Read Pinyin Rèvə̀leshònə̀ 22 Bible Online

Rèvə̀leshònə̀ 22 - Pinyin bible

Rèvə̀leshònə̀ 22

¹Angèrə̀ wa à lə̀ kɨ nnèrə̀ mə̀ nɨ ndòorə̀ nchyə wa nɨ nchyə e ɨ wa ŋŋâ a nɨ̀chyə̂mbyə̂, ɨ laanə̀ ntsìinə̀ tsaʼa glasə̀. Ndòorə̀ nchyə wa lə̀ furə̀ aŋunə aləŋə nɨ̀fò Nẅùə̀ pobə yè Mômbyə̂ Ndzìrə̀ Nẅùə̀ wa,

²nkuŋnə̀ nshwuʼə̀ a tɨ̀tɨ̀rə̀ àlàŋə yè ẅùunə a mbòmpə àlaʼà ngẅùunə gha. Mɨ̀tɨ̀ghə nɨ mɨ̀ntàamə ɨ̀me ma ngɨ̀rə̀ lo pànə̀ pə nɨ nɨ̀chyə̂mbyə̂ lə̀ pə a mbwùnə mɨ nchyə gha pɨ̀pàa pɨ̀tsùmə̀. Mɨ̀tɨ̀ghə mɨ̀ghu lə̀ mə ndzumə̀ mbuurə̀ mɨ̀ntàamə mɨ àtɨ̀ghə ntsòbə̀ ɨpaa aŋunə ŋwɨgrə̀. Mɨfuə mɨ mɨ̀tɨ̀ghə zə̀ lə̀ pə afuə a nɨ parə̀ pànə̀ pɨ àtwuə̀ ɨ̀shyə̂.

³Ka àzwuumə̀ àtse nɨ Nẅùə̀ à chyânə ndòonə̀ aŋunə a pə ghǎ pə e amwuə mbòmpə àlaʼà ghu, la aləŋə nɨ̀fò Nẅùə̀ ghobə yè Mômbyə̂ Ndzìrə̀ Nẅùə̀ wa a ghǎ təəmə̀ amwuə, ngàŋə àfàʼà Nẅùə̀ mə səəkə̀ e.

⁴Pobə ghǎ zəənə̀ ɨ̀sɨghə̀ Nẅùə̀, nɨ̀linə̀ ɨ̀tse kɨ mbə aŋunə mɨ̀zènə ɨ̀mobə.

⁵Ka ɨ̀twuʼə̀ ɨ̀ pə ghǎ pə e ghu, pobə̂ kɨ nchi ntàʼà a ghobə a làamə̀ kə̀ nẅùumə̀ lo â kyàʼà a ghobə apə̀, ntiinə Ndòʼnə̀mbyə̂ Nẅùə̀ la nkàʼà ɨ̀ghobə, lenəla pobə̂ puʼtə̀ nɨ nkuŋə̀ nɨ nkuŋə̀.

⁶Angèrə̀ wa à lə̀ shwəŋə̀ ambo mɨ̀ŋə̀ lo, “Zhyə̂ lo ɨ̀shwəŋnə̀ pə̀ nɨ ngwə̀ nshwəŋə̀ ambo ghò lə a nkǔŋə nkuŋə, nkɨ mbə ɨ̀shwəŋnə̀ nɨ mbə̀ʼə wə̀ nùŋə̀ ntɨŋmə̀ aŋunə. Ndòʼnə̀mbyə̂ Nẅùə̀ wa nɨ à wa ŋŋâ Àzhwùə̀ e ambo ngàŋə ntwuumə̀ ɨ̀ze lo pobə̂ chwìitə̀ ntwuumə̀ e la à twuumə̀ angèrə̀ e lo â nèrə̀ mɨ̀nwùə̀ nɨ mèrə faʼa furə̀ ambo ngàŋə àfàʼà ɨ̀ze.”

⁷Yěsû a shwəŋə̀ lo, “Nɨ̀ zəənə̀, nkwùə̀ ɨpaa ǹtô! Mborə̀ ɨ̀ chyə̂ ambo ŋònə̀ nɨ à nùŋə̀nə mɨ̀nwùə̀ nɨ pɨ ŋwàʼnə̀nə amwuə àŋwàʼnə̀ zə̀. Mɨ̀nwùə̀ mə ghǎ lòo alyiʼə la amwuə nkwùə̀ nɨ ɨ̌ pòŋə̀ tô.”

