Read Pinyin Rèvə̀leshònə̀ 5 Bible Online

Rèvə̀leshònə̀ 5 - Pinyin bible

Rèvə̀leshònə̀ 5

¹Ndə̀ chi ndzəənə̀ nɨ̀pùʼu nɨ àŋwàʼnə̀ a àpô yè zɨghə̀nə ze wa nɨ à ŋaanə̀nə aŋunə aləŋə nɨ̀fò. Pɨ lə̀ ŋwàʼnə̀ aŋunə ndzùmə̀ ntsùmə̀ nkɨ nkarə̀ a zèrə mbaanə̀ a zèrə nɨ shwùurə̀ ɨlyiʼə sàmbaa.[1]

²Ǹchi ndzəənə̀ angèrə̀ nɨ à pənə nɨ mɨ̀tɨ̀ŋnə̀ a kyiinə̀ nɨ ngyə̀ ntɨ̀ŋnə̀ nshwəŋə̀ lo, “A ɨ̀wə̌ nɨ à kùʼnə̀nə a nɨ nyanə̀ ɨlyiʼə shwùurə̀ pə̀ sàmbaa nnyaʼkə̀ nɨ̀pùʼu nɨ àŋwàʼnə̀ tsə̀?”

³Ka ŋònə̀ ɨ̀tse a pə e ghu a nɨ̀pwuurə̀ kə̀ a àtwuə̀ ɨ̀shyə̂ kə̀ a ndzùmə ɨ̀shyə̂ nɨ mbə̀ʼə a nyaʼkə̀ kə̀ nnaŋə̀ a tsèrə.

⁴Ndə̀ yìi tə ngyìi ntiinə ka ŋònə̀ ɨ̀tse a lə̀ pə e ghu nɨ à lə̀ kùʼnə̀nə a nɨ nyaʼkə̀ nɨ̀pùʼu nɨ àŋwàʼnə̀ tsə̀ kə̀ nnaŋə̀.

⁵Taʼà ndɨ̀ŋmə̂ ɨ̀tse a shwəŋə̀ ambo mɨ̀ŋə̀ lo, “Kò wə̀ kɨ ngyìi. Zəənə̀, ze wa nɨ à pənə puʼmbyìinə̀ nɨ à furə̀nə amwuə àtsɨ̀ŋə̀ Judà, mbə ŋwùə̀ ngẅàrə̀ Dàfirə̀ à zòŋnə̀ mə ntsòo wa ndzɨghə̀. À kùʼnə̀ a nɨ nyanə̀ ɨlyiʼə shwùurə̀ pa sàmbaa nkɨ nyaʼkə̀ nɨ̀pùʼu nɨ àŋwàʼnə̀ tsa.”

⁶Ǹtyiʼə̀ ndzəənə̀ a mômbyə̂ ndzìrə̀ a təəmə̀ a tɨ̀tɨ̀rə̀ aləŋə nɨ̀fò. À lə̀ pə tsaʼa pɨ kyiimə̀ mə. Mɨ̀nyàamə̀ ma nɨ̀kwàa pobə pɨ̀lɨ̀ŋmə̂ pa kamnə̀ a zèrə. Mèrə lə̀ pə nɨ mɨ̀ndoŋə̀ sàmbaa ghobə ɨ̀myə̂ sàmbaa. Ɨ̀myə̂ ma sàmbaa lə̀ mə nnèrə̀ la ɨ̀zhwùə̀ Nẅùə̀ pa sàmbaa nɨ à tsàanə amwuə àtwuə̀ ɨ̀shyə̂ àtsùmə̀.

⁷Mômbyə̂ ndzìrə̀ wa a ghə̀ nkẅiirə̀ nɨ̀pùʼu nɨ àŋwàʼnə̀ tsa a àpô yè zɨghə̀nə ze wa nɨ à ŋaanə̀nə aŋunə aləŋə nɨ̀fò za.

⁸Nkwùə̀ nɨ à lə̀ kẅiirə̀nə, mbuurə̀ mɨ̀nyàamə̀ za nɨ̀kwàa pobə pɨ̀lɨ̀ŋmə̂ pa mɨ̀ghumə̀ mbaa ntsòbə̀ nɨ̀kwàa kunə̀ àkùbəkubə̀ a mbyə̀ mômbyə̂ ndzìrə̀ wa. Ŋwùə̀ ɨghobə moʼo moʼo a twuʼtə̀ nɨ̀lùŋə nɨ ngyə̂ pobə kumbù nɨ pɨ tsùŋə̀nə nɨ goldə̀ pèrə lẅenə̀ nɨ alyiinə. Alyiinə zə a lə̀ pə la ɨ̀chàʼtə̀ Nẅùə̀ pànə̀ pɨ Nẅùə̀.

