Read Pinyin Rèvə̀leshònə̀ 3 Bible Online

Rèvə̀leshònə̀ 3 - Pinyin bible

Rèvə̀leshònə̀ 3

¹Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù a Sadìsə̀ lo, lə̌ ntwuumə̀ nɨ ɨ furə̀nə ambo mɨ̀ŋə̀ wa nɨ ngwə̀ ntwuʼtə̀ Ɨ̀zhwùə̀ Nẅùə̀ sàmbaa nɨ pɨsaŋə sàmbaa. Ǹzhyə̂ àfàʼà nɨ nɨ̀ wa nfàʼà; nɨ̀ wə̀ mbyiimə̀ pànə̀ nɨ pɨ pə nchyə̂ la ntyiʼə̀ a wɨghə ɨ̀kwuə̀ pə̀ənə̀.

²Nɨ̀ zhwèmnə̀ aŋunə pɨlô ndàŋə̀ nɨ mbyə̀ a nɨ fàʼà àfàʼà mə̀ ɨ̀shìʼnə̀ njiilo kò zèrə a təəmə̀ e, ntiinə ǹdzəənə̀ lo mɨ̀nwùə̀ nɨ nɨ̀ ghɨ̀rə̀ mə mɨ pirə̀ e tɨ təəmə̀ ɨ̀shìʼnə̀ a mbyə̀ Nẅùə̀ mə̀.

³Nɨ̀ tyiʼə̀ nkẅempə̀ ànwùə̀ nɨ pɨ lə̀ nèrə̀nə ambo pɨghə farə a zhyə̀ nɨ nɨ̀ lə̀ zuʼnə̀; nɨ̀ ẅìimə̀ a zèrə mbə̀ŋə̀ mɨ̀ntɨŋmə̀ ɨ̀mɨghə aŋunə tɨ̀pòŋə̀ ɨwɨghə. Nɨ̀ tə ngoŋə̀ a wɨghə tɨ zhwèmnə̀ aŋunə pɨlô, ǹtô ambo pɨghə tsaʼa ɨ̀ndzə̀ərə̀ tɨghu nɨ̀ zhyə̂ nkwùə̀.

⁴“A patə mbə pə lə la, ndùnə̀ pànə̀ pɨ̀kɨ̂ pɨ̀tse a Sadìsə̀ sùu mə ɨtsəʼə ɨ̀pobə laanə̀. Pobə̌ pə pəə pɨ pobə ẅî ɨtsəʼə pɨ fuə ntiinə pobə kùʼnə̀.

⁵Ŋònə̀ wa ntsùmə̀ nɨ à tsàarə̀nə a tɨ̀pòŋə̀ à ghǎ kɨ ẅî ɨtsəʼə pɨ̀fuə tyìʼə̀ tsaʼa ɨ̀pobə aŋunə ze, n̂kɨ mbyaatə̀ mə̀ nɨ̀linə̀ ɨ̀tse amwuə àŋwàʼnə̀ nɨ̀chyə̂mbyə̂ apə̀. Ngǎ shwəŋə̀ a mbyə̀ Tǎ ɨwəə pobə pəngèrə̀ ɨ̀pe lo pobə̌ pə̀ənə̀ ɨ̀pâ.

⁶“Ŋònə̀ nɨ à pənə nɨ mɨtugrə â zuʼù ànwùə̀ nɨ Àzhwùə̀ a zə̀ nshwəŋə̀ ambo ɨ̀shwatə̀ ɨ̀poonə̀ pɨ Kristù pə̀!”

⁷Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo àshwatə̀ ɨ̀poonə̀ pɨ Kristù a Fìlàdefyà lo, Lə̌ ntwuumə̀ wa nɨ ɨ furə̀nə ambo ze wa nɨ à laanə̀nə nkɨ mbə nkǔŋə nkuŋə. À wa nɨ ɨ̀tɨ̀ŋnə̀ a nɨ puʼtə̀ tyìʼə̀ tsaʼnə Dàfirə̀ à lə̀ mənə mbuʼtə̀. À tə pəla nkòo, ŋwùə̀ a fɨ̀ŋnə̀ e apə̀, nkɨ nfɨ̀ŋnə̀, ŋwùə̀ a kòo e apə̀.

