Read Pinyin Rèvə̀leshònə̀ 7 Bible Online

Rèvə̀leshònə̀ 7 - Pinyin bible

Rèvə̀leshònə̀ 7

¹Ànwùə̀ zə̀ a lə̀ kɨ làŋə̀, ǹdzəənə̀ pəngèrə̀ nɨ̀kwàa pèrə təəmə̀ aŋunə mɨ̀lẅuə̀ mɨ àtwuə̀ ɨ̀shyə̂ nɨ̀kwàa. Pəngèrə̀ pə̀ lə̀ mə nnàanə̀ a fèrə̀ nɨ à furə̀nə amwuə pɨ̀pàa pə̀ nɨ̀kwàa lo kò a làŋə̀ e a àtwuə̀ ɨ̀shyə̂ ghə̀ kə̀ àtwuə̀ nchyə ghu nɨŋnə̀nə kə̀ aŋunə àtɨ̀ghə àtse.

²Ǹchi ndzəənə̀ a angèrə̀ wa yɨ̀tse a furə̀ a pàa saʼà nẅùumə̀ mmə ntô nɨ àlènə̀ Nẅùə̀ wa nɨ à pənə ghù ntɨ̀ŋnə̀ la. Angèrə̀ wə̀ à lə̀ mə nfuŋə̀ a pyə̀ pəngèrə̀ pa nɨ̀kwàa nɨ ngyə̀ ntɨ̀ŋnə̀. Lə̌ pəngèrə̀ pa nɨ̀kwàa nɨ pɨ lə̀ ŋânə a ghobə nɨ ɨ̀tɨ̀ŋnə̀ lo pobə̂ tsə̀ŋə̀ àtwuə̀ ɨ̀shyə̂ pobə nchyə ghu nɨŋnə̀nə. Angèrə̀ wa a shwəŋə̀ ambo pəngèrə̀ pa nɨ̀kwàa lo,

³“Kò nɨ̀ tsə̀ŋə̀ a wɨghə àtwuə̀ ɨ̀shyə̂ kə̀ nchyə ghu nɨŋnə̀nə kə̀ mɨ̀tɨ̀ghə tə mbyàa nkwùə̀ nɨ pə̀ənə̀ chyânə àlènə̀ aŋunə mɨ̀zènə mɨ ngàŋə àfàʼà Nẅùə̀ ɨ̀wəənə̀.”

⁴Ndə̀ tyiʼə̀ ndzuʼù ndùnə̀ pànə̀ nɨ pɨ chyânə àlènə̀ aŋunə mɨ̀zènə ɨ̀mobə. Pobə lə̀ pə pànə̀ nkaamə̀ nkɨrə nɨ mɨ̀ghumə̀ nɨ̀kwàa ntsòbə̀ nɨ̀kwàa. Pànə̀ pə̀ lə̀ pə pànə̀ nɨ pɨ furə̀nə amwuə ɨ̀tsɨ̀ŋə̀ Israel pa ntsòbə̀ ɨpaa.

⁵Pànə̀ nɨ pɨ lə̀ chyânə àlènə̀ a mɨ̀zènə pobə lə̀ furə̀ amwuə àtsɨ̀ŋə̀ Judà nkaamə̀ ntsòbə̀ ɨpaa, nfurə̀ amwuə àtsɨ̀ŋə̀ Rubènə̀ nkaamə̀ ntsòbə̀ ɨpaa, nkɨ nfurə̀ amwuə àtsɨ̀ŋə̀ Gadə̀ nkaamə̀ ntsòbə̀ ɨpaa,

⁶nfurə̀ amwuə àtsɨ̀ŋə̀ Ashà nkaamə̀ ntsòbə̀ ɨpaa, nfurə̀ amwuə àtsɨ̀ŋə̀ Naftalì nkaamə̀ ntsòbə̀ ɨpaa, nkɨ nfurə̀ amwuə àtsɨ̀ŋə̀ Manasè nkaamə̀ ntsòbə̀ ɨpaa,

⁷nfurə̀ amwuə àtsɨ̀ŋə̀ Simyònə̀ nkaamə̀ ntsòbə̀ ɨpaa, nfurə̀ amwuə àtsɨ̀ŋə̀ Levì nkaamə̀ ntsòbə̀ ɨpaa, nkɨ nfurə̀ amwuə àtsɨ̀ŋə̀ Isàkà nkaamə̀ ntsòbə̀ ɨpaa.

⁸Pɨ lə̀ furə̀ amwuə àtsɨ̀ŋə̀ Zebulùnə̀ nkaamə̀ ntsòbə̀ ɨpaa, nfurə̀ amwuə àtsɨ̀ŋə̀ Jòsebə̀ nkaamə̀ ntsòbə̀ ɨpaa, nkɨ nfurə̀ amwuə àtsɨ̀ŋə̀ Benjàminə̀ nkaamə̀ ntsòbə̀ ɨpaa.

