ lo, “Alyiʼə nɨ Nẅùə̀ à wə̀ nchyə̂ a zə pobə pɨ pànə̀ pɨ mɨsoŋə tɨ̀tsòŋə̀! Ǎ chyə̂ pobə pɨ pobə, pobə̂ pə pə̀ənə̀ ɨ̀pe, Nẅùə̀ àtwuə̀ ɨ̀pɨ̀ŋmə̀ e â pə pobə pɨ pobə kɨ pə Nẅùə̀ ɨghobə.

⁴Ǎ zə̀ə nchyə ɨ̀myə̂ ɨ̀tsùmə̀ a ɨ̀myə̂ pobə. Ka nɨ̀wɨghə̀ a pə ghǎ chi pə e ghu kə̀ àsòmnə̀, kə̀ nɨ̀yìi, kə̀ àndzaŋə. A ghǎ pə a lenə ntiinə mɨ̀nwùə̀ mɨ̀lwùnə̀ ma làŋə̀ mə.”

⁵Lenəla ze wa nɨ à lə̀ nwuunə̀nə aŋunə aləŋə nɨ̀fò la à lə̀ shwəŋə̀ lo, “Ngwə̀ ngɨ̀rə̀ àzwuumə̀ àtsùmə̀ a tyiʼə̀ yè shwuə̀!” Nkɨ nchi nshwəŋə̀ lo, “Ŋwàʼnə̀ a zə̀ a ɨ̀shyə̂, ntiinə ɨ̀shwəŋnə̀ pə nɨ ngwə̀ nshwəŋə̀ lə a ɨ̀shwəŋnə̀ nɨ mbə̀ʼə pànə̀ nùŋə̀ mɨ̀ntɨŋmə̀ ɨ̀mobə aŋunə, nkɨ mbə ɨ̀shwəŋnə̀ nkǔŋə nkuŋə.”

⁶A chi nshwəŋə̀ ambo mɨ̀ŋə̀ lo, “A ghɨ̀rə̀ mə! Ǹchyə̂ mbə Alfàa nkɨ mbə Omegà; ǹchyə̂ mbə mbìʼnə nkɨ mbə ndẅùutə. Ŋònə̀ wa ntsùmə̀ nɨ njyə̀ nchyə ɨ̀ zaŋə̀nə e la mbɨ ŋâ e nɨ nchyə wa nɨ ɨ wa nfurə̀ amwuə nɨ̀mwurə̀ ɨ̀shyə̂ wa nɨ ŋwùə̀ à wa nnô ẅèrə mbə nɨ nɨ̀chyə̂mbyə̂ la. Mbɨ ŋâ e nɨ nchyə ghu la tɨghu à twuə̀ nkabə̀ ɨ̀tse.

⁷Mbɨ ŋâ a ŋònə̀ wa nɨ à zòŋnə̀nə ngəʼə̀ ntsàarə̀ nɨ ɨ̀pwuumə̀ pə̀ ɨ̀tsùmə̀: Mbɨ pə Nẅùə̀ e, â kɨ mbə moonə̀ mə̀.

⁸La ngə̀ aŋunə ngàŋə àkẅàrə̀, nɨ pànə̀ nɨ ka pobə pyiimə̀ a ghobə a Nẅùə̀, nɨ pànə̀ nɨ pobə pa ngɨ̀rə̀ mɨ̀nwùə̀ mɨ ntsɨ̀ŋnə, nɨ pànə̀ nɨ pobə pa nzhwuutə̀, nɨ pànə̀ nɨ pobə pa ngɨ̀rə̀ a məghàbə̀, nɨ ngàŋə mɨ̀kàŋə̀, nɨ pànə̀ nɨ pobə pa nsəəkə̀ pɨ̀tɨtoo pobə ngàŋə pɨ̀chwìrə̀ ɨ̀tsùmə̀, àzobə alyiʼə ghǎ pə la àkɨɨnə̀ ɨ̀mǔ za nɨ a za ntòonə̀ ka mɨ̀zùŋə la. Nɨ̀wɨghə̀ wə̀ à chyə̂ mbə la nɨ̀wɨghə̀ amwuə Àzhwùə̀.”

⁹Taʼà angèrə̀ wa ɨ̀tse amwuə pəngèrə̀ pa sàmbaa nɨ pɨ lə̀ twuʼtə̀nə ɨ̀kaŋə̀ ndẅùə̀ndzùmə̀ ngəʼə̀ pa sàmbaa a tô nshwəŋə̀ ambo mɨ̀ŋə̀ lo, “Tô n̂nèrə̀ o nɨ ngɨ̀ɨnə̀ nɨ à pənə ngẅùə Mômbyə̂ Ndzìrə̀ wa.”