⁸Ǹzhyə̂ ɨ̀fàʼà ɨ̀pɨghə. Nɨ̀ naŋə̀! Ǹyaʼkə̀ mə ntswùə̀ ndâ nɨ ɨ pənə a mbyə̀ pɨghə ntə̂ ghù ghɨɨrə̀ ambo pɨghə nɨ mbə̀ʼə ka ŋònə̀ nyàanə a fɨ̀ŋnə̀ e a ẅèrə. Ǹzhyə̂ lo ɨ̀tɨ̀ŋnə̀ ɨ̀wɨghə ɨ kɨ̂, la nɨ̀ zùŋə̀ àshwəŋnə̀ mə̀ ka kɨ mə shwəŋə̀ a wɨghə lo ka nɨ̀ zhyə̂ a wɨghə a gha.

⁹Nɨ zhwiʼtə̀! Pànə̀ pa nɨ pobə pənə amwuə ndâ àshwatə̀ Satàanə̀ mmə nfuŋə̀ mbɨ̀ŋmə̀ ɨ̀zobə nɨ pɨ̀Jew la ka pə a ghobə pèrə la ngàŋə pɨ̀chwìrə̀. Mbɨ ghɨ̀rə̀ pobə̂ tô ambo pɨghə nkunə̀ a mɨ̀kwùə̀ pɨghə. Mbɨ kɨ ghɨ̀rə̀ pobə̂ zhyə̂ lo ǹkòŋə̀ a wɨghə.

¹⁰Tsaʼnə nɨ̀ zùŋə̀nə àshwəŋnə̀ mə̀ a nɨ ẅìimə̀ ntɨŋmə̀ mbyiimə̀ ngəʼə̀ la, mbɨ pyabə̀ a wɨghə aŋunə ngəʼə̀ nɨ ɨ̌ tô a nɨ kwàʼnə̀ pànə̀ pɨ̀tsùmə̀ nɨ pənə a àtwuə̀ ɨ̀shyə̂ ghə.

¹¹Mbɨ zàŋə̀ tô. Nɨ̀ nùŋə̀ ntɨŋmə̀ ɨ̀wɨghə aŋunə mɨ̀ŋə̀ mbə̀ʼə ŋònə̀ ɨ̀tse a kaŋə kẅiirə̀ àtsoʼò àfàʼà àzɨghə.

¹²Ŋònə̀ nɨ à tsàarə̀nə a tɨ̀pòŋə̀, mbɨ lòo e ghɨ̀rə̀ ntoomə̀ ghu amwuə Ndâ Mɨ̀shwàʼà Nẅùə̀ mə̀, a pə ghu ndaʼa nfurə̀ e apə̀. Mbɨ ŋwàʼnə̀ nɨ̀linə̀ nɨ Nẅùə̀ mə̀ pobə nɨ̀linə̀ nɨ mbòmpə àlaʼà ngẅùunə Nẅùə̀ mə̀ aŋunə ze; a pə Yèrusalèmə̀ ghù shwuə̀ nɨ à furə̀nə a nɨ̀pwuurə̀ ambo Nẅùə̀ mə̀ nshwuʼə̀. Mbɨ kɨ ŋwàʼnə̀ nɨ̀linə̀ ɨ̀tsâ tsɨ̀ shwuə̀ aŋunə ze.

¹³“Ŋònə̀ wa nɨ à pənə nɨ mɨtugrə â zuʼù ànwùə̀ nɨ Àzhwùə̀ a zə̀ nshwəŋə̀ ambo ɨ̀shwatə̀ ɨ̀poonə̀ pɨ Kristù pə̀!”