⁸Mɨ̀ŋə̀ Jònə, ndə̀ zuʼù nkɨ ndzəənə̀ mɨ̀nwùə̀ mèrə mə. Nkwùə̀ nɨ ndə̀ zuʼnə nkɨ ndzəənə̀ mɨ̀nwùə̀ mèrə mə la, ndə̀ kunə̀ a mbyə̀ angèrə̀ wa nɨ à lə̀ nèrə̀nə mə̀ nɨ mɨ̀nwùə̀ mə àkùbəkubə̀ lo səəkə̀ e.

⁹La a shwəŋə̀ ambo mɨ̀ŋə̀ lo, “Kò wə̀ ghɨ̀rə̀ a lenə. Ǹkɨ mbə àzâ la ngàŋə̀ àfàʼà Nẅùə̀ tsaʼa ghò nɨ pɨlyimə ɨ̀pô a ndzùmə̀ Kristù pa nɨ pobə pənə ngàŋə ntwuumə̀ Nẅùə̀ la pobə pànə̀ pa nɨ pobə pa nnùŋə̀ ànwùə̀ za nɨ àŋwàʼnə̀ zə̀ a za nshwəŋə̀ la. Səəkə̀ pə a Nẅùə̀!”

¹⁰A chi nshwəŋə̀ ambo mɨ̀ŋə̀ lo, “Kò wə̀ lə̀əmə̀ o pə̀ənə̀ nɨ mɨ̀nwùə̀ nɨ mɨ ghǎ lòo alyiʼə nɨ pɨ ŋwàʼnə̀nə amwuə àŋwàʼnə̀ zə, ntiinə nkwùə̀ nɨ mɨ̀nwùə̀ mèrə mə ghǎ furə̀ ɨ̀ paatə̀;

¹¹Ŋònə̀ nɨ à wa ngɨ̀rə̀ a tɨ̀pòŋə̀ â làŋə̀ nɨ mbyə̀ ntə ngɨ̀rə̀ mɨ̀nwùə̀ mɨ tɨ̀pòŋə̀ ɨ̀me. Ŋònə̀ nɨ à wa ngɨ̀rə̀ mɨ̀nwùə̀ mɨ ntsɨ̀ŋnə la â làŋə̀ nɨ mbyə̀ ntə ngɨ̀rə̀ mɨ̀nwùə̀ mɨ ntsɨ̀ŋnə ɨ̀me, ŋònə̀ nɨ à wa ngɨ̀rə̀ mɨ̀nwùə̀ mɨ təəmə̀nə la â làŋə̀ nɨ mbyə̀ ntə ngɨ̀rə̀ mɨ̀nwùə̀ mɨ təəmə̀nə ɨ̀me, ŋònə̀ nɨ à laanə̀nə la â laanə̀ ndèrə̀ nɨ mbyə̀.”

¹²Yěsû a shwəŋə̀ ambo mɨ̀ŋə̀ lo, “Nɨ̀ zəənə̀ mbɨ faʼa tô, ngwə̀ ntwuʼtə̀ mɨ̀ntsoʼnə̀ mɨ àfàʼà mɨ ŋwùə̀ ntsùmə̀, mbɨ kɨ tsoʼò àfàʼà ŋònə̀ la tsaʼnə à fàʼnə.

¹³Ǹchi mbə Alfàa nkɨ mbə Omegà, mbə Ntsàambyə̀ nkɨ mbə Ndẅùə̀ndzùmə̀, mbə Nɨ̀pìʼnə̀nə nkɨ mbə Ndẅùutə.

¹⁴Mborə̀ ɨ̀ chyə̂ ambo pànə̀ pa nɨ pobə sùu mə ɨtsəʼə ɨ̀pobə pɨ̀sàa, lenəla pobə̂ tyiʼə̀ mbə nɨ ɨ̀tɨ̀ŋnə̀ a nɨ làŋə̀ amwuə mɨ̀ntswùə̀ mɨ nkaʼà nkwuunə̀ amwuə mbòmpə àlaʼà ngẅùunə za, njiilo pobə zɨghə̀ mɨ̀ntàamə mɨ àtɨ̀ghə ma nɨ mèrə ma ŋŋâ a nɨ̀chyə̂mbyə̂ la.