⁹Tsaʼnə zə̀ ànwùə̀ a lə̀ làŋə̀nə, ǹnaŋə̀ ndzəənə̀ àpùŋə̀ pə̀ənə̀ pɨ̀noʼnə. Pobə lə̀ noʼò tɨsɨŋnə amwuə ndwuumə̀ nɨ mbə̀ʼə ka ŋwùə̀ a shaŋə̀ e. Pobə lə̀ furə̀ amwuə ɨ̀laʼà ɨ̀laʼà, nfurə̀ amwuə ɨ̀tsɨ̀ŋə̀ ɨ̀tsùmə̀. Pobə lə̀ pə mbuurə̀ pànə̀ pɨ̀tsùmə̀, nkɨ mmə nshwəŋnə̀ ɨ̀shwəŋnə̀ chwìi chwìi. Pobə lə̀ təəmə̀ a mbyə̀ aləŋə nɨ̀fò za pobə mômbyə̂ ndzìrə̀ wa. Pobə lə̀ ẅî pɨ̀gàanə̀ pɨ̀fuə ntwuʼtə̀ ɨ̀zaŋə̀ a mbô pobə.

¹⁰Pobə lə̀ mə nkyiinə̀ nɨ ngyə̀ ntɨ̀ŋnə̀ nshwəŋə̀ lo, “Nɨ̀chwarə̀ pə̀ənə̀ à furə̀ la ambo Nẅùə̀ ɨ̀wəənə̀, Nẅùə̀ wa nɨ à ŋaanə̀nə aŋunə aləŋə nɨ̀fò, pobə mômbyə̂ ndzìrə̀ wa.”

¹¹Pəngèrə̀ pa pɨ̀tsùmə̀, pobə pɨ̀lɨ̀ŋmə̂ pa nɨ mɨ̀nyàamə̀ ma nɨ̀kwàa, lə̀ təəmə̀ nkamnə̀ aləŋə nɨ̀fò za. Pobə pɨ̀tsùmə̀ lə̀ kunə̀ a ɨ̀shyə̂ a mbyə̀ aləŋə nɨ̀fò za àkùbəkubə̀ mmə nsəəkə̀ a Nẅùə̀.

¹²Pobə lə̀ mə nshwəŋə̀ lo, “Amen! Mborə̀, nɨ nɨ̀linə̀ tsɨ̀ ẅùunə, nɨ àzhìʼtə̀, nɨ mɨyàa, nɨ àghuʼtə̀, nɨ ɨ̀tɨ̀ŋnə̀ pobə mɨ̀tɨ̀ŋnə̀ pə ambo Nẅùə̀ ɨ̀wə̀ənə̀ ngoŋə̀ nɨ nkuŋə̀ nɨ nkuŋə̀. Amen!”

¹³Taʼà ndɨ̀ŋmə̂ wa yɨ̀tse a pyiitə̀ ambo mɨ̀ŋə̀ lo, “Pànə̀ pə̀ nɨ pɨ ẅînə pɨ̀gàanə̀ pɨ̀fuə lə a pɨ̀wə̌, nfurə̀ la ɨghə?”

¹⁴Ǹkẅùə̀ ambo ze lo, “Tǎ, wə̀ zhyə̂.” A shwəŋə̀ ambo mɨ̀ŋə̀ lo, “A pànə̀ pa nɨ pɨ làŋə̀ mə amwuə ngəʼə̀ yɨ̀ ntɨ̀ŋnə̀ za. Pobə sùu mə pɨ̀gàanə̀ ɨ̀pobə amwuə àləəmə̀ mômbyə̂ ndzìrə̀ wa ngɨ̀rə̀ pèrə tyiʼə̀ pɨ̀fuə

¹⁵Lə̌ ɨ̀sùmə nɨ pobə təəmə̀nə a mbyə̀ aləŋə nɨ̀fò Nẅùə̀ mmə nsəəkə̀ nɨ njyə̂ pobə ɨ̀twuʼə̀ amwuə Ndâ Mɨ̀shwàʼà Nẅùə̀ e. Ze wa nɨ à ŋaanə̀nə aŋunə aləŋə nɨ̀fò za la, ǎ tyiʼə̀ pə ghu nkwùə̀ ɨ̀tsùmə̀ a nɨ naŋə̀ a ghobə.

¹⁶Ka njyə̀ ɨ̀ pə ghǎ chi zaŋə̀ e a ghobə, njyə̀ nchyə ɨ̂ chi ndzaŋə̀ e a ghobə apə̀. Ka nẅùumə̀ pobə ɨlyiʼə pɨ lwùumə̀ pə ghǎ chi tòonə̀ e a ghobə.

¹⁷Mbə̀ʼnə mômbyə̂ ndzìrə̀ wa nɨ à pənə a tɨ̀tɨ̀rə̀ aləŋə nɨ̀fò za à ghǎ mə pyamnə̀ a ghobə. Ǎ lòo a ghobə ghə̀ chàanə̀ aŋunə pɨ̀nɨ̀mwurə̀ ɨ̀shyə̂ nɨ pèrə pa ŋŋâ a nɨ̀chyə̂mbyə̂. Nẅùə̀ à ghǎ zə̀ə nchyə ɨ̀myə̂ ɨ̀tsùmə̀ a ɨ̀myə̂ pobə.”