¹⁴Ẅùə̀ wa nɨ à shwuə̀nə a ŋwùə̀ mɨsoŋə la a chi nshwəŋə̀ ambo mɨ̀ŋə̀ lo, “Ŋwàʼnə̀ ambo angèrə̀ àshwatə̀ ɨ̀poonə̀ pɨ Kristù a Laodicea lo, Lə̌ ntwuumə̀ nɨ ɨ furə̀nə ambo ze wa nɨ à pənə Amen, mbə ze wa nɨ à wa nfàʼà ànwùə̀ àtsùmə̀ nɨ Nẅùə̀ à tàʼnə lo â fàʼà nkɨ mbə nkǔŋə nkuŋə ndzəənə̀ zəənə̀nə, mbə ze wa nɨ Nẅùə̀ à lə̀ làŋə̀nə a ndzùmə̀ ze a nɨ furə̀ a nɨ̀pìʼnə̀nə ntsùŋə̀ àzwuumə̀ àtsùmə̀.

¹⁵Ǹzhyə̂ àfàʼà nɨ nɨ̀ wə̀ nfàʼà. Ǹzhyə̂ lo ka nɨ̀ mə nfî a wɨghə kə̀ ka kɨ mə lwùumə̀ a wɨghə! A tô mbòŋə̀ lo nɨ̀ lwùumə̀ kə̀ nfî.

¹⁶Tsaʼnə nɨ̀ wə̀ mbopə̀ popə̀nə la, ka mə lwùumə̀ a wɨghə kə̀ ka kɨ mə fî a wɨghə la, mbɨ tẅùə̀ a wɨghə fuukə̀ a ntswùə̀ mɨ̀ŋə̀.

¹⁷Nɨ̀ wə̀ nshwəŋə̀ lo mɨ̀ŋə̌ ngàŋə̀ nkabə̀, mbə nɨ àzwuumə̀ àtsùmə̀ ka puŋə̀ mə̀ àzwuumə̀ àtse. La ka zhyə̂ a wɨghə lo pɨghə̌ ɨ̀fǐfǐ ɨ̀pwuumə̀, mbə ngàŋə mɨ̀liŋə̀, mbə ngàŋə àfumə̀, mbə pɨ̀fə̀, nkɨ mbə ntǔmnə̀.

¹⁸Ngwə̀ ntəətə̀ a wɨghə lo nɨ̀ zwuunə̀ a goldə̀ nɨ pɨ tòonə̀ mə amwuə ɨ̀mǔ nsùu ambo mɨ̀ŋə̀ mbə̀ʼə pə pɨ̀ghàŋə pɨ nkabə̀. Nɨ̀ kɨ ndzwuunə̀ ɨtsəʼə pɨ̀fuə ngẅî mbə̀ʼə kẅupə̀ ɨ̀sɨŋnə̀ nɨ ntǔmnə̀ ɨ̀wɨghə ɨ̌ lòo tô. Nɨ̀ zwuunə̀ farə mɨ̀ghurə̀ nchyâ amwuə ɨ̀myə̂ ɨ̀mɨghə mə mbə̀ʼə zəənə̀ ɨlyiʼə.

¹⁹Ngwa nsaʼà nkɨ nchyâ ngəʼə̀ aŋunə pànə̀ pa nɨ ǹkòŋə̀nə. Njiilo nɨ̀ pə nɨ ntɨŋmə̀ nkẅebə̀ aŋunə tɨ̀pòŋə̀ ɨwɨghə.

²⁰Naŋə̀! ngwə̀ ntəəmə̀ a ntswùə̀ ndâ ntsòotə̀; ŋònə̀ ɨ̀tse à tə zuʼù ngyə̀ mə̀ ngẅùʼə̀, ǹkwuunə̀ ndzɨghə̀ pəə ze, a kɨ ndzɨghə̀ pəə ze.

²¹Ŋònə̀ nɨ à tsàarə̀nə a tɨ̀pòŋə̀, mbɨ ŋâ e nɨ ɨ̀sàanə̀ â nwuunə̀ pəə ze aŋunə aləŋə nɨ̀fò mə̀ tyìʼə̀ tsaʼnə ndə̀ kɨnə ntsàarə̀ a tɨ̀pòŋə̀ nnwuunə̀ pəə Tǎ ɨwəə aŋunə aləŋə nɨ̀fò e.

²²“Ŋònə̀ nɨ à pənə nɨ̀ mɨtugrə â zuʼù ànwùə̀ nɨ Àzhwùə̀ a zə̀ nshwəŋə̀ ambo ɨ̀shwatə̀ ɨ̀poonə̀ pɨ Kristù!”