Read Pinyin Rèvə̀leshònə̀ 4 Bible Online

Rèvə̀leshònə̀ 4 - Pinyin bible

Rèvə̀leshònə̀ 4

¹Tsaʼnə mɨ̀nwùə̀ mə mɨ̀tsùmə̀ lə̀ làŋə̀nə, yɨ̀tse ndzə̀əmə̀ ɨ̀ lə̀ làŋə̀ a ɨ̀myə̂ mɨ̀ŋə̀ ǹdzəənə̀ ntswùə̀ ndâ ghù ghɨɨrə̀ a nɨ̀pwuurə̀. Ǹdzuʼù ngyə̀ nɨ ɨ̀ lə̀ pyə̀ mmə nshwəŋnə̀ ambo mɨ̀ŋə̀, ɨ̀ tswuə̀ tsaʼa ntàŋnə̀ nshwəŋə̀ ambo mɨ̀ŋə̀ lo, “Koʼò ntô a nɨ̀ghə̂ n̂nèrə̀ o nɨ mɨ̀nwùə̀ nɨ mɨ chyə̂nə a nɨ furə̀ tsaʼnə nkwùə̀ zə̀ ɨ̀ ghǎ làŋə̀.”

²Àzhwùə̀ Nẅùə̀ a lə̀ zùŋə̀ ntô aŋunə mɨ̀ŋə̀, ǹtyiʼə̀ ndzəənə̀ aləŋə nɨ̀fò nɨ ŋònə̀ ɨ̀tse à nwuunə̀nə aŋunə a nɨ̀pwuurə̀.

³Ɨ̀sɨghə̀ e ɨ tsìinə̀ tsaʼa mɨ̀ghòorə nɨ ndùnə̀ ɨ̀ghobə tsə̂nə pɨ mə nfuŋə̀ nɨ jaspà ghobə kànelyànə̀. Nkoŋə àlùmə̀ ɨ kamnə̀ aləŋə nɨ̀fò ghu. Nkoŋə àlùmə̀ wə̀ lə̀ mə ntsìinə̀ tsaʼa nɨ̀ghòorə nɨ pɨ pa nfuŋə̀ nɨ emeràdə̀.

⁴Pɨ̀tse ɨləŋə nɨ̀fò mɨ̀ghumə̀ mbaa ntsòbə̀ nɨ̀kwàa lə̀ kamnə̀ aləŋə ghu. Pɨ̀lɨ̀ŋmə̂ mɨ̀ghumə̀ mbaa ntsòbə̀ nɨ̀kwàa nwuunə̀ aŋunə ɨləŋə pɨ̀ghu. Pobə lə̀ ẅî ɨtsəʼə pɨ̀fuə ntuŋə̀ pɨ̀tɨ̀làarə̀ pɨ nɨ̀fò nɨ pɨ tsùŋə̀nə nɨ goldə̀ a àtwuə̀ pobə.

⁵Aŋunə aləŋə nɨ̀fò za, mbə̀ŋə̀ ɨ̀ lə̀ furə̀ aŋunə ŋŋwàŋə̀, nkwùrə̀ nkɨ mə nkəʼə̀ mɨ̀nẅùə. Mɨ̀nkàʼà sàmbaa lə̀ pə a mbyə̀ aləŋə nɨ̀fò za mmə nkɨrə̀. Mɨ̀nkàʼà ma sàmbaa lə̀ pə la ɨ̀zhwùə̀ Nẅùə̀ pa sàmbaa.

⁶Àzwuumə̀ àtse a lə̀ kɨ mbə a mbyə̀ aləŋə nɨ̀fò ghu nɨ a lə̀ pənə tsaʼa nchyə ghu nɨŋnə̀nə nɨ ɨ lə̀ pənə tsaʼa glasə̀ nɨ mbə̀ʼə pɨ zəənə̀ àzwuumə̀ nɨ a pənə amwuə zhyə̀ ndzùmə̀. Mɨ̀nyàamə̀ mɨ̀tse nɨ̀kwàa lə̀ kamnə̀ aləŋə nɨ̀fò za pɨ̀pàa nɨ̀kwàa mbə nɨ ɨ̀myə̂ aŋunə mbɨ̀ŋmə̀ ɨzobə ntsùmə̀ a mbyə̀ ghobə ndzùmə̀.

⁷Ntsàambyə̀ nyàamə̀ ghu ghùtse à lə̀ pə tsaʼa puʼmbyìinə̀, àpaatə̀ a pə tsaʼa nyàamə̀, nòmbàa pɨtarə a pə nɨ ɨ̀sɨghə̀ tsaʼa ɨ̀sɨghə̀ ŋwùə̀ mɨsoŋə, ndẅùə̀ndzùmə̀ a pə tsaʼa àzaamə̀ nɨ a mənə ntàarə̀.

⁸Mɨ̀nyàamə̀ mə nɨ̀kwàa lə̀ pə nɨ ɨ̀myə̂ mɨ̀noʼnə aŋunə pobə farə aŋunə mɨ̀pàrə̀ ɨ̀mobə. Pobə lə̀ mə ndzòbə̀ nchyə nɨ ɨ̀twuʼə̀ pobə njyə̂ tɨ zhwùutə̀. Pobə lə̀ mə ndzòbə̀ nshwəŋə̀ lo, “Ndòʼnə̀mbyə̂ Nẅùə̀ Àkoʼntsirə̀ à laanə̀, à laanə̀, à laanə̀ mbə ze wa nɨ à lə̀ pənə, nɨ à pənə, mbə ghǎ tô!”

⁹Mɨ̀nyàamə̀ mə nɨ̀kwàa lə̀ mə ndzòbə̀ mɨnchyə ambo ze wa nɨ à ŋaanə̀nə aŋunə aləŋə nɨ̀fò ngoŋə̀ nɨ nkuŋə̀ nɨ nkuŋə̀ la. Pobə lə̀ mə ndzòbə̀ ŋŋaŋə̀ nɨ̀linə̀ ɨ̀tse àtɨ̀ghə, nguʼtə̀ e nkɨ ŋŋâ a mɨyàa ambo ze.

¹⁰Tsaʼnə pɨ lə̀ mənə ndzòbə̀ la, pɨ̀lɨ̀ŋmə̂ pa mɨ̀ghumə̀ mbaa ntsòbə̀ nɨ̀kwàa lə̀ màʼà mbɨ̀ŋmə̀ ɨ̀zobə a ɨ̀shyə̂ a mbyə̀ ze wa nɨ à ŋaanə̀nə aŋunə aləŋə nɨ̀fò ngoŋə̀ nɨ nkuŋə̀ nɨ nkuŋə̀ la, nsəəkə̀ e. Pobə lə̀ tsoʼò pɨ̀tɨ̀làarə̀ pɨ nɨ̀fò ɨ̀pobə nnùŋə̀ a mbyə̀ aləŋə nɨ̀fò ghu ndzòbə̀ nshwəŋə̀ lo,

¹¹“Ndòʼnə̀mbyə̂ Nẅùə̀ ɨwəə, wə̀ kùʼnə̀ lo pɨ̀ ŋaŋə̀ o a àtɨ̀ghə nkɨ nguʼtə̀ o aŋunə ɨ̀tɨ̀ŋnə̀ o. Ntiinə wə̀ lə̀ tsùŋə̀nə àzwuumə̀ àtsùmə̀. Wə̀ lə̀ tsùŋə̀ a pèrə tsaʼnə wə̀ kòŋə̀nə, pèrə kɨ mmə nchyə̂.”