⁹Pobə lə̀ zòbə̀ nchyə ghù shwuə̀ nshwəŋə̀ lo, “Wə̀ kùʼnə̀ a nɨ kẅiirə̀ nɨ̀pùʼu nɨ àŋwàʼnə̀ tsa lo nyantə̀ pɨ̀shwùurə̀. Wə̀ kùʼnə̀ ntiinə pɨ lə̀ zhwuutə̀nə o wə̀ kwɨghə̀ tsaʼa mômbyə̂ nɨ̀shwàʼà ndòo a àləəmə̀ o ntsuʼù ɨ̀twuə̀ pànə̀ pɨ mɨsoŋə ghu, ngɨ̀rə̀ pobə tyiʼə̀ pànə̀ pɨ Nẅùə̀. Pobə lə̀ furə̀ amwuə ɨ̀tsɨ̀ŋə̀ ɨ̀tsùmə̀, mmə nshwəŋnə̀ ɨ̀shwəŋnə̀ pɨ̀nyaanə, Pobə lə̀ furə̀ amwuə ɨ̀laʼà ɨ̀laʼà, mbə mbuurə̀ pànə̀ pɨ̀tsùmə̀ a àtwuə̀ ɨ̀shyə̂.

¹⁰Wə̀ shwatə̀ mə a ghobə ngɨ̀rə̀ pobə tyiʼə̀ mbə ngàŋə màʼà Nẅùə̀ a nɨ fàʼà ambo Nẅùə̀, mbə àtsɨ̀ŋə̀ nɨ̀fò nɨ a ghǎ puʼtə̀ àtwuə̀ ɨ̀shyə̂.”

¹¹Ǹchi nnaŋə̀ ndzuʼù ngyə̀ pəngèrə̀ pɨ̀noʼnə pɨ̀noʼnə nɨ mbə̀ʼə pɨ shaŋə̀ pɨ pə nkaamə̀ nkaamə̀ pobə ntswùʼə̀ ntswùʼə̀. Pobə lə̀ kamnə̀ alyiʼə nɨ aləŋə nɨ̀fò za ghobə mɨ̀nyàamə̀ nɨ pɨ̀lɨ̀ŋmə̂ pa lə̀ pənə ghu.

¹²Pobə lə̀ mmə nkyiinə̀ ndzòbə̀ lo, “Mômbyə̂ ndzìrə̀ wa nɨ pɨ lə̀ zhwuutə̀nə la, à kùʼnə̀ a nɨ pə nɨ ɨ̀tɨ̀ŋnə̀ ghobə nkabə̀, nɨ àzhìʼtə̀, nɨ mɨ̀tɨ̀ŋnə̀, nkùʼnə̀ lo pɨ̂ ŋâ e nɨ àghuʼtə̀ ŋŋaŋə̀ nɨ̀linə̀ ɨ̀tse a àtɨ̀ghə, ŋŋâ a mɨyàa e.”

¹³Ǹchi ndzuʼù tsaʼnə àzwuumə̀ àtsùmə̀ nɨ pɨ tsùŋə̀nə nɨ a pənə a nɨ̀pwuurə̀ ghobə zhyə̀ nɨ a pənə àtwuə̀ ɨ̀shyə̂ nɨ zhyə̀ nɨ a pənə a ndzùmə ɨ̀shyə̂, ghobə zhyə̀ nɨ a pənə amwuə nchyə ghu nɨŋnə̀nə ghobə àzwuumə̀ àtsùmə̀ nɨ a pənə amwuə, a mə ndzòbə̀ lo: “Mɨyàa ghobə àghuʼtə̀, nɨ nɨ̀linə̀ tsɨ̀ ẅùunə, nɨ mɨ̀tɨ̀ŋnə̀ pə ambo ze wa nɨ à ŋaanə̀nə aŋunə aləŋə nɨ̀fò pobə mômbyə̂ ndzìrə̀ wa, ngoŋə̀ nɨ nkuŋə̀ nɨ nkuŋə̀.”

¹⁴Mɨ̀nyàamə̀ ma nɨ̀kwàa shwəŋə̀ lo, “Amen!” Pɨ̀lɨ̀ŋmə̂ pa tyiʼə̀ nkunə̀ a ɨ̀shyə̂ àkùbəkubə̀ nsəəkə̀ a Nẅùə̀.