¹⁵La pànə̀ nɨ pobə ghǎ ghoŋə̀ a àpyìinə à ghǎ pə pànə̀ nɨ pobə pa ngɨ̀rə̀ mɨ̀nwùə̀ mɨ ntsɨ̀ŋnə, pobə ngàŋə nɨ̀kàŋə̀, pobə pànə̀ nɨ pobə pa ngɨ̀rə̀ a məghàbə̀, pobə pànə̀ nɨ pobə pa nzhwuutə̀, pobə pànə̀ nɨ pobə pa nguʼtə̀ pɨ̀tɨtoo, pobə pànə̀ nɨ pobə pa nkòŋə̀ a nɨ nyìi a chwìrə̀ nkɨ mmə nnyìi chwìrə̀.

¹⁶Mɨ̀ŋə̀, Yěsû, ǹtsàa mə angèrə̀ mə̀ lo â tô nshwəŋə̀ mɨ̀nwùə̀ mə amwuə ɨ̀shwatə̀ ɨ̀pɨghə. Nɨ̀ zhyə̂ lo mɨ̀ŋə̌ ŋwùə̀ ngẅàrə̀ ɨ̀fò Dàfirə̀, ǹkɨ mbə saŋə nɨ à wa ntâ a nkòʼò njyə̂.”

¹⁷Àzhwùə̀ Nẅùə̀ pobə ngɨ̀ɨnə̀ pə̀ nshwəŋə̀ lo, “Tô!” Ŋònə̀ wa ntsùmə̀ nɨ à wa ndzuʼù ànwùə̀ zə̀ â kɨ nshwəŋə̀ lo, “Tô!” Ŋònə̀ wa ntsùmə̀ nɨ njyə̀ nchyə ɨ̀ zaŋə̀nə e â tô nnô nchyə wa nɨ ɨ wa ŋŋâ a nɨ̀chyə̂mbyə̂ àfǐfǐ.

¹⁸Ngwə̀ nkwàtə̀ a ŋwùə̀ ntsùmə̀ wa nɨ à wa ndzuʼù mɨ̀nwùə̀ nɨ pɨ ŋwàʼnə̀nə amwuə àŋwàʼnə̀ zə̀ mbə mɨ̀nwùə̀ mɨ ghǎ tô. Ŋònə̀ ɨ̀tse à tə mbəla nkẅìʼnə̀ ànwùə̀ àtse amwuə àŋwàʼnə̀ zə̀, yi Nẅùə̌ kɨ kẅìʼnə̀ mɨ̀ngəʼə̀ mɨ̀tɨ̀ŋnə̀ aŋunə ze tsaʼa myə̀ nɨ pɨ ŋwàʼnə̀nə amwuə àŋwàʼnə̀ zə̀ la.

¹⁹Kə̀ ŋwùə̀ à tə fuukə̀ àshwəŋnə̀ àtse aŋunə mɨ̀nwùə̀ nɨ mɨ pənə amwuə àŋwàʼnə̀ zə̀ mbə̀ʼə mɨ̀nwùə̀ nɨ mɨ ghǎ lòo alyiʼə, yi Nẅùə̌ kɨ kẅiirə̀ àze alyiʼə mɨ̀ntàamə mɨ àtɨ̀ghə nɨ mɨ furə̀nə aŋunə àtɨ̀ghə nɨ̀chyə̂mbyə̂ za. Nẅùə̌ kɨ fuukə̀ àze alyiʼə amwuə mbòmpə àlaʼà ngẅùunə yɨ̀ ndaanə̀nə za. Pɨ ŋwàʼnə̀ ɨ̀nwùə̀ pèrə pə amwuə àŋwàʼnə̀ zə̀.

²⁰Ze wa nɨ à zəənə̀nə mɨ̀nwùə̀ mə mɨ̀tsùmə̀ à wə̀ nshwəŋə̀ lo, “A lenə, mbɨ fàʼà tô.” Amen. Tô, Ndòʼnə̀mbyə̂ Yěsû.

²¹Àpòŋə̀ ntɨŋmə̀ Ndòʼnə̀mbyə̂ Yěsû Kristù â pə aŋunə pànə̀ pɨ Nẅùə̀ pɨ̀tsùmə̀. Amen.