Read Pinyin Rèvə̀leshònə̀ 6 Bible Online

Rèvə̀leshònə̀ 6 - Pinyin bible

Rèvə̀leshònə̀ 6

¹Ǹtyiʼə̀ ndzəənə̀ a mômbyə̂ ndzìrə̀ wa a nyanə̀ a ntsàambyə̀ shwùurə̀ amwuə pɨ̀shwùurə̀ pa sàmbaa. Ǹdzuʼù ngyə̀ taʼà nyàamə̀ wa yɨ̀tse amwuə mɨ̀nyàamə̀ ma nɨ̀kwàa, ɨ̀ kyiinə̀ tsaʼa nɨ̀fàŋə̀ nshwəŋə̀ lo, “Tô!”

²Ǹtyiʼə̀ nnaŋə̀ ndzəənə̀ a ləəmə ghu fuə. Ŋònə̀ nɨ à pənə àtwuə̀ ẅèrə a twuʼtə̀ a àghòomə̀, pɨ tuŋə̀ ngùʼu e. À lə̀ pə ŋònə̀ nɨ à lə̀ mənə mmàʼà mɨ̀ntsòo ndzɨghə̀ nkɨ mə ndèrə̀ a nɨ ghə̀ ndzɨghə̀ ntsòo.

³Ndə̀ zəənə̀ a mômbyə̂ ndzìrə̀ wa a nyanə̀ àpaatə̀ shwùurə̀, ǹdzuʼù àpaatə̀ nyàamə̀ amwuə mɨ̀nyàamə̀ ma nɨ̀kwàa a shwəŋə̀ lo, “Tô!”

⁴Ghùtse ləəmə a furə̀ a mbyə̀ mɨ̀ŋə̀ mbàŋə̀ nɨ bumə̀. Pɨ lə̀ ŋâ a ŋònə̀ nɨ à lə̀ pənə àtwuə̀ ləəmə ghu nɨ ɨ̀tɨ̀ŋnə̀ lo â fuukə̀ àporə̀porə̀ amwuə àtwuə̀ ɨ̀shyə̂, njiilo pànə̀ pɨ mɨsoŋə zhwuutə̀ a pyə̀. Pɨ lə̀ kɨ ŋŋâ e nɨ maa ɨ̀nẅùə ntsòo.

⁵Mômbyə̂ ndzìrə̀ wa à lə̀ chi nnyanə̀ a shwùurə̀ wa nɨ à pənə nòmbàa pɨtarə, ǹdzuʼù nyàamə̀ nɨ à pənə nòmbàa pɨtarə amwuə mɨ̀nyàamə̀ ma nɨ̀kwàa, a shwəŋə̀ lo, “Tô!” Ǹtyiʼə̀ nnaŋə̀ ndzəənə̀ a ləəmə ghù shyə a mbyə̀ mɨ̀ŋə̀. Ŋònə̀ nɨ à pənə àtwuə̀ ẅèrə a twuʼtə̀ a kilù a àpô ze.

⁶Ǹdzuʼù ngyə̀ ɨ̀ pə tsaʼa ngyə̀ nɨ ɨ̀ furə̀nə a tɨ̀tɨ̀rə̀ mɨ̀nyàamə̀ ma nɨ̀kwàa nshwəŋə̀ lo, “Mbə̀ʼə taʼà kumbù àpaanə̀ nkẅùə̀ a twuə̀ àfàʼà taʼà njyə̂, pɨ̀kumbù pɨ àpaanə̀ nkẅùə̀ mɨ̀sàŋə pɨtarə kɨ ntwuə̀ àfàʼà taʼà njyə̂. La kò nɨ̀ tsə̀ŋə̀ a wɨghə mɨ̀ghurə̀ pobə mɨ̀lùʼù.”

⁷Nkwùə̀ nɨ mômbyə̂ ndzìrə̀ wa à lə̀ chinə nnyanə̀ a shwùurə̀ nɨ à pənə nòmbàa nɨ̀kwàa, ǹdzuʼù ngyə̀ nyàamə̀ nɨ à pənə nòmbàa nɨ̀kwàa ɨ̀ shwəŋə̀ lo, “Tô!”

⁸Ǹnaŋə̀ ndzəənə̀ a ləəmə nɨ à zwuumə̀nə a mbyə̀ mɨ̀ŋə̀. Pɨ mə nfuŋə̀ a ŋònə̀ nɨ à pənə àtwuə̀ nɨ Nɨ̀wɨghə̀. Àlaʼà pɨ̀kwuə̀ a lə̀ mə ndzùŋə̀ e a ndzùmə̀. Pɨ ghàpə̀ àtwuə̀ ɨ̀shyə̂ aŋunə ɨlyiʼə nɨ̀kwàa, ŋŋâ a e nɨ ɨ̀tɨ̀ŋnə̀ lo â puʼtə̀ a taʼà alyiʼə. Pɨ lə̀ shwəŋə̀ lo â zhwuutə̀ pànə̀ nɨ pobə pənə amwuə taʼà alyiʼə ghu nɨ ɨ̀nẅùə ntsòo ghobə ndzàŋə̀, nɨ mɨghoonə mɨ tɨ̀pòŋə̀ nɨ mɨ ma nzhwuutə̀ pànə̀ pɨ̀noʼnə, nkɨ nzhwuutə̀ a ghobə nɨ mɨ̀nyàamə̀ mɨ tsə̂nə.