¹⁰Àzhwùə̀ Nẅùə̀ a lə̀ chi nshwuʼə̀ aŋunə mɨ̀ŋə̀, angèrə̀ wa a lòo mə̀ nkoʼò ndèrə̀ àtwuə̀ tə̀sàa mbarə̀. À lə̀ nèrə̀ mə̀ nɨ Yèrusalèmə̀ nɨ à pənə mbòmpə àlaʼà yɨ̀ ngẅùunə yɨ̀ ndaanə̀nə a furə̀ a nɨ̀pwuurə̀ ambo Nẅùə̀ mmə nshwuʼə̀ a ɨ̀shyə̂.

¹¹À lə̀ mə ntsìinə̀ nɨ Àghuʼtə̀ Nẅùə̀. Mbòmpə àlaʼà ngẅùunə za ɨ̀ lə̀ mə ntsìinə̀ tsaʼa nɨ̀ghòorə tsɨ̀ tsə̂nə, mmə ntsìinə̀ tsaʼa jaspà, nkɨ mmə ntsìinə̀ tsaʼa glasə̀.

¹²Nkaʼà nɨ ɨ lə̀ faŋə̀nə nkɨ nsàa àtɨ̀ghə ɨ lə̀ kamnə̀ mbòmpə àlaʼà ngẅùunə za. Ɨ lə̀ pə nɨ mɨ̀ntswùə̀ mɨ nkaʼà ntsòbə̀ ɨpaa, pəngèrə̀ ntsòbə̀ ɨpaa kɨ mmə mbyabə̀ mɨ̀ntswùə̀ mɨ nkaʼà mèrə mə. Pɨ lə̀ ŋwàʼnə̀ mɨ̀linə̀ mɨ ngẅàrə̀ ndâ ɨ̀poonə̀ pɨ Israel pa ntsòbə̀ ɨpaa aŋunə mɨ̀ntswùə̀ mɨ nkaʼà mèrə mə.

¹³Nkaʼà ghu ɨ lə̀ pə pɨ̀pàa nɨ̀kwàa. Mɨ̀ntswùə̀ mɨ nkaʼà lə̀ pə a pàa nsaʼà nẅùumə̀ mɨntarə, mbə a pàa ngẅènə̀ nẅùumə̀ mɨntarə, mbə a pàa mɨ̀kòʼnə mɨntarə, nkɨ mbə a pàa mɨ̀tùŋə mɨntarə.

¹⁴Pɨ lə̀ korə̀ nkaʼà wə̀ àtwuə̀ mɨ̀ghòorə mɨ̀ẅùunə ntsòbə̀ ɨpaa. Pɨ lə̀ kɨ ŋŋwàʼnə̀ mɨ̀linə̀ mɨ ngàŋə ntwuumə̀ mômbyə̂ nɨ̀shwàʼà wa ntsòbə̀ ɨpaa aŋunə.

¹⁵Angèrə̀ wa nɨ à lə̀ shwəŋə̀nə mɨ̀nwùə̀ mə mɨ̀tsùmə̀ ambo mɨ̀ŋə̀ la à lə̀ twuʼtə̀ àtɨ̀ghə nɨ pɨ tsùŋə̀nə nɨ goldə̀, mmə ndòo a zèrə mmɨ̀nkə̀ mbòmpə àlaʼà ngẅùunə za ghu ghobə mɨ̀ntswùə̀ mɨ nkaʼà ɨ̀me ghobə ɨ̀sǎ nkaʼà ɨ̀pe.

¹⁶Mbòmpə àlaʼà zə ɨ̀ lə̀ pə nɨ ɨ̀sǎ nɨ̀kwàa nɨ lə̀ pənə ndəŋə ndəŋə aŋunə nɨ̀sàa a ɨ̀shyə̂ ghobə nɨ̀faŋə̀. Angèrə̀ wa à lə̀ lòo àtɨ̀ghə za a nɨ mɨ̀nkə̀ mbòmpə àlaʼà za. Ɨ̀ lə̀ pə pɨ̀kìlometà nkaamə̀ ɨpaa nɨ nkɨrə nɨ̀kwàa. Nɨ̀sàa e nkoʼò àtɨ̀ghə nɨ nɨ̀faŋə̀ e ghobə nɨ̀sàa e a ɨ̀shyə̂ a kɨ mbə ndəŋə ndəŋə.

¹⁷Angèrə̀ wa à lə̀ kɨ mmɨ̀nkə̀ nɨ̀sàa nkoʼò àtɨ̀ghə nkaʼà mbòmpə àlaʼà za a pə pɨ̀metà mɨ̀ghumə̀ ntuurə̀ ntsòbə̀ ntuurə̀ a nɨ zùŋə̀ tsaʼnə pànə̀ pa mmɨ̀nkə̀ ɨ̀pwuumə̀.