⁹Mômbyə̂ ndzìrə̀ wa a tyiʼə̀ nnyaʼkə̀ a shwùurə̀ nòmbàa pɨtaanə̀. Ǹtyiʼə̀ ndzəənə̀ ɨ̀zhwùə̀ pànə̀ nɨ pɨ lə̀ zhwuutə̀nə a ghobə ntiinə pobə lə̀ mənə nchwìitə̀ ntwuumə̀ Nẅùə̀ farə ntiinə pobə lə̀ təəmə̀nə ntɨ̀ŋnə̀ aŋunə nɨ̀chwìitə̀ àshwəŋnə̀ Nẅùə̀ a ɨ̀sùmə alyiʼə mɨ̀shwàʼà.

¹⁰Ɨ̀zhwùə̀ pə̀ lə̀ kyiinə̀ nɨ ngyə̀ ntɨ̀ŋnə̀ nshwəŋə̀ lo, “Mbuʼtə̀ Mbyə̂ Ndòʼnə̀mbyə̂, ghò wa nɨ wə̀ laanə̀nə ntsàarə̀ a ŋwùə̀ ntsùmə̀ nkɨ mmə nshwəŋə̀ a nkǔŋə nkuŋə! Wə̌ pyabə̀ tə pyàa nkwùə̀ àkə pòŋə̀ tsoʼtə̀ ɨ̀sàʼa pànə̀ pɨ àtwuə̀ ɨ̀shyə̂ chyâ ngəʼə̀ aŋunə pobə ntiinə pobə lə̀ kẅìrə̀nə àləəmə̀ àzəə?”

¹¹Pɨ tyiʼə̀ ŋŋâ a ŋwùə̀ ɨghobə moʼo moʼo nɨ gàanə̀ yɨ̀ fuə, nshwəŋə̀ ambo pobə lo pobə̂ nyaʼa mbyabə̀ aŋunə mətùmə nkwùə̀ tə mbyàa nkwùə̀ nɨ pɨ zhwuutə̀ mə ndùnə̀ pɨlyimə ɨ̀pobə nɨ pobə pɨ pobə lə̀ mənə nfàʼà nɨ pɨlyimə ɨ̀pobə a ndzùmə̀ Kristù ndùnə̀ ɨ̀ghobə ɨ kùʼù tsaʼnə pɨ lə̀ kɨnə nzhwuutə̀ a ghobə.

¹²Ndə̀ zəənə̀ a mômbyə̂ ndzìrə̀ wa a nyanə̀ a shwùurə̀ nɨ à pənə nòmbàa ntuurə̀. Ɨ̀shyə̂ ɨ̀ tyiʼə̀ nnə̀ʼnə̀ nɨ ɨ̀tɨ̀ŋnə̀. Nẅùumə̀ a pə̀ŋə̀ nsinə̀ tsaʼa àlùŋə̀ nɨ̀wɨghə̀ nɨ pɨ tsùŋə̀nə nɨ mɨ̀nyùŋə̀ mɨ mbyə̂. Məŋwɨgrə̀ ntsùmə̀ a pə̀ŋə̀ mbàŋə̀ tsaʼa àləəmə̀.

¹³Pɨsaŋə furə̀ a nɨ̀pwuurə̀ nkẅìnə̀ a ɨ̀shyə̂ tsaʼa mɨ̀ntàamə mɨ àtɨ̀ghə mɨ porə̀ nɨ fèrə̀ ghù ntɨ̀ŋnə̀ à làŋə̀nə nchyìʼə̀ àtɨ̀ghə ghu, mɨ kẅìnə̀.

¹⁴Nɨ̀pwuurə̀ pî tsaʼa nɨ̀pùʼu nɨ àŋwàʼnə̀ nɨ pɨ karə̀nə. Mɨ̀mbarə̀ mɨ̀tsùmə̀ pobə ɨlyiʼə ɨ̀shyə̂ ɨ̀tsùmə̀ nɨ nchyə kamnə̀nə kẅebə̀ ɨlyiʼə ɨ̀pobə.

¹⁵Nkwùə̀ ghu, pɨ̀fò pɨ a àtwuə̀ ɨ̀shyə̂ ghə, nɨ ɨ̀twuə̀ pɨ̀soyì, nɨ ngàŋə nkabə̀, pobə ngàŋə mɨ̀tɨ̀ŋnə̀, nɨ ɨ̀pùʼù pobə pànə̀ nɨ ka pobə pə ghobə ɨ̀pùʼù lə̀ kɨ̀ɨrə̀ ndə̀əmə̀ amwuə mɨ̀mbwùʼə̀ pobə mɨ̀sùmə mɨ mɨ̀ghòorə a mbɨ̀ŋmə̀ mɨ̀mbarə̀.

¹⁶Pobə lə̀ mə nkoʼò mɨ̀mbarə̀ ghobə mɨ̀ghòorə ntyiʼə̀ nshwəŋə̀ lo, “Nɨ̀ kunə̀ aŋunə pəə nkẅupə̀ a wəə ngɨ̀rə̀ lo kò ŋònə̀ nɨ à ŋaanə̀nə aŋunə aləŋə nɨ̀fò a zəənə̀ e a wəə nkɨ ngɨ̀rə̀ lo kò àzaŋə̀ ntɨŋmə̀ Mômbyə̂ Ndzìrə̀ wa a kunə̀ aŋunə pəə.

¹⁷Mbə̀ʼnə, ngotə njyə̂ àzaŋə̀ ntɨŋmə̀ ɨzobə za ɨ̀ tô mə. Ka ŋònə̀ nɨ mbə̀ʼə a zòŋnə̀ a zèrə.”