¹⁸Pɨ lə̀ korə̀ nkaʼà wa nɨ jaspà, ntyiʼə̀ nkorə̀ mbòmpə àlaʼà ghu nɨ goldə̀ nɨ à laanə̀nə nkɨ mmə ntsìinə̀ tsaʼa glasə̀ yɨ̀ fuə.

¹⁹Pɨ lə̀ lòo mbuurə̀ mɨ̀ghòorə mɨ tsə̂nə ntsùmə̀ ndòo nkorə̀ àtsirə̀ nkaʼà mbòmpə àlaʼà ngẅùunə ghu ghu. Ntsàambyə̀ nɨ̀ghòorə à lə̀ pə jaspà, chyə̀ nɨ nɨ paatə̀nə pə safayà, nòmbàa pɨtarə a pə agètə̀, nòmbàa nɨ̀kwàa a pə emeràdə̀,

²⁰nòmbàa pɨtaanə̀ a pə onix, nòmbàa ntuurə̀ a pə kànelyànə̀, nòmbàa sàmbaa a pə chrysolite, nòmbàa nɨ̀fàamə̂ a pə beryl, nòmbàa nɨ̀pwùʼə a pə topàzə̀, nòmbàa nɨ̀ghumə̀ a pə Krisoprèsə̀, nòmbàa ntsòbə̀ moʼo a pə jasìntə̀, nòmbàa ntsòbə̀ ɨpaa a pə ametìstə̀.

²¹Mɨ̀ntswùə̀ mɨ nkaʼà mɨ̀ghu ntsòbə̀ ɨpaa lə̀ pə ɨ̀tuʼù ntsòbə̀ ɨpaa. Taʼà ntswùə̀ nkaʼà a pə taʼà àtuʼù. Àlàŋə yè ẅùunə a lə̀ tomnə̀ amwuə mbòmpə àlaʼà zə̀ nɨ pɨ tsùŋə̀nə nɨ goldə̀ nɨ à lə̀ mənə ntsìinə̀ tsaʼa glasə̀.

²²Ka ndə̀ zəənə̀ mə̀ Ndâ Mɨ̀shwàʼà Nẅùə̀ amwuə mbòmpə àlaʼà ngẅùunə zə̀ ntiinə Ndòʼnə̀mbyə̂ Nẅùə̀ Àkoʼntsirə̀ pobə Mômbyə̂ Ndzìrə̀ Nẅùə̀ wa chyə̂ mbə la tsaʼa Ndâ Mɨ̀shwàʼà Nẅùə̀ zə̀.

²³Ka mbòmpə àlaʼà za ɨ̀ chi ntàʼà e a nẅùumə̀ kə̀ məŋwɨgrə̀ lo a kyàʼà e ntiinə nɨ̀tsìinə̀ Nẅùə̀ à wə̀ nkyàʼà e tyìʼə̀ tsaʼnə Mômbyə̂ Ndzìrə̀ Nẅùə̀ wa à wə̀ nkɨ mmə nkyàʼà e tsaʼa làamə̀

²⁴Pànə̀ pɨ àtwuə̀ ɨ̀shyə̂ ghǎ chyə̂ aŋunə nkàʼà e wə̀, pɨ̀fò pɨ àtwuə̀ ɨ̀shyə̂ àtsùmə̀ kɨ ndòo ɨ̀pwuumə̀ nkabə̀ ɨ̀pobə ntô nɨ pèrə amwuə mbòmpə àlaʼà zə̀.

²⁵Ka pɨ pə ghǎ wùʼnə̀ e mɨ̀ntswùə̀ mɨ nkaʼà mə ntsòbə̀ ɨpaa nkwùə̀ ɨ̀tse, ntiinə ka ɨ̀twuʼə̀ ɨ pə ghǎ pə e ghu.

²⁶Pɨ ghǎ lòo ɨ̀pwuumə̀ pɨ̀shìʼnə̀ ghobə ɨ̀pwuumə̀ nkabə̀ pànə̀ pɨ àtwuə̀ ɨ̀shyə̂ tô amwuə mbòmpə àlaʼà ngẅùunə zə̀.

²⁷Ka àzwuumə̀ ntsɨ̀ŋnə àtse a pə ghǎ kwuunə̀ e amwuə, kə̀ ŋònə̀ nɨ à wa ngɨ̀rə̀ ɨ̀nwùə̀ ntsɨ̀ŋnə kə̀ ngàŋə̀ pɨ̀chwìrə̀. À ghǎ kwuunə̀ e tyìʼə̀ pànə̀ pa nɨ pɨ ŋwàʼnə̀nə mɨ̀linə̀ ɨ̀mobə amwuə àŋwàʼnə̀ nɨ̀chyə̂mbyə̂ Mômbyə̂ Ndzìrə̀ Nẅùə̀